Acts 2

O'moso'mi Sikalahu' Lemo Ani' Gamazi

Zuda veliti avo'ningine O'moso'mo ise'ine izingumu' gili minaa' ani' holise' nene osu' lavo neloti' salele seveni ogo vavo noso' nite' api' igi di naa' ani' holise' mo ogavo Izesu' evenele zuho ingine numuno hamoku' ma mulise mili nizavo hepe' naba amuzo'vesi gugu laa' neine' ne'mine Okulumokuti' nene lite' mate' lo gugu lo lemavo gugu line' ne'mo minani' numungu' nene amuzo molani' ve. Ne'mine ogavo ningi nizavo olo' vele gele vine' nene soto' pizo evene' godo'nido' hamo' hamo' mine hutile' ogo minavo O'moso'mi sikalahu' ne'mo lu'ningu' lemo gono do do lapa nomine' o-ngedavo ato ato' gamazi gilamani' gamaziuti' api' igi li'mi vani'.

Ti' igi nizavo a'mine gameneu' nene Zuda ve mono' gilaa' ave numudo' namado' ve Zelusalemi ebeta igi mini gugu line' nene gili nemu' mulise mili aposolo ingine gamazi'ninguti' gamazi'ninguti' likevo gili gopo ga'ine gilani'. Gili golize li sizaga li ti' li lani': Mene gamazi nilave ingine nGalilaia misubokotikovo' nizani' ve. Ne nadi' isa leze note gihile izete metetidati' gilune' nene likevo gilune. Laza misubo ato atokuti' none. Palatia ve ido' Mede ve ido' Elame ve ido' Mesopotamia misubouti' ve ido' Zuda ve ido' Kapadokia ve ido' Podo ve ido' Asia ve 10 Piligia ve ido' Pamahilia ve, Aigita ve ido' Libia misubo ebekuti' Kilene ve ido' Loma ebetasi ungunive ne none. 11 Ido' laza Zuda ve gehepeve noube ido' monokumu' Zuda vela do gi'mizunive noube ido' Keleta ve nehe Alabia ve nehe laza muki' gelo leli' noteti' noteti' O'moso'mi ele'vole' sunomu' likevo gelekune. 12 Ne'mine lii golize li gili gopo igi agae, mene nani suno ve li lani'. 13 Ti' li lani'za ve linge ma nete a'mine di ledi mini gize' i-ngidi ti' li lani': Vaini noso gosoho' nisa sipaki igi mini nilave.

Sikalahu' Lemo Angumu' Petolo' Line' Gamazi

14 Sipaki igi mini nilave likevo Petolo' aza gonolomote levenisi ne ote mino gamazi naba lo ti' lo lo-ngimine': Vekizo, lingine Zelusalemi alevesi ido' Zuda ve mukikisi naza gamazi ma lo-lengemeloze. Gatine huli gili minilo. 15 Lengi' nene gili ladani ikeve. Nedenga' naeni kiloku nene olihe aminako me ve ne sipaki amave. 16 Sipaki amani'za soto' neine' initekumu' mene O'moso'mi gamazi lo soto' oga' ive Zoele' luhuvo gizine' ne'mi gihile nene me neive. Ti' lo gize neive:

17 O'moso'mo ti' lo line':

Mino alinge' gamene alitavo Sikalahu'ne evene' muki' lehize-ngedekuvo
a'mine Sikalahu'ne ne'mo nene zatuho' o-ngedavo
gipe alu langa'vopilemo' nete neni' ve'neti' gamazi li soto' igi
li-lingimilisave.
Ido' a'mine Sikalahu'ne ne'mo do soto' o-ngedavo
inite' ato ato' nene goso' vetineliti ve'nido' o molavo
ningika' ningika' navo ozohotinelitesi vamu' ningi'mi vi minilisave.
18 Ee, a'mine gameneu' Sikalahu'ne nene
a'mine gelekele' alu izipe'ne nesi lehize-ngedekuvo
neni' gamazi'ne nene li soto' igi evene' li-ngimilisave.
19 Ido' ne'mine navo hoze okulumo' veletasi ido' misubo gala'mudasi nene
ele'vole' inite' muki' noso molo lengelebizelesuve.
Ado' misubola nene vanisesi olokisi soto' ikesivo
sokile'mo limuso ne'minosa soto' ogavo ningilisave.
20 Ido' Guvelesi ve'mi gamene naba olihe alitamivo
ho' velelo' nene hitavo liti'muso ize mineleseive.
Ido' a'mine'mine ogo ike'nisi nene gulehe' kulehe' lizo
vanise ne'mine geleleseive.
21 Ido' Guvelesi ve'mi gulive di minilizave nene
O'moso'mo do ngu' ize-lengedeleseive lo gize neive.
22 Ne'mine lo Petolo' imine' molo ti' lo line': Isilaele' alevekizo, ma lo-lengemeloze. Gililo. O'moso'mo lingine nezelati' ve ve li ningilizave lo Nasalete ve Izesu'ni do amuzo molo-do hize ele' o-davo ele'vole' nitekisi golize nitekisi ogo noso molani' nene lengi' vovotingu' ine' nemu' gili nizani' ma neive. 23 Eze nene O'moso'mo gozopo' gelo lo huko gele neido' ogo aka elebizo adingu' molani' ve. Adingu' molavo lingine bilani' ve. Ee, lingine likevo biluva've gamazi gilamavete lohoto' zalo' nilidunu' bilikevo hiline'. 24 Ne'mine ikeni'za gonoso milaa' angu' mine gili' lamiline' ogavo nemu' mulumo gelo hilinguti' O'moso'mo do ote-dine' ve. 25 Davidi' ezemu' ti' lo gizine' ve:

Guvelesi ve nezesi gamene gamene minaa' neive lo
a'mine nene ga'neu' soto' o neivo naza gele minaa' uvoni' ve.
Aza inite' mali'mo do goloso o-nedalive lo neni' a'ne zamela minaa' neive.
26 Nemu' lu'neu' lamine' gelo
mulu'neu' gulumo avile lisavo nolize gamazi noluve.
O'moso'ne make, vo'nehaza nene hilavetida minelive lo mudise hulamolosane.
Ido' lu'ne geita molo gelekele' o-giduve neni' nene hulo-nedanivo
oko'ne geleso unuvo amoloseive.
Nemu' nene gele hamo' ogo hongu lo gizebo ogo minelesuve.
28 Naza minevo' minevo' ogo lu'ne gosoho' do mineloni' aka nene nelebizanivo
gezesi minusidi'mo lu'neu' gulumo avile liso minavo
ne'minovo' minelesuve lo gizine' ve.
29 Neni' zuhokizo, naza avoteho Davidi'nimu' nene mo lamineto' lo-lengemelesuve. Aza helavo galese izi-dani' ve. Gonoso galese've nene idisesi soto' neivo ningo minaa' noune. 30 Ne neiha aza O'moso'mi gamazi lo soto' oga' ive polohete minine' nenako a'mine line' gamazi nene O'moso'mo gamazi've do amuzo molo lo huko-dine' gamazimu' gelo mino line' ve. Ado' ezelo' medelo eze a'vopilemo' zuhouti' mali'mo eze mo'mosi've dalive lo lo huko-dingumu' gele minosa line' ve. 31 Ee, aza alinge' soto' iline' initekumu' gele mino O'moso'mo do lu' izelive lo imiselelesa live nene hilinguti' do ote-delingumu' line' ve. Ado' O'moso'mo a'mine ve hilavetida mudise hulo-damivo oko'no gelesamilive line' nene O'moso'mo hilinguti' do ote-delingumu' line' ve. 32 O'moso'mo Izesu'ni do ote-dine' nene eze izipahala zuho laza vete gihiletunu' ninge none' ma neive. 33 Ido' meleho O'moso'mo evene' muki' livile' ogo dize minive ve li ningilizave lo ana zamela ele'mize molo gozopo' lo huko-dido' e'meto eze Sikalahu've emavo lehize-lidine'. Ido' idise gili ningi nizani' inite' ado' eze Sikalahu've lehize-lidine' nene gili ningi nizave. 34 Ido' Davidi' aza oko'no losuvosi Okulumoku' dizamine'za aza gamazi ti' lo line':

Vozeu' ve'mo aza Guve'nesi vemu' ti' lo lo-imine':
Gaza evene' nabavo' minaa' ada a'ne hulaa' uvoda minezo.
35 Mine do vo nanivo biluvaka nete gelekele' i-gidi minilizave lo
gizengauko do'mo leme-ngedelesuve line'.
36 Nemu' lingine Isilaele' zuho muki' gili lamine' ilo. A'mine ve ma lingine bilikevo hilive Izesu' nene O'moso'mo Guvelesi ve ve lo ido' do lu' izelive imiselelesa live ve lo ele'mize molavo neive lo Petolo' lo-ngimine'.

37 Ne'mine lavo evene' gili mulu'ine hukavo mulumo gili Petolo' ve aposolo linge ma nesi longo' i-ngidi ti' li lani': Zogole zuhokizo, nadi' okunivo lamine' ilive. 38 Ne'mine likevo Petolo' ti' lo lo-ngimine': O'moso'mo lihimete hulo-ledelingumu' ve li lingine hamo' hamo' igi lutine di velepe' izilo. Ne'mine ikevo laza Izesu' Kilisito' gulivelo' mono' noso holo-lengedekunivo O'moso'mi Sikalahu've nene lehize-lengedeleseive. 39 Linginesi langa'vopilemo' hota nizavesi elese molo-lengemavo aliza aleve muki' nene eze Sikalahu've lehize-lengedelesa lo huko neine' ma ve. 40 Petolo' aza ti' lo lo-ngemosa gamazi muki' imine' molo ga'ine do ti' lo lo-ngimine': Evene' zuho goloso minani' mene O'moso'mo goni' o-ngedo ngebelelingu' nene lengikisi lengebelamivo lukuvo nalizangisi olovo' ilo lo lo-ngimine'. 41 Ti' lo lo-ngemavo eze gamazi gili dave gohi tili tauseni (3,000) nene imine' milavo mono' noso hili-ngidani' ve.

Izesu'nimu' Gili Ele'vole' Avelite Igi Mili Minani' Monovoli'mi Gamazi've

42 Ne'mine ogavo gamene gamene amuzo mili di gese' igi gili hamo' igi aposolo apizi ngimani' gamazi gili haza noso' nitekisi lebeni initekisi ni O'mosola li minaa' ani'. 43 Ti' igi nizavo aposolo ingine O'moso'mi amuzo ningilizave li ei' velemu' ato ato' initekisi golize nitekisi di soto' ikevo evene' muki' ngehelele izivo minani'. 44 Izesu'ni gili imaa' ave ingine muki' hamo' zuho lili' igi inite' mata' di minani' nene mukito' inite' ogavo di minani' ve. 45 Misubo'ine nehe heneni nganeni'ine nehe nene meni hizi a'midoti' moni dani' nene inite'ine nomivo vise' iga' ave ize' mili engi' votigilelo' ngimani' ve. 46 Lu'ine ga'ine mili hamo' igi mono' numuno nabau' mulise milaa' ani'. Ido' numungu' numungu' di gese' ika' ika' igi mini noso' nite' naa' ani' nene mulu'ningu' lamine' gili balu i-ngidi 47 ni mini O'mosola opo'ni li minikevo evene' muki' ningi lamine' i-ngidani'. Ne'mine navo Guvelesi ve ne'mo gamene gamene evene' gohi ma do ngu' izo ei' evenele zuhou' do imine' molo-ngedaa' ine' ve.

Copyright information for `ASO