Galatians 4

Ido' luvoni' initeli'mi monovo nene do guno ogo gohi ma lolosuze. Gililo. Monovo ne'mino ma neive: Evene' naba'mi gipele ma naba o'mo vo lodive ogo melehidati' inite' ma do a'mine inite' mukito' nene ha gizebo ogo mineleseiha olihe naba ogo lodive amine' gameneu' nene ne'mine amo haza goboni ve minave nene ngivile' amo ha meleho molo-dine' gamenemu' nene gizebo ogo mino meleho ne'mo ezelokisi ido' heneni'velokisi gizebo ilizave lo evene' ngele'mize molado' nene gelekele' ogovo' mineleseive. Ido' evene' laza a'mine'mine ogo gelekele' ogo minune' ve. Gomu' nene olihe monoku' lodive amunivo a'mine gamenela nene me misubou' veti mono' ato ato' gihile've nomine' monoto' gelekele' ogo minune' ve. Ne'mino nonivo gamene lamine' nene soto' ogavo O'moso'mo leli' nene do ti' ogavo izipahala zuho mineloningumu' ve lo ei' gipele nene Mose' lou' gamazilo' gelekele' ogo minunive nene a'mine Mose' lou' gamazi'mi gesi minguti' do heta o-ledelive lo O'moso'mo imiselavo venetati' soto' ogo Mose' lou' gamazilo' gelekele' ogo minosa ei' oko'no hulo meni hizo do lu' izidoti' nene amuzo do O'moso'mi izipahala gihile none. Ido' izipahala minuningumu' ve lo O'moso ei' gipele'mi Sikalahu've nene imiselavo lelita ogo mino lute do otavo O'mosomu' nene ahono ido' meteho ve laa' noune. Nemu' nene gaza goboni ve ido' gelekele' ve ne'mine gohi ma minamo asi O'moso'mi izipahala ne nane. Ido' mo izipahala lolo' ogo nane' nenako O'moso'mo nasahili' o-gedavo gazasi nene eze zuhomu' salani molo-ngidine' initekuti' dalinive lolo' ogane.

Mo lamineto' gomu' lingine heta ato' ve mini O'mosomu' gilamani' gameneu' nene soza inite' O'moso gihile lamine' minamado' nene gelekele' igi minaa' ani'za idi'ne nene O'mosomu' mo ningi gilikeve. Ne neiha naza nene O'moso'mo lengi' nene ningo gele neive nizave lo loloni' nene mo lamine' akauti' lolosuve. Ee, O'mosomu' lingine mo ningi gili nizani' nenako lingine gohi velepe' izi vi amuzo've nomine' mono' mino ido' lengele'mize lamine' ilido' minamo gihile'vesi nomine' mono' atoku' vi hili a'mido' gohi gelekele' olone li nanimu' nigilave. 10 Ne'mine niigi lingine ne'mine olonidi'mo O'moso'mo do lu' izelihe li ladani gatine gili gamene ato atoto' holise' gamenelo' nehe ike'ni gosoho' lomine' gamenelo' nehe kilisimasi gosoho' ma soto' ilidope a'mine monokumu' nene gilisa holise' minaa' nave. 11 Naza lengita mono' gono duvoni' nene vo haza ilihe lo lengikumu' geni nebelavo nehelele izaa' neive.

12 Neze zuhokizo, lingine gomu' Mose' lou' gamazi'mi gesi mingu' minami heta minani' ma'mino nazasi minelesa a'mine lou' gamazi'mi gesi mingu' minuvonguti' nene leme heta ogo nouve. Nemu' nene lingine naza leme heta ogo nouvoni' ne'mine igi minilizangisi lingine Mose' lou' gamazi'mi gesi mingu' vilisa minanguti' nene tine' mili heta limi alizave lo agae losa nolo-lingiduve. Lengita vo nouvo lingine di goloso ma i-nidamani' ma neive. 13 Gana' Kilisito'nimu' gamazi lamine' lo soto' ogo lo-lingimuvoni' nene naza inite' gize doo gilizevo ogo mino ebe' mala vamoloni' ogavosa nemu' lengita ogo mino Kilisito'nimu' lo-lingimuvoni' nene lingine mo gili nizave. 14 Ido' naza lengita inite' gize do gilizevo ogo minuvongumu' nene lingine ge'nebe goloso igi na'na' i-nidi minani'za nenikumu' gosele' lengebelamivo vasa izi-nidami O'moso'mi angelope Izesu' Kilisitope ne'mine ve ngele'mize lamine' goloso ilizani' ma'minisa neni' nele'mize lamine' goloso ani' ve. 15 Ne'mine i-nidani' nenako nenikumu' longolize izi minani' nene idise osu' lahe. Ee, a'mine gameneu' nene lingine neni' ve'ne di lamine' i-nidilisa lengi' vetine nene ha kuluhizilizado' o minidiniko lingine a'mine vetine nene ha kuluhizi nimadine. Ido' nimadiniko na'nise'ne gele lamine' ogo ha lo soto' olonako lingine lamine' nenikumu' longolize izi minani' nene mo gele lamine' o nouve. 16 Ido' gotine izamo gamazi nene laminetokovo' lo-lengemaa' nouvodi'mo nenikumu' nene lovo o lemaa' ive lolo' ogave li gilani' gelave. 17 Mose' lou' gamazi'mi gesi mingu' lengele'mizi nimilave ingine nene lengi' di naba i-lingidaa' nani'za nene lengi' lengele'mize lamine' ilido' nomive. Ingine lengi' di naba i-lingidaa' nani' nene nenito' ido' neni' gamazi'nelokisi gi'mizi minilizani' akatine nene hizi tili-lingidikevo lingine nene engi' di naba i-ngidi minilizave li lengi' di naba i-lingidi gotine izaa' nave. 18 Ido' evene' do naba o-ngedaa' nene go'ine izami laminetokovo' di naba i-ngidilizani' nene monovo lamine' ve. Ido' neni' di naba i-nidili ma naza lengita nouvosavo' nene di naba i-nidami mo gamene gamene ne'mine ilizani' nene mo lamine' o neive. 19 Izipaha'ne mate, olihe Kilisito'nimu' gili ele'vole' amavo lengikumu' mulumo naba gelo minuvoni' ma'mino naza gohi nogiluve. Vene' izipaha'ine soto' olosa neivo mulumo naba gilaa' nani' ne'mino lengikumu' nene Kilisito' emeni damenisi soto' ilizanako lo gelo mulumo naba nogiluve. 20 Lengikumu' nene naza nadi' ilizave lo gopo ga'ne gelo lengita lite' lo vo hetelo gamazi lo-lengemaa' uvoni' monovo'ne nene ma do ato' ogo neni' ve'neuti' gehepeve lo-lengemeloho lo gelaa' nouve.

Mose' Lou' Gamazi'mi Gesi Mingu' Vi Hilave Nene Goboni Aleve Ne'mine Nizave Ido' Kilisito' Evenele Laza Nene Goboni Aleve Ne'mine Minamune Lo Paulo' Aza Aneza Gamazi Sala'nidokisi Hagala'nidokisi Lo Molo Lo-ngimine'

21 Lingine Mose' lou' gamazi'mi gesi mingu' mino a'mido' gelekele' ogo minelone li laa' nave lingine a'mine lou' gamazi gizikani' buku mau' gizi nizani' gamazi ma nene lingine mo gilaa' nani' nehe. Olo. 22 A'mine bukuu' nene Abalahamu' gipele gidingumu' gizi nizani' gamazi mamu' noluve. Abalahamu' aza gipele seta' gidine' ve li gizi nizani' ve. A'mine gipele setakuti' ma nene elenaho Sala' ne'mi goboni alu've Hagalangu' gedo ma nene goboni alu minamine' ei' elenaho Salangu' gidine' ve. 23 Goboni aluu' gidive Isimaele' aza nene evene' muki' leli' soto' oga' noune' monovolo' ogo haza soto' ine'za goboni alu minamine' vene' Salangu' gidive Isaka' aza nene O'moso'mo Abalahamu'ni lo huko-dine' gamazi nene do gihile izelingumu' soto' ine' ve. 24 A'mine gamazilo' nene aneza gamazi ma lo-lengemelove: A'mine vene' sita' nene O'moso'mo gamazi sita' ato ato' lo huko lido' nene lo molo noluve. Ma nene Sinae gololoti' lou' gamazilo' gelekele' igi mini goboni aleve minilizave lo lo huko-ngidine' ve. A'mine lo huko-ngidine' gamazi nene goboni alu Hagala'nido' lo molo noluve. 25 Ido' Mose' aza Sinae gololo' vo O'moso'mo lou' gamazi lo huko line' nene do soto' ine' nenako a'mine Sinae golo Hagala' a'vopilemo' zuholite di minani' misubo Alabiau' minine' nene Mose' lou' gamazilo' gelekele' igi a'mine'mi goboni ve minani' aleve neti ize'nibo ne'mino mino goboni alu Hagala' ne'mine minine' ve. Ne neiha idisesi neine' Zelusalemi numuno ebe' nene a'mine Mose' lou' gamazilo' e'meti di minani' aleve neti goto' ebe'ine mino ize'nibo ne'minosa minine' nenako nemu' nene Sinae gololo' medelo Hagala' ne'mine minine' gelave. Ido' nene nanitekumu' ve. A'mine Zelusalemi ebekuti' aleve nesi ido' a'mingu' minine' monovolo' igi mili mini'mi vi minave muki' ingine nesi nene Mose' lou' gamazilo' gelekele' igi a'mine'mi goboni ve minani' nenako ingine nene a'mine goboni alu Hagala' ne'mine mini goboni vevo' nizave losa noluve. 26 Ne neiha Okulumoku' hozi minine' Zelusalemi numuno ebe' gosoho' nene goboni alu minamine' vene' Sala'nido' nene lo molo noluve. Aza nene Mose' lou' gamazi'mi goboni ve minamunive leli' goto' ebete mino izeteho ne'mine nene neive. 27 Ido' Okulumoku' minine' Zelusalemi numuno ebe' gosoho' nene Izesu' zuho leli' goto' ebete mino izeteho ne'mino neive luvoni' nemu' nene a'mine luvodo' vo daline' gamazi nene izipahala leli' soto' oloningumu' mono' godolou' ti' li gizi nizani' nenako nemu' nene mo lamineto' lokuvoni' neive lo gelelesune:

Zelusalemi numuno ebe' gaza mulumo gelo izipe gedamanivo izipaha nizamavo
gohuno vene' ne'mino minaine'za nemu' gelamo golize izo minezo.
Ee, gaza vangaho O'moso aza hulo-gedavo izipe gedamo minaine' giline'za
alinge' nene gomu' minine' Zelusalemi litehe nene vanahosi mino
izipahala vaikisi minine' nene ivile' ogo izipaha vai' goloso gedelesane.
Nemu' nene gaza ou' ou' lo geke' geke' lo golize izo minezo li gizi nizani' ma neive.
28 Ido' neze zuhokizo, lingine nene O'moso'mo Abalahamu'ni lo huko-dine' gamazi do gihile izelingumu' Isaka' soto' ine' ne'mine igi linginesi O'moso'mo gozopo' lo huko line' gamazi ma nene di gihile izi ei' izipahala zuho lili' igi nizave. 29 Ne neiha Isimaeleki Isakaki soto' igi minasine' gameneu' nene leli' haza ve soto' oga' une' monovolo' soto' ive ne'mo Sikalahutati' soto' ive nene goboni mala' mala' o-daa' ine' ne'mine igi idise gameneukisi Mose' lou' gamazi'mi goboni ve Zuda ve ingine Sikalahutati' soto' unive Izesu' evenele leli' nene goboni mili-lidaa' nave. 30 Ne'mine o neine'za a'mine lou' gamazi'mi goboni alevelo' vo do neine' gamazi ma mono' godolou' gizi nizani' nene lo-lengemelove. Ti' li gizi nizave:

Goboni alu'mi gipele aza goboni alu minamine' veneli'mi gipele nene
meleho salani molo-dine' inite' dalinguti' nene
linge ma mo keke' damoloseinako
nemu' nene a'mine goboni alu nesi a'mine gipele nesi nene
ngimiselo hulozo.
31 Nemu' nene neze zuhokizo, laza nene goboni alu ei' zuhouti' soto' amo asi goboni alu minamine' Sala' zuhouti' soto' une' nene none.

Copyright information for `ASO