Acts 7

Setehano' Ei' Monovo'vemu' Lo-ngimine' Gamazi

Ne'mine ogavo eveneto' medelo mino O'moso inite' lehize-daa' ive naba'mo ti' lo longo' o-dine': Mene gamazi nilani' nene mo lamine' nehe. Lavo Setehano' ti' lo lo-imine': Lingine gono'nemote ido' neze zuho gamazi lokuvo gililo. Avoteho Abalahamu' olihe Halana' misubouko vo minamo Mesopotamia misubouko ha neivo labana'vesi minaa' neine' O'moso ne'mo soto' omo ti' lo lo-imine': Geze misubokasi ido' geze zuhosi nene hulo-ngedo misubo ma gelebizeloni' nelo' nene vo mineline. Lavo gelo a'mine Kaladia' misubo hulo Halana' misubou' ne vo minine'. A'mida mino meleho helavo Abalahamu' aza O'moso'mo lavo leli' none' misubou' meuko nene ani' ve. Ogavo do goto' misubo lolo' ogo minamine'. O'moso'mo misubo ngomo ha nitekisi ma emamine'. Ee, misubo ma emamine'za azasi ido' a'vopilemo' zuhosi di minilizani' misubo ve lo salani gamazi lo-emo a'mine misubo lengemelove lo lo huko lo-dine' ve. Ido' a'mine ga'vopilemo' zuhosi lengemelove lo line' gameneu' nene Abalahamu' aza izipahala ma nomivo minine' ve. Ido' a'mine gamazi lo gamazi gohi ma ti' lo lo-imine': Ga'vopilemo' vi misubo mala minikevo a'mida goboni izipe lili' i-ngidi mulumo gono ngimi di goloso i-ngidi nizavo kilisimasi fo hadeti (400) ogo voloseive line'. Ne'mine lo gohi imine' molo ti' lo line': Kilisimasi ne'mine ogo vavo a'mine goboni izipe lili' i-ngidiliza aleve nene na'nise'ne goni' o-ngedelesuve. Ne'mine okuvo ngimiselikevo ga'vopilemo' me misubouko di tine' mili igi nopo'ni li gelekele' i-nidi minilizave lo lo-imine'. Ido' O'moso'mo salani molo-ngidine' inite' dalizave eze zuhouti' minilizangumu' nene Abalahamukisi ido' ei' a'vopilemo' zuhosi engi' gipe'ine oko'ine lolovo huki huli-ngidi O'moso'mi noso mili-ngidilizave lo lo huko lo-dine' ve. Ido' lo huko-davo gipele Isaka' soto' idoti' nene gamene seveni ogo vavo eiti malo' ne O'moso'mi noso molo-dine'. Molo-davo Isaka' aza mino naba ogo Zakobo'ni gidine'. Ido' Zakobo' ne'mo avotemotine tuvelu ne gidine' ve.

Ne'mine ogavo a'mine avotemote ingine naku'ine ma Zosehe'nimu' livile' ogalinako li lukehe bili evene' ma ngimisa ei' oko'noloti' meni dani'. Dikevo a'mine ve nete ele'mizi Aigita misubosuko vani'za O'moso'mo Zosehe'nisi mininako ne'mo 10 mulumo alumo nite' muki' soto' o-dingu' nene gizebo lamine' o-davo goloso amo minine'. Ne'mine ogo minavo Aigita misubou' veti guve'inesi ve naba Halao' aza Zosehe'ni ningine' gamazi noso'vesivo' linako ninge lamine' o-do ne eze zuho ido' Aigita aleve mukikisi do nubuho ogo mukiliti guve'inesi ve minelive lo ele'mize molani'. 11 Ele'mize molavo neivo Aigita misuboukisi Kanaha misuboukisi ga'na naba soto' ogavo evene' muki' ga'nali'mo goloso ani'. Goloso ikevo avotemotesi noso' nitekumu' vise' ani'. 12 Ne'mine igi mini alinge' evene' malite Aigita misubou' noso' nite' neive likevo Zakobo' gelo gana' api' ogo avotemotine ngimiselavo vi tine' mili ani'. 13 Ido' gohi Aigita misubola vani' gameneu' nene ingine Zosehe'nimu' Aigita ve nehe li ha gili nizavo aza nakunotine Zosehe' ma ne nouve lo uvolomotine lo-ngemo Halao' neida ngele'mizo vavo engikumu' nene Zosehe' zuho ve lo Halao' ningo giline'. 14 Ne'mine ogavo Zosehe' melehine Zakobo'nisi eze zuho mukikisi elese molo ngemavo evene' sevedi faef (75) ne'mine Zakobokisi Aigita misubouko vi minani'. 15 Vi mini Zakobo' helavo ido' leli' avotemote minave ei' gipele zuho nesi hilika' hilika' igi osu' lani'. 16 Hilikevo engi' izipaha'ine zuho nete gonoso'ine nene di vi Sekemi numuda galese izi-ngidani'. Ado' Abalahamu' aza Hamola' zuho meni ngemo gonoso ebe' meni hizingu' nene galese izi-ngidani' ve.

17 Ne'mine lo Setehano' imine' molo ti' lo lo-ngimine': Ne'mine ikevo mino O'moso'mo Abalahamu'ni lo huko-dine' gamazi gihile izeline' gamene avito' ogavo leze avotemote zuho Aigita misubou' mini vanu hizi mine hutile' ani'. 18 A'mine gamene neu' nene guve'inesi ve naba gohi ato' ma Zosehe'nimu' gelamive Aigita misuboko soto' ogo minine'. 19 A'mine Aigita ve aza leze zuho go'ine izo do goloso o-ngedo hililizave lo izipe namuno heta di huli' hulikovo' i-ngidilo lavo di huli' hulikovo' i-ngidaa' avo hilani'. 20 A'mine gameneu' nene Mose' soto' ine'. O'moso'mo ningine' nene noso'vesi izipe lamine' minine'. Minavo melehi numungu' gizebo i-di nizavo 21 ike'ni seto hamo' vavo di heta huli-dikevo Halao' aluvo'mo ningo do ti' ogo ei' gidine' gelavo gizebo o-dine'. 22 Gizebo o-do neivo Aigita aleve ningi gilani' inite' mukikumu' apizi li-imikevo gele osu' lo amuzo ve lolo' ogo mino gamazi line' nehe ido' inite' ogo molo ine' nehe muki' inite' nene amuzovo' molo minine' ve.

23 Ne'mine ogo mino kilisimasi've nene foti (40) ogo vavo eze zuho Isilaele' aleve vo ninge-ngedelove lo gelo lulo otavo vine'. 24 Vo ninge neivo Aigita ve mali'mo Isilaele' ve ma do goloso o-do neivo ningo eze zuho alete molo-do Aigita ve'mo monovo do goloso o-dido' nene golo hizo a'mine Aigita ve nene bele hiline'. 25 Ido' Mose' aza a'mine Aigita ve bele hiline' nene aza ne'mine okuvo neze zuho do ngu' izelove lo O'moso'mo nimiselave li ningi gililizave lo gelo bele hiline'za ingine ne'mine li ningi gilamani' ve. 26 Ongo go' lavo vo Isilaele' ve sita' ma lovo nihizasivo ningo kuku holo-ngedo do hongu lo-ngedelesa ti' lo line': Velizo, hamo' zuho nizasine' nenako ge nebele ne gebele nanimu' nilasive lo line'za 27 eze zuho do goloso o-do minive ne'mo Mose'ni vasa ize-do ti' lo line': Geze nene lelito' gizebo iline lo zaho do ote-gedavo guvekasi ve lolo' ogosa leze gonito' lele'mize nomolane. 28 Gaza ne'mine ogo aize' Aigita ve ma bele helaine' ma'mino nezesi a'mine'mino nebelelesa nolabe. Olo. 29 Ne'mine lavo Mose' aza gelo golise Midiani misubou' vo venenga ve gelo minine'. Mino vene' do gipele sita' gidine' ve.

30 Mino kilisimasi ihe' foti (40) ogo vavo vo Sinae golo ne'mi gizeneu' ebe' hadivelo' neivo za li'nibe hamo' ma mininguti' olo' gulumo ogo neivo a'mine'mi lulou' angelo' ma soto' ogo neivo ningine'. 31 Ningo a'mine initekumu' nanite' soto' neive lo gelo ninge veveselove lo avito' vine'. Avito' vavo a'mine zauti' Guvelesi ve'mi nolo soto' ogo ti' lo line': 32 Naza avamote nopo'ni li gelekele' i-nidaa' ani' O'moso'ine nene nouve. Ado' Abalahamule Isakale Zakobole engi' O'moso'ine nene nouve. Ne'mine lavo Mose' aza gelo luvo luvo izo ningelesa ehelele izine'. 33 Ne'mine ogo neivo Guvelesi ve'mo ti' lo lo-imine': Nolisane' misubo nene do kegeso neni' ve lokuvo neine' nenaze. Gizengalo' nite' nene kuluhizo hulozo. 34 Neze evene'ne zuho Aigita misubou' nizavo Aigita aleve nete goboni mala' mala' i-ngidi minikevo goloso igi minani' nene ningo agae agae li minani' nene ga'nelo' ogavo giluvoni' ve. Nemu' do ngu' izelove losa lemekuve. Idise gei' nene Aigita misubou' nogimiseluze. Vozo lo lo-imine' ve.

35 Ee, a'mine ve Mose' nene ingine geze zaho do ote-gedavo guvekasi ve lolo' ogosa leze gonito' lele'mize nomolane li vasa izi-dave ve. Ido' a'mine ve Mose'ni O'moso'mo a'mine Isilaele' aleveti guve'inesi ve ido' do ngu' izelive lolo' ogo minelive lo engita imiseline'. Ado' angelo' ma O'mosolo' medelo mino za ngomou' olo' gulumo o miningu' soto' o-dine' ne'mo nene imiseline' ve. 36 Imiselavo vo Isilaele' aleve Aigita misubou' minanguti' ngele'mizo Aigita misuboukosi guvo noso ma gulive Gulehe' Noso ve ladokisi ebe' hadive maukisi ngele'mizo novo kilisimasi foti (40) novivo ato ato' suno do minine'. 37 Eze gamazi lo soto' ilive polohete ma neni' ne'mine ma lengi' zuhouti' do ote-do O'moso'mo imisele-lengedeleseive lo Isilaele' zuho lo-ngimive nene idise luvoni' Mose' ma ne neive. 38 Avotemote Isilaele' aleve ebe' hadiveu' mulise mili nizavo a'mida Sinae gololo' a'mine ve azasi engikisi angelo' ma O'moso'mi gamazi lo-imivesi nizavo minevo' minevo' lemeni ne'mi gamazi do lemelove lo O'mosolati' dani'. 39 Ne dani'za avotemote ingine eze gamazi gele damolone li vasa izi-di Aigita misubouko do ti'no voloninako li lu'ine nela milani'. 40 Ne'mine igi Mose' uvoloho Aloni'ni ti' li li-imani': Mose' nene Aigita misubouti' lele'mizo ave aza vo gopo ihe vo hadene ihe laza gelamunako gaza leze o'mosote gohi lolo' o-ledanivo gomu' molo limivo volone. 41 Likevo ne gameneu' bulumaka' angale naba avazaha ne'mine lili' igi a'mine avazaha o'moso nene guno gizi imilizani' inite' di igi imi mini engi' a'inedunu' lili' ani' initekumu' ngolize izi minani'. 42 Ne'mine igi Okulumoku' labana' elaa' ine' inite' muki' o'moso'ine lili' igi ngopo'ni lilisa igi minikevo O'moso'mo ti' igi minilizave lo velepe' izo mehene ngemo hulo-ngidine'. Ne'mine ani' nemu' O'moso'mo line' gamazi nene polohete luhuvo gizani' neu' ti' li gizi nizani' ma neive:

Isilaele' alevekizo, lingine ebe' hadive mau' moni nizavo
kilisimasi foti (40) novivo ize ato ato' bili guno gizika' gizika' igi minani' nene
nenikumu' nehe. Ne nomive.
43 Lingine mono' numuno ado' seli numuno gele vine' di monani' nene
avazaha o'mosotine Moloko'nisi ido' gohi ma sonohi' avazaha'vesi minine'
Lehana'nisi ngopo'ni lilisa di monani' ma ve.
Lolize izo a'mine inite' ngopo'ni lo minelone li avazaha inite' lili' igi
di minani' nemu' nene na'nise lokuvo Kanaha misubo huli vi
Babelonia misubo nesi huli misubo mauko vi mini mulumo gili minilisave line' ve.
44 Ido' di minilizave lo O'moso'mo Mose'ni avazaha ogo elebizidi'mine lili' ani' mono' numuno selitunu' gizangu' O'moso'mi gamazi minine' nene avotemote ebe' hadiveu' di minani'. 45 Ido' me'ninge ngimikevo avotemote zuho engitoti' minani' netesi a'mine seli numuno di minani'. Ido' Zosua' ngele'mizo novivo O'moso'mo gomu' molo ngemo a'mine misubou' minani' zuho ato ato' nene ngeleto do nohulivo a'mine avotemote zuho Kanaha misubo di ti' ani' gameneu' nene a'mine mono' numuno nene di ani' ve. A'mida nene a'mine numuno ha di nizavo mini di igi guvelesi ve naba Davidi' soto' ogo neivosasi nene ha di minani' ve. 46 Davidi'ni nene O'moso'mo ninge lamine' dani' ve. Ido' O'moso'mo ninge lamine' davo Davidi' aza Zakobo' nga'vo pilemo' zuho gelekele' i-dani' O'moso'inemu' numuno gosoho' do soto' o-delesa gelo ne'mine o-delingumu' nene longo' o-dine'za 47 O'moso'mi numuno gosoho' gize-dive nene Davidi' gipele Solomoni' gize-dine' ve. 48 Ee, numuno gize-dine'za Vozeu' ve dize neive O'moso nene evenelite a'inedunu' gizani' numungu' minevo' dovo' osa'mive. O'moso'mi gamazi lo soto' ive polohete ma ti' lo gize neine' ma ve:

49 Guvelesi ve aneza gamazi lo ti' lo laa' neive:
Okulumo' nene neze mo'mosi'ne ve.
Ido' misubo nene gize'ne lise minaa' uvoni' inite' ve.
Nemu' nene numuno nani'mine numuno gizi-nidikevo lisihe' ilive.
Nani holomolo' mine geleloni' o neive
50 Na'nise'ne a'netunu' Okulumo' Misubo do soto' muluvoni' ma gilamani' nehe
lo gize neine' ve.

51 Ne'mine lo Setehano' aza kanisole aleve lo-ngemo imine' molo ti' lo line':

Lingine a'manapa igi gamazi gilamaa' igi mini lutine gatine ngolo' lamivo avotinge igi mili iga' ani' suno ma'mine igisa lingine O'moso'mi Sikalahu' lovo i imaa' nave.
52 Avotinge ingine polohete soto' ani' muki' goboni mili-ngidisa hamokisi ise'ine izi-ngidani' ma nehe. Ne nomive. Ve lisihe' lamine' ma soto' ilive li li soto' igi lave polohete nene ingine ngibili osu' likevo mini lingine a'mine ve lisihe' bili hililizave li biluvaliti a'ningu' milikevo bili hilani' ve. 53 Ido' O'moso'mo lo hukine' gamazi nene angelole neve nete avotemotine ngimikevo dikevo imine' mili gizebo ilizave lo lengita ogani' neiha lingine gili damani' neive.

Setehano'ni Gehenidunu' Huli Huli' Igi Bilikevo Hiline' Gamazi

54 Setehano' ti' lo lo-ngemavo gili ngizebolo' goloso molavo ve'ine ingihi gili' lani'za 55 Setehano'ni lulou' O'moso'mi Sikalahuli'mo gono davo aza Okulumoku' vokene' ogo ningine'. Ningo O'moso'mi labana've ningo Izesu' O'moso'mo ana hulaa' ida neivo ningo 56 ti' lo line': Okulumo' ngolo' lavo ve gihile O'mososi mino ana hulaa' ida neivo ningekuve.

57 Ne'mine lavo gili gamazi goloso nolihe li a'mine gelalone li ga'nido' hiti mini geke' li-di vi abuti' izi gili' lani'. 58 Abuti' izi ehuso' igi di vi numuno si'mingala huli-di vi eze lihime'vemu' li soto' ave nete geheni huli bili' bili' ilisa ingine oko'nido' inite' ha'na ha'na ne kuluhizi gipe goso've ma minine' gulive Saulo' ne'mi gizeneu' di mulise milani'. 59 Setehano'ni gehenitunu' nibilavo aza vise lo Guvekasi ve Izesuvo, gaza sikalahu'ne dozo lo 60 alabuvolo hize mino gamazi naba lo Guvekasi ve mene lihime nidani' nene do minamo hulo-ngedezo lo hiline'.

Copyright information for `ASO