Ephesians 3

Paulo' Aza Heta Ato' Vemu' Ve Lo Mono' Gono Do Minine' Ne'mi Monovo Lo-ngimine'

Ido' O'moso'mo ne'mino do lungu' izine' nenako nemu' Paulo' naza Izesu' Kilisito' goboni ve've mino eikumu' nene heta ato' ve lengita gono do minuvoni' nemu' Loma vete galapuso numungu' huli-nidikevo minuve naza O'mosola lengikumu' laa' nouve. O'moso'mo lengi' nene ei' nasahili'veu' lengele'mize molalongumu' ve lo asi've lengikumu' neni' nene gono nimine' nemu' mo gili nilisave lo gele nouve. Ido' ne'mine o-nedo olosa giline' inite' haleko suno' minine' nene lo soto' ogo lo-nimine' nesi nene mo gili nilisave lo gele nouve. A'minemu' nene me luhuvo initeku' nene gamazi li'nibevo' gize nouvoni' ma neive. A'mine gizuvoni' gamazi nene gatisa naza Kilisito'nimu' gamazi suno' minine' gele guno o nouvoni' nemu' nene lingine gili lamine' ilisave. Ido' a'mine suno' minine' gamazi nene O'moso'mi Sikalahu've ne'mo idise mene gamenela Kilisito' aposolo've minilizave lo do kegese-lidive lelitasi ido' polohetelasi lo soto' ogo nolo-limine' ne'mino gomu' gamene vomila nene O'moso'mo evene' ma lo-ngemesa'mine' ve. A'mine gamazi gomu' haleko suno' minine' nene ne'mino neive: O'moso'mo eze evenele zuho lemelove lo lo huko-ledo salani molo-lidine' inite' nene Zuda ve lelikovo' dalobe lo gilune' inite' nene lelikovo' ma damolosune. Asi heta ato' ve lingine Kilisito'nimu' gamazi lamine' mene gilii gili ele'vole' igi ezela gi'mizi O'moso'mi evenele lili' igi leli' Zuda vesi hamo' zuho lili' igi mini a'mine O'moso'mo inite' lemelove lo lo huko-lidine' gamazi ne'mi lulou' lelikisi makato' vi hili mini a'mine salani molo-lidine' inite' nene lelikisi makato' dalonido' minikeve. Ido' O'moso aza nasahili' o-nidine' ne'mo ei' amuzo've nene neniku' gono nodavo aza gono nemavosa a'mido' e'meto a'mine gamazi lamine' nene lo soto soto' ogo eze goboni ve ne'mine lolo' ogo nouve. Ee, naza nene gomu' minaa' uvodasi giluvoni' nene O'moso'mi evenele mukikuti' lemo minuve minuvoni'za O'moso aza neni' nene do vevese-nedo nasahili' o-nidine' ne'mo Kilisitodati' nene monovo danava lamine tamine' vai' goloso lo neivo laza ngelo ningo gele osu' lamolone' o minine' inite' ne'mi gamazi've lamine' nene Zuda ve minamani' heta ato' ve lo soto' ogo lo-ngemeline lo ido' O'moso'mo leze Zuda vesi heta ato' vesi Kilisitoda do hamo' o-ledelesa giline' gamazi nene inite' mata' do soto' oga' ive O'moso aza nene gozopo' gamene aka'milati' ei' lulou' molo halekekivo suno' haza minine' gamazi nene evene' ato ato' mukilite ningi gililizangumu' nene neni' lo soto soto' ogo lo-ngemeline lo gono lamine' nemosa nele'mize molavo nouve. 10 Ido' O'moso'mo ne'mine ine' nene guve'inesi ve amuzo'ine ato atokisi okulumoku' veleta mini'mi monave nete leli' Zuda vesi ido' heta ato' vesi O'moso'mo do hamo' o-ledo eze evenele mulise gosoho' hamo' do soto' o-ledavo minunive lelitoti' nene ningisa O'moso aza nene ne'mine mana'mine gala gele nge lo minaa' neive li ningi gililizave losa ne'mine ine' ve. 11 Ido' O'moso'mo ne'mine ine' nene gomu' gozopo' aka'milati' aza olosa giline' inite' nene Guvetesi ve Izesu' Kilisito' gono dadi'mo soto' ine' inite' nene do gihile izelove losa ne'mine ine' ve. 12 Ido' Kilisito' gono dani' ne'mi gihile've nene laza ezemu' gele ele'vole' ogo mino O'moso'mo lebelelihe lo golise gelamo mo hize ele' o-ledeleseive lo gele ele'vole' ogo ezemu' lehelele izamivo gamazi ha lo-emaa' olone' akate nene Kilisito' mo vele ngolose-ledavo O'moso gamazi ha lo-emaa' none. 13 Ido' O'moso'mo gono nimidoti' nene inite' lamine' ne'mine soto' oga' neine' nenako nemu' nene naza ti' lo nolo-lingimuve: Naza lengi' lengele'mize lamine' olosa gono do minuvoni' ma'mo goboni mili-nidi nala' numungu' huli-nidikevo geni initeli'mi lulou' nouvoni' nemu' nene geni lengebelamivo minilo. A'mine geni initeli'mi lulou' nouvoni' nene lengikumu' ve losa nouvoni' nenako Paulo' lelikumu' gelavo dizave li neloti' lingine ningi gili longolize izilizado' o neive.

O'moso'mo Hize Ele' O-lingidivo Kilisito' Lulo Lemo Nasahili' O-ledaa' Neine' Monovo Nemu' Lingine Gili Osu' Lilizave Lo Paulo' O'mosola Lingumu' Lo-ngimine'

14 Ido' O'moso'mo ne'mino do lungu' izive lo gomu' lo-lingimuvoni' nemu' nene naza okulumokuko misubouko ato ato' zuho mine'mo monune' mukiliti gulivetesi ido' lemeni damenisi do soto' molo-ledaa' ive meteho O'mosola nene obuvo'ne hizo lengikumu' nene ti' lo laa' nouve: 16 Ei' emeni dameni atoli'mine lamine tamine' neine' votigilelo' nene do molo amuzo lengemavosa Sikalahu've ne'mo lutingu' hize ele' o-lingidivo 17 ne'mo Kilisito'nimu' gili ele'vole' igi minikevo aza lutingu' minevo dovo' ogo minelive. Ido' ne'mine ogavo lingine lute ngemo nasahili' o-ngedaa' monovolo' nene e'meti minikevo ne'mo monoku' luhivetine do ngi lo-lengedavo amuzo mili minilizave. 18 Ido' ne'mine ilizave lo O'mosola laa' nouvoni' nene Kilisito' do atoli'mine ogo lulo lemo nasahili' o-ledaa' neine' monovo nemu' nene evene' laza mudise gele osu' lamolonido' o neine' monovomu' nene gilisa Kilisito' do atoli'mine goloso ogo vauve elo lulo lemaa' neingumu' nene O'moso'mi evenele mukikisi gili nge li minikevo ne'mo O'moso'mi emeni dameni vai' nene lutingu' vai' lo minelive lo O'mosola laa' nouve.

20 Ee, laza O'moso'mo ne'mine mana'mine inite' ha oloseive lo gilune' inite' ido' ne'mine ilive lo ezela laa' noune' inite' muki' nene ivile' ogo ei' amuzo've ne'mo leli' luteu' gono do minaa' neine' ne'mo nene atoli'mine inite' vauve elo iline' amuzo'vesi neine' nemu' nene 21 laza Izesu' Kilisito'nimu' gele ele'vole' ogo O'moso'mi evenele mulise lolo' ogo nonivete ezemu' opo'ni lo'mo vo nonivo kilisimasi ogo voka' voka' ogo mineline' nene mo osu' lamivo mo ne'minovo' miniliho.

Copyright information for `ASO