2 Corinthians 5

Ido' ne'mine ogo minaa' noune' nene nemu' ve: Seli numuno ngu'vosi milaa' naani' ne'mino me misubou' minine' numude leli' okode ma osu' liline' nene numude gohi ma neine' nene evenelite a'inedunu' gizamani' asi Okulumoku' minevo' minevo' iline' numuno O'moso'mo salani molo-lede neine' nene ma neive. Ee, laza misubou' okodesi noningu' mene Okulumo' numude nene do ti' ogo saketi ne'mino do ngolaloinako lo agae, agae lo le' izo minaa' noune. Ne'mine oga' noune' nene a'mine Okulumo' numude nene saketi ne'mino do ngolosa mineso' nene haza baka' ne'mine okodelo' inite' nomivo minamoloningumu' ve losa nene ne'mine oga' noune. Ee, laza nene agae, agae lo le' izo minaa' noune' nene idise do none' okode mene do hulo haza minelone losa nevoba asi a'mine seli numungu' mene ha geni libilivo mino minevo' minevo' lemeni dameni ne'mo nene a'mine hele vaa' okode ne'mi ebe' dalingumu' nene Okulumo' numude saketi ne'mino ngolaloinako lo agae, agae lo le' izo minaa' noune. Ido' asi've O'moso'mo nene minevo' minevo' lemeni dameni ne'mo hele vaa' okode'mi ebe' nene dalingumu' ve losa leli' nene do va'va' o-ledosa a'mine salani molo-lidine' inite' muki' nene damolonivoba mo dalosune li ningi gililizangumu' ve lo a'minguti' gana' dalonido' o neine' inite' ei' Sikalahu've nene mo lehize-lede neive.

Nemu' nene laza gamene gamene vode vosa'mivo lute amuzo molo minivo ti' lo gele minaa' noune: Laza nene okode meesi ha mino Okulumo' numudela minosa Guvelesi vesi maka' minelonidoti' nene hoto' haza none. Ido' idise Guvelesi vesi maka' minamune luvoni' nene laza idise minevo dovo' ogo noningu' mene eze ninge minosa minevo dovo' ogo nonivoba asi vetedunu' eze ningamosa nene ha gele ele'vole' ogovo' nene none. Ee, laza nene vode vosa'mivo lute amuzo molo minivo mino laza nene okode mene hulo Okulumo' numudela nene vo Guvelesi vesi maka' minelobo lo gelo minaa' noune. Nemu' nene me misubou' okodesi ha minelobe Okulumo' numudela vo minelobe neukisi nene Guvelesi ve'mo lelikumu' geleline' lamine' ilive losa ei' gilido' ogo molo olosa nene lute molo mino a'minemukovo' nene gono amuzo molo daa' noune. 10 Ido' Guvelesi ve'mo lelikumu' geleline' lamine' ilingumu' ogo molo minaa' noune' nene laza mukito' Kilisito' zasi gono dalido' nene laza hamo hamo' okode losuvosi minune' gameneu' ogo molo une' initeto' inite' lamine' une' nolihe inite' goloso une' nolihe ne'mi meni've lemelingumu' nene ei' velelo' vo soto' olone' o neine' nenako nemu' nene ne'mino ogo molo minaa' noune.

Paulo' Aza Kilisitodo' Medelo Mino Lingine O'moso Biluva' I-dani' Nene Huli Ezesi Di Bizilo Lo Evene' Ga'ine Daa' Ine' Gamazi Line'

11 Nemu' nene laza Guvelesi vemu' golise gelelonido' o neine' nemu' nene gele mino evene' ingine leli' gamazite gililizangumu' nene ga'ine hizaa' noune. Leli' monovote nene mo O'moso'mo gele neive. Ido' monovotemu' nene linginesi ize' mili gilisa a'minemu' gili guni i-lidilizaho lo gelaa' nouve. 12 Ne'mine nolo-lingimune' nene leli' monovote lamine' ve losa a'minemu' gohi lo-lengemelesa lamune. Asi leli' monovotemu' gilikevo lamine' ogavo longolize izilizani' aka nene do soto' o-lengedekunivo evene' ma lu'ningu' minine' monovomu' nene gili huli oko'ine losuvolokovo' lamine' i minilizangumu' nene di naba igi laa' ave nene lingine laza lo-lengemelone' gamazi nene li-ngimikevo engi' gamazi'ine do'mozelingumu' nene nolo-lingimune. 13 Ve malite lelikumu' nene negi hizikeve li laa' nahe. Ne'mine noolone' nene mo O'mosomu' negi hize nolosune. Ne neiha negi hizamo lute gate laminekisi nolone' nene lengikumu' ve losa nene lute gate laminekisi mino ogo molo oga' noune. 14 Ido' ne'mine oga' noune' nene Kilisito' lulo leme neine' monovo've ne'mo nene do ote-ledavosa nene oga' noune. Ee, laza ti' lo ize' molo gele none' nenako nemu' nene ne'mine oga' noune: Ve hamo' nene evene' mukito' medelo hiline' nenako nemu' nene evene' muki' nene mo hilani' gele neive. 15 Ido' evene' mukito' medelo hiline' nene evene' ingine angise'inemukovo' igi mili minaa' ani' ma nene huli gohi ne'mine ami a'mine engikumu' helosa ote neive neemukovo' nene igi mili ilizave losa nene evene' mukito' medelo hiline' ve.

16 Ne'mino neine' nenako nemu' nene laza idise ado' mene none' gameneloti' nene evene' ize' molo-ngedelo ma engi' oko'ine losuvolokovo' ningekosa ize' ma molo-ngedamolosune. Ido' gomu' ma nene Kilisito'ni nene oko'nolokovo' ninge mino ize' molo-dune' noline' nene idise mene a'mine'mine ogo ize' molo-desa'mune. 17 Ee, ne'mino neine' nenako nemu' nene evene' ma ingine Kilisitoda mini mili nilizave nene mo O'moso'mo do gosoho' gehepeve o-ngede neine' nenako ne'mo ingine gomu' igi mili minani' monovo'ine ma nene mo osu' lavo ngemeni dameni'ine nene, aizo, mo gosoho' gehepeve lolo' ogave. 18 Ido' a'mine noluvoni' inite' muki' nene O'mosolatikovo' soto' ine' monovo ne neive. O'moso aza nene Kilisito' gono dadi'mo nene eze biluva' o-do minuninguti' nene laza ezela ogo do hamo' ogo bizelone' akate vele-ledosa evene' linge nene ezesi di hamo' igi bizilizangumu' ve losa a'mine akalo' ngele'mize molalone' gono nene mo leli' limine' ma neive. 19 Ado' me misubou' aleve O'moso ei' gamazi've avuto' ani' lihime'ine nene do molo' molo' o-ngedamo Kilisito' gono dangu' nene O'moso aza eita igi di hamo' igi bizilizani' aka nene vele-ngede'mo vo mino a'mine aka'mi gamazi nene evene' muki' li-ngimilizave lo leli' nene do limine' ve. 20 Ido' nemu' nene Laza Kilisito' limiselavo ezelo' medelo mino asi've O'moso nene leli' gamaziteu' mine molo mino lengi' nene gatine dani' gelavo leli' nene Kilisito' liline' velemu' nene leli' medelo mino amuzonga ti' lo nolo-lingimune: O'mosola nene lingine biluva' i-di minani' monovo nene hulisa igi ezesi di bizi minilo. 21 Ido' evene' laza nene Kilisitoda gi'mizo minekunivo ei' O'moso'mi monovo lisihe' gehepeve nene leli' okodela dizo minelingumu' nene O'moso'mo lavo leli' lihimete vai' nene ei' Kilisito' oko'nola dizavo lihime hamokisi ma damive Kilisito' nene lelito' medelo lihimelo' ve lolo' ine' ve. Nemu' nene lingine O'moso biluva' i-di minani' nene huli eita igi di bizi minilo losa nolo-lingidune.

Copyright information for `ASO