Colossians 2

Ido' ne'mine noluvoni' nene naza lengikumukisi ido' Laodikia ebeku' minavemukisi ido' neni' go'ne ve'ne gehepevelo' ningamave linge mukikumukisi nene mono' gono zege' zege' ogo daa' nouvongumu' nene gililizave losa noluve. Ido' ne'mine nouvoni' nene ingine lu'ine amuzo molavo lu'ine ne geme ge neme li di hamo' igi bizi minilizangumu' ve losa ne'mine nouve. Ne'mine igi mono' nene mo gili vevesilizadi'mo nene gili ele'vole' gehepeve igi O'moso'mo suno' molani' inite' Kilisito'nimu' nene gili ngolo' li minilizave losa gele noosa noluve. Ido' mono' gele osu' lo otohato ogo minaa' monovo muki' nene heneni lamine' di haleki milaa' naani' ne'mine mino a'mine nene ei' Kilisitoda mine osu' lo neive. Ne'mine noluvoni' nene evene' hamolitesi gamazi noso'vesi li-lingimii gotine izi lengele'mize gopo ikelizave losa noluve. Ee, naza nene hota goloso nouha lu'ne ga'ne've nene mo lengikisi gehepeve neivo lingine Kilisito'nimu' gili ele'vole' anitine nene ma hulami di gili' li mini di hamo' igi mine lamine' igi nizani' nene ningo gelo nolize izo nouve.

Kilisitoda Gi'mizi Gelekele' I-dani' Ne'mo O'mosolati' Lengemeni Dameni Nene Mo Dikeni' Nenaze. Evenelite Di Soto' Ani' Gamazilo' Nene Gelekele' Igi Minamilo Lo Paulo' Lo-ngimine' Gamazi

Lingine Guvetesi ve minelive li Izesu' Kilisito'ni nene di ti' ani' nenaze. Nemu' lingine nene ezela e'meti igi milisa minilo. Luhisetine nene Izesu' Kilisitodo' do neivosa minevo' alevotine nene eita di lehete igi li-lingimani' gamazilo' nene e'metisa ezemu' gili ele'vole' naani' nene di amuzo mili'mi vi mini a'minemu' O'mosola nene isaa' neve li opo'ni vauve ili li minilo. Evene' hamolitesi gotine izi gihile've nomine' gamazimu' nene otohato gamazi lamine' ve li lengele'mize gopo igi a'mido' di gelekele' i-lingidikelizaze. Ehe' igi ningisa minilo. A'ne'mine gamazi li-lingimilizani' nene Kilisito' gamazilo' vo daline' gamazi li-lingimilizavoba asi haza evenelite ne'mine mana'mine initeliti monovomu' nene avotemotidati' li di dizani' gamazivo' nene li-lingimilisave. Ido' ne'mine noluvoni' nene ei' Kilisitoda ei' oko'nola gehepeve nene O'moso'mi emeni dameni vai' nene mo mine molo osu' lo neine' nenako nemu' nene noluve. 10 Ido' O'moso'mi emeni dameni vai' Kilisitoda neine' ne'mo nene lingine ezelo' gi'mizi nizani' nenako eitati' neve nene lutine'mo minevo' alevo' iline' inite' vai' nene lingine di osu' li nizanako nemu' nene ngomosi ma vise' amilisave. A'mine Kilisito' nene guve'inesi ve gizebo iga' amuzo di nizave mukiliti godo'nido' minive ne neive. 11 Ezelo' vi gi'mizikevosa O'moso'mi noso neve nene mo lengita molo-lengede neive. A'mine O'moso'mi noso nene evenelite Zuda veti monovolo' e'meti okodine lolovo huki huli-lingidiisa milani' nevoba asi lengemeni dameni litehe nene di hulikevo Kilisito' asi've nene a'mine O'moso'mi noso nene molo-lingidine' ve. 12 Ee, lingine noso hilangu' nene Kilisito' galeseu' limingu' nene linginesi maka' ezesi limani' gele neive. Ido' ezelo' gi'mizi mini eze galeseuti' do ote-dive O'moso'mi amuzo ne'mo lelikisi do ote-ledelido' lisihe' o neive li gili ele'vole' ani' ne'mo nene ezesi galeseuti' do ote-dingu' nene lengikisi makato' do ote-lingidine' gele neive. 13 Ee, lingine O'moso'mi noso lengita nomine' mini lengemeni dameni litehe nene hulamii goloso nite' di minadi'mo lutine hele vine' minanguti' nene Kilisito'nisi maka' lengi' lutinesi nene O'moso'mo do vele gizine' ve. Ne'mino Kilisito'nisi makato' do ote-lidine' giline' nene aza goloso nitete muki' do hulo-ledosa nene ne'mine ine' ve. 14 Leli' lihimetemu' lo soto' ogo goni' o-ledelesa minine' luhuvo nite' Mose' gizine' lou' gamazi nene lohoto' zalo' belo bado a'mine gamazi ne'mo leli' goni' o-ledeline' amuzo've nene do hulavo osu' gehepeve line' ve. 15 Ne'mino Kilisito' lohoto' zalo' hilidi'mo nene aza guve'inesi sikalahu' goloso gizebo iga' amuzo'inesi minave nene ngivile' ogosa amuzo'ine nene do hulo-ngedosa a'mine lohoto' zadunu' ngivile' ogosa neine' monovo nene evene' mukiliti ve'nido' do soto' ogo osu' laave.

16 Ne'mine ine' nenako nemu' nene lingine noso' nite' ma naakumu' nehe malise ogakumu' nehe evene' malite ne'mine ne'mine ilizave lii monovotinemu' ize' mili lii lengemenga lilizani' nene gili ngimamilo. Ido' a'mine'mine igi evenelite holise' minaa' ani' gamene ado' kilisimasilo' kilisimasilo' noso' nite' naba naa' ani' gamenelokisi ike'ni gosoho' soto' ine' gamenelo' gamenelokisi ido' saleleu' saleleukisi nene lingine holise' minaa' naahe minamaa' naahe ne'mine naavo evene' malite a'mine monovotinemu' ize' mili lii lengemenga nilavo ma nene gili ngimamilo. 17 A'mine noso' nite' nehe holise' gamene nehe ne'mine inite' nene alinge' soto' ilizani' initeliti avazaha'ine mumuno'ine ne'mine minani'za a'mine initeliti inite' gihile'ine nene Kilisito' ne neive. 18 Evene' malite ha me misubou' alevete ga'ine gilaa' adi'mine igi gilii ingine laza vetelo' inite' o molavo ninguune' nenako nemu' nene laza mono' monovo gehepeve gele none liisa engi' oko'ine nene hazamu' di dizi minii lengikumu' nene lingine amuzo mili okodine di limisa angelo' gubi' izi ngimaa' amilizani' nene lukuvo nalizado' lisihe' igi minamilisave lii lutingu' hizilizani' nene gili ngimamilo. 19 A'mine ne'mine aleve nene leli' godote ne'mino neive Kilisitodo' nene eze aleve mukito' gi'mizo none' ne'mine igi ingine nene gi'mizamave. Ido' laza eito' gi'mizo none' nene ezelati' gu'nuhuvolo ne'mo eze oko'no linge ato ato' ne'mine nonive muki' nene do gili' lo-lidivo mino O'moso'mo hize ele' o-lede neivo ne'mo nene naba o'mo vo minaa' noune.

20 Lingine nene Kilisitolesi maka' hiliisa me misubou' alevete ne'mine mana'mine initekumu' gili laa' ani' gamazilo' gelekele' igi minanguti' nene kuluhizisa nizani' nenako nemu' nene lingine a'mine Kilisito'nimu' gilamave me misubou' aleveti muliseuti' ha nizani' gilivo evenelite ne'mine mana'mine initekumu' nene di gilamilo ido' ni gilamilo ido' diisa igi mili amilo li li-lingidaa' ani' gamazilo' gelekele' igivo' minaa' naani' nene nanimu' naave. 22 Ingine ne'mine li-lingidaa' ani' inite' nene ha igi mili naavo osu' loosa vo haza oga' neine' initekumukovo' nene li-lingidaa' ani' ve. Ido' ingine ne'mine iga' ani' nene haza evenelitevo' apizi ngimi li huki li-ngidaa' ani' gamazilo' e'metiisa iga' ani' ve. 23 A'mine laa' ani' gamazi ne'mo nene okodeloti' monokumu' lanite' gelo amuzo molo e'metaakumukisi ido' leli' okode nene lanite' gelamiline' inite' o-do do limune' gelo minaakumukisi nene laa' neine' nenako a'mine neve nene otohato gamazi gele neine'za a'mine lemeni dameni litehe ne'mo lanite' giline' monovo nene do leme-doo e'metamo mineloningumu' nene mo keke' hize ele' o-ledesa'mive.

Copyright information for `ASO