2 Corinthians 6

Ido' laza O'mososi maka' bize mino gono daa' unive nete nene gatine do ti' lo nolo-lingimune: O'moso'mi nasahili've lengemavo di minaa' nani' nene ningi hulikevo vo labuluvo ogalive losa nolune. Ido' ne'mine noluvoni' nene O'moso'mo ti' lo lingumu' nene noluve:

Naza gamene lamine' muluvongu' nenita laa' nani' ma nene
mo giluve.
Ee, evene' do ngu' izelove lo gamene muluvongu' nene
hize ele' o-lingiduvoni' ve.
Gililo. A'mine gamene lamine' molani' nene idise mene gamene nene neive. Evene' do lu' izeline' gamene molani' nene idise mene gamene nene neive.

Lingine Leli' Monovote Lamine' Nene Ningilizave Losa Aposolo Laza Geni Ato Ato' Gehaa' Noune Lo Paulo' Line' Gamazi

Laza nene goloso gidini geleline' monovo ngomosi nene ma okunivo a'mine mono' gono nodune' nene evene' nete divi ledivika li mono' goloso ve likelizave lo evene' hamolitesi olovo' ilizado' o mineline' inite' nene mo keke' amoovo' minaa' noune. Asi laza nene O'moso'mi gonolo' ve ne'mine none' nene evene' do soto' ogo ngelebizelesa nene ado' ne'mine monovo lamine' nene ogo minaa' noune: Laza nene geni inite' ato ato' ne'mi lulou' minaa' noube, ido' lihitehe' inite' gehepeveli'mi lulou' minaa' noube, ido' do goloso o-ledaa' initeli'mo nene akate gize osu' lavo minaa' noube, ne'mine ogo minaa' nouningu' nene lemo ongamo amuzo molovo' minaa' noune. Ido' di goloso igisasi nene libilaa' nave. Ido' nala' numungu' nesi nene huli-lidaa' nave. Ido' evene' gulugulunga li lovo di soto' i-lidilisasi nene iga' nave. Ido' gonosi nene amuzo molo daa' noune. Ido' okisete nesi nene do guno ma ongosa'mune. Ido' noso' nite' nesi nene do lamino nosa'mo ga'nasi nene helo minaa' noune. Ne'mino minoosa monovo lamine' golosovo' nesi nene ha ogo mino gele nge lo minaa' monovo nesi nene do minaa' noune. Ido' laza nene hongu loovo' mino evene' nasahili' o-ngedo mino O'moso'mi Sikalahu've nesi nene lelita minevo dovo' ogo neivo mino evene' lute ngemo minaa' noune' nesi nene abeleni amo mino Ido' gamazi gihile laminekovo' nesi nene lo mino O'moso'mi amuzo lelita minine' nesi nene do soto' o'mo vo mino monovo lisihe' lamine' gehepeve ne'mo nene lovou' initete ne'mine lolo' ogavo ade hela adavala nene lepesete ne'mine ne neivo ido' ade hela zamela nene bainati mitete ne'mine ne neivo minaa' noune. Evene' linge ma nete nene di naba i-lidaa' naavo ido' linge ma nete nene di limi-lidaa' naavo monaa' noune. Ido' evene' linge ma nete lelikumu' nene lemenga laa' naavo linge ma nete nene lopo'ni laa' naavo monaa' noune. Ee, evene' linge ma nete lelikumu' nene evene' go'ine izaa' ave ve li laa' naaha laza nene ne'mine amo soza nite' osa'mune. Ido' evene' ma nete lelikumu' nene gililisa ma gilisa'maha evene' muki' nete lelikumu' nene ningi gili lamine' goloso i nizave. Ido' lelikumu' nene mo hililisaave li gili minaa' naaha ido' mene vetesi ha none' nene mo haza ne none. Ido' lihimetemu' ve lo mulumo gono nene ne'mino daa' nouba a'mine ne'mo nene lebele helesa'mive. 10 Ido' mulumo gele minuningukisi nene gamene gamene lolize izovo' minaa' noune. Laza nene ve goho' gahali' ne'mine none'za monoku' evene' muki' nene heneni ve ne'mine lolo' o-ngedaa' noune. Henenite nomine' minaa' noune'za inite' mata' nene lelita ha neivosa minaa' noune. Ido' ne'mine ogo mine do vaa' nounidoti' nene laza O'moso'mi gonou' ve minaa' noune' nene soto' o minivo ningilizave lo ne'mine oga' noune.

11 Agae, lingine Kolidi alevekizo, gamazi nene ma do halekamo mo lo ngolokovo' lo lo-lengeme osu' lokune. Laza lute lengeme none' nene mo nabalo' goloso lengeme none. 12 Ee, leli' nene lute lengemaato' do a'manapa ma amune'za langisetine lengi' lutine nene di a'manapa igi leli' nene lutine limi lamine' amave. 13 Ido' lingine neni' izipaha'ne ne'mine gili nizavo ti' lo nolo-lingimune: Laza lute ne'mino lingimune' malo' nene golo hizi lutine di gili' lami limi lamine' ilo.

Evene' Nene O'moso'mi Numu've Ne'mine Nounako O'mosomu' Gilamave Nesi Nene Bizi Monikelizave Lo Paulo' Line' Gamazi

14 Ado' monovo lamine' oga' monovosi ido' monovo golosolo' vaa' monovosi nene gono di hamo' mili dikesivo monovo'ine nene lisihetokovo' vilihe vamilive. A'mine noluvoni' inite' labanakisi liti'musosi engi' monovo'ine nene hamoli'mine monovo igi mili isa'masive. Ido' a'mine'mine ogo Kilisito'nimu' gili ele'vole' ave nesi ido' ezemu' gili hulaa' ave nesi nene hamo' akalo' ngeli ma e'metamilisaanako nemu' nene lingine Kilisito'nimu' gili hulaa' ave engikisi nene maka' moni engi' iga' ani' monovo nene lingine igi mili ikelizaze. Engikisi bize lamine' igi minamilo. 16 O'moso'mi kekeize numu've nesi ido' soza o'mososi di hamo' ilisido' nene ma vo damive. Ido' ne'mine noluvoni' nene minevo' minevo' O'mosoli'mi numu've nene leli' none' nenako nemu' noluve. A'minemu' nene O'moso'mo ti' lo lo neine' ma neive:

Naza nene engi' vovo'ningu' ogo minevo' alevo' ogo mino
mono minelesuve.
Ido' O'moso'inesi nene lolo' ogo minelesuve.
Ido' ingine neve nene neni' evene'ne zuho minilisave lo neine' ma neive.
17 Nemu' nene Guvelesi ve'mo ti' lo nolive:

A'mine nenikumu' gili ele'vole' amaveti vovo'ningu' minanguti' nene
lingine huli mine abaza' igi mini
goloso nite' nene damilo.
Ne'mine ikevo naza lengi' nene do nenita ogo
18 metibo lolo' okuvo
lingine nene neni' gipe alu minilisave lo
amuzo've atoli'minesi minive Guvelesi ve'mo nene line' ve.
Copyright information for `ASO