2 Peter 2

Soza Polohete Gomu' Minani' Ne'mine Soza Mono' Apizi nGimaa' Ave Alinge' Soto' Ilizaditi Monovo Lo-ngemo A'mine Ve Nene O'moso'mo Do Goloso O-ngedo Lihime nGemelingumu' Petolo' Lo-ngimine' Gamazi

Ne neiha gomu' nene O'moso'mi eveneleliti vovo'ningu' nene soza polohetesi soto' igi minaa' ani' ve. Ne'mine iga' ani' ne'mine igi lengi' vovotingukisi nene soza mono' apizi lingimilizave soto' igi minilisave. Engi' nene monovo'ine di haleki mini lengele'mize goloso ilido' o mineline' soza mono' nene li soto' igisa engi' meni hize-ngidive Guvelesi ve nesi nene mehe'ine imilisave. Ido' ne'mine ilizadoti' nene O'moso'mo upuho' nite' ngiso do goloso o-ngedeleseive. Ido' ingine ne'mine mana'mine monovo goloso gopo iga' ilizani' monovo'nido' nene evene' muki' nge'metilisave. Nemu' nene evenelite mono' aka gihile nene divi' ledivi' ilisave. A'mine soza mono' apizi lingimilizave nene inite' gohi gohi dalone lii soza gamazi li-lingimilizadoti' nene lengitati' moni gelelehe' ilisave. O'moso'mo gozopo' aka'mila a'mine ve lihime ngemelesa line' nene hazamu' ma lamive. A'mine gamazi lokivo neine' nene okise ongamo ha neivo mo do goloso gehepeve o-ngedeleseive.

O'mosomu' nene ti' lo gele none: Angelo' linge ma lihime dani' nene ise'ine izivoba asi seni nala' ize-ngedosa lihime ngemeloni' gamenemu' gizebo igi liti'musoukovo' minilizave lo galese naba mo homiu' gehepeve ngimisele neive. Ido' ma nene ti' lo gele none: Gamene aka'mila minani' alevesi ise'ine izamo evene' goloso misubo vaiku' mini'mi monani' muki' nene nosodunu' molo hite-ngedo ngebele gese' ine' ve. Ne'mine ine'za a'mine gameneu' nene evene' eiti (8) ado' monovo lisihekumu' lo soto soto' oga' ive Noakisi ido' evene' gohi sevenisi nene alete molo do ngu' izine' ve. Ido' ma nene ti' lo gele none: Sodomi alevesi nGomola alevesi ido' numuno ebe'ine nesi nene O'moso'mo lihime ngemo do velepe' izo lenehevo' miniliza akalo' ngele'mize molavo ne'mine ani' ve. Ne'mine ine' nene ezemu' gilamave soto' o-ngedeli initeli'mi avazaha ne'mine do soto' ine' ve. Ne'mine ogo aza ve lisihe' Loti'ni nene a'mine ve goloso ingine monovo goloso i'mi angumu' nene muluno hukidi'mo lulo zovo' izo mininguti' nene do u' izine' ve. Ee, a'mine ve lisihe' engi' vovo'ningu' mino ingine monovo lamine' avutokovo' i'mi i'mi vi nizangumu' nene ningo gele'mo vine' ne'mo eze lulo lisiheku' nene gamene gamene mulumo geni naba bele'mo bele'mo vo minine' ve. Ido' O'mosomu' ne'mine lo gele none' nenako nemu' nene laza ti' lo gelelesune: Guvelesi ve aza evene' lisihe' ngemengu' soto' o ngemelinguti' do ngu' izaa' monovomu' nene gele mino evene' goloso nene lihime'ine abeleni ogo ngeme'mo vo mino mukito' goni' o-ledeline' gamenemu' gizebo ogo lihime'ine do minaa' monovo nesi nene mo gele neive. 10 Ido' a'mine lihime ngemelive engikuti' nene oko'ine'mo lanite' giline' monovo goloso gehepevelo' e'meti mini evene' naba'mi gizebolo' mini gamazi've gili di minaa' monovomu' gosele' iga' ave nene lihime naba ngemeleseive.

A'ne'mine ve ado' a'mine soza mono' laa' ave engi' nene gamazi gilami hokolize' igi engi' lu'nidokovo' iga' ave mini hozila dizi minave nabamu' nesi nene ngehelele izamivo mini engi' nesi nene divi' ledivi' i-ngidaa' nave.
11 Ne'mine iga' naha O'moso'mi angelo' nete a'mine nene ngivile' igi mini evene' naba amuzo'inesi nizani'za ingine neve nene divi' ledivi' i-ngidi Guvelesi vela goni' i-ngidisa'mave. 12 Ne neiha a'mine ve nene ize gulo ido' nama gaha ga'ine nomivo minani' ado' evenelite ngimiselo ngebelaa' ido' ngebelaa' olonido' soto' igi minaa' naani' ne'mini mini ingine gilamani' initekumu' nene divi' ledivi' igi laa' nave. Nemu' nene ize gulo nama gaha ngebelaa' noune' ne'mine ogo O'moso'mo a'mine ve nene do goloso gehepeve o-ngedeleseive. 13 Ee, evene' di goloso ilizado' nene O'moso'mo golo hizo do goloso o-ngedeleseive. A'mine soza mono' laa' avete gilavo labana' ele minine' gamenelo' noso' nite' naba nii noso ni'mi vi minaakumu' nene lanite' goloso ve li gilaa' nave. Ingine lengikisi maka' noso' nite' ni mini di gopo'napa i-lingidi gotine izaa' naangumu' nene ngolize izi mini lengi' muliseu' nene longovozo hililiza nite' goloso lili' ikeve. 14 Ingine vene' ma ningani' nene ma duvo lii gumine dika' dika' igi lihime daa' monovo nene engitati' osu' losa'mivo monoku' amuzo'ine nomive nene lihime monovou' ngimimise' igi di vaa' igi mini mumuzo' oga' monovomu' api'napi' igi save naba di minani' nenako nemu' nene O'moso'mo usi' ize-ngedelido' i nizave. 15 Ingine aka lisihe' nene huli vi gopo igi nimonani' nene Bosole' gipele Balaamu' vine' akalo' nene e'metikeve. Ado' monovo golosoloti' meni dalingumu' umo hilive ma'mi monovolo' e'metikevosa nene noluve. 16 A'mine Balaamu' ne'mo nene monovo lamine' avuto' ingumu' O'moso'mo elemine' ve. A'mine elemine' nene gamazi lamaa' ine' inite' dongi ize ne'mo nene evene' laa' noune' nolouti' gamazi lo-emo a'mine poloheteli'mo negi inite' olosa inguti' nene do o'ove lo-dine' ve.

17 A'mine soza mono' laa' ave nene noso hinipiniku' goko' lavo haza galesevo' minaa' neine' ne'minesi ido' hepeli'mo limuso hubu lo do vavo goline izamaa' neine' ne'minesi nene nizani' nenako ne'mo nene monoku' ma hize ele' i-lidisa'mave. Nemu' nene O'moso'mo liti'muso atoli'mine ogo ize minine' ebeku' vi hilalisave lo a'mine liti'muso ebe' nene salani molo-ngede neive. 18 Ne'mine noluvoni' nene nemu' noluve: Ingine gamazi naba gele vine' gihile've nomine' gamazi li evene' ma ladeni igi igi mili minaa' nave engikuti' idise a'mene olovo' nave nene okode'mo lanite' gelaa' neido' gopo geligeli igi e'meti minaa' monovo nedunu' nene gohi ngimimise' iga' nave. 19 A'mine ve ingine a'mine ngimimise' ani' aleve nene ti' li li-ngimaa' nave: Leli' le'metilizani' nene lingine inite' mali'mosi nene igi mili ilizani' akatine nene hize tile-lengedamivo goboni ve ne'mine ma minamilisave. Ne'mine li li huki-ngidaa' naani'za engi' neve nene lele'mize tolovo oga' inite' monovo goloso ne'mo nene a'nido' davo ne'mi goboni ve mini milikeve. Ido' goboni ve minikeve noluvoni' nene inite' mali'mo zatuho' o-ngidivo a'mine inite' igi mili iga' ilizave neve nene mo a'mine initeli'mi goboni ve lili' i nizani' nenako nemu' nene noluve. 20 Ee, evene' malite Guvetesi ve do lu' izaa' ive Izesu' Kilisito'nimu' giladoti' nene me misubou' minine' monovo goloso evene' lute do goloso o-ledaa' neidoti' nene olovo' igisa gohi a'mine monovou' vi hili mutuho ngatuho igi minilizani' nene gomu' goloso igi minilizado' mini milani' ma nene ivile' ivosa alinge' nela nene di goloso gehepeve igi minilizado' mini mili minilisave. 21 Ee, O'moso'mo lo-lidine' gamazi ma li-ngimikevo gilisa a'mine gamazi gili huli mehe'ine ma imado' nene golo hizo lihime atoli'mine ogo ngemelido' o neine' nenako ingine nene a'mine aka lisihekumu' nene ma gilami minadiniko a'mine lihime do dizo ngemeline' votigileloti' nene lemosa lihime ngemelido' minadinako ne'mo nene mo lamine' ngomo ma idine. 22 A'mine ne'mine ve nene mono' godolou' ti' li gizikani' malo' nene vo milise' ogave:

Gulo ne'mo muso velo do huline' inite' nene gohi vo naa' neive.
Ido' ma nene:

Ize nene nosou' ongo-dekunivo gohi vo gohiku' gomo gomo izo ongaa' neive.
Copyright information for `ASO