Acts 16

Pauloki Silasiki Timoteo'ni Ele'mizi Vasine' Gamazi

Pauloki Silasiki ingine Delebe ebeta vi Lisitila ebeta hetelasine'. Ido' Izesu' evenele zuho a'mida minanguti' ve ma minine' nene gulive Timoteo'. A'mine veli'mi izeleho nene Zuda vene' mino Izesuda gi'mizo minine' ido' meleho nene nGiliki ve minine'. Izesu' zuho Lisitila ebeku' ido' Ikonio ebeku' minave ingine Timoteo'nimu' gamangi mili-daa' ani'. A'mine ve nene Paulo' aza ele'mizo volosa giliha a'mine ebeta Zuda ve muki' minani' nete meleho nene nGiliki misuboukoti' ve minine' nene gili osu' li minani' nenako aza nene lukehe ikelizave lo Timoteo'ni ele'mizo vo O'moso'mi noso molo-do oko'no lolovo huko hulo-dine'. Ne'mine ogo numudo' namado' vi aposolokisi gizebo vesi ingine Zelusalemi ebeta li hukani' gamazi nene gili dalizave li li-ngidi'mi li-ngidi'mi vani'. Ne'mine igi gono dikevo Izesu' evenele zuho ingine monokumu' gili ele'vole' ani' ne'mo amuzo molavo gamene gamene vi kilika' kilika' avo muki' hizi hutile' ani'.

Paulole Makedonia Misubouko Vani' Gamazi

Ne'mine ikevo Asia misuboukosi mono' li-ngimamilizave lo O'moso'mi Sikalahuli'mo aka hize tile-ngedavo Piligia misuboukosi ido' Galatia misuboukosi mono' gamazi lamine' li-ngimi' ngimi' i'mi vani'. Vi Misia misubo gahevela igi Bitinia misubouko volone likevo Izesu' Sikalahuli'mo a'mine'mino gele ngemamivo Misia misubo ivile' igi lomi vi Toloasi ebeta hetelani'. Hetelikevo me luhuvo gizuve nazasi makato' minune. Minuningu' holuka' Paulo' vamu' ti' lo ningive: Makedonia ve mali'mo ote mino amuzonga lo ti' lo line': Gaza Makedonia misubouko ogo do lu' izezo. 10 Aza vamu' ne'mino ningavo nemu' O'moso aza Makedonia misubouko vi mono' gamazi lamine' nene li-ngimilizave lo lo-limine' nene ningo gelo a'mida volone' akamu' vise' une. 11 Ne'mine ogo sipi do soto' molo a'mingu' dizo Toloasi ebe' hulo lisihe' ogo vo guvo noso huko guvo noso oluso' ailani ma minido' Samotalaka nelo' vo hetelune. Hetelo ongo go' lavo guvo noso huko'mo vo Neapoli ebeta hetelune. 12 Nelo' Sipiuti' lemo vo Hilipi ebeto' hetelune. A'mine numuno ebe' nene Makedonia misubo nene ize' milanguti' guvelesi misubo dizo minine' ve langu' nene minine'. Ido' Loma ve ingine igi a'mine ebe' me'ninge lili' igi gizebo ani'. A'mine ebeku' nomonunivo gamene ma ogo vine'. 13 Ogo vavo holise' gamene alitavo a'mine veliti gesi minguti' leme heta ogo noso gahevela nene O'mosola laa' ani' ebe' nolihe lo gelo lemo vune. A'mido' nene vene' ma di gese' igi nizavo ningo laza misubolo' lemo mito' mino mono' lo-ngimune'. 14 Lo-ngemekunivo engikuti' O'mosomu' gele ele'vole' ine' vene' ma gulive Lidia' minine'. Aza Tiatila ebekuti' vene' mino gumi kala pepoli live laa' nani' lavolavo ne'mine maketi molavo meni hizaa' ani'. Aza Paulo' line' gamazi nogilivo Guvelesi ve'mo lulo do ngolo' lo-davo Paulo' line' gamazi nene gele dani'. 15 Gele do azasi ido' ei' numungu' maka' ingaa' ani' alevesi mono' noso hili aza ti' lo lo-limine': Lingine neze ningavo Guvelesi vela lamine' mine molokuvo ma lingine neni' numungu' dizi minivi' divi' ilizave lo amuzonga lavo gele emo dizune' ve.

Paulongi Silasingi Hilipi Ebeku' Nala' Numungu' Huli-ngidani' Gamazi

16 Gamene ma O'mosola laa' ani' ebeta nolimunivo gelekele' alu ma neivo a'minesi votene' une. A'mine alu'mi lulou' nene sikalahu' goloso minavo alinge' soto' o-ngedeline' initekumu' lo soto' ogo evene' lo-ngemaa' ine' nemu' eze gizebo i-daa' ave meni ngimikevo a'midoti' moni naba daa' ani'. 17 A'mine alusi votene' ogo Paulo'nisi lezesi le'meto noogo asi lo ti' lo line': Ve mene O'moso dize minive'mi gelekele' izipahala mini O'moso'mo do lungu' izeline' aka ma li soto' igi li-lingimaa' nave. 18 A'mine gamazi nene gamene gamene asi lo laa' ivo nemu' Paulo' gosele' belavo velepe' izo sikalahu' goloso nene ti' lo lo-dine': Izesu' Kilisito' velemu' ogo nolo-gimuve. Sikalahu' goloso gaza alungo hulo-do dizo ogo vozo. Ti' lo nolivo noline' velesi geto dizo ogo vine'. 19 Ne'mine ogavo a'mine alu gizebo i-di minave ingine eze gonoloti' meni daa' ilizani' aka'ine nene tilavo ningi gili nemu' Paulongi Silasingi a'nido' di gelelehe' malelehe' igi di vi mulise ebe' nabala zasi nabaliti mo'mosi'nida ngele'mizi vani'. 20 Zasila ngele'mizi mili goni' nii-ngidi ti' li lani': Ve seta' mene Zuda ve nizasive. Ingine leze mene ebeku' aleve di gopo nii-lidasivo ningo do une. 21 Ingine monovo gohi atokumu' dalizave li gate di li soto' i limikesivo a'mine monovo gele do e'metelone' nene leze Loma veti lou' gamazite avuto' olone' ogavosa ngele'mizo noune. 22 Ne'mine likevo mulise mili minavetesi lovo gamazi li-ngimikevo genegana'ine divi' bolotivi' igi huli ngibililizave li zasilite likevo ne'mine ani'. 23 Vauve ili izivi' itivi' igi ngibili nala' numungu' huli-ngidi nala' numudo' gizebo ve lamino gizebo ilive li li-dani'. 24 Ne'mine li-dikevo gelo nemu' nene ngele'mizo nala' numungu' lulo oluso' gehepeveu' hulo-ngedo gize'ine za lulou' loloso' ogo hulo ngimikivo minasine' nene hanigati ne'mine lolo' ogo ne'mine o-ngidine'. 25 Holuka' ongo velepeto' Pauloki Silasiki ingine O'mosola li opo'ni li mono' nama li nizasivo nalato' ve lingelite a'minemu' lubamu nigilavo 26 mimi' naba lite' lo ogavo nala' numuno nene muki' do mo'mongo' ine'. Ne'mine ogavo gete geto nala' numungu' akahe muki' si'zo osu' lavo nalato' veti a'nido' seni nala' dani' nene apase osu' line'. 27 Ne'mine ogavo nala' numudo' gizebo ve okiseti' oto ningine' nene nala' numungu' akahe muki' si'ze osu' lo neine' neivo ningo nalato' ve muki' limi vi haha ahe lo ei' do minine' bainati mite' nene gelelehe' ogo asi've oko'no bele helelesa neivo 28 Paulo' aza amuzo molo asi lo line': Gasika okonga do goloso amozo. Laza muki' meuko haza nonge lo line'. 29 Lavo gizebo ve aza livikumu' lavo imikevo nizasida loti' izo dizo vo luvo luvo noizo engikumu' lamine' giline' nenako nemu' Paulongi Silasingi gize'ningu' lemo pou' lo ongo 30 ngele'mizo heta ogo ti' lo longo' o-ngidine': Ve naba matise, naza nadi' ogosa lukuvo nalove. 31 Longo' o-ngedavo ingine ti' li lasine': Guvetesi ve Izesu Kilisito'nimu' gele ele'vole' iline' gezesi maka' nizavesi do lungu' izeleseive. 32 Ne'mine li Guvelesi ve'mi gamazi nene a'mingu' minani' alevesi ezesi li-ngimasine'. 33 Li-ngimikesivo nala' numudo' gizebo ve aza a'mine holuka' mo a'mine gamenelo' gehepeve ngele'mizo do vo gavoso ngibilado' nene noso izo do hongu lo-ngidine'. Ne'mine o-ngedavo a'mido' geti azasi ido' eze zuhosi mono' noso hilani'. 34 Ne'mine ikevo azasi eze zuhosi O'mosomu' gili ele'vole' ani' nemu' ngolize izi minani'.

35 Ingi go' lavo zasi ingine ti' li li pilisi ve ngimiselani': Ve seta' ma kuluhizi-ngidilo. 36 Likevo nala' numudo' gizebo ve gelo Paulo'ni vetete' ogo lo-emo ti' lo line': Naza kuluhize-lengedekuvo vilisive li zasilite gamazi hulikevo nenita naze. Nemu' lingine muludingu' hongu lo minivo vilisasive. 37 Lavo Paulo' aza pilisi ve ti' lo lo-ngimine': Laza nene Loma ve lengi' muliseuti' nosine'za Loma ve i-ngidisa'mani' inite' ma i-lidi goni' i-lidilisa gilani' nene leze monovo vise' igi lihimete di soto' mili lami haza evene' mukiliti ve'nido' gavoso libili nala' numungu' huli-lidani' ma nemu' nene suno' limiselilisa nilahe. Ne'mino nomive. Angise'ine igi lele'mize heta ikevo volosine' o neive. 38 Lavo pilisi ve ingine vi a'mine gamazi zasi li-ngimikevo ve seta' ingine Loma veti muliseuti' gidani' minasine' nene gili upuho' igi golise gilani'. 39 Upuho' igi vi ve setakumu' agae li isetine ve li di hongu li-ngidi ngele'mizi di heto' i-ngidi numuno ebe'ine huli vilisive li zou li ngimiselani'. 40 nGimiselikevo ingine nala' numunguti' limi heta igi Lidia' numu'veu' vi Izesu' zuho ningi mono' li-ngimi di amuzo mili-ngidi vasine' ve.

Copyright information for `ASO