Acts 17

Tesalonika Aleve Ingine Gulugulunga Li Gopo Gani Lani' Gamazi

Hilipi ebe' huli vi Amihipoli ebekisi Apolonia ebekisi ivile' igi Tesalonika ebeku' hetelasine'. A'mine ebeku' nene Zuda veti mono' numuno ma minine'. Neivo Paulo' aza oga' idi'mine ogo holise' gameneu' mulise milangu' dizeka' dizeka' ogo minine'. Gamene setohamo dizo mino inginesi mono' godolouti' gati li gili ha gili ani'. Ne'mine igi mono' luhuvo gizani' linge ma ne'mi monovo lo-ngemo ti' lo line': O'moso'mo do lu' izelive lo imiselelesa live nene helo gohi kululu' izo oteleseive li monoku' gizi mili nizani' ma neive. Ido' ezemu' nolo-lingimuve nene gulive've Izesu' aza do lu' izelive lo imiselelesa live nene neive. Ti' lo lavo Zuda ve linge malite a'mine gamazi gilani' nene gihile ogavo Paulongi Silasingi nge'metani'. Ido' nGiliki ve ingine O'moso opo'ni li gelekele' i-di minaa' ave muki' inginesi ido' vene' dizi minani' mukikisi nge'metani'. Ne'mine ikevo nemu' Zuda ve nete Paulongi Silasingi lukehe ngibili ve goloso maketi ebeku' gopo minaa' aveuti' ma ngele'mizi di mulise mili-ngidi a'mine ebeku' aleve muki' mulu'ningu' hizii vi Zasoni' numu've di vodo vodo igi mini a'minguti' Paulongi Silasingi ngele'mizo evene' mukiliti ve'nido' do soto' molalone li eze akahe've izivi' apasivi' ani'. Ve seta' ingine numungu' nizamasivo ningami Zasoni'nisi Izesu' evenele linge masi a'nido' di gelelehe' igi ebeto' gizebo igi goni' gilaa' avela ngele'mizi igi ele'voleka li ti' li lani': Ve seta' mene numudo' namado' ve di gopo i-ngidaa' asive ma mela hetelikesivo Zasoni' aza ei' numu'veuko ngele'mize molave. Ido' ingine guvetesi ve naba Loma ebeku' minive Kaesale' gamazi've ma avuto' igi Guvelesi ve gosoho' ma Izesu' soto' ogave li laa' nasive. Ne'mine li go'ine izikevo evene' mukikisi goni' gilaa' avesi upuho' igi gamazi gopo' napa vai' lani' ve. Ne'mine igi goni' gilaa' ave ingine Zasoningisi ido' eze zuho lingesi ti' li li-ngimani': Pauloki Silasiki vilisive li oko'ine meni hizilo. Likevo moni ngimikevo ngimiseli hulani'.

Pauloki Silasiki Belia Ebeta Vasine' Gamazi

10 Ne'mine ikevo a'mine gameneu' holuka' Izesu' evenele zuho nete Paulongi Silasingi geti ngimiseli hulikevo Belia numuda vasine'. A'mida vi heteli Zuda veti mono' numungu' dizi Izesu' gamazi vetete' igi li-ngimasine'. 11 Li-ngimikesivo a'mine ebekuko Zuda ve ingine Tesalonika ebekuko minani' ne'mine minami lu'ine laminekisi ve hongu ve mini ngivile' igi mini vo'ine ngilingili ivo mono' gamazi gili Pauloki Silasiki lasine' gamazi nene lamine' nehe soza nehe li gamene gamene mono' godolouti' mono' monovomu' gize'neka' hizi minani'. 12 Ne'mine igi engikuti' evene' mukikisi ido' nGiliki vene' dizi minanikisi ido' vemohokisi ingine Izesu'nimu' gili ele'vole' ani'. 13 Ne'mine ikevo Paulo' nene Belia ebekukisi O'moso'mi gamazi lo hutile' ine' nene Tesalonika ebeku' minani' Zuda ve ingine gili Belia ebeta igi evene' muki' nene go'ine izi lovo hizilizangumu' mulu'ningu' hizi lani'. 14 Ne'mine ikevo Izesu' zuho Paulo'ni di aka i-dikevo a'mine ebe' hulo guvo noso gahevela vo heteline'za Silasiki Timoteoki ingine Belia ebeku' minasine'. 15 Nizasivo evene' nete Paulo'ni ele'mizi vi Atena ebeta huli-dani'. Huli-di vi Paulo' line' gamazi nene Silasingi ido' Timoteongi ti' li li-ngimani': Lengikumu' moda lite' li alizo nolive.

Paulo' Atena Ebeku' Mono' Lo-ngimine' Gamazi

16 Ne'mine ikevo Paulo' aza Atena ebeta gizebo mino avazaha o'moso nite' vanu hizi minikevo ningo mulunou' olo' line'. 17 Mulunou' olo' lavo Zuda veti mono' numungu' dizo Zuda vesi ido' heta ato' ve O'moso opo'ni li gelekele' i-di minaa' ave nesi a'mine mulunou' olo' line' initekumu' nene li volelo' melo' iga' ani'. Ne'mine igi gamene gamene do gese' ebeto' evene' muki' igi di gese' ado' nesi a'mine'mino mono' gamazi lo-ngimine'. 18 Ne'mine ogavo a'mine ebeku' evene' ma minanguti' malite Epikulo' mono' gilaa' ani'. Ido' malite nene Sitoiki aleveti mono' gilaa' ani'. A'mine aleve Paulolesi gamazi di velepe' alepe' izi li linge malite Paulongumu' ti' li lani': Hokolize' ve mene gamazi gihile've nominekovo' gohi liline' nenako nadi ve lo lo-lemelesa neive li likevo malite ti' li lani': Aza neve ato' aleveti o'moso'ineliti monovomu' noline' gelave. Ne'mine lani' nene Paulo' aza Izesu'nimukisi ido' hele noloninguti' otakumukisi lo soto' o ngimingumu' nene ne'mine lani'. 19 Ne'mine li analo' di Aleopago gololo' kanisole nizada ele'mizi igi ti' li lani': Gaza gelamune' gamazi gosoho' evene' muki' lo-ngeme'mo monaa' naine' ma idi'nise nene lo-lemanivo gelelobo. 20 Laza gei' laine' gamazi nene gilune' atoli'mine oganako nemu' ne'mi monovo nado nehe. Lanivo gelelone li lani'. 21 Ne'mine li Atena alevesi ido' engi' vovo'ningu' venenga ve minanikisi ingine muki' nete gamene gamene inite' malokisi lu'ine milami gamazi gosoho' gamazimu' nene li gili ha gili igi a'minemukovo' gili minaa' ani'.

22 Ne'mine likevo Paulo' aza Aleopago gololo' minani' kanisoleti ve'nido' ogo oto ti' lo line': Lingine Atena vekizo, gililo. Lingine monotinemu' gili ngilingili goloso iga' navo noninguve. 23 Naza numudida ogo vogo noogo o'moso initetine ato ato' ningaa' uvongu' inite' hamo' ma ninguvoni' nene mabanuho gizaa' holomo ma ninguve. Ido' a'mine initeto' nene luhuvo ti' li gizikave: Laza ma ningo gelamune' o'moso ma nolingumukisi ve li gizikani' ningo gatuve. A'mine O'moso nene lingine gilami gopo gubi' izi imi opo'ni laa' nani' neve ezemu' lo lo-lengemeloze. Gililo. 24 O'moso aza okulumo' misubo do soto' molo a'mido' minani' inite' matakisi do soto' molo osu' line'. Do soto' molani' nenako asi've nene okulumo' misubo engi' Guve'inesi ve naba mino mono' numuno evenelite gizangu' nene dizo minevo' dovo' osa'mive. 25 Asi've nene evene' muki' minevo' alevo' ngemo ido' mutive daa' ani' ngemo ido' inite' muki' lehize-ngedaa' neine' nenako nemu' aza nene inite' matakumu' vise' osa'mive. o've. Nemu' nene evenelite gono've do inite' ma do soto' ogo emelonido' nomive. 26 Ne'mine o neine'za aza neve evene' hamo' do soto' molo lavo ezelati' evene' zuho ato ato' soto' ogo misubou' misubou' hutile' ogo none. Ido' soto' ogo misubou' minelone' gamenesi misubotesi asi've laka'ni molo-lede neine' ma neive. 27 Nemu' nene lu'inedunu' vise' i'mi igi O'moso neni' nouvoda igi hetelilizave lo gelo ne'mine ine'. Ido' laza vise' olosuba aza hoto' minamo leli' hamo' hamokisi maka' avito' neive. 28 Lengitati' gili vevesi mini luhuvo gizaa' ave linge malite ti' li lani':

Ei' mumunou' vo holo mino ogo molo oga' noune.
Ne'mine li likevo linge malite ti' li lani':

Laza O'mosolati' soto' une' ve.
29 Laza O'mosolati' soto' une' nenako O'mosomu' nene aza evenelite ga'ine gili ngolitunupe ido' siluvatunupe ido' gehenitunupe lili' ani' inite' gidini nolihe lo gelo lamolosune. 30 Gomu' O'moso'mi monovo gilamani' gameneu' nene lihime'ine molo-ngedamo ninge huline'za idi'nise nene numudo' namado' ve mukito' lu'ine di velepe' izilisave lo lo-ngede neine' ve. 31 Nemu' nene aza numudo' namado' ve monovote do soto' molo do lisihe' ogo lihime lemeline' gamene molo neive. Ido' a'mine gameneu' goni' gelelive nene do kegeso hulo-dine'. Ido' a'mine do kegese-dive ma nene neive li numudo' namado' ve gililizave lo hilinguti' do ote-davo neive.

32 Paulo' aza hele noloninguti' otaakumu' lavo gilii ve linge ma nete gize abelenga likevo malite nene gamene ma a'mine gamazi lanivo gohi gelelone li lani'. 33 Ne'mine likevo Paulo' aza hulo-ngedo lemo vine'. 34 Vavo evene' linge nene ezela vi gi'mizi Izesu'nimu' line' gamazi nene gili ele'vole' ani'. Gili ele'vole' angu' Aleopago gololo' kanisole minaa' anguti' ve ma gulive Dionisiokisi gele ele'vole' ine'. Ido' vene' ma gulive Damalikisi ido' linge masi gili ele'vole' ani' ve.

Copyright information for `ASO