Acts 20

Paulo' Makedonia Misuboukisi Ido' Akaia Misuboukisi Vine' Gamazi

Gamazi gulugulunga lani' nene osu' lavo Paulo' aza Izesu' zuho asi lo do avito' o-ngedo ga'ine do do amuzo molo-ngede mese' aseka lo-ngedo hulo-ngedo Makedonia misubouko vine'. Ido' a'mine misubou' mono Izesu' evenele zuho a'mingu' mini'mi monani' nene gamazi vai' lo-ngemo monoku' amuzo do molo-ngedo'mo vo Akaia misubo ado' gulive ngomo nGiliki misubouko vo heteline'. Hetelo nela ike'ni setohamo mino Silia misubouko volosa sipiu' dizelesa neivo Zuda vete gili gohoni milani'. Paulo' nene gelo Makedonia misubouko gohi do tine' molo volosa giline'. Ne'mine lo gelo Belia ebekuti' Pilo' gipele Sopatolo' ve ido' Tesalonika ebekuti' Alisitako' ve ido' Sekudo' ve ido' Delebe ebetoti' Gaio' ve ido' Timoteo' ve ido' Asia misuboukoti' Tikiko' ve ido' Tolohimo' ve evene' ne'mine Paulolesi makato' e'metavo vi Makedonia misubou' heteli Paulo' aza a'mido' minavo ezesi maka' monave muki' nene gomu' mili vi Toloasi numuda di gese' igi lelikumu' gizebo igi minani'. O'moso'mo Zuda veti avo'ningine ise'ine izingumu' gili mini lulu izamine' beleti naa' ani' gamene osu' lavo laza Paulolesi ido' evene' masi Hilipi ebe' hulo vo sipiu' dizo guvo noso huko'mo novunivo gamene faef ogo novivo Toloasi ebeta vo hetelune. Hetelo a'mido' salele hamo' minune.

Paulo' Aza Toloasi Ebeku' Mono' Lo-ngemo Ido' Eutiko'nisi Hilinguti' Do Ote-dine' Gamazi

Mino salele gosoho' minelone' gamene api' ine' holuka' nene noso' nite' nalone lo do gese' ogo nonivo Paulo' aza nene aize' go' lavo volove lo nogelo mono' gamazi lo-ngeme' ngeme' ogo neivo liti'muso mudise lipele' iline'. Numuno veleto' lulo mau' minuningu' nene lamu muki' gulumo ogo minine'. Ne'mino neivo gipe goso've ma minine' gulive Eutiko' aza nene Paulo' mono' ha'na ha'na lavo viniduvato' mino vele hihi' ongumangu ogo minidoti' okise ongo helo imine' mili gizi'mi dizani' numuno lumu naba tili ne'mi viniduvatoti' velehe' lemo misubou' helavo di oti ningani' nene helavo 10 Paulo' numunguti' leme heta ogo gipe ne dizo abuti' izo noongo evene' ti' lo lo-ngimine': Lingine ive nama igi muludine hukamivo. Ve ne haza neive. 11 Ne'mine lo numunguko dizo lebeni inite' ngemo noso' nite' ngomo nani'. 12 Go' lavo Paulo' aza hulo-ngedo vine'. Novivo evene' ingine gipe vele gizo otavo mulu'ningu' lamine' gili numu'veuko ele'mizi di vani'.

Paulolesi Toloasi Ebe' Huli Mileto Ebeku' Vani' Gamazi

13 Ne'mine ikevo Paulo' aza nene misubou' aka volove lo vavo laza sipiu' dizo Paulo'ni sipiu' ele'mize molalosa Aso ebeto' vo nonivo asi've misubou' ogo heteline'. 14 Hetelavo lezesi do bizo sipiu' ele'mize molo maka' vo Mitilene ebeku' hetelune. 15 Neloti' novunivo akalo' go' lavo Kio ailani gahevela gohi huko novunivo go' lavo Samo ailaniu' vo hetelune. Hetelo ongo oto Eheso ebe' nene ivile' ogo vo Mileto ebeta hetelune. 16 Ido' Eheso ebe' ivile' une' nene Paulo' aza Zuda veti holise' gamene Pedekosi ve langu' nene O'moso'mi Sikalahu' limine' gamene aliteline' nene Zelusalemi numuno ebeta geto volone' aka neivo ma a'mida vo nouvo a'mine gamene aliteleseive lo amuzo molo geloo Eheso ebeta volone' nene a'mine Asia misubola mino gamene ha'na hulokunivo a'mine Pedekosi gamene gomu' ogo vavo alinge' Zelusalemi numuno ebeta nene vo hetelalone lo gelo Eheso ebeta vamo ivile' ogo volone lavo ne'mine une' ve.

Paulo' Mo Volosa Eheso Ebetoti' Mono' Gizebo Ve Gamazi Lo-ngimine' Gamazi

17 Hetelo elese ve ngimiselavo Eheso ebeta vi mono' gizebo ve linge ma ngele'mizi ani'. 18 Eita igi hetelikevo Paulo' ti' lo lo-ngimine': Naza Asia misubouko gana' ogo hetelo lengikisi mine'mo dizo minuvoni' gameneu' nene gamene gamene ogo molo minaa' uvoni' monovo'ne nene lingine ningi gili nizave. 19 Naza ne'mino minaa' uvoni' ma neive: Haza ve ne'mine gelo naza hokolize' amo Guvelesi ve gelekele' o-do gono've do minuvoni' ve. Linginela a'mine gono've nodo mulumotine geleka' ogosa ive nama ogo minaa' uvoni' ma ve. Ido' Zuda ve nenikumu' lovo gizi hukadi'mo mulumo nite' gasavasi kise mino gono've haza do minuvoni' ma ve. 20 Ne'mine ogo lengele'mize lamine' iline' gamazi nene ma hite-lengedesa'muvoni' ma neive. A'mine mono' gamazi ma nene lo soto' ogo evene' mukiliti ve'nidokisi ido' numudingu' numudingukisi hamo' hamo' lo-lengemaa' uvoni' ve. 21 Zuda vesi nGiliki vesi lutine di velepe' izi goloso nite' huli O'mosola vi gi'mizi Guvetesi ve Izesu'nimu' gili ele'vole' ilizave lo lo gatine gatine ogo minaa' uvoni' ma neive. 22 Ido' O'moso'mi Sikalahu' ne'mo nala' o-nedo gelelehe' nonidine' gelavo idi'nise nene Zelusalemi numuda novuve. Holila vo heteluvo nanite' soto' o nemelihe lo ne'mi monovo gele vevesamuvoni'za 23 O'moso'mi Sikalahuli'mo nene numudo' namado' vetingu' nomonuvo galapuso nalali'mo ido' geni'vesi initelite nenikumu' gizebo i nizave lo lo-nemaa' neive. 24 Nemu' nene naza ogo molo nouvo nezela nanite' soto' ilihe a'mine initekumu' giluvo ha nite' neive. Nemu' nene neze nemeni'ne nene do gili' lo minamo Guvelesi ve Izesu' aza O'moso'mo nasahili' o-ledo do gatulo o-ledaa' neine' ne'mi gamazi lamine' nene lo soto soto' o-ngemo mineline lo gono nimine' nemukovo' gele mino a'mine gono nene do osu' lolosavo' nene gele nouve.

25 Ido' gililo. O'moso'mo gizebo o-ledaa' neine' aka ne'mi monovo lo soto' ogo vovotingu' minevo' dovo' uvo lingine ningani' ma neine'za idi'nise gohi go'ne ve'nelo' ningamilisave losa gele nouve. 26 Idi'nise nene lovo' ngolosevo' ogo lo-lengemekuvo gililo. Lengikuti' mali'mo labuluvo iline' nene ne'mi lihime nenita minamoloseive. 27 Naza nene oko'ne huko nehelele izamivo O'moso'mi galau' neine' nesi moda lo-lengeme osu' laa' uvoni' ma neive. 28 Langisetine okodine lutine gizebo niigi Izesu' evenele zuho nesi gizebo i-ngidilo. O'moso'mi Sikalahu' ne'mo engi' gizebo ve minilizave lo lengele'mize molani'. Ido' lengele'mize molani' nene O'moso'mo vono emekive'mi vaniseli'mo meni hizivo ei' ve lo dani' evenele zuho nene lingine gizebo i-ngidilizave lo lengele'mize molani'. Nemu' gizebo lamine' i-ngidilo. 29 Naza hulo-lengedekuvo evene' malite gulo hadene lili' igi vovotingu' heteli Izesu' evenele zuho lutine di gopo i-lingidilisave losa gele nouve. 30 Ido' lengikuti' evene' malite oti gopo gamazi li Izesu' evenele zuho lelita le'metilizave li muludingu' hizilisave. 31 Nemu' nene langisetine okodine gizebo lamine' igi minilo. Kilisimasi setohamo' ogo novivo gamene gamene go' laneme go' laneme ive nama ogo lengi' hamo' hamo' nene gatine doo gamazi lo-lengemaa' uvoni' nene hulosa'muvoni' ma neive. Nemu' lingine gili minilo. 32 Ido' idi'nise O'moso'mo hize ele' o-lengedelive lo eze anau' nomuluve. Aza nene nasahili' o-ledaa' neine' ne'mi gamazi'vetunu' lutine do ngi lo-lengedo eze evenele zuho do kegeso molave mukikumu' salani inite' molavo neinguti' nene ma lengemeleseive. 33 Ve mali'mi moni henenilokisi upuho' ogo dalosa amuvoni' ma neive. 34 Langisetine ningi gili nizave. Neni' oko'nelo' nitekisi ido' nezesi maka' gono daa' univeti oko'nido' initekisi nene na'nise a'netunukovo' gono do do soto' oga' uvoni' ma ve. 35 Ne'mine ogo aka lengelebizuvoni' ma neive. Laza Guvetesi ve Izesu line' gamazi mamu' gelo gono amuzo molo do evene' gulupese hize ele' o-ngedelone lo ne'mi aka'vesi lengelebize osu' lo nouvoni' ma neive. Izesu' line' gamazi nene ne'mino neive: Inite' limikevo dosa muludeu' lamine' gelelesune. Ne neiha inite' ngemeko nemu' muludeu' lamine' gilune' ne'mo nene ivile' o neive.

36 Paulo' ti' lo lo hulo ezesi inginesi obuvo'ine hizi O'mosola lani'. 37 O'mosola li ive nama igi ingine Paulo'ni abuti' izi golo ili nani'. 38 Ido' ive nama ani' nene Paulo' gomu' lo-ngimine' gamazi ado' ingine eze gololo' gohi ma ningamilisave lo lo-ngimine' gamazimu' gili mulumo naba gili ive nama ani'. Ne'mine igi sipiu' dizo vilive li ele'mizi limani' ve.

Copyright information for `ASO