2 Thessalonians 3

Lelikumu' Ve Li O'mosola Lilo Lo Gizine' Gamazi

Leze zuho mate, gamazi nene mo gize-lengemekune'za ma neine' nene lo-lengemelonge. Gililo. Guvetesi ve'mi gamazi lengita ine' ne'mino buu lo novivo ne'mi guvele vovo' minelive li lelikumu' ve li O'mosola livo' minilo. Ido' evene' muki' nene Izesu'nimu' gili ele'vole' isa'manako engi' a'ningu' okunivo libilikelizanako lingine a'mine zogo zogolo' ve evene' golosoliti a'ningu' volosa nooloninguti' ipe' ilive li O'mosola livo' minilo.

Ee, evene' ingine gamazi've gili ele'vole' isa'mani'za Guvelesi ve neve ei' gamazi lido' gele daa' neive mino ezelo' gele medelelonido' lisihe' o neive. Nemu' nene ve goloso ne'mo lengebelalive lo luhivetine do ngi lo-lengedo alete molo-lengedeleseive. Ido' linginela gono davo lingine lo huko lo-lingimune' gamazi nene idise gili di mini alingekisi gili'mi gili'mi dizi minilizave lo Guvelesi vemu' gele ele'vole' o nonako lengikumu' gate seta' gelamune. Guvelesi ve aza lutine ele'mize lamine' ogo O'moso lulo leme neine' ne'mi monovo gili guni igi a'mine monovo di ti' ilizani' akalo' lengele'mize molalive lo O'mosola nolune.

Gono Damo Zogo Zogo Izo Monaakumu' Gamazi

Leze zuhokizo, Guvetesi ve Izesu' Kilisito' ei' velemu' ogo ti' lo lo huko nolo-lingimune. Izesu' evenele zuho linge ma nete mono' gamazi lo-lingimune' nene gili huli ha gopo moni gono damani' nene inginela vi gi'mizami mini abaza' igi minilo. Laza ogo molo une' ne'mine igi lingine le'metilizani' o neine' nene langisetine gili nizave. Lengita mino noso' nite' haza gidini ma namune. Ve hamoli'midatikisi noso' nite' haza ma do no minamune. Linginelati' inite' ma limilizani' nene linginela nomivo geni ogalive lo holisekisi holukakisi ele'vole' gono amuzo molo do labusote ilivo okode losuvo'mi gono do minune' ma neive. Mono' gono daa' nounive laza a'mine gonoloti' noso' nite' daloninako lengitati' haza gidini nunidini nene lisihe' ogo minidine'za monovo lamine' do mino aka lengelebizekunivo le'meti mini leli' gono dune' monovo ne'mine di minilizave lo gono do noso' nitete do soto' une' ma ve. 10 Ido' lengita minune' gameneu' ti' lo lo huko lo-lengemaa' une': Ve mali'mo gono dalosa gelamivo ma noso' nite' malise i-dikevo namilive. 11 Ido' lengitati' gamazi ma ogavo gilune' ne'mino ogave: Ve linge ma nete engi' gono'ine huli ve maliti gono'ningu' gavakavato' monaa' nave. 12 Evene' a'ne'mine ve Guvetesi ve Izesu' Kilisito' ei' velemu' ogo ga'ine do ti' lo nolo-ngidune: Ingine dalupizi mini engi' gono'nine di engitatikovo' nalizave.

13 Leze zuho mate, lingine gosele' lengebelamivo mini gono lamine' veveso lisihe' o mineline' gono ha di minilo.

14 Ido' luhuvo nite' meu' gamazi gizo nolo-lingimune' nene ve mali'mo gele hulavo ma eze monovo ningi gili asi'vevo' mino ovozo helelingumu' ve li huli-di mehedine imilo. 15 Nene biluva' i-dilizave losa lamuve. Leze zuho ve li gala di di vevesi i-dilo.

Paulo' Gamazi Gize Osu' Lo O'mosola Line' Gamazi

16 Guvetesi ve hongu meleho aza gamene gamene ne'mine mana'mine ogo do hongu lo-ledelive lo nolune. Guvetesi ve linginesi mine do dizo minelive.

17 Lingine longopo'ni noluve. Ido' ve gohi mali'mo gizamivo na'nise gizuvoni' ve li ningilizave lo ne'mi gamazi nene Paulo' naza neni' a'nedunu' nogizuve. Naza gamene gamene neni' luhuvo ti' ogo gizaa' nouve.

18 Guvetesi ve Izesu' Kilisito' ei' nasahili' lingine mukita minelive lo O'mosola noluve. Moda ve.

Copyright information for `ASO