Acts 6

Evene' Hize Ele' Oga' Gonolo' Gizebo Ve Seveni Di Oti-ngidani' Gamazi

A'mine gameneu' nene Izesu' evenele zuho mo imine' mili'mi nivavo engikuti' evene' ma ado' nGiliki eveneliti gamazi'ninguti' laa' ave nete ti' li li mulu'ningu' goloso gilani'. Gamene gamene noso' nite' ize' mili ngimaa' angu' leze muliseuti' minani' geto' vene' ne ningi huli-ngidi noso' nite' mili-ngidisa'mave li mulu'ningu' goloso gili Zuda veti gamazi'ninguti' laa' ave ngelemilisa lani'. Ne'mine ikevo aposolo tuvelu ingine Izesu' evenele zuho muki' vise li di mulise mili-ngidi ti' li li-ngimani': Laza noso' nite' ize' molo ngemo minelesa O'moso'mi gamazi lo-ngemaa' noune' nene hulolone' ne edamoloseize. Leze zuhokizo, lingine lengikuti' evene' seveni O'moso'mi Sikalahu' gili imi nizavo lu'ningu' gono daa' neive ido' gamazi noso'vesi laminekovo' laa' ave evene' ningi gamangi mili-ngidaa' ave di soto' ikevo laza gono mene dalizave lo ngele'mize molalone. Ido' ne'mine ogo la'lise O'moso opo'ni lo ido' evene' O'moso'mi gamazi lo-ngemo lute hamo' minavo amuzo molo minelone. Likevo Izesu' evenele zuho muki' gamazi lamine' ve li Setehano' nene O'mosola amuzo molo gele emo minavo Sikalahu've'mo lulou' vauve elo gono davo minive nesi ido' Hilipokisi ido' Polokolokisi ido' Nikanolokisi ido' Timonakisi ido' Palamenakisi ido' Nikolao' ado' Adiokia ebekuti' monokumu' Zuda vela gi'mizive nesi nene di kegesi-ngidi aposolo nizada ngele'mizi milikevo ingine a'mine gono ngimilisa O'mosola li a'ine godo'nido' hitani' ve.

Ne'mine ikevo O'moso'mi gamazi hutile' ogo novivo Zelusalemi ebeta Izesu' evenele zuho vanu hizi imine' mili muki' goloso soto' navo eveneto' medeli mini O'moso inite' lehizi-daa' ave linge muki' ma Izesu'ni gili imi gamazi've gili dani' ve.

Setehano'ni Analo' Di Goni' I-dani' Gamazi

Ido' O'moso'mo Setehano'ni ninge lamine' ogo hize ele' o-do amuzo muki' emavo O'moso'mi amuzo ningilizave lo eveneta ato ato' suno doo do soto' ogo minine'. Ne'mine ine'za evene' malite oti gamazi lido' nene e'menga li-imani'. Ingine Zuda veti mono' mulise hamokuti' minani' ve. Ado' goboni gelekele' ve minanguti' kuluhizi-ngidikevo minaveliti mulise'ine ve languti' nene minani' ve. Engikuti' ve ma Kilene misubouti' ve minavo ido' ve ma Alekisadalia ebekuti' ve minavo ve ma Kilikia misubouti' ve minavo ve ma Asia misubouti' ve minavo minani' ve. Ingine oti Setehano' gamazi lido' nene e'menga li-imani'za 10 Sikalahu' ne'mo hize ele' o-davo Setehano' gamazi laminekovo' lavo ingine eze gamazi ngeli ivile' amilizani' ogavo 11 evene' ma di ezemu' soza gamazi li-ngimilizani' nene suno' li-ngimisa di oti-ngidikevo ingine me ve nene Mose'nisi O'mososi dovo ledevo' ogo gamazi nolivo gelekune li lani'. 12 Likevo ingine haza vesi gizebo ve'inesi mono' apizi ngimaa' avesi go'ine izi di upuho' i-ngidikevo lite' mate' li vi analo' di engi' kanisole aleve nabala gonito' ele'mizi vani'. 13 Ele'mizi vikevo sakupo gamazi laa' ave soza li ti' li lani': Me ve nene mono' ebe' memukisi O'moso'mo lavo Mose' lo huko-lidine' gamazi mamukisi dovo ledevo' ogo lo minaa' neive. 14 Aza ti' lo gamazi nolivo gele noune' ma ve. Nasalete ve Izesu' aza ebe' mene do goloso ogo Mose' gize limine' gamazilo' ogo molo oga' une' monovo nene do gopo' napa' oloseive line' ve li lani'. 15 Likevo kanisole numungu' minave muki' nete vonu' bili ningani' nene golo velelo' ne angeloli'mi golo vele gele neivo ningani' ve.

Copyright information for `ASO