2 Corinthians 3

Paulo' Ei' Monovo Lo Soto' Ogo O'moso'mo Lo Huko-lidine' Gamazi Gosoho' Ne'mi Gonou' Ve Nouve Losa A'mine Lo Huko-lidine' Gamazi Gosoho' Ne'mo Litehe Nene Ivile' Ivo Lamine' Goloso Neive Line' Gamazi

Ne'mine noluvoni' nene leli' monovote nene lamine' ve losa a'mine gamazi ma nene gohi api' ogo nolo-limive lisa nigilahe. Ido' mono' laa' ave linge ma nete evene' malite engi' monovo'inemu' li soto' igi gizani' gamazi nene ma disa a'mine vilizada minaa' nani' aleve nene ngimaa' nave. Lingine gilavo leli' nene a'mine'mine ogo evene' malite leli' monovotemu' li soto' igi gizani' gamazi ma dosa lengemelonido' o neihe. Ido' a'ne'mine luhuvo nene evene' ma ngemeloningumu' nene lingine ma gizi limilizado' o neihe. O'ove. Leli' monovote lo soto' iline' luhuvo nite' ne'mine nene mo lengi' nene nizave. Ido' a'mine leli' monovote lo soto' iline' luhuvo nite' gizahe' nene leli' luteu' do nonivo evene' muki' nete nene a'minemu' ningisa gilaa' nave. Leli' mono' gono nodune' ne'mi gihile've lengi' nene Kilisitodati' luhuvo nite' ne'minisa nizani' nene mo soto' gehepeve o neive. A'mine luhuvo nite' nene ingi noso ne'minedunu' gizani' nomive. Ido' gehenilo' luhuvo mili gizani' ne'minesi nene nomive. Asi minevo' minevo' O'moso ne'mi Sikalahu' nedunu' nene evene' lengi' lutingu' nene luhuvo ne'minosa gize neive.

Ne'mine nolune' nene Kilisito' gono dani' ne'mo nene O'mosolo' gele mu'musi' o none' nenako ne'mine gamazi lamine' nene laa' noune. Ido' ne'mine laa' noune' nene gihile ne'mine do soto' olonido' nene laza mo lisihe' o none losa nevoba ne'mine amuzo nene lelita ma nomive. Asi O'moso ei' nene amuzo lemo a'mine gono dalonido' nene do lisihe' o-ledaa' neive. Aza nene lo huko-lidine' gamazi gosoho' ne'mi gonou' ve minelonido' nene do lisihe' o-lede neive. A'mine gono nene gizikani' neine' lou' gamazi malo' nevoba asi O'moso'mi Sikalahuto' nene neive. Nene nanitekumu' ve. A'mine gizikani' neine' lou' gamazilo' nene ngelo e'metamune' ne'mo nene lute helavo a'mine louli'mo lebele helaa' neine' giline'za O'moso'mi Sikalahu' ne'mo nene minevo' minevo' lemeni dameni lemo do upuho' o-ledaa' neive.

Ee, ido' a'mine gehedo' gizikani' neine' lou' gamazi'mi gonoloti' nene helaa' noune'za a'mine lou' gana' soto' ine' nene mo vode gade viline' inite' amuzo'vesi labana'vesi nene soto' ine' ma neive. Ido' a'mine amuzo labana've nene vo Mose' golo veleloti' nene silingenge'ni hulo minine' nene gopo oka' oka' o'mo vo minine'za a'minesi nene Isilaele' aleve ningavo ve'ine lenge lenge lavo vonu' bililizado' lisihe' amani' ve. A'ne'mine inite' nene ne'mino minine' nenako O'moso'mi Sikalahuli'mo do soto' o neine' mono' gono ne'mo nene a'mine litehe mono' nene ivile' nabalo' goloso ivosa leli' vode gade goloso viline' monovo'vesi soto' oloseive. Ee, gonito' ngele'mize molaa' ine' mono' litehe ne'mo nene inite' naba mino vode gade viline' monovo'vesi minine' nenako O'moso'mo evene' lisihe' ve lo-ledelido' lele'mize molaa' neine' mono' gono gosoho' ne'mo nene ivile' goloso ivosa inite' naba goloso mino vode gade atoli'mine goloso ogosa viline' monovo'vesi noloseive. 10 Ee, mono' gosoho' ne'mi monovo've vode gade vaa' neine' ne'mo nene ivile' ogo dizo minidi'mo nene mono' litehe labana'vesi mino vo'ine ga'ine vaa' neine' monovo've ma nene mo vo halekave. 11 Ee, a'mine mono' liteheli'mi labana've nene vo gopo oka' oka' o'mo vo osu' line'za a'mine nesi nene vo'ine ga'ine vaa' neine' inite' minine' nenako osu' lamo minevo' minevo' monovo've laminekisi minine' mono' gosoho' ne'mo nene ivile' ogo vode gade goloso viline' inite' mineleseive.

12 Ido' a'mine noluvoni' monovomu' mene mo gele mu'musi' o none' nenako nemu' nene laza gamazi laa' noune' nene do hito gepe' gamazi ne'mingutikisi lamo asi mo gamazi lamine' sotokovo' lovo' kiselevo' ogo laa' noune. 13 Laza nene Mose' ne'mine nene minamune. Aza nene ei' veleloti' silingenge'ni hulo minine' vo gopo oka' oka' o'mo vo osu' nolivo Isilaele' aleve nene a'mido' gisili hizi ningi minikelizave losa velelo' nene lavolavo do hitine' ma neive. 14 Ne neiha Mose' golo velelo' lavolavo do hitine' ne'mino Isilaele' aleve nene O'moso'mo lo huko-ngidine' mono' litehe gatangu' gatangu' monovo've gilisa'mani' nenako nemu' nene idisesi engi' lu'ine ga'nido' nene ha hite neine' gele neivo lu'ine ga'nine nene ha ngi lo neive. A'mine lute gatelo' hite mineline' inite' nene mo Kilisitoda vo gi'mizekunivosavo' nene do hulo-ledeleseive. 15 Ee, idise mene gamenelokisi nene Mose' gizine' mono' gamazi evene' gati ngimaa' naani' gamenelo' gamenelo' nene Isilaele' aleveti lu'ine ga'ine nene initeli'mo ma hite neine' gele neivo minaa' nani'za 16 mono' godolou' Mose'nimu' ti' li gizi nizani' ma nene engitokisi ha gihile izelido' o neive: Ido' Guvelesi vela mine velepe' izine' gamenelo' gamenelo' nene velelo' hitine' inite' nene do hulaa' ine' ve. Ado' Guvelesi vela mini velepe' izilizani' gamenela nene a'mine lu'ine'mi velelo' hitine' nene do hulo-ngedeleseive. 17 Ido' Guvelesi ve ve noluvoni' nene Sikalahu'vemu' noluve. Ido' Guvelesi ve'mi Sikalahu' lelita minive nene inite' mali'mosi nalava ize-ledamivo apase-ledavo haza minaa' noune. 18 Ee, laza mukito' Mose' inite' velelo' hitosa minaa' ine' ne'mino minamo asi mukito' nene vete haza soto' o neivo mino gapogapoli'mo silingenge'ni gohi do tine' molo hulo mala oga' neine' ne'mino Guvelesi ve'mi monovo've vode vaa' neine' monovo've nene lelitati' hulo evene' mala oga' noune. A'mine monovo've lamine' goloso lelita minine' nene vo naba o'mo voovo' neivo laza nene ei' Guvelesi ve'mi emeni damenilo' gehepeve lisihe' ogosa medelo minaa' noune. Ido' ne'mine noune' nene O'moso'mi Sikalahuli'mo nene oga' noune.

Copyright information for `ASO