Ephesians 5

Liti'musou' Minani' Gamenelo' Monovo Goloso Igi Mili Minaa' Ani' Monovo Nene Huli O'moso'mi Emeni Damenilo' E'meti Labanali'mi Emeni Dameni Di Otuhilizani' Monovomu' Paulo' Lo-ngimine' Gamazi

Ido' ne'mine ogo O'moso'mo lihimetine hulo-lingidine' nemu' nene lingine O'moso'mo lulo lingimine' izipahala minani' nete nene ei' emeni dameni ne'mido' gehepeve e'metilizado' o neine' nenako nemu' nene e'meti minilo. Ido' O'moso'mo unuvo lamine' gelo mulunou' lamine' gelelive li sipisipi ize nevo'mine bili oloku' gizi O'moso imaa' nani' ne'mine ogo Kilisito' aza nene leli' lulo limidi'mo lelikumu' oko'no nene hulo hiline' ve. Nemu' lingine nene a'mine'mine igi lutine ngemaa' monovo nene lengita minivosa a'mido' e'meti vi minilo. Ido' vene' vemoho' gipe alu gopo ingaa' monovo ido' ne'mine monovo lute do goloso iline' monovo ato ato' nesi ido' inite' gohi gohi dalisa gilaa' monovo nene O'moso'mi evenele laza ogo molo amolonido' o neine' nenako lengi' vovotingu' a'mine monovo nene ngomosi mo soto' ogalize. A'mine inite' goloso nemu' nene li volelo' melo' igi gohi di gatido' milamilo. Ido' lingine nene ekese' gamazi nesi lami ido' dingani gamazi nevo'mine nesi lami ido' ha gize' zohi' gamazi nolube li monovo laminekumu' di gopo igi lami ido' monovo golosomu' nene vetete' igi lami O'moso opo'ni li minilo. Ee, vene' vemoho' gipe alu gopo'napa ingi'mi monaa' nave nehe ido do goloso o-ngedeline' monovo goloso igi mili iga' nave nehe ido' inite' gohi gohi dalone li gilaa' nave nene a'mine inite' ne'mo engi' O'moso'ine gelavo soza o'moso opo'ni li minaa' ave ne'mine ve nene O'mososi Kilisitokisi gizebo i minasingu' nene vi hilami salani mili-lidasine' inite' nesi nene ma damilisave lo laminetokovo' nolo-lingimuze. Gili minilo. Ido' a'mine ne'mine monovo daa' nave nene O'mososi Kilisitokisi gizebo i minasingu' nene vi hilamilisanako nemu' nene lingine a'mine ne'mine monovo nene damilo lo nolo-lingimuve.

O'moso'mi gamazi gili disa'mave nete nene a'mine ne'mine monovo goloso daa' nani' nenako nemu' O'moso izebolo' molavo lihime ngemeline' nenaze. A'mine ne'mine monovo goloso nemu' nene gotine izi soza saza gamazi nili-lingimavo ma nene a'mido' gili ngimamilo. Nemu' nene lingine ne'mine alevesi gi'mizo maka' monalone li ehee' igi minilo. Lingine gomu' nene liti'musou' ne'mine minani' ma neine'za idise nene mo Guvelesi vela igi gi'mizi mini labana' ne'mi lulou' nizani' nenaze. A'ne'mine alevelo' nene gi'mizami labanali'mi emeni damenisi minani' nete igi mili minilizani' lisihe' iline' monovolokovo' nene e'meti vi minilo. Ee, labanali'mi gihile ne'mi emeni damenisi minave ingine nene monovo laminekovo' igi mili evene' lisihe' mini evene' go'ine izami gamazi nene laminetokovo' laa' nani' nenako nemu' nene laza labanali'mi emeni damenisi minunive leli' monovotelokovo' nene e'meti vi minilizangumu' luvoni' ve. 10 Ido' ne'mine igi minilizangu' nene Guvelesi ve'mo ningivo lamine' iline' monovomukovo' nene vise' igi ningi igi mili minilo. 11 Lingine evene' liti'muso ne'mi lulou' mini monovo goloso igi mili minaa' nani' ne'mo nene gihile izesa'mine' nenaze. Engikisi zogo mili bizi minami asi a'mine monovo'ine goloso nene hulilizangisi di soto' i-ngidilo. 12 Ee, ingine haleki igi mili iga' nani' monovomu' nene laza ma ogo molo amo noloba ha vetetekovo' olone' nesi nene lovozo helelonido' o neine' nenako nemu' nene a'mine monovo'ine nene di sotokovo' i-ngidilo. 13 Di soto' ikevo miniliza inite' muki' nene labanato' soto' igi minikevo labana' ne'mo engi' monovo'ine nene do soto' ogavo sotokovo' minaa' neive. 14 Ido' ne'mine noluvoni' nene a'mine di soto' ikevo miniliza inite' muki' nene labanali'mi emeni dameni di otuhilizado' o neine' nenako nemu' nene luvoni' ve. A'minemu' nene nama ma ti' li laa' nave:

Upuho' igi otilevo. Lutine okise ongavo minave
lingine hili minani' gili minanguti' nene otilevo.
Otikevo Kilisito' aza hize labana' ele-lengedeleseive.
15 Nemu' nene lingine evene' ga'ine gili nge li mini igi mili isa'mave nete iga' ani' ne'mine ami asi evene' ga'ine gili nge li mini monovo laminekovo' igi mili iga' nani' ne'mine igi monovotine igi mili mini di vilizado' nene gizebo lekeseve igi minilo. 16 Ido' idise gameneu' evene' ingine nene monovo goloso di soto' i'mi vivo' nizanaze. Lingine haza gopo moni minami monovotido' gizebo lekeseve igi mini evene' hize ele' i-ngidiliza gonotine lamine' soto' iline' nene mo diivo' minilo. 17 Ee, evene' ingine nene monovo goloso di soto' i'mi vivo' nizani' nenako nemu' negi hizi gopo' napa minami Guvelesi ve'mo ei' lulou' nene lengikumu' nadi' igi minilizave lo gele nolihe nemukovo' nene ningi gili hehe li minilo. 18 Ido' lutine nene do gopo o-lengedavo vi tolovo ikelizaze. Negi noso nene ni sipaki igi minamilo. Asi O'moso'mi Sikalahu' ne'mo nene lutine vaito' gizebo o neivo mini ei' lilidokovo' nene e'meti minilo. 19 Ido' gamazi li volelo' melo' igi minilizangu' nene mono' nama ato ato' O'moso opo'ni li laa' nani' ido' O'moso'mi Sikalahu' ne'mo lo soto' ogo lo lengemeline' ne'mine nama nene li mini Guvelesi ve nene lutinedunu' opo'ni li longolize izi minilo. 20 Ne'mine igi mini lengita soto' iline' inite' mukikumu' nene Guvetesi ve Izesu' Kilisito' velemu' igi gamene gamene O'moso metehine nene tangezo' li-di opo'ni li minilo. 21 Ido' Kilisito'nimu' nene evene' naba lamine' ve li ezemu' lengehelele izivo mini ei' gala gilido' e'meti lingine nene ge gelekele' o-nede ne gelekele' o-gede li minilo.

Vene' Vemoho' Engi' Igi Mili Miniliza Monovomu' Paulo' Lo-ngimine' Gamazi

22 Ido' a'mine'mine igi vene' nete Guvetesi vela gelekele' i-daa' nani' ne'mine igi vadinge lilizado' gelekele' igi minilizado' o neine' nenako gelekele' i-ngidi minilo. 23 Ee, Kilisito' aza evenele muliseti godotelo' minive minine' ne'mino vadinge nene godotido' minave nizani' nenako nemu' nene gelekele' i-ngidi minilo. Ido' Kilisito' aza nene godotelo' minivevo' minine' nevoba ei' evenele ei' oko'no ne'mino minunive nene do lu' izaa' ive ne'mine nesi minine' ve. 24 Nemu' nene eze evenele mulise Kilisito'nimu' gelekele' o-do minaa' noune' ne'mine igi vene' nete va'ninge lilizani' inite' mukikumu' nene gelekele' i-ngidilizado' o neive. 25 Kilisito' aza nene evenele zuho mulise nene lulo limidi'mo lelikumu' oko'no hulo hiline' nenaze. Vemoho' lingine a'mine'mine igi eledingine nene lutine ngimilo. 26 Ido' Kilisito' ei' evenele mulisemu' ei' oko'no hulo hiline' nene aza a'mine evene' mulise nene gamazi'ne lo-ngemo noso holo-ngedeloni' ne'mo neni' ve lo ngele'mize molo lu'ningu' goloso neine' nene gilite osu' lo-ngedelove lo 27 ido' a'mine evene'ne mulise neti oko'nido' nene hu'ine ne'mine inite' golososi nomivo mini ido' gonolise'ine laminekisi minani' gelavo na'nise'ne nenita do gi'mize-ngedekuvo lihime'inesi ido' gamazi'inesi nomine' minilizave lo nemu' nene ei' oko'no hulo hiline' ve. 28 Ido' a'mine'mine igi vemoho' nete lengi' okodinemu' gilaa' nani' ne'mine igi lengi' eledinginemu' gili lutine ngimilizado' o neive. Ve ma ingine ele'ningine lu'ine ngimi minaa' nave nene mo engi' oko'inesi nene ne'mine nii-dave. 29 Ee, evene' hamolitesi engi' oko'inemu' nene goloso ma gili imaa' navoba asi noso' nite' lamine' nene di vele vele igi a'mine oko'ine nene ganala daliko li gizebo lamine' i-daa' nani' nenako ido' eledinge nene lengi' okodine ne'mine nizani' nenaze. Nemu' nene lingine a'mine'mine igi lutine ngimilizado' o neive. Ido' Kilisito' evenele mulise laza nene ei' oko'nolo' gizene ana nevo'mine none' nenako aza nene a'mine'mine ogo leze lute'mi noso' nite've nene do vele vele o-ledo ganala dikelizave lo gizebo lamine' o-ledaa' neive. Nemu' nene ingine engi' oko'ine i-daa' nani' ne'mine igi ele'ninginesi a'mine'mine i-ngidilizave nene mo Kilisito' ei' evenele leli' o-ledaa' neine' ne'mine igi minilisave. 31 Mono' godolou' ti' li gizi nizani' ma'minosa nene neive:

Nemu' nene vehomo' aza izelehingi melehingi nene hulo elenahida vo bizo minavo
ingine nene evene' hamo' ne'mine lolo' igi minilisasive.
32 Ido' a'mine mono' godolou' gizani' gamaziu' nene aneza gamazi dizo minine' ma haleko neive. Naza a'minemu' nene giluvo evene' hamo' ne'mine lili' igi minilisasive li gizani' nene Kilisito'nimukisi ido' eze evenele mulise leli' nesi nene hamo' lili' igi minilisasive li li mili gizikeni' neive. 33 Ido' ne'mine li mono' godolou' gizani' nene Kilisito'nimukisi eze evenele zuho mulisemukisi nene li gizani'za a'mine nene mo lengi' vene' vemohotasi nene vo do neize. Mukito' lingine lengi' okodinemu' gilaa' nani' ne'mine igi venetinemu' gili lutine ngimikevo vene' lingine nete vadinginemu' nene evene' nabate mo gelekele' o-ngedelonido' o neive li vadingine gili ngimi mini di vi minilizave.

Copyright information for `ASO