Hebrews 13

Ogo Molo Nonivo O'moso'mo Ninge Lamine' Iline' Ne'mi Gamazi Lo-ngimine'

Lingine monoku' nene hamo' zuho lili' igi mini lutine nene ne geme ge neme li minaa' nani' nene lengitati' huko vamivo mini di vi minilo. Ido' evene' malite venenga ve ma engi' minada ikevo ngele'mize lamine' igi haza evene' nene ne'mine noo-ngidube li gili angelo' nene ngele'mize lamine' ani' nenako nemu' lingine venenga ve ngele'mize lamine' ogakumu' nene gili hulikevo gatine molalive. Ido' Izesu' evenele ma nala' numungu' huli-ngidikevo minangu' nene lingine engikisi makato' nala' numungu' mini mulumo alumo gili nizani' gilivosa engikumu' gili mini hize ele' i-ngidi minilo. Ido' lingine ha vetinesi mini olihe ma hili vamanako lengikisi nene a'mine'mine igi goboni mili-lingidilizani' nene agae ma hize ele' i-lidavoo li minilisanako nemu' nene goboni mili-ngidavo minaa' navemukisi nene gili mini hize ele' i-ngidi minilo. Ido' vene' vemoho' gopo' napa ingalizani' nene O'moso'mo lihime ngemeleseinako evene' muki' nene vene' vemoho' lili' iga' monovomu' nene gili lamine' i mini di gopo ami lisihe' lamine' igi mini eledingesivo' ido' vadingesivo' ingalizave. Ido' Guvelesi ve aza lengi' mo keke' hulo-lengedo vo haha amolosuve lo line' nenako nemu' lingine lutine nene moni henenilo' vaalive. Inite' gohi ma daloinako li mumuzo' ami lingine di minani' inite' nene leli' votigilelo' lisihe' o neive li gili hongu li lamini minilo. Ee, Guvelesi ve aza lengi' hulo-lengedamolosuve line' nenako nemu' nene laza gopo gate gelamo ezemu' gele ele'vole' ogo mono' godolou' ti' li gizi nizani' gamazi ma nene ha ti' lo lolosune:

Guvelesi ve aza hize ele' o-ledaa' neinako
laza inite' mamu' lehelele izelido' nomivo
ido' evene' nete ma di goloso i-lidilizado' minamune.
Ido' O'moso'mi gamazi li-lingimave gizebo vetine ingine mono' akalo' nivi hilani' engita nene gili mini gizeka'nido' nene ningi hehe li mini nge'meti nivi ingine O'mosomu' gili ele'vole' igi minaa' ani' monovo'ine ne'mido' nene lingine api'napi' igi di minilo. Izesu' Kilisito' aza nene gomu' minine' monovo'vesi hazavo' mino monovo've nene do ato' amo idisesi nene mo a'mine'mine ogovo' mino mine do voo mineleseinako nemu' nene evene' ma mono' gamazi ve li soza gamazi ato ato' li-lingimilizani' ne'mo gatine hizalize. Lute hize ele' oloseive li noso' nite' naakumukisi li-lingimilizani'za lute hize ele' o-ledaa' neine' inite' nene noso' nite' nevoba asi O'moso'mo nasahili' o-ledaa' neine' ne'mo lute amuzo molavo ne'mo nene lamine' iline' nenako a'mine noso' nitekumu' li-lingimilizani' gamazi gili daa' nave nene a'mine initeli'mo ngele'mize lamine' amaa' neine' nenako ne'mo gatine hizalive. 10 Ee, O'moso imani' noso' initekuti' nene ha nalisave li li-lingimilisani'za nemu' lo-lengemeloze. Gililo. Sipisipi ize nevo'mine bili O'moso'mi holomolo' mili gizi imisa naa' nani' ne'mine inite' gelo minivete Kilisito' nene leli' sipisipi nevo'mine initete lolo' ogo lelita mine molo neive. A'mine Kilisito' nene O'moso belo gize emaa' sipisipi ize ne'mine lolo' ogo neivosa laza nene ei' Izesu'nimu' gele ele'vole' ogo minaa' noune' ne'mo ei' Izesu' oko'no naa' noune' gelave. Ne'mine oga' noune'za Zuda veti mono' numuno ado' seli numuno avazahalo' gizani' miningu' nene vi hili mini sipisipi nevo'mine bili O'moso imanguti' naa' nave ingine nene leli' sipisipi izete ne'mine lolo' ogo neivo laza eze oko'no nene naa' noune' gilivo minaa' noune' ne'mine igi ingine gohi Izesu' oko'nosi nene nalizave lo O'moso'mo gele ngemamine' ve. 11 Ido' gele ngemamine' nene Kilisito' avazahalo' ingine nene ize ma bilikevosa eveneto' medelo mino O'moso inite' lehize-daa' ive naba aza a'mine izeliti vanise'ne nene eveneliti lihime'ine apaselingumu' ve lo O'moso'mi kekeize atoli'mine lo minine' numuno lulouko nene do dizo hibi' izo O'moso emavo sikizapovo nene mo keke' nami di vi numuno ebe' heta gizi'votaa' ani' nenako nemu' a'mine'mine igi ize ne'mi avazahalo' minive bilangutikisi nene ingine mo nani' gilivo minilizave lo ma gele ngemamine' ve. 12 Ido' a'mine ize ne'mi vanise've nene O'moso imi sikizapovola nene di vi numuno ebe' heta gizi'votaa' ani' nenako ne'mo Izesu' aza ei' vanise'vedunu' eveneliti lihimete apase-ledo O'moso'mi evenele lolo' ogo minelonido' do lisihe' o-ledelesa Zelusalemi numuno ebeli'mi gesi gatedoti' lemo heta ogo mulumo gelo hiline'. 13 Nemu' nene Zuda veti gesi minguti' lemo vida nene lazasi lemo vo heta ogo ezela gi'mizo mino eze ovozo hiline' inite' i-di minaa' ani' ma'mine igi leli' lovozo helelone' inite' i-lidi minilizani' nene gopo gehe do vuke'zo. 14 Ido' ezemu' lovozo helelone' inite' geho Zuda veti gesi minguti' lemo vo heta olone' nene minevo' minevo' iline' numuno ebete me misubou' nene ma minamivo minevo' minevo' numuno ebete nene alinge' soto' o-ledelingumu' gelo a'minemu' gizebo ogo ne'mine olone. 15 Nemu' nene eze evenele nene none lo leli' veteti' eze gulive oga' noolonivete a'mine gulive nene do oto minelonido' o neine' nenako nemu' nene Izesu' akate vele-lidido' nene e'meto O'moso ize bili imaa' ani' ne'mino laza nene gamene gamene veteuti' O'moso opo'ni lo-emo minelone. 16 Ido' evene' nasahili' i-ngidi inite'ine nomivo nizani' aleve nene inele i-ngidi minilizani' ne'mo ize ato ato' bili O'moso gizi imaa' ani' inite' ne'mine lamine' ma imani' gelavo mulunou' lamine' geleleseinako nemu' nene ne'mine ogakumu' gatine molalive.

17 Lengi' monoku' gizebo i-lingidaa' nave nete di minaa' nani' gono'ine ne'mi monovomu' nene alinge' gamene nabalo' O'moso'mi velelo' li soto' ilisanako nemu' gili mini ingine nene lengi' monovotido' gizebo lamine' igi di lisihe' i-lingidivo' minaa' nave. Nemu' nene lengikumu' geni ngebelamivo gono'ine nene ngolize izi lu'ine laminetotikovo' daa' ilizave li lingine engi' gamazi lilizado' gili di mini gelekelekovo' i-ngidi minilo. Ee, ingine lengikumu' gosele' ve li geni ngibilivo gono dalizani' ne'mo lengi' lengele'mize lamine' amilizado' o neine' nenako nemu' liliza gamazilo' nene gelekelekovo' i-ngidi minilo.

18 Laza gamene gamene monovo lisihekutikovo' ogo molo minelone lo gelo minaa' noune' nenako laza gilune' leli' lute nene O'moso'mi velelo' lisihe' goloso o neive losa gele none. Nemu' nene lingine O'mosola lelikumu' ve li li minilo. 19 Ido' O'mosola nenikumu' li-nidikevo ne'mo nele'mize lamine' ivo lengita lite' losa tine' molo alove lo amuzonga noluve.

Gamazi Lo Osu' Lolosa O'mosola Laa' Ne'mino Line'

20 Ido' O'moso nene zou lo minaa' monovo do soto' o-ledaa' ive mino aza nene ei' evenele sipisipi ize ne'mine gelo minunive leli' gizebo vete naba Izesu' Kilisito' aza vanise've lepo leli' gele daloningumu' ve lo O'moso'mo lo huko-lidine' minevo' minevo' iline' gamazi do amuzo molavo gohi hilinguti' do ote-dine' ne'mo 21 O'moso aza nene lingine ei' lulolo' e'meti gili dalizangumu' ve lo ne'mine ilizado' do lisihe' o-lengedo monovo lamine tamine' muki' nene lehize-lengedo Izesu' Kilisito' amuzo ne'mo lutingu' gono do eze ninge lamine' iline' monovo nene do soto' o-lengedelive lo ido' eze opo'ni livi' livi' igi mini izi hukamavo minevo' minevo' ilive lo mo ne'mino miniliho lo noluve.

22 Neze zuhokizo, lutine do ngi lo-lengedo luhuvo inite' mene do li'nibe ogosa gizuvoni' nenako nemu' nene gosele' lengebelamivo gati gili minilizave losa lengita amuzo molo noluve.

23 Ido' ti' lo nolo-lingimuze. Gililo. Leze zuho Timoteo'ni ma nene nalato' minidoti' mo imiselikeve. Ido' mo imiselikenako aza lite' lo nouvoda ogo heteleline' nene ninge-lengedelesa lengi' nizada nene makato' ogo hetelelesusive.

24 Ido' lengi' gizebo vetine nesi O'moso'mi evenele muki' nesi nene longopo'ni noluze. Gati li-ngimilo. Ido' O'moso'mi zuho Italia misuboukoti' minani' ingine netesi longopo'ni nilave.

25 O'moso'mi nasahili' ne'mo nene lengita mine do vo miniliho lo noluve.

Moda a'nesi' ve.

Copyright information for `ASO