2 Corinthians 4

Laza Nene Inite' Lamine' Minamo Ha Misubo Somo Ne'mine None'za A'mine Misubo Somo Ne'mi Lulou' Nene Inite' Lamine' Tamine' Gehepeve Minelido' O Neine' Ne'mino Leli' Luteu' nene Inite' Lamine' Tamine' Ado' Kilisitokisi Ei' Monovo Danava've Lamine' Masi Nene Neive Lo Paulo' Line' Gamazi

Ne'mino neine' nenako O'moso'mo asi've lulo lamine' lemosa a'mine mono' gono lamine' mene lemavo do do vo minaa' nouningu' nene gosele' ogo muludeu' goloso ogavo ma hulosa'mune. Laza nene monovo goloso suno' daa' naani' ne'minemu' nene mo amolosune lo mo mehede emekune. Laza evene' ma nene go'ine izo O'moso'mi gamazi lamineli'mo lido' lamo do ato' ogo lo-ngemesa'mune. Asi evene' muki' leli' monovote nene ize' mili ningi hehe lilizangumu' ve lo O'moso'mi velelo' mino gamazi gihile laminekovo' nene lo soto' ogo ngelebizaa' noune. Ido' a'mine O'moso'mi gamazi lamine' lo soto' none' nene ma hito noline' nene mo vi tolovo ilizado' mini mili nizavelavo' nene hitosa mineleseive. A'mine me misubou' aleve vi tolovo ilizave nene O'moso gihileloti' do eita medele-ngedavo gelekele' i-di nizave Satani ne'mo nene O'moso gele vive gehepeve Kilisito'nimu' guvele'vesi minine' gamazi lamine' ne'mo nene hize labana' ele-ngedavo labana've ningikelizave losa a'mine O'mosomu' gili hulaa' aveti lu'ine'mi vele nene do like-ngidine' ve. Ido' Izesu'nimu' gamazi ve luvoni' nene nemu' luve. Laza leli' nene le'metilizave losa ne'mine gamazi nene lo-lengemaa' nounivoba asi Izesu' Kilisito' nene Guvelesi ve ne neize. Ei' nene e'metilo losa nene lo-lengemaa' noune. Ido' la'lisetemu' nene laza Izesu'nimu' gelosa lengito' gelekele' izipe ne'mine nene none losa lo-lengemaa' noune. Ne'mine noluvoni' nene nemu' noluve. O'moso gozopo' aka'mila liti'muso izo miningu' labana' soto' ilive live ne'mo nene O'moso neni' nemeni dameni nene Izesu' Kilisito' veleloti' soto' neivosa a'midoti' nene ningi gililizangumu' ve losa luteu' nene hize labana' ele-lidine' ma neive.

Ne neiha a'mine gamazi lamine' tamine' luteu' do nonive laza nene haza nite' heneni milaa' ani' somo misubodunu' lili' ani' ne'mine nene none. Ido' somo ne'mino haza nite' none' nene lelito' minine' amuzo atoli'mine goloso neine' neve nene lelitati' minamine'za asi O'mosolati' neine' nene soto' o minelive losa nene somo ne'mino haza nite' nene none. Laza nene geni ato ato' gehaa' noune'za ne'mo nene aka vamaato' ma lele'mize molosa'mive. Ido' geni inite' lelita minaa' neingumu' nene gate muki' gelaa' noune'za a'mine ne'mo lute gate do gopo gehepeve ogo ma hize tile-ledesa'mive. Ido' libililisasi nene vise' i-lidaa' nani'za O'moso ne'mo ma hulo-ledesa'mive. Ido' libilikevosasi nene lemo ongaa' nouba goloso gehepeve nene ma dosa'mune. 10 Neve nene laza mo Izesu' helaato' mine molo mino monaa' ine' ma'minosa nene nomonune. Ne'mine oga' noune' nene lelitoti' nene Izesu' minevo' alevo've neine' ma nene evene' muki' ningilizave losa nene ne'mine oga' noune. 11 Ee, laza nene vetesi ha noune'za Izesu'ni do minuningumu' nene gamene gamene helaa' akalokovo' lele'mizi milaa' navo minaa' noune. Ne'mine oga' noune' nene a'mine helaa' neine' okodeloti' mene Izesu' minevo' alevo've neine' nene soto' ogavo ningilizangumu' ve losa nene ne'mine oga' noune. 12 Ne'mino neinako helaa' ne'mo nene lelita gono nodani'za ne'mine idi'mo minevo' minevo' oga' monovo ne'mo nene lengiku' gono nodave.

13 Ido' ve mali'mo gamazi ma line' mono' godolou' minine' ne'mo nene lelitokisi vo do neive. A'mine gamazi nene ti' lo lo neive:

Naza gele ele'vole' ogo nouvoni' nenako nemu' nene naza lo soto' nouve.
Lazasi nene a'mine'mine ogo Izesu'nimu' gele ele'vole' o minosa nene lo soto' oga' noune.
14 Ne'mine oga' noune' nene a'mine Guvelesi ve Izesu'ni hilinguti' do ote-dive ne'mo nene Izesulesi maka' do ote-ledo lengikisi nene do ei' velelo' o-ledeleseive lo gele minosa nene ne'mine oga' noune. 15 Ido' laza ne'mino mulumo alumo geni inite' geho none' nene ha lengi' lamine' ilizangumu' ve losa nene ne'mine ogo none. Ido' ne'mine ogo none' nene O'moso'mi nasahili' ne'mo evene' mukita nene voka' voka' ogovo' neivosa a'minete nene O'moso opo'ni lika' lika' i'mi viivo' nizavo eze guvele nene vo naba goloso o'mo vo minelive losa nene ne'mine oga' noune.

Me Misubou' Ningaa' Noune' Inite' Osu' Laa' Neine' Malo' Nene Lehete Amo Alinge' Dalone' Inite' Osu' Lamiline' Malo' Nene Gele Mu'musi' Ogo Mino Geni Lelita Neivosi Nene Gosele' Lebelamivosa Minaa' Noune Lo Paulo' Line' Gamazi

16 Ne'mine o neine' nenako nemu' nene laza gono daakumu' gosele' osa'mune. Ee, okode losuvola amuzote neve nene labuluvo olosa api' o'mo novivosi gamene gamene lute nene gosoho' oka' oka' o'mo novive. 17 Naza ne'mine noluvoni' nene laza ne'mine mana'mine geni muki' leli' gehelone' o neine' nene mo ngomo ha nite' mino gamene li'nibemukovo' ne neive. Ido' a'mine ne'mo nene inite' naba a'mine geni muki' nene ivile' ogo minine' ado' minevo' alevo' lamine' goloso osu' lamiline' nene do soto' o-lede'mo novive. 18 Ee, laza ninge none' inite' muki' nene gamene li'nibemukovo' minosa nene osu' laa' neine'za ningamune' Okulumoku' inite' nene minevo' minevo' inite' nizave. Nemu' nene ninge none' initeto' nene lute gate molamo asi ningamune' initeto' nene lute gate molaa' noune.

Copyright information for `ASO