Hebrews 3

Izesu' Ne'mo Mose'ni Ivile' Ogo Dizosa Miningumu' Lo-ngimine'

Nemu' nene neze zuho, O'moso'mo ei' ve lo Okulumoku' voloningumu' lengele'mize molave lingine nene leli' monoku' nene O'moso'mo ei' velemu' ogo imiselavo ave aposolo mino eveneto' medeli mini O'moso inite' lehizi-daa' ave naba ne'mine minive naba Izesu'nimu' nene gatine gili minilo. Mose' aza O'moso'mi zuhola gono dangu' nene O'moso'mo lo-didokovo' e'meto monovo've lisihetoti' gono do do vine' ne'mine ogo Izesu' aza nesi a'mine'mine ogo gonolo' ele'mize molave O'moso'mi gamazi've nene ivile' amo lo-didokovo' e'meto monovo've lisihetoti' gono do do vine' ve. Ido' evene' zuho maliti me'nibi guvele ne'mo a'mine zuholiti guve'ine nene ivile' ogo naba minaa' neine' ne'mino Izesu' gulive do hozi lolone' nene Mose' gulive do hozi laa' noune' nene ivile' ivosa do hozi lolonido' lisihe' o neive. Ido' lisihe' o neine' nenako nemu' nene ezemu' gatine gili minilo. Ido' ne'mine lo O'moso'mi evenele zuholiti me'nibo nene Izesu'nimu' luvoni' giline' nenako nemu' nene lo-lengemelove. Evene' zuho ato ato' di soto' i-ngidave me'ninge nene minamani' nevoba ha minani' ma neive. Ha minani'za a'mine inite' mata' muki' do soto' molave nene O'moso'movo' do soto' molani' nenako ei' hamo' nene me'nibo neive. Ido' Mose' nene O'moso'mo lo-didokovo' e'meto monovo've lisihetoti' O'moso'mi zuhola gono do do vine' nene ha O'moso'mi gelekele' ve'vevo' mino O'moso'mi gamazi've alinge' soto' ilingumukovo' gamazi lo ngeme ngeme' ogo gono do do vine'za Kilisito' aza neve O'moso'mo lo-didokovo' e'meto monovo've lisihetoti' gono do do vine' nene mo O'moso'mi gipele mino eze zuholo' gizebo o-ngede mino gono do do vine' ve. Ido' eze zuho ve luvoni' nene laza Kilisito' do lu' izelive lo ezemu' gele ele'vole' o mino lolize izaa' noune' monovote nene ma hulamoso' a'mine zuho nene leli' minelesune.

Mose' nGele'mizo Vive Muki' Ingine O'mosomu' Gili Ele'vole' Ami Mehe'ine Imi'mi Vadi'mo Mine Gelaa' Ebe' nGemelesa Ingu' Nene Vi Hilamani' Nenako Nemu' Leli' Nene Ehe' Ogo Mineloningumu' Lo-ngimine'

Nemu' nene laza O'moso'mi Sikalahuli'mo gamazi ma ti' lo line' mamu' nene gele dalone:

Mose' aza ebe' hadivela ngele'mizo novivo
O'moso golo izani' gameneu' evene' ingine
O'moso'mi gamazi've gili huli gili dalisa gilami
a'manapa igi minani' ne'mine igi minami
lingine ei' nolo've idise a'mene ma nigili ma
lutine di a'manapa igi gili hulamilo.
Ido' a'mine ebe' hadivela nene avotinge ingine
inite' mata' muki' engita ogo molo uvoni' nene
kilisimasi foti (40) ne'mine nene mini ningi minani'za
ningi huli-nidi go'ne izi'mi igi minani' ve.
10 Nemu' nene naza a'mine alevemu' nene mulu'neu' goloso gehepeve gelo
engikumu' ti' lo luvoni' ve:
Engi' lu'ine ne'mo gamene gamene gopo akalo' vaa' ivo
neze aka'ne nene ningi hulani' ve.
11 Nemu' nene nizebolo' molani' nenako naza lamineto' nolo hukuve lo
ti' lo luvoni' ve:
Ingine nene neni' mine gelaa' ebe'neu' nene igi mini gilamilisave lo
noluve.
12 Nemu' nene neze zuhokizo, lengikuti' evene' ma nene lutine golososi mini O'mosomu' gili ele'vole' ami minevo' minevo' ogo gono daa' ive O'moso nene mehedine imikelizaze. Ehe' igi minilo. 13 Ido' lengikuti' evene' ma lingine lutine O'mosola molakumu' lutine a'manapa ogavo lihime daa' monovo goloso ne'mo lingimimise' ogavo goloso ikelizaze. Mono' godolou' idise gamene ve lani' nene ha neidokovo' monoku' nene ne lu'ne do ngi lo-nede ge luka do ngi lo-gede livo' minilo. 14 Laza gana' api' ogo Kilisito'nimu' gele ele'vole' une' nene hulamo do gili' lo nonivo idise mene none' gamene osu' liline' nene a'ne'movo' Kilisito' evenele lolo' une' nene gihile mineleseive.

15 Nemu' nene mono' godolou' ti' li gizi nizani' gamazi malo' e'meti minilo:

Evene' ingine O'moso'mi gamazi've gili huli
gili dalisa gilami a'manapa igi minani' ne'mine igi minami
lingine ei' nolo've idise a'mene nigili ma
lutine di a'manapa igi gili hulamilo.
16 Ido' mono' godolou' gamazi idise lo soto' uvoni' ne'mo nene lamineto' ti' lo nolo-limive: Laza O'moso'mi gamazi gele damo mehede emo minelone' nene O'moso'mo mine gelaa' lemelesa neingu' nene ngelo vo holamolosune. Ee, O'moso'mo gamazi nolo-ngimivo gili minisasi a'mine gamazilo' e'metami mehe'ine imave li mono' godolou' gizani' ma nene zamotinemu' luhuvo gizani' neve. Mose' Aigita misubouti' ngele'mizo ani' aleve muki' engikumu' nene luhuvo gizani' ve. 17 Ido' kilisimasi foti (40) ne'mi lulou' ma nene O'moso'mo zamotinemu' mulunou' goloso gehepeve giline' neve. A'mine hamo' aleve ingine kilisimasi foti (40) ne'mi lulou' lihime di ebe' hadivela hili gese' ani' aleve engi' nemu' nene mulunou' goloso gehepeve giline' ma neive. 18 Ido' O'moso aza evene' mine gelaa' ebe' ngemelesa nouvongu' nene ingine mini gilamilisave lo evene' zamotinemu' lo huko line' ma neve. A'mine hamo' aleve ingine O'moso'mi gamazi gili huli mehe'ine imave engikumu' nene mine gelaa' ebe' ngemelesa nouvongu' nene igi mini gilamilisave lo lo hukine' ve. 19 Nemu' nene ingine O'mosomu' gili ele'vole' ami mehe'ine imaa' ani' monovo'ine ne'mo nene mine gelaa' ebe' ngemelesa ingu' nene vamani' ve lo mo ningo gele none.

Copyright information for `ASO