Acts 28

Paulole Melita Ailanilo' Dizani' Gamazi

Kelala vo osu' lokunivo ailani gulive Melita ve likevo gilune'. A'mine ailaniuti' aleve ingine leze muki' di lamine' i-lidi nasahili' i-lidani'. Goline izo hepe' lolavo olo' gizi-lidikevo nolahizunivo Paulo' aza olo' ngomo ngomo nubuho ogo oloku' nohulivo a'mine olokuti' gosihe' ma olokumu' golise higusagu izo lemo ogo Paulo' analo' ongoho zu' lo minine'. Ne'mine ogavo a'midoti' aleve ingine gosihe' ne'mo Paulo' analo' ongoho zu' lo minine' nene ningi li volelo' melo' igi Paulo'nimu' ti' li gili lani': Evene' ngebele hulo' hulo' ve noloseinako guvo nosou' lemo helamo kelala haza dizavo lihime apase-ngedaa' neine' o'moso niteli'mo aza velesi minalive lavo gosiheli'mo belanako heleleseive. Ne'mine li nilavo Paulo' aza gosihe' do hibi' ize hulavo oloku' lemavo gosiheli'mo belamine' gelo haza minine'. Neivo ingine lulu izelihe li ido' lemo pou' lo ongo helelihe li gizebo igi ningi minani'. Ningi nizavo gamene ha'na ogo novivo ne'mine mana'mine amivo lu'ine di velepe' izi ti' li lani': Mene ve nene o'moso inite' noloseive.

Ido' a'mine aleveti ve naba'ine gulive Pupilio' ne'mi misubo nene leli' minune' gahevela minine'. Nemu' nene aza lele'mize molo zogo lemo nasahili' o-lidivo ei' numu'veu' minune' nene gamene setohamo minune. Nonivo Pupilio' meleho aza oko'nou' olo' lo iseveti' vovo' vovo' ivo gizeho' numuno ogo neivo Paulo' aza neida dizo O'mosola lo ana hito do lamine' o-dine'. Ne'mine ogavo a'mine ailaniu' evene' inite' gizi dave muki' ingine nonida igi a'mine'mine igi lamine' ani'. 10 Nemu' nene ingine mulu'ningu' lamine' gili inite' muki' lehizi-lidi volone' gamene alitavo akalokumu' inite' di va'va' i-lidi sipiu' di mili' mili' i-lidani' ve.

Paulo' Loma Ebeta Vo Heteline' Gamazi

11 A'mine ailani ogo heteluningu' nene sipi gohi ma minine'. A'mine sipi nene Alekisadilia ebetati' ogavo hepe' naba eleli gamene alitavo nemu' golise gizebo ogo minine'. Ido' a'mine sipilo' nene engi' o'moso nite'ine'mi lobe' izipahala avazaha igi lili' igi di badikani' minine'. Ne neivo lazasi nonivo ike'ni setohamo lomo helavo a'mine sipiu' dizo vune. 12 Guvo noso huko vo Silakusa ebeta hetelune. Hetelo a'mido' numuno setohamo ungune. 13 Ongo gohi sipiu' dizo a'mine ebe' hulo hepeli'mo sipi do zovo' zava' ize-divo novivo Legio ebeta vo hetelune. A'mido' numuno hamo' ongo go' lavo mehedelati' hepeli'mo hilulu' o-do vivo akalo' numuno seta' ongo Puteoli ebeta vo hetelune. 14 Hetelo sipiuti' lemo Izesu' evenele zuho linge ma ningune. A'minete minelone likevo engikisi salele hamo' makato' minune'. Mino gohi oto vo Loma ebe' do avito' une. 15 Akalo' novunivo Izesu' evenele zuho Loma ebeku' minani' nete leli' une' gamazi gili lelikisi votene' olone li ani'. Ne'mine ikevo linge masi votene' une' nene Apio Maketilo' votene' une'. Ido' linge masi votene' une' nene ebe' gulive Venenga Velite Meni Hizi Ingaa' Ani' Numuno Setohamo ve laa' ani' malo' votene' une' ve. Paulo' aza eveneto' ningine' nemu' O'moso opo'ni lo mulunou' lamine' gilidi'mo ngi lo-dine'. 16 Loma ebeta hetelekunivo ngamani aleve Paulo'ni gili imikevo ami mali'mo gizebo o-divo engikovo' numuno mau' ingi minasine' ve.

Paulo' Loma Ebeku' Mono' Lo-ngimine' Gamazi

17 Paulo' nelo' numuno setohamo ongo Zuda ve Loma ebeku' minani' neti gizebo ve Paulo' elese molo-ngemavo ikevo Paulo' aza ti' lo lo-ngimine': Neze zuhokizo, naza leze evenete zuho inite' goloso ma do-ngedamo ido' avotemoti monovo danavasi do goloso amuvoni'za ingine hazalo' gopo Loma veti a'ningu' mili-nidikevo Zelusalemi numuda nala' nimani' ve. 18 Ne'mine igi goni' i-nidi lihime've apaso bele helelone' votigilelo' lihime dahe damihe li vise' aha aha nomivo nala' numunguti' kuluhizi-nidilisa lani'za 19 Zuda vete o've likevo naza neze zuhomu' gamazi mela do ogo lolove losa amuvoni'za haza mineloni' aka gohi ma nomivoo Loma veti guve'inesi ve naba'mo goni'ne gelelive lo luvoni' ve. 20 Nemu' nene ninge-lengedo linginesi lo volelo' melo' olone lo elese molo lengemekuvo nave. Ido' Isilaele' aleve none' laza ve ma ogo do lamine' o-ledeleseive lo gelo ezemu' gizebo oga' ube. A'mine ve mo ogave lo lokuvo ingine ataize li nemu' nala' mene a'nelo' izi-nidikevo nouve. 21 Lavo ingine ti' li li-imani': Volela Zudaia misubou' minavete ingine gei' gamazika li gizi luhuvo nite' limamave. Ido' evene' ma a'midati' igi gei' monovomu' gamazi goloso ma lavo gelamune. 22 Ido' numudo' namado' evene' ingine gei' e'metaa' ane' mono' aka nemu' divi' ledivi' iga' nani' nene mo gele none. Nemu' nene gei' gaka gelaa' nane' nene gei' vekati' lanivo gelelone losa nolune.

23 Ne'mine li gamene milani' nene alitavo Zuda ve muki' nene Paulo' numu'veu' igi di gese' ani'. Ne'mine ikevo Paulo' aza nedenga' api' ogo O'moso'mo gizebo o-ledaa' neine' ne'mi gamazi aka've lo soto' ogo lo ngolo' lo lo-ngemo neivo liti'muso izine'. Nolo-ngemo Mose' lo huko line' gamazisi O'moso'mi gamazi li soto' iga' ave poloheteliti gamazisi gizikani' gamazi nene gato nongemoo Izesu' monovo've ngelebizo ezemu' gili ele'vole' ilizave lo ga'ine dani'. 24 Ne'mine ogavo linge nene gamazi've gili dikevo linge nete gili hulani'. 25 Ne'mine igi di bizi lani' gamazi'ine ato ato' vavo vilisa navo Paulo' gamazi hamo' ti' lo lo-ngimine': O'moso'mi Sikalahu' ne'mo do ote-davo O'moso'mi gamazi lo soto' oga' ive Isaia' aza O'moso'mo lo-imine' gamazi nene gamazi gihile lamine' avotingine ti' lo lo-ngimine':

26 Gaza voo mene zuho Zuda ve nizangu' ti' lo lo-ngemezo:
Lingine gilii gilii gililizaha gili lamine' amilisave.
Ido' ningii ningii ningilizaha ningi lamine' amilisave.
27 Ingine lu'ine hize tilavo ga'ine nunu lo
ve'ine likavo ve'inedunu' inite' ma ningisa'mave.
Ga'inedunu' nene inite' ma gili hehe lisa'mave.
Ido' lu'inedunu' nene gamazi monovo gili lamine' isa'mave.
Ingine ne'mine amadiniko lu'ine di velepe' izikevo
ha do lamine' o-ngiduvodine lo line'.
28 Nemu' nene lo-lengemeloze. Gililo. O'moso'mo do lu' izaa' aka viline' ne'mi gamazi nene lingine o've likevo O'moso'mo heta ato' ve lo-ngemeline lo lo-nemavo engita do novuve. Ingine gili lamine' ilisave.

30 Ne'mine lo lo-ngemavo vikevo Paulo' nene kilisimasi seta' Loma ebeku' mino numuno asi've meni hizo numuno me'ningine meni ngemeka' ngemeka' ogo a'mingu' ongo minine'. Neivo evene' muki' ezela igi vigi igi minani' nene ngele'mize lamine' ogo 31 O'moso'mo gizebo o-ledaa' neine' ne'mi aka've lo soto' o ngemoo Guvelesi ve Izesu' Kilisito' ei' monovo apize ngemo mino a'mine gamazi lovo' kiselevo' ogo lo-ngemo neivo Loma ve ingine Paulo'ni aka gizi-damani' ve.

Copyright information for `ASO