2 Corinthians 10

Evene' Malite Paulo'ni Di Limi-di Lani' Gamazilo' Nene Aza Do Velepe' Izo Ei' Monovo've Hize Ele' Ogo Line' Gamazi

Neni' Paulo' nene Kilisito' aza hongu lo muluno laminekisi minine' mamu' nene gele mino agae lo gatine do gamazi ma lo-lengemelove. Ee, lingine linge malite nenikumu' nene leli' vovoteu' mino gamazi amuzo molo lo-lemelido' minamo honguvo' lo minaa' neiha vo mala mino luhuvo gize-lidingu' nene gasava ve ne'mine lolo' ogo mino olo' lo vine' gamazivo' laa' neive li li-nidaa' ave neni' nene agae lo ti' lo nolo-lingimuve: Neni' monovo'nemu' giluvoni' nene naza nehelele izamivo mino ve linge ma lelikumu' nene ha me misubou' veliti monovolokovo' e'metaa' nave li li-lidaa' ave nene ha do lisihe' o-ngedelodo' o nouve lo gele nouve. Ne'mino nouvoni' nenako lengita ogo gasava ve ne'mine mino amuzo molo-lengedaaloze. Ne'mine olodo' o minine' gamazi nene mo hulilo. Lamine' laza nene mo ha misubou' ve none'za monoli'mi lovou' lovo oga' noune' nene me misubou' vete iga' ado' do molo lovo osa'mune. Nene nanitekumu' ve. Laza lovo oga' noune' inite' nene me misubou' initedunu' lovo amo asi O'moso'mi amuzosi minine' inite' ado' biluva' alete molo-ngedeline' gamazi'ine nene hupu' ize hulilido' o minine' amuzo nene do none. Ee, gamazi'ine bele hulo ido' O'moso'mi monovomu' ningi gililizani' aka hize tilaa' neine' amuzo malehe gamazi'ine naba nesi nene ha belo do'mo lemaa' noune. Ido' evenelite ga'ine gilaa' inite'ine muki' nesi nene doosa a'mine ga'ine gilaa' inite'ine nene Kilisitoda do gelekele' o-ngedaa' noune. Ido' ingine nene mudise lelito' gelelekele' gehepeve ikevo ma laza nene evene' linge ma gamazi gili hulika' hulika' ado' ado' nene golo hizo lihime ngemeloningumu' nene mo do va'va' ogo none.

Lengi' vetido' soto' mene soto' o neine' inite' nene ningahe ningamave. Alo' ningilo. Evene' ma zaho nolihe aza eikumu' nene naza Kilisito' evenele nouve lo gele ele'vole' o minelive ne'mo lelikumukisi nene naza Kilisito' evenele nouvoni' ne'mino inginesi nene Kilisito' evenele nizave lo gele minelido' o neive. Ido' Kilisito' evenele nouve lo noluvodo' nene imine' moloo loloni' votigile ivile' ivosa Guvelesi ve'mo nimine' amuzo nene do naba ma oloni' nemukisi nene novozo ma helamolosuve. A'mine amuzo Guvelesi ve'mo nimine' nene do goloso o-lengedelongumu' nene nimivoba asi monoku' hize ele' o-lengedelongumu' nene nimine' ve. Ee, Guvelesi ve'mo nimine' amuzo nene novozo helamo ha do naba oloni'za naza luhuvo nite' gize-lengedaa' nouvongu' nene golise lengemeline' gamazivo' gizaa' nouvoni' gelalive losa nemu' nene gele nouve. 10 Nene evene' linge nete ti' li laa' nangumu' nene noluve: Aza luhuvo gizeline' nene amuzo malehe gamazi genivesi gamazi gizaa' neiha ei' omo neivo ningelone' nene oko'no gilizevo o vine' mino gamazi've line' nesi nene amuzo'vesi nomine' gamazi laa' neive laa' nave. 11 Ne'mine li laa' ave nene ti' li gili minilizave: Lengikisi maka' minamo luhuvo nite' gizeso' nene a'mine luhuvo niteku' gamazi amuzo molo gize nolone' ne'minosa laza linginela ogo hetelo ogo molo olone' nene a'mine luhuvo niteku' lolone' ne'mino gehepeve ogo molo olosune.

12 Lengita minave linge nete nene engi' oko'ine di dizi dizi' igi evene' ma ne none laa' nave. Laza engikisi lelikisi nene do milise' ogo ningo engito' lisihe' o none lo mo keke' lamolosune. Engikumu' nene lehelele izamine'za ingine nene engi' monovo ize' mili ningaa' nani' nene O'moso'mo line' gamazisi di milise' igi ningami angise'ine gilaa' nani' gamazisi nene di milise' igi ningi ize' mili mo evene' naba none li negi suno daa' nanako nemu' nene laza engito' lisihe' o none lamolosune. 13 Leli' monovotemu' do naba olone' nene lisihe' o neine' votigile nene ivile' ogo gohi ma do naba amolosune. Ido' leli' gono dalonido' nene O'moso'mo asi've laka'ni molo-lede neive. A'mine laka'nitelokovo' mino gono daa' noune' neemukovo' nene do naba ogo lolosune. Ido' lengita vo gono dune' ma nene a'mine O'moso'mo laka'ni molo-lidine' nene mo a'midasi vo do neivosa nene dune. 14 Ee, laza lengita ogo Kilisito' gamazi lamine' leli' neve gana' api' ogo lo-lingimune' nenako nemu' nene lengita gono dune' nene do naba oloningumu' O'moso'mo molo-lede neine' votigile nene ivile' amolosune. 15 Evene' atolite dani' gonomu' nene leli' okode do dizo O'moso'mo molo-lede neine' votigile nene ivile' amolosuune'za laza lengikumu' nene ti' lo gele mu'musi' o none: Lingine O'mosomu' gili ele'vole' ani' nene mo amuzo molo'mo vo neivo leli' gonote ne'mo lengita nene vauve elo vo naba ilive. 16 Ne'mine ogavo lengi' mehedida minine' misubolasi nene vo evene' gohi masi nene Kilisito' gamazi've lamine' nene lo-ngemelesune. Ne'mine olosune'za laza evene' malite vi gono dikengu' nene vo gono damolosune. Ido' evene' malite gono dangumu' leli' okode nene do dizamolosune. 17 Nemu' mono' godolou' ti' li gizi nizani' ma neive: Ve ma aza ei' oko'nomu' olize noizeline' ne alamo Guvelesi ve neemukovo' nene olize izelive. 18 Mene noluvoni' nene nemu' noluve: Evene' gihile minelive nene ei' oko'no do dizaa' ive minelivoba asi Guvelesi ve'mo do naba o-dive ne'mo nene evene' gihile mineleseive.

Copyright information for `ASO