Hebrews 4

Ido' nemu' nene O'moso'mo evene' ma ingine mine gelaa' ebe'neu' nene vi hilalisave lo lo hukine' gamazi nene olihe ogo gihile izamivo a'mine'mi aka'vesi olihe tilamido' nene O'moso'mo lengikumu' gala gelosa lengikuti' evene' mamu' mo aka ivile' ikenako a'mingu' mo keke' vi hilamilisave lo gelalize. Laza ehe' ogo golise gelo minelone. Ido' laza ehe' ogo golise gelelone' nene nanitekumu' ve. Mose' miningu' minani' aleve mono' gamazi lamine' li-ngimani' ne'mine igi lezesi li-limikevo none. Ido' a'mine mono' gamazi lamine' nene li-ngimi ngimi' avo gilani'za ingine a'minemu' gili ele'vole' igi e'metisa'madi'mo engita vo gihile izamo hize ele' o-ngedamaa' ine' ve. Nemu' nene laza engi' ani' monovo nemu' gelo golise gelo ehe' ogo minelone. Ido' O'moso'mo ezemu' gili ele'vole' ami mehe'ine imaa' avemu' ingine mine gelaa' ebe'neu' igi mini gilamilisave lo lo hukokuve line' nenako nemu' nene a'ne'mine ve ingine mine gelaa' ebe'veu' nene vi hilamilizado' mini mili minikevo a'mine mine gelaa' ebe'veu' vo holalonive nene ezemu' gele ele'vole' ogo nonive leli' nene none. Ido' ingine O'moso'mi mine gelaa' ebe'veu' vi hilamani' nene mine gelaa' ebe've nomivosa nevoba asi aza okulumo' misubo do soto' ogo gono do osu' lidoti' nene mine gelo neine' nenako mine gelaa' ebe've nene mo neive. Ido' O'moso aza mine gelo neive luvoni' nene O'moso'mo gamene sigisi (6) ne'mi lulou' gono davo gamene seveni (7) ine' nemu' nene mono' godolou' gamazi ti' li gizi nizani' ma neive:

Gamene seveni (7) ogavo gono've osu' line' nenako
neu' nene api' ogo mine giline'.
Ido' mine gelo neive li luhuvo gohi gizani' ma ti' lo line' neuko mo lo-lengemekuve:

Ingine nene mine gelaa' ebe'neu' nene igi mini gilamilisave.
Ido' naza gomu' lo-lingimuvoni' gamazi maloti' nene evene' ma ingine O'moso'mi mine gelaa' ebe'veu' vi hilalizani' aka nene ha ngolokovo' lo minivo minine' nenako ido' gomu' minangu' nene mono' gamazi lamine' li-ngimikevo gilave engi' nene a'mine gamazi gili ele'vole' igi e'metisa'madi'mo O'moso'mi mine gelaa' ebeku' nene ma vamani' nenako a'mingu' vo holalone' gamene ato' gohi ma do kegeso molo-lidine' ve. Ido' a'mine gamene nene idise mine do nodizune' gamene ne neive. Ee, Mose' evene' ngele'mizo vine' gameneloti' kilisimasi vai' goloso ogo vavo a'mine gamenemu' nene idise mine do noune' gamene ve lo O'moso'mo Davidi' veleu' molavo a'mine lo-lingimuvoni' gamazi ma nene Davidi' ti' lo line' ve:

Lingine ei' nolo've idise a'mene ma nigili ma
lutine di a'manapa igi gili hulamilo.
Ido' Mose' helavo Zosuva' ezelo' medelo Kanaha misubou' ngele'mizo vine' mau' nene ingine mine gelaa' ebe' nene dadiniko O'moso'mo mine gelaa' ebeku' vo holaa' gamene ato' gohi mamu' alinge' ma lamidine. Nemu' nene O'moso'mo gono've do osu' losa mine giline' ne'mine ogo eze evenele zuho mine gelelone' gamene nene lelikumu' ha gizebo ogo neive. 10 Ee, O'moso'mi mine gelaa' ebeku' vo holalonive laza nene O'moso'mo inite' mata' lolo' ogo osu' lo gono've hulo mine giline' ne'mino lazasi gonotesi hulo a'mida mudise aka vo mine gelelesunako nemu' nene O'moso'mi evenele zuho mine gelelone' gamene nene lelikumu' gizebo ogo neive. 11 Nemu' nene laza Mose' miningu' minani' aleve O'moso'mi gamazi gili huli e'metami a'mine mine gelaa' ebeku' vi hilamani' ne'mine ogo engi' ani' ne'mine olone' ne'mo a'mine mine gelaa' ebeku' nene vo holamo zovo' izo mau' vogalonge. Mine gelaa' ebeku' voloningumu' nene O'mosomu' gele ele'vole' ogo eze gamazi've nene amuzo molo gele do vo minelone.

12 Ee, O'moso'mi gamazi ne'mo nene gilizevo ogo haza minamo amuzo'vesi goloso mino gono dovo dovo' ogo mino bainati mite' velela ge'no mehenela ge'no gohe goloso minaa' neine' nene ivile' ogo gohe goloso neive. Ido' bainati mite' nene evene' hize sato sokulu' lo lulou' gehepeve vaa' neine' nene ivile' ogo a'mine O'moso'mi gamazi ne'mo luteu' vodeu' nene hize sokulu' lo vo holosa laza lute gateu' olosa gilune' initekumu' nene ize' molaa' neive. 13 O'moso'mo do soto' molani' inite' muki' nene haleki minilizado' ma minamavo aza ningesa'mine' inite' nene hamokisi mo keke' nizamave. Ee, leze monovote ize' molo-ledelive ei' velelo' nene inite' muki' hiti minami sotokovo' minaa' nani' nenako nemu' a'mine O'moso'mi gamazi nene amuzo molo gele do minelone.

Leli' Hize Ele' O-ledelive Eveneto' Medelo Mino O'moso Inite' Lehize-daa' Ive Nabate Dizo Minive Izesungumu' Lo-ngimine'

14 Ido' eveneto' medeli mini O'moso inite' lehizi-daa' ave nabalitevo' mono' numuno nabau' lavolavo izi hukikani' nene di veseme' ili O'moso'mi mo'mosi'vevo' ve langu' dizaa' ani' ne'mine ogo O'moso'mi gipele Izesu' aza eveneto' medelo mino O'moso inite' lehize-daa' ive nabate dizo minive lolo' ogo okulumo' ivile' ogosa hozila O'moso'mi mo'mosi've gehepeve neida Okulumokuko dizo minine' nenako nemu' monote gele ele'vole' une' nene do amuzo molo do ngi lo do minelone. 15 Ido' monote nene do amuzo molo do ngi lo do minelone' nene eveneto' medelo mino O'moso inite' lehize-daa' ivete naba nene lemengu' ne'mi lulou' mino amuzote nomivo gilizevo ogo nonivo aza nene mulumote ningamo ninge mate-ledaa' ive minine' nevoba lelita lemengu' ato ato' muki' soto' oga' neine' ne'mino ezelasi nene emengu' ato atoli'mine soto' o-dine' nenako nemu' nene leli' mulumote ningelido' lisihe' o neive. Ee, lelita lemengu' soto' oga' neine' ne'mino ezelasi soto' ine'za aza neve lihime hamokisi ma damive. Ido' leli' mulumote ningelido' lisihe' o neine' nenako nemu' nene monote nene do amuzo molo do ngi lo do minelone. 16 Ido' eveneto' medelo mino O'moso inite' lehize-daa' ive nabate ne'mo leli' mulumote ningelido' lisihe' o minive aza nene O'moso neida leli' gamazite hize ele' olosa vo neine' nenako nemu' laza geni lebeleli gameneu' nene O'moso'mo isete izo ido' nasahili' o-ledo ha hize ele' o-ledeleseive lo a'mine geni lebeleline' inite' nemu' nene lovo' kiselevo' ogo lo-emeso' nene O'moso aza mo'mosi'velo' mino gizebo o-ledo nasahili' o-ledo minaa' neingumu' nene ha lo-emelone.

Copyright information for `ASO