2 Corinthians 7

Lu'ne lengeme nouvoni' alevekizo, a'mine gamazi mene ne'mino O'moso'mo lo huko-lede neine' nenaze. Nemu' nene laza okodesi lutesi do goloso o-ledeline' monovo muki' gilito do hulosa O'mosomu' golise gelo mino mudise monovo lisihe' lamine' gehepevevo' nene ogo molo o'mo vo minuke'zo.

Kolidi Aleve Lu'ine Di Velepe' Izangumu' Paulo' Lulou' Olize Soto' Ingumu' Line' Gamazi

Lingine leli' nene di lutingu' milalo. Ne nanitekumu' ve. Laza lengikuti' evene' hamokisi ma do goloso o-ngedamune. Ido' evene' hamokisi nene aka golosolo' ngele'mize molamo ido' evene' hamokisi go'ine izo inite'ine nene ma do lelita amune. Ido' ne'mine luvoni' nene lengelemosa lamuve. Helelone' nehe ha minelone' nehe, lengi' nene luteu' do molo-lengedamo mino ne'mine ogalone losa lengi' nene mo mudise luteu' do molokune lo gomu' mo ma lo-lengeme nouvoni' ma neive. Naza lingine gamazi nene ha gililizado' i nizave losa lengikumu' nene gele ele'vole' o mino ne'mine mana'mine lo ha lo-lengemaa' nouve. Ido' lengikumu' nene nolize goloso izo mino do naba o-lengedo minaa' nouve. Lengi' monovotinemu' giluvo lamine' ogavo mulu'neu' nene lamine' goloso o neivo geni ato ato' geho minuningukisi nene lu'neu' gulumo atoli'mine ogo lisivosa nouve.

Ee, ido' Makedonia misubou' une' gamene nesi nene okode ma molo gelo mineso' nite' ogavo ma minamune'za asi ganala geni inite' ne'mo nene a'midati' a'midati' okodela nene dizovo' minive. Ado' okode losuvoloti' nene lovo lolize nene ha ogo mino luteu' neve nene golise gelo minune. Ne'mino minune'za geni initeli'mi lulou' mini gopo ga'ine gili nizangu' do hongu lo-ngedaa' ive O'moso ne'mo nene Tito'ni aka vele-do imiselavo nonida ogo hetelidi'mo golise gelo minune' nene do hongu lo-lidive. Ido' ne'mino do hongu lo-lidine' nene ei' Tito' adi'movo' ne nomive. Asi aza lengita vo hetelo lengita geni minine' nene di lisihe' ikeni' neivo ningosa a'minemu' geni biline' nene mate-do mulunou' lamine' ogavo a'minemu' gamazi do ani' ne'mosi nene do hongu lo-lidine' ve. Tito' nene lingine neni' ningeso' lingisivo nizani' nemukisi ido' goloso nite' soto' ingumu' agae, agae li minaa' naani' nemukisi ido' neni' gamazi'nelo' e'metilisa amuzo mili gilaa' naani' nemukisi lo-limine' nenako ne'mo nene lu'neu' gulumo lisine' nene vo naba goloso ine' ve. Gomu' luhuvo niteku' gizuvoni' gamazi ne'mo muludingu' agae li okodido' gili mulumo gilani' noline' nesi nene naza lu'ne ga'ne nene do ato' ma amuve. Ee, a'mine luhuvo nite' nene ningi lutingu' mulumo gilani' nemu' nene mo ningo gelekuve. Ido' a'mine lutingu' mulumo nene gilani'za neve nene mo gamene li'nibemukovo' gilani' noloseive. Ido' lu'ne ga'ne do ato' amuve luvoni' nene lingine lutine di velepe' izangumu' nene naza olihe gelamosa gomu' lu'ne ga'ne do ato' uvoni'za idise nene ma do ato' amuve. Asi idise nene mo nolize izo nouve. Ido' nolize izo nouvoni' nene lingine luhuvo ningi okodido' gili mulumo gilangumu' nevoba asi mulumo giladoti' lutine di velepe' izani' nemu' nene nolize izo nouve. Lingine okodido' gili mulumo gilani' nene O'moso'mo gele neido' vo dani' nenako a'mine gamazitemu' mulumo gilani' ne'mo nene ma do goloso o-lengedamine' ma neive. 10 Ne'mine noluvoni' nene O'moso'mo gele neido' ogo okodelo' gelo mulumo gelelonidoti' nene lute do velepe' izo lukuvo nalone' nenako nemu' nene a'ne'mino okodelo' gelo mulumo gelaa' noune' nene goloso ve lo lamolosune. Ne neiha O'mosomu' gilamavetida ne'mino oko'nido' gili mulumo gilaa' soto' o-ngedaa' neine' ne'mo helaa' nene do soto' o-ngedaa' neive. 11 Naza noluvoni' nene mo lamine' noluze. Lingine ma ningi'nalo. Ado' lingine a'mine'mine igi O'moso'mo gele neido' igi okodido' gili mulumo gilani' ne'mo nene lengita monovo lamine tamine' vai' goloso do soto' o-lengedave. A'mine nene ado' gilingili igi monovotine lisihekovo' minelive li lutine a'mido' milaa' monovo nene atoli'mine ogo do soto' o-lengedavosa lingine a'mine gamazitine nene di lisihe' ilisa amuzo mili minii goloso monovo di hulilisa lite' li upuho' igi minii golise gili minii leli' ningelobo li gili minii goloso nite' dave nene lihime imilisa amuzo mili minani' ve. Nemu' nene a'mine lengita minine' gamazi mamu' nene gilunivo a'mine luvoni' monovo muki' lingine igi mili minadi'mo nene lihime lengita minamine' nene do soto' ogave. 12 Ido' gomu' luhuvo nite' gize-lingiduvoni' ma nene lihime davemu' gelo gizuvoni' nomive. Ido' lihime do-divemu' gelosa gizuvoni' nomive. Asi lingine lutine lelita milani' amuzo goloso milisa milani' monovotine nene ningilizave losa O'moso'mi velelo' ne'mi monovo nene lengelebizosa gizuvoni' ve. 13 Ido' muludeu' lamine' gilune' nene idise mene noluvoni' initekumu' nene lamine' gilune.

Ido' lingine muki' nene Tito' lulo di hongu li-dangumu' olize izo minine' ne'mo nene a'mine muludeu' lamine' gilunido' nene imine' molo lazasi gohi lolize naba izune.
14 Ido' lolize izune' nene naza lengi' do naba ogosa Tito'ni gamazi gomu' lo-imuvoni' nene hazamu' nomine' nenako novozo nene ma helamuvoni' nenako nemu' nene mo lolize izune. Ee, naza lengi' gamazi lo-lingimune' nene mo gamazi gihile laminetokovo' lo-lingimune' ne'mino lengi' nene do naba o-lengedo Tito'ni lo-imune' gamazi nene laminetokovo' lo-imune' nenako a'mine nene mo lamine' gihile izave. 15 Tito' aza lengita ogo nohetelivo lingine muki' golise've gili luvo luvo izi mini ele'mize lamine' igi gamazi'velo' e'metani' mamu' nene aza gohi gele mino lulo've nene atoli'mine ogosa lengita hulo neive. 16 Ido' naza idise nene giluvoni' lingine nene inite' mukiku' monovotine nene mo lisihe' ogavo minilisave losa giluvo mo mu'musi' gehepeve ogavo nemu' nene nolize goloso noizuve.

Copyright information for `ASO