2 Thessalonians 1

Paulo' Tesalonika Aleve Geke' Lo-ngedo Luhuvo Gize-ngidine' Gamazi

Paulo' nazasi Siluvanokisi ido' Timoteokisi laza meteho O'moso ido' Guvetesi ve Izesu' Kilisito' eze evenele zuho lingine Tesalonika ebeku' mulise milaa' nani' nene luhuvo nite' mene nogize-lingidunge. Ningilo. Ido' meteho O'moso ido' Guvelesi ve Izesu' Kilisito' engitati' nasahili' ido' hongu lo lamino minaa' monovo nene lengita mine do vo minivoo.

Izesu' Tine' Molo Aline' Gameneu' Goni' Iliza Gamazi

Leze zuho mate, Izesu'nimu' gili ele'vole' iga' nani' nene naba ogavo lutine hamo hamo' ge neme ne geme li minaa' nani' nesi naba ogavo nemu' nene O'moso opo'ni lolonido' lisihe' ogavo gamene gamene lengikumu' ve lo opo'ni laa' noune. Lengi' goboni mili-lingidi mulumo nite' i-lingidivi' i-lingidivi' igi minaa' navo mulumo gili minangu' nene Izesu'nimu gili ele'vole' anitine nesi hulami amuzo mili minaa' ani' ve. Ne'mine ani' ne gelo O'moso'mi evenele zuho muki' mini'mi monada lengikumu' longopo'ni lo gulivetine do hozi laa' noune. Ido' O'moso'mo gizebo o neingu' vo holalone li lingine a'minemu' mulumo geni ha gihi'mi vi nizani' ne'mo nene a'mine O'moso'mo gizebo o neingu' vi hilalizado' do lisihe' o-lengedelesa neine' ne'mo nene O'moso'mo do lisihe' ogo ize' molo-ledaa' neine' nene do soto' ogave. Ido' ne'mi monovo ne'mino neive: Guvetesi ve Izesu' aza amuzo malehe angelo'vesi Okulumokuti' limi soto' i limilizani' gamenela nene O'moso'mo gilivo lisihe' o neivo aza mulumo inite' i-lingidi minaa' nave engi' nene a'mine'mine ogo mulumo inite' o-ngedeleseive. Ido' goboni mili-lingidikevo mulumo gili minaa' nave linginesi lelikisi nene a'mine mulumo nite' do mate-ledo do hongu lo-deleseive. Ne'mine noogo olo' gulumosi lemo O'moso'mi monovo gilamave nesi Guvetesi ve Izesu' Kilisito' ei' gamazi lamine' nene gili disa'mave nesi lihime ngemeleseive. Ee, ve a'ne'mine ve lihime ti' ogo ngemeleseive: Guvetesi ve'mi veleloti' ngimisele hulavo vi eze amuzo'vesi labana'vesi mo ningami mini golosovo' igi minivi' minivi' ilisave. 10 O'moso'mo lihime ne'mine ogo nongimivo Izesu' tine' molo aline' gamenela eze evenele zuho di kegesi minani' ingine eze labana've ningi di ti' igi ezemu' gili ele'vole' igi minave ingine gamazi'inesi nomivo siza li-dilisave. Ido' lingine leli' lo-lingimune' gamazi nene gili ele'vole' ani' nenako nemu' linginesi a'mine evenekisi minilisave.

Paulo' Aza Tesalonika Alevemu' O'mosola Line' monovomu' lo-ngimine' Gamazi

11 Nemu' nene lengikumu' ve lo gamene gamene O'mosola laa' noune. Igi mili minilizani' ve lo lengele'mize molani' monovo nene igi mili minilizado' aza O'moso'mo do lisihe' o-lengedo amuzo molo hize ele' o-lengedavo ne'mo lingine O'mosomu' gele ele'vole' o none' ne'mi gihile do soto' olone li inite' lamine' ilisa gilani' muki' nene gihile izelive lo nolune.

12 Ido' ne'mine lo O'mosola laa' noune' nene nemu' laa' noune: Ado' leli' O'mosote ido' Guvetesi ve Izesu' Kilisito' ingine a'mine laa' nounido' igi nasahili' i-lingidikesivo lingine igi mili igi minilizani' monovotidoti' nene Guvetesi ve Izesu' gulive've di hozi li nizavo aza nene lengi' gulivetinesi do hozi lilingumu' ve lo laa' noune.

Copyright information for `ASO