Acts 1

Izesu' O'moso'mi Sikalahu' Imiselelesa Lo Hukine' Gamazi

O Teohilo', Naza luhuvo nite' lingela ma gomu' gize-giduhe. A'mine luhuvo niteku' nene Izesu' api' ogo gono do minine' ne'mi gamazisi ido' evene' apize ngimine' gamazi nesi nene gize osu' luvoni' ma neive. Ido' a'mine gamazi nogizo Izesu' aza gono do evene' apize ngeme'mo dizosa do kegese-ngidive aposolo gono dalizani' gamazi nene O'moso'mi Sikalahuli'mo lido' lo-ngemavo O'moso'mo Izesu'ni Okulumoku' ele'mizo dizine' nene gizosa gamazi gohi ma gizamo luhuvo nite' nene hulo-giduvoni' ma ve.

Ee, lohoto' zalo' bili badikevo mulumo gelo helo oto velesi mino aposolo soto' o ngimine' ve. Neze ha neive li gilikevo gihile izeleseive lo ele'vole' nite' muki' nene ogo ngelebizo neivo gamene foti novivo eze ningika' ningika' navo ezesi gamazi li volelo' melo' igi lani' ve. Ido' aza nene O'moso'mo gizebo o-ledeline' gamazi lo-ngimine' ve. Ne'mine ogo engikisi mino ti' lo lo-ngimine': Lingine Zelusalemi numuno ebe' mene hulamilo. Me'neho Sikalahu've imiselelove lingumu' lo-lingimuvoni' mamu' nene gizebo igi minilo. Zohane' aza evene' noso holo-ngedavo ingine haza nosovo' dani'za lingine gamene ha'na ogo vamivo O'moso'mi Sikalahu' neve nene dalisave lo lo-ngimine' ve.

Izesu' Okulumokuko Dizo Vine' Gamazi

Gamene ma izipahala zuhosi di gese' igi mini Izesu'ni ti' li longo' i-dani': Guvekasi ve make, guve'inesi ve nabalite avotemotine gizebo i-ngidi minaa' ani' ma'mine ogo gaza Guvetesi ve naba lolo' ogo leze Isilaele' ve gizebo o-ledeline' gamene nene idise nehe. Olo. Ne'mine li likevo Izesu' aza ti' lo lo-ngimine': Naza olihe ne'mine amuvo gamene ma ogo viline' nene nehe ido' gomu' soto' iline' inite' nene nehe neve nene lengi' initetine ne nominako lingine ma gilamilisave. Nanitekumu' ve. Me'neho asi've amuzo'velo' molo gelo mino lo hukine' nemu' ve. Ne neine'za O'moso'mi Sikalahu' lengita lemo amuzo molo lengemavo neni' gamazi'ne nene Zelusalemi numudoti' api' igi li Zudaia misuboukosi Samalia misuboukosi vi li soto' ikevo misubo lumolasi vo osu' lilive. Ti' lo lo-ngemavo ingine vonu' bili nizavo Okulumokuko dizo volosa nodizivo limuso'mo molo hite-davo vo halekavo ma ningamani' ve. 10 Okulumoku' vo halekavo ingine okene' igi ningi nizavo ve seta' genegana'ine mokonokisi lite' mate' li vovo'ningu' soto' asine' ve. 11 Soto' igi ti' li li-ngimasine': nGalilaia ve lingine nanimu' okene' igi ningi nizave. Izesutine lengikisi minidoti' O'moso'mo Okulumokuko ele'mizo dizive nene ningi nizavo dizine' ne'mine ogo lemo aloseive li li-ngimasine'. 12 Ne'mine ikesivo aposolo nene Oliva gololoti' tibizi aka alite minida vi Zelusalemi numuda hetelani'. 13 Heteli numuno mulolo' ma minine' numungu' ingi minaa' ani' numungu' nene dizi minani'. Engi' gulive'ine nene Petolo' ve Zohane' ve Zakobo' ve Adelea' ve Hilipo' ve Tomasi' ve Batolomaio' ve Mataio' ve ido' Alahaio' gipele Zakobo' ve ido' Simoni aza Loma ve ngimiselelone lo amuzonga laa' ive neve ido' Zakobo' gipele Zudakisi ve. 14 Vekise nesi ido' vene' linge masi Izesu' izeleho Maliakisi ido' Izesu' akunolomotesi di gese' igi mini lu'ine mili hamo' igi O'mosola li minani' ve.

Zudado' Medelo Minelive Ma Di Kegesi-dani' Gamazi

15 A'mine gamene neu' nene Izesu' evenele zuho evene' vani hadeti tuvedi (120) ne'mine nene igi mulise mili nizavo Petolo' aza vo'ningu' ote mino ti' lo lo-ngimine': 16 Zogone zuhokizo, gililo. O'moso'mi Sikalahuli'mo Davidi'ni do ote-davo Davidi' aza Zuda' ado' Izesu'ni dalizave gomu' molo ngemo ngelebizive mamu' line' gamazi gizikani' nene gihile izeline' ogavosa gihile izine' ve. 17 Lezesi maka' gono dalive lo Izesu' aza Zuda'ni do kegeso ele'mize molani' nenako aza Zuda' leli' aleve minine' ve. 18 A'mine ve nene monovo goloso ogo Izesu'ni nene adeu' molalive li biluvalite moni imani' nedunu' nene misubo ma meni hizo a'mido' vo mino godololati' velepe' izeko lemo gatuno izo ho'lavo iseve nene dulungizo do'mozine' ve. 19 Nemu' Zelusalemi aleve muki' gili a'mine ebeli'mi gulive nene engi' gamazi'ninguti' Akeledama ve li milani' ve. Ido' a'mine gulive nene leli' gamaziuti' vanise ebe' ve lo neive. 20 Ido' O'moso opo'ni li nama laa' ani' nama mono' godolou' ma ti' li gizi nizani' ma neive.

Numu've nene hulavo zupo' molo neivo evene' mali'mo a'mingu' minamoloseive li gizi nizave.
Ido' ma nene ti' li gizi nizave:

Ei' gono velelo' nene ve mali'mo do ti' ogo dalive li gizi nizani' ma neive.
21 Nemu' nene Izesu' hilinguti' ote neine' gamazi lo soto' ilive lo ve ma do kegeso leli' aposoloku' do gi'mize-do ele'mize molalone' ogave. Ado' Izesu' ha neivo Zohane' noso holo-dine' gameneloti' api' ogo mine do dizo O'moso'mo vovoteuti' Izesu'ni Okulumoku' do dizo vine' gameneu' ezesi maka' minuniveuti' ma do kegeso ele'mize molalone' ogave. 23 Petolo' ti' lo lo-ngemavo Izesu' evenele zuho ingine ve sita' ma Zosehe' ado' gulive ngomo Balasaba' ve lo mininekisi ido' gulive ma Zusito' ve lo mininekisi ido' ve ma gulive Matatia' nesi nene di soto' i-ngidi 24 O'mosola ti' li opo'ni lani' ve. Agae, Guvetesi ve make, evene' muki' luteu' ningaa' anive neke, Zuda' aza aposolo gono hulo O'moso gei' do va'va' ogo molo-daine' ebeta vo mo gopo ogaze. Eze gono velelo' dalive lo mene ve sitakuti' ma do kegeso lelebizezo. 26 Ti' li opo'ni li O'moso gelavo di kegesaa' zohiku' ngele'mizi milikevo Matatia' ivile' ogavo aposolo leveni minangu' nene di gi'mizi-dani' ve.

Copyright information for `ASO