Hebrews 10

Ido' gomu' lou' gamazilo' e'meti ize ato ato' ngibili O'moso lehizi-dikevo ne'mi gihile've inite' lamine' soto' o ngemaa' neine' nene alinge' inite' lamine' lelita soto' o lemeline' nene inite' gihile ne'mine engita nene ma soto' o ngemesa'mine' ve. Asi mo alinge' soto' o-ledeline' inite' neti avazaha ne'minevo' nene soto' o ngemaa' neine' nenako ingine nene kilisimasilo' kilisimasilo' lihimete apase-ledavo lisihe' lamine' mineloningumu' ve li ize ato ato' di igi ngibili O'moso lehizi-dika' lehizi-dika' igi minaa' nani' ne'mo ngelo do lisihe' lamine' gehepeve o-ngedesa'mine' nenako nemu' nene a'mine inite' nene O'moso lehizi-dika' lehizi-dika' igivo' minaa' nave. Ee, ne'mine iga' nani' ne'mo lihime'ine apase-ngedo mudise do lisihe' gehepeve o-ngididiniko a'mine inite' O'moso imi gubi' izi imaa' nave ingine nene lihimete nomine' minelesune li ize ngibili O'moso lehizi-dika' lehizi-dika' nani' nene huli alamadine. Ne neiha vemoho' bulumaka' neti vanisesi meme' ize neti vanisesi ne'mo nene eveneliti lihime'ine nene apase osu' lo-ngedamilido' nenako kilisimasilo' kilisimasilo' ingine ne'mine inite' ngibili vanise'ine nene O'moso lehizi-daa' nani' ne'mo lihime dani' mamu' nene gohi gili oko'nido' gilaa' nave.

Nemu' nene Kilisito' misubouko mene lemelesa noogo mono' godolou' melehine lo imine' gamazi ma ti' li gizi nizani' ma neive:

Gaza evene' isaa' neve li ize ato ato' bili gimi ido'
inite' gohi ato ato' nene gimika' gimika' igi minilizave lo gelamo
neni' nene gelekele' o-gedelongumu' ve lo
oko'ne nene do va'va' ogo molo-nedane.
Ee, ize ma bili oloku' gizi' voti gimi ido'
lihime apase-ngedelive li ize ngibili
vanise'ine gimaa' nani' nemu' nene lanite' gelesa'manivosamu'
ti' lo lo-gimuvoni' ve: O'mosoo, gelezo.
Naza mono' godolou' nenikumu' lou' gamazi gizi nizani' malo'
nene e'meto gei' lukalo' do molo gelekele' o-gedelesa uvoni' ve.
Ido' Mose' lou' gamazi'mo lido' e'meti iga' nani' initekumu' Kilisito' aza O'mosomu' line' nene ize ato ato' bili gimi ido' ato ato' inite' nesi isaa' neve li gimi ido' lihime apase-ngedelive li ize bili gizi' voti gimaa' nani' nene lanite' gelamosa nimika' nimika' igi minilizave lo gelesa'mane loosa neloti' nene gei' lukalo' do molo gelekele' o-gedelesa uvoni' ve lo Izesu' lidi'mo lihimetemu' ize belo O'moso emaa' monovomu' nene gana' line' gamazi nene do hulo O'moso'mi lulolo' do molo gelekele' o-daa' monovomu' alinge' line' gamazi nene do otine' ve. 10 Ido' Kilisito' aza O'moso'mi lulolo' e'meto leli' mukikumu' nene gamene hamokovo' oko'no hulo helo O'moso imine' ne'mo lute do lisihe' o-ledo O'moso gelekele' o-do minelone' evenele lolo' o-ledave.

11 Ido' eveneto' medeli mini O'moso inite' lehizi-daa' ave muki' ingine nene go' laneme go' laneme mono' gono'ine nene di mini ize ato ato' ngibili gamene gamene hamo' initekovo' igi O'moso imi'mi vi minaa' nani'za eveneliti lihimete nene apase-ledelido' lisihe' amine' initekovo' imaa' nave. 12 Ingine ne'mine iga' nani'za Kilisito' aza gamene hamokovo' oko'no hulo helo O'moso imine' ne'mo eveneliti lihimete nene mudise apase-ledelido' vo daavosa O'mosolati' lemo minive ei' mo'mosi've O'moso'mo ana hulaa' ida neido' a'mida vo neive. 13 Ee, eze oko'no hulo helo mo gamene hamokovo' O'moso imine' ne'mo O'moso gelekele' o-do minelone' evenele nene mo mudise do lisihe' lamine' gehepeve o-lidine' nenako nemu' nene oko'no've gohi gohi hulo helo O'moso emamo vo O'moso'mo ana hulaa' ida ei' mo'mosi'velo' mino neloti' nene ei' Kilisito'ni biluva' i-daa' ave nene gelekele' i-dilizave lo O'moso'mo gizeneuko do'mo leme-ngedelingumu' nene gizebo o neive.

15 Ido' a'mine luvoni' gamazi nene O'moso'mi Sikalahu' ne'mosi hize ele' ogave. A'mine Sikalahuli'mo ei' gamazi've lo-limine' mono' godolou' ti' li gizi nizani' ma neive:

16 Guvelesi ve'mo ti' lo line':

Gamene muluvoni' nene ogavo alinge' evene' mukilite gili dalizani'
gamazi gosoho' gohi ma lo huko do soto' o-ngedeloni' gamazi nene
ne'mino neive: Naza lo huko do soto' o-ngedeloni' gamazi nene
lu'ningu' molo-ngedo ido' ga'ningu' nene luhuvo ne'mine gize-ngedekuvo
mineleseive.
17 Ido' ne'mine lo neloti' alinge' gamazi gohi ma ti' lo line':

Ido' evene' engita lihime minine' mamu' nesi ido'
lou' gamazi avuto' iga' nani' mamukisi nene
gohi ga'ne gelamolosuve.
18 Ido' O'moso'mo lihimete muki' nene apaso osu' lo-ledavo ma nene lihimete apase-ledelive lo lihimetemu' ize ato atoli'mine belo oloku' gize emaa' une' ma nene gohi ma amolosune.

Laza O'moso'mo Lihime Lemelihe Lebelelihe Lo Golise Gelamo Ezela Vo Gi'mizelone Lo Lo-ngimine'

19 Nemu' nene neze zuho lingine Izesu' vanise lepo helo O'moso imine' ne'mo lihimete nene mudise apase-lidine' nenako nemu' nene golise gelamo O'moso'mi kekeize atoli'mine lo minine' numuno lulou' nene ha vo dizelonido' o neive. 20 Ee, Izesu' eze oko'no hulo hiline' ne'mo O'moso'mi kekeize atoli'mine lo minine' numuno lulou' nene evene' dizikelizave li mono' numuno nabau' lavolavodunu' akate hizi tili-limikani' nene mudise bele ngolo' lo-ledo O'mososi bizo minelone' aka gosoho' ele'vole' ogo minevo' minevo' iline' nene vele-ledave. 21 Ido' lelito' medelo mino O'moso inite' lehize-daa' ivete nene aza evene' naba mino O'moso'mi evenele zuho leli' nene gizebo o-lede neive. 22 Nemu' nene eveneto' medeli mini O'moso inite' lehizi-daa' ave ngele'mize milalizangumu' a'mine ve nene di lamine' i-ngidi oko'nido' nene vanisedunu' hibi' izi huli-ngidi ido' noso' izi-ngidaa' ani' ne'mino aza leli' lute nene ei' vanise'vedunu' hibi' izo hulo-ledo a'mingu' monovo goloso minine' nene do hulo-ledo ido' okode nene noso laminedunu' noso ize-lidine' gelavo mino lute lisihe' lamine' minidi'mo O'moso golo izamo ido' gate seta' gelamo ezemu' gele ele'vole' goloso ogo O'mosola ogo ezesi bizo minuke'zo. 23 Ido' O'moso'mo inite' muki' ha olosuve line' inite' nene mo lamineto' oloseive lo mo gele none' ma nenako laza gele ele'vole' ogo O'moso'mo lemelove lo lo neine' initekumu' gizebo ogo minaa' noningumu' lo soto' oga' noune' nemu' nene golise gelo hulamo do gili' lo do minelone. 24 Ne'mine ogo lute ngemo nasahili' o-ngedaa' monovo ido' nevo'mine gono lamine' ato ato' daa' monovo lamine' nene lelita amuzo molo minelive lo ge luka do ote-gede ne lu'ne do ote-nede lolone' akamu' nene vise' ogo ningo ogo molo minelone. 25 Ido' evene' malite monokumu' do gese' oga' monovo hulaa' nani' ne'mine igi lingine hulami monokumu' di gese' i'mi vi mini monoku' ge hize ele' o-nede ne hize ele' o-gede li minilo. Gamene naba mo avito' navo lingine mo ningi gili nizani' nenaze. Nemu' nene lingine mo ge hize ele' o-nede ne hize ele' o-gede livi' livi' igivo' minilo.

26 Ido' laza Kilisito' gamazi've gihile laminekumu' nene mo gelo e'meto minaa' noolonivete lihime daa' initekumu' nene mo amolone' inite' neive lamo lihime doso' ne'mo Kilisito' vanise've lepo helo lihimete apase-ledeline' aka vele-lidingumu' nene o've lune' geleleseive. Ido' laza lihime daa' akalo' gohi volone' ne'mo O'moso'mo lihimete apase-ledeline' aka nene Kilisito' vele-lidingumu' nene o've lune' gelavo a'mine lihimetemu' golo hizo O'moso lehize-delone' inite' gohi ma minamoloseinako a'mine lihimete nene O'moso'mo ha do mineleseive. 27 Ido' a'mine lihime'ine do minelive nene O'moso biluva' i-daa' nanako aza olo' goloso lo neine' oloku' ngimiselavo a'mingu' vi tolovo ilizani' nenako laza golise volone' akate ato' ma nominako nemu' laza lihime daa' akalo' gohi ma volone' nene lehelele izivo golise goloso gelo O'moso'mo lihime lemo oloku' hulo-ledo ne'mine o-ledeline' gamenemukovo' nene gizebo ogo minelesune. 28 Ido' Mose' lou' gamazi avuto' ave nene mo ise'ine izisa'mani' ve. Ve malite a'mine lou' gamazi avuto' ani' nene evene' sitape sitohamolite he ningi goniku' li soto' i-ngidikevo a'mine lou' gamazi avuto' ave nene lihime ngimi ngibili hilaa' nave. 29 Ee, Mose' lou' gamazi've nene mo gili e'meti minaa' niigisa a'mine lou' nene ma avuto' ani' nene ngibili hilaa' ani' nenako Mose'ni ivile' ogo minive O'moso'mi gipele aza O'moso'mo lo huko-lidine' gamazi gosoho' nene do amuzo molo ido' engi' lu'ine do lamine' o-ngedo O'moso'mi evenele lolo' o-ngedo vanise've lepo hilingumu' gilikevo haza inite' ogavo eze nene lisi hupi' izi-dii ido' leli' nasahili' o-ledaa' ive O'moso'mi Sikalahu' nene di u'musupo lizi-dilizave nene Mose' lou' gamazi avuto' ikevo lihime'inemu' ngibili hilaa' nani' nene ivile' ivosa lihime nabalo' goloso ngemeleseive. 30 Mono' godolou' gizani' gamazi ma ti' lo livemu' mo gele none:

Lihime ngemaa' gono nene neni' gono nenako
lihime nene neni' ngemelesuve.
Ido' ma nene:

Guvelesi ve'mo zasi gono do eze evenele ize' molo-ngedeleseive.
Ido' a'mine gamazi live nene O'moso'mo line' nenako nemu' nene Izesu' monovo danavamu' mo gili minisasi avuto' iga' nave nene lihime ngemo mo ngebeleleseive losa mo gele none.
31 Nemu' nene laza ne'mino lihime do minelonidoti' lebelaa' amuzo'vesi minive minevo' minevo' O'moso'mi anau' alone' nene lihime atoli'mine ogo lemeleseinako agae mo nehelele goloso izo live. Nemu' nene lihime akau' vaalone lo ge hize ele' o-nede ne hize ele' o-gede lovo' lovo' ogovo' minelone.

32 Gomu' gameneu' lingine minani' monovomu' gatine molalize. A'minemu' gohi gili minilo. A'mine gameneu' nene Izesu'nimu' gilikevo ne'mo lutingu' hize labana' elavo minani' ne'mo goboni mala' mala' i-lingidi nizavo mulumo alumo gili'mi vi minisasi Izesu' mono've nene hulami amuzo mili di minani'. 33 Ee, gamene ma nene evene' mukiliti ve'nido' di oti-lingidi gamazi goloso li-lingidi di goloso i-lingidaa' ani' ve. Ido' gamene ma nene lingine zuhola a'mine suno nene soto' noo-ngidivo linginesi a'mingu' vi makato' a'mine geni nene gihaa' ani' ve. 34 Ne'mine noluvoni' nene Izesu'ni biluva' i-daa' avelite henenitine inite' matatine ipe' igi di vikevo lingine nene laza a'mine heneni nene ivile' ogo minine' lute'mi minevo' minevo' iline' heneni nene ha molo none li gili longolize izi ningi mati-ngimikavo dii vaa' ani' ve. Ido' lingine zuho Izesu' evenele linge nala' numungu' minani' nene mulumo'ine gili nasahili' i-ngidaa' ani' nemu' nene noluve. 35 Ee, lingine gomu' nene lengita geni inite' ato ato' muki' soto' ivo a'mingu' amuzo mili gili ele'vole' igi minani' nenako ne'mi gihile've dalizangisi idise lengehelele izavo a'mine gili ele'vole' ani' nene hulikelizaze. Ha gili ele'vole' igi di minilo. O'moso'mo lemelove lo salani molo-lidine' inite' nene dalone li ma a'mine geni inite' soto' o-lengemelinguti' nene olovo' igi limi ingami amuzo mili gili ele'vole' igivo' minilizani' nenako nemu' nene a'mine gili ele'vole' ilizani' monovotine nene hulami di gili' li di minilo. Amuzo mili gili ele'vole' igi minilizani' nene O'moso'mo menitine naba lengemeleseive.

37 Ido' geni lengebelelingu' nene olovo' ami ha amuzovo' mili gili ele'vole' igi minilizani' nene mono' godolou' Izesu' geto alingumu' ti' li gizi nizani' nenako nemu' ne'mine ilizave:

A'mine aloseive lave nene gamene ha'na ne'mine minosa alivoba
aline' gamene've nene mo li'nibe o neive.
38 Ido' O'moso'mo ti' lo line':

Ne'mine o neiha neze evene'ne zuho lu'ine lisihekisi minani' nete
nenikumu' gili ele'vole' igivo' minilizani' ne'mo
hazavo' ele'vole' igi ve'inesi mini-di vii minilisani'za
gili ele'vole' igi mini-di vilizanguti'
ve ma ingine olovo' igi velepe' izi vilizani' nene
naza mo lu'neu' goloso gehepeve gelelesuve.
39 Ne'mine lo line'za laza nene evene' ma ingine gili ele'vole' igi mini di vanguti' olovo' igi velepe' izi vii vi tolovo iga' nave ne'mine evene' minamo laza nene gele ele'vole' ogo mino mine do dizo minaa' lemeni dameni do minelonive nene none.

Copyright information for `ASO