2 Corinthians 12

O'moso'mo Okulumoku' Monovo Lamine' Atoli'mine Nene Paulo'ni Elebizine' Nenako Ne'mo Ei' Nene Evene' Naba Gehesalive Lo Do Leme-delingumu' Nene Oko'nola Geni Mulumo Inite' Gehe-dine' Nemu' Line' Gamazi

Lelikumu' do naba oga' ne'mo nene evene' hize ele' o-ledesa'mine'za nenikumu' do naba ogo lamo mineloni' aka nene ma nominako nemu' nene neni' monovo'nemu' do naba ogo lolosuha a'mingu' nene Guvelesi ve'mo do soto' o-nedavo inite' ato ato' ve'nelo' o molangumukisi ido' atoli'mine inite' nelebizingumukisi nene lo-lengemelesuve. Naza Kilisito' evenele mamu' gele nouve (neni' ve lo lo soto' oloni' nene edamilihe loo ve malo' lo nomuluvoni' gilivo noluve). A'mine ve aza nene kilisimasi fotini (14) ogo vine' ne olihe api' olosa idoti' nene okulumo' nama minaa' ani' nene hulo ho' ike'ni sonohi' minaa' ani' nesi nene hulosa O'moso'mo ei' minaa' idaa nene ele'mizo dizine' ve. A'mine ve nene oko'no've hulosa dizo vihe ido' oko'no'vesi dizihe nemu' nene gelamuve. Asi O'moso'movo' nene gele neive.

A'mine ve nene O'moso'mo Okulumo' ebe' lamine' Paladisiu' nene ele'mizo dizavo a'mida nene gamazi lamine' evene' laza lolonido' lisihe' amune' ido' lo soto' amaato' ve li li hukani' gamazi galau' giline' nene gele nouha oko'no've hulosa dizo vihe ido' oko'no'vesi dizihe nemu' nene naza ma gelamuve. Asi O'moso'movo' nene gele neive. Ee, naza a'ne'mine vemu' do naba ogo ha lolosuha nenikumu' nene do naba ogo ma lamolosuha asi gilizevo o nouvoni' monovo'ne nemukovo' nene do naba ogo lolosuve. Ido' lamine' naza nenikumu' do naba ogo ma lolove lo giluvodiniko mo gamazi gihile laminekovo' luvodinako neni' nene negi minamuvodine. Ne'mine minamuvodine'za evene' malite nenikumu' gililizani' nene angise'ine nene neni' monovo'nemu' ningi gilani' votigile ivile' ogo dizalive losa ne'mine olosa gelamuve. Ido' Guvelesi ve'mo ato atoli'mine inite' gehepeve nelebizine' nemu' neni' nene oko'no do dizalive loo lokosolo' medeluvoni' gilivosa oko'neu' mene mulumo alumo do soto' o-nedeka' o-nedeka' ogo mineline' inite' nene ma nimine' ve. Ee, neni' nene oko'ne do dizeloni' aka hize tile-nedo a'mine inite' nene ogo lovo o nemelive loo Guvelesi ve'mo laavosa Satani'mo imiselavo a'mine inite' nene ogo lovo o nemeka' nemeka' neive. A'mine ogo lovo o nemeka' nemeka' ine' inite' nene Guvelesi ve'mo do hulilive lo eita agae lo gamene setohamo luve. Lokuvo Guvelesi ve'mo ti' lo lo nimine' ve: Evene' gilizevo minavela nene neni' amuzo'ne ngelebizeloni' aka gihile lamine' nene soto' o-nedaa' neine' nenako nemu' nene gei' nasahili' o-gedaa' nouvoni' ne'mo geita geni soto' o neine' nene ha gehe do dizeline' votigilelo' nesi nene ha vo do neive lo line' ve. Ne'mino neine' nenako nemu' nene inite' mamu' do naba ogo lamo asi Kilisito' amuzo've nenita soto' ogo minelingumu' ve lo neni' do gilizevo o-nedaa' neine' initekumukovo' nene nolize izo do naba ogo lolosuve lo gele nouve. 10 Nemu' nene naza Kilisito'nimu' nene gilizevo ogo minuvongu' nehe ido' evene' neni' divi ledivi' i-nidangu' nehe ido' lihitehe akalo' mine molo minuvongu' nehe ido' evene' malite goboni mala' mala' mili-nidangu' nehe ido' inite' mali'mo aka'ne gize gehepeve o-nidihe ne'mine ingu' nene mulu'neu' goloso gelamo ha lamine' gelo minaa' nouve. Nene nanitekumu' ve. Naza gilizevo o nouvoni' gameneu' neve nene Kilisitoda lehete o minuvodi'mo nene mo amuzo molo minaa' nouve.

Lengitati' Noso' Nite' Namuvoni' Ne'mo Nene Goloso Amive. Ido' Gotine Izamuve Lo Engita Gohi Vilingumu' Nene Engita Monovo Goloso Ha Minelihe Lo Gopo Gala Gilingumu' Lo-ngimine' Gamazi

11 Naza negi monovolo' e'meto gamazi mene lo minuvoni' nene lengi' lengemenitine'mo ivosa nene luve. Ee, lingine di naba i-nidilizado' o neine' nenako di naba ma i-nidadiniko naza nene neni' do naba olodo' ma minamuvodiinako neeve nene mo lengi' lengemenitine'mo ivosa nene do naba ogo luve. Ido' lingine di naba i-nidilizado' o neive noluvoni' nene naza haza nitekisi noluha a'mine aposolo dizi nizave laveloti' nene ngomosi' ma lemo minamuvoni' nenako nemu' nene noluve. 12 Ee, lengita minuvoni' gamenelo' nene geni gehe'mo ogo minuvongumu' nene gele hulo ato atoli'mine suno vodine vine' inite' amuzo nite' nene do soto' ogo aposololiti suno gehepeve nenita minine' nene lengelebizuvoni' ve. 13 Ido' lingine gilavo naza Izesu' evenele mulise linge muki' o-ngedaa' uvoni' inite' ne'mine nene lengi' ma o-lengedamuvo engi' nene lingivile' igi nizani' nehe. O'ove. Engi' o-ngiduvoni' inite' muki' nene lengikisi o-lengedosa inite' hamokovo' nene ma o-lengedamuvoni' ve. A'mine nene ado' lengitati' noso' nitekisi ido' initekisi nevo'mine ma damo minuvodi'mo nene geni ma gehe-lengedamuvoni' ma neive. Ne'mine amuvoni' nenako neeve nene lengita monovo goloso o-lingiduvoni' neivosa a'minemu' nene naza agae loo lihime'ne mene huli-nidilo lolodo' neihe. Ne'mine ma lolodo' nomive. 14 Gililo. Naza idise do va'va' ogo mino lengita gohi alosa nouvoni' nene mo gamene sitohamo ivosa nene nouve. Ido' aloni' nene a'mine'mine ogo geni ma gehe-lengedamolosuve. Naza gele nouvoni' inite' nene lengi' mili nizani' initetine nemu' nene gele nouvoba asi lengikumu' neeve nene gele nouve. Neve nene nanitekumu' ve. Izipaha'ine nete ize'ningine me'ningine inite' salani mili-ngidilizado' nene nizavoba asi ize'ninge me'ninge nete nene izipaha'ine inite' salani mili-ngidilizado' nene nizave. 15 Ido' naza a'mine'mine ogo lengikumu' nene nolize izo nenita minine' inite' nene hulosa neni' minevo' alevo'nesi nene hulo labuluvo gehepeve olosuve. Ne'mino naza lu'ne lengeme nouvoni' votigile do naba gidini okuvo ne'mo nene lingine lutine nimani' votigile nene di ngomo ilizani' nene lisihe' o neihe. 16 Ido' evene' linge ma nenikumu' nene ti' li nilave: Ei' nene geni ma gehe-lengedamo noline'za ei' nene tilikilo' ve mino gotine izo dani' noloseive. 17 Ee, evene' lengita ngimiselivela laavo ingine lengita igi initetine gotine izi diisa di vi imi nilisaave nilani' nene mo lamineto' neni' ngimiseluve hamoli'mosi ma ne'mine ido' nilahe. Mo o'ove. 18 Naza Tito'ni do ote-dekuvo lengita vine' nene leze zuho masi ezesi maka' imiselekuvo vasine' ve. Ne'mini vasingu' Tito' nene initetine ma tilikimi o-lengedo do nolihe. O'ove. Azasi laza nene lemeni dameni hamoli'minesi mino hamo' monovolo' e'meto hamo' gono nodune' nenako ngelo ne'mine amoloseive.

19 Gamazi ha'na gizuningu' mene lingine gilavo lengi' vetido' leli' monovote nene lamine' ilive losa a'mine monovote nene hize ele' ogo gizune' nehe. O'ove. Laza Kilisitoda gi'mizo mino O'moso'mi velelo' neve nene a'mine gamazi nene gizune. Ido' gizune' gamazi muki' nene lu'ne lengeme nouvoni' aleve lengi' nene monoku' do amuzo molo-lengedelesa nene gizune. 20 Ido' ne'mine o-lengedelesa gizuvoni' nene naza ogo lengi' ningeloni' nene lingine ne'mini minilisaaze lo giluvodi'mine igi minamavo ningelohe ido' lingine ningikevo neni' nene ne'mino minaalive li giladi'mine ogo minelohe lo gopo ga'ne nogelosa nene gizuve. Ee, naza lengita ogo lingine lovo lolize iga' ido' ge lukehe nebele ne lukehe gebele laa' ido' lingizebolo' molaa' ido' mine eza ema igi hizi ho'laa' ido' divi ledivika laa' ido' mehe'nida gamazi laa' ido' evene' naba gehesaa' ido' di gopo' napa iga' monovo ne'mine nene igi nizavo ogo ningelohe lo gopo ga'ne nogiluve. 21 Ee, gohi naza lengita ogo hetelekuvo O'moso'ne ne'mo lengi' vetido' lengi' monovotinemu' nene do leme-nedelihe lo gelo lengikuti' evene' linge mukilite monovo goloso gomu' dani' ado' lute do goloso oga' monovosi vene' vemoho' alu gipe gopo ingaa' monovosi ido' ne'mine mana'mine monovo goloso ngovozo hilami gopo iga' monovosi nene igi mili minaa' angumu' nene ingine lu'ine di velepe' izami minikevo naza engikumu' nene agae lo ive ga'ne dizelido' o minelihe lo gelo gopo ga'ne nogiluve.

Copyright information for `ASO