2 Corinthians 1

Paulo' Aza Izesu' Evenele No'noho' Ize-ngedo Lo-ngimine' Gamazi

Izesu' Kilisito' aposolo mineline lo O'moso'mo ei' lulolo' nele'mize molave Paulo' naza leze zuho Timoteokisi maka' mino O'moso'mi evenele zuho Kolidi ebeku' mulise milaa' nave lengikisi ido' Akaia misubo linge mukiku' O'moso'mi evenele mini'mi monani' lengikisi nene luhuvo nite' mene nogize-lingiduze. Ningilo. Ido' meteho O'moso ido' Guvelesi ve Izesu' Kilisito' engitati' nasahili' ido' hongu lo lamino minaa' monovo nene lengita mine do vo minivoo.

O'moso'mo Do Lu' Izaa' Ine' Monovo Lo Soto' Ogo A'minemu' Paulo' O'moso Opo'ni Line' Gamazi

Guvetesi ve Izesu' Kilisito' ei' O'moso've mino ei' meleho minive nene opo'ni lolone. Aza nene mulumote gelaa' monovoli'mi meleho mino hize ele' oga' monovo muki' do soto' o-ledaa' neine' O'moso nene neive. O'moso naza hize ele' okuvo ingine a'mine'mine igi evene' ma ne'mine mana'mine geni gihilizani' nene hize ele' i-ngidilizado' lisihe' i minilizangumu' ve lo aza nene genite vaiku' hize ele' o-ledaa' neive. Ido' ne'mine noluvoni' nene nemu' noluve. Laza nene Kilisito' mulumo gilidi'mine ogo mulumo vauve elo gelaa' noune'za a'mingu' nene O'moso'mo Kilisito'nimu' ve lo hize ele' nesi vauve elo o-ledaa' neive. Laza mulumo gono nodune' nene O'moso'mo lengi' hize ele' o-lengedo do lungu' izelingumu' ve losa nene nodune. Ido' O'moso'mo leli' hize ele' o-lede neine' ne'mo nene lengi' hize ele' o-lengedelingumu' ve lo hize ele' o-lede neive. Laza mulumo gono nodunidi'mine igi linginesi nene mulumo gono di ha gihi di dizi minilizani' ne'mo nene O'moso'mo a'mine'mine ogo hize ele' o-lengedeleseive. Ido' leze mulumo gono dunidi'mine igi linginesi nene nidaze. Nemu' nene O'moso'mo leli' hize ele' o-ledaa' neidi'mine ogo lengikisi nene a'mine'mine ogo hize ele' o-lengedeleseive lo gelosa lengikumu' nene monoku' ele'vole' igi minilisave lo gele none' nene mo gele ele'vole' o none.

Neze zuhokizo, Asia misubou' geni initeli'mi lulou' minune' nemu' nene lo-lengemamuvo lingine gilami minilizani' nene edamoloseive lo gelosa mene nolo-lingimuve. Laza nene a'mine geni leli' okodela soto' ine' nene atoli'mine geni mo ngelo gehamolonido' o minine' geni soto' o-ledavo ne'mo leli' nene gohi minevo' alevo' amolobe lo gate muki' goloso gelo golise gilune. Ee, luteu' neve nene mo helaato' lele'mize milikeni' neive losa gele minune. Ne'mine inite' soto' o-lidine' nene laza lelito' gele medelo mino minamo asi hilanguti' do ote-ngedaa' ive O'mosolo' nene lehete o mineloningumu' nene soto' o-lidine' ve. 10 Ido' monovo goloso gehepeve ato ato' i-lidilisa ani' ne'mo nene hilunidine'za O'moso ne'mo nene mo do lu' ize'mo vo minine' ve. Ido' aza gohi do lu' izelido' o neive. Ee, linginesi nene lelikumu' O'mosola li hize ele' i-lidi nizavo aza nene gohi do lu' izeleseive losa eito' gele mu'musi' ogo none. Ne'mine ogosa ezela evene' mukilite lelikumu' lilizani' nene gelosa mangi o-ledo lukuvo lemeline' nene evene' muki' ingine O'mosola nene leli' ne'mine o-ledeline' nemu' nene opo'ni lilisave.

Paulo' Engita Volove Loko Vamine' Monovo Lo-ngimine' Gamazi

12 Ido' ne'mine noluvoni' nene nemu' noluve: Leli' luteu' nene ti' lo gele ele'vole' ogo none: Me misubou' aleveti vovo'ningu' ogo molo une' nene me misubou' aleve gilavo otohato monovo ve laa' nani' monovolo' nene e'metamo asi O'moso'mi nasahili've ne'mo hize ele' o-ledo neivo monovote nene do zovo' zava' izo soza nite' amo O'moso'mo gilivo lisihe' iline' initekovo' nene ogo molo minune' ve. Ido' lengita nene a'mine monovolo' nene e'mete gehepeve ogo ogo molo minune' ve. Ido' luteu' nene ne'mine lo gele ele'vole' ogo minaa' noune' nenako leli' monovotemu' nene lolize izaa' noune. 13 Ido' monovote nene zovo' zava' izo soza saza inite' osa'mune lo luvoni' gamazi mene mo laminetokovo' noluvoni' nene luhuvo nite' meneloti' nene ningi gililisave. Naza gamazi gizaa' nouvoni' nene suno' gamazi gizamo asi soto' ogo minine' gamazi lingine ha gati gili guni ilizado' o minine' gamazivo' nene gizaa' nouve. Leli' monovote lingela nene lingine mo gili guni i nizave. Ido' monovote lingela lingine gili guni ani' ne'mino nene lelikumu' gili guni igi osu' lisa lelikumu' ti' li gililizaho lo gele minaa' noune: Ado' Guvetesi ve Izesu' Kilisito' aline' gamene nabala nene Paulole lelikumu' ngolize izaa' naani' ne'mine ogo laza Paulonginemu' lolize izelonido' o none li gililizaho lo gele minaa' noune.

15 Ido' lingine nenikumu' nene mo lamine' gililisave lo naza gele mu'musi' o mino gomu' nene naza gamene sita' lengita vokuvo lingine gamene sita' muludingu' lamine' gililizave lo gelo 16 Makedonia misubou' volodo' nene lengitasi voosa alodokisi nene gohi lengita ogo ninge-lengedekuvosa nene lingine Zudaia misubou' voloni' aka'ne vili-nidisa nimiselilizave lo giluvoni' ve. 17 Ne'mine lo gelosa lengita amuvoni' nene naza gamazi do senisi senisi ogo laa' uve nouvodi'mo nehe. Naza oloni' initekumu' ga'ne gelo do lisihe' oga' nouvongu' nene me misubou' aleve vai' iga' adi'mine ogo oo, ne'mine ha olodo' nouve nolo a'midokisi o've, mo amolosuve lo laa' nouhe. O'ove, mo ne'mine osa'muve. 18 O'moso eikumu' nene evene' muki' gele mu'musi' olonido' lisihe' o neine' nenako nemu' nene lingine lelikumu' nene gili mu'musi' ilizado' o neive. Laza lo-lengemaa' noune' gamazi nene senisimi senisimi osa'mune. Oo laa' nouningu' o'ove haleko minaa' neine' ne'mino haleko neivosa nene ma losa'mune. 19 Naza lamineto' noluve. Laza Siluvanolesi Timoteolesi lo soto' o-lingimunive O'moso'mi gipele Izesu' Kilisito' ei' nene oo lingu' o'ove nene a'mingu' minamivo gamazi laa' ive nene neive. Aza oo line' inite' nene mo gihile izaakovo' oga' neive. 20 Ee, aza nene O'moso'mo salani gamazi lo hukaa' neido' nene oo lo do gihilevo' izaa' ive nene neive. Nemu' nene a'mine O'moso'mi gamazi gelosa O'moso opo'ni nolo lamine' ele'vole' gamazi ve laa' noune' nene ei' Izesu' Kilisito'nimu' ve losa nene lamine' ve laa' noune. 21 Ido' Kilisitoda gi'mize gili' lo mineloningumu' lezesi lengikisi hize ele' oga' ive nene O'moso ei' nene neive. Aza nene ei' gonolo' lele'mize molani' ve. 22 Ido' lele'mize nomolo ei' ve lo noso molo-ledo salani molo-lidine' inite' muki' nene damolosune li gilikelizave lo a'minguti' ma gana' dalonido' o minine' inite' ei' Sikalahu've nene luteu' lehize-ledavo neive.

23 Naza Kolidi ebetida vamuvoni' nene naza ma voloni' nene geni gono gehe-lengedekuvo okodido' gilikelizave losa nene do lungu' izosa vamuve. Nene mo lamineto' noluve. Soza nololoni' nene lu'neu' ninge osu' lo neive O'moso ne'mo nene lo soto' ilive losa ezela nene noluve. 24 Lingine gamazi gihile gili ele'vole' igi monoku' mini gili' li nizani' nenako nemu' gizebo amuzo molo o-lengedo mino ne'mine mana'minemu' gili ele'vole' ilizave lolosa gelamune'za haza lingine muludingu' lamine' gili minilizangumu' lengele'mize lamine' olosa nene lengikisi maka' gono nodune.

Copyright information for `ASO