Hebrews 6

Nemu' nene lu'ine do ngi lo-ngedelingumu' ve li Kilisito' evenele idi'ne a'mene lili' ave gana' apizi ngimaa' ani' gamazi ado' lu'ine di velepe' izi labuluvo oga' akau' ngele'mize molaa' neine' monovo nene hulaakumu' gamazi nesi ido' O'mosomu' gele ele'vole' ogali'mi gamazi nesi mono' noso holaa' monovo ato atokumu' apizi ngimaa' nani' gamazi nesi ido' a'ine evene' godo'nido' hitaa' nani' monovo ne'mi gamazi nesi ido' hele noloninguti' otaa' ne'mi gamazi nesi ido' O'moso'mo goni' o-ngedo lihime ngemelive mulumo alumo gili minivi' minivi' ilizani' gamazi nene gohi gelo gohi gelo minune' nene hulo gamazi monoku' do lodive o-ledeline' gamazi ma atokumukisi imine' molo gelo minelone. Ido' gamazi gohi ma monoku' do lodive o-ledeline' gamazi mamu' imine' molo gelo gelo mineloningumu' nene mo O'moso'mo gele lemavo ma mo ne'mino imine' molo gelo minelone. Mono' ne'mo ve ma ingine lu'ine hize labana' ele-ngedavo O'moso'mo eze evenele lehize-ngedaa' inite' nene lehize-ngedavo ne'mi lanite've gilaa' ido' O'moso'mi Sikalahu' engita ogavo minaa' ido' O'moso'mi gamazi nene lamine' neive li ne'mi lanite've gilaa' ido' alinge' gamene naba soto' iline' ne'mi amuzo engita soto' ivo lanite've gilaa' ave ingine ne'mine ve mono' mehe'ine imi hulilizani' ne'mo ingine O'moso'mi gipele nene lohoto' zalo' gohi bilani' gelavo evene' muki' eze di u'musupo lizi-dilizani' monovo di soto' ilizani' nenako ne'mine igi nizadoti' laza engi' nene lu'ine di velepe' izilizani' akau' ngelo ngele'mize tine' molamolosunako nemu' nene lutine di velepe' izilisave li gana' api' igi li-lingimaa' ani' gamazi bina nene hazamu' gohi lo gohi lo amo gamazi gohi mamu' imine' molo lo gelo minelone. Ee, goline nene misubou' izeka' izeka' ivo misubo ne'mo ge'no nosa a'mine misubou' gono daa' ave nene do lamine' o-ngedeli noso' nite' nene do soto' oga' neine' misubo nene O'moso'mo no'noho' izo do lamine' oga' neine' ne'mino aza evene' ma engita eze gamazi limine' nene gili ne'mi gihile've monovo lamine' di soto' ilizave nene no'noho' ize-ngedaa' neive. Ido' a'mine misubo ne'mo goline nene ge'no noosa a'mingu' nene gasavasi lilihe golosovo' do soto' iline' nene O'moso'mo a'mine misubo nene gohi ma do guno amoso' ogave lo usi' ize-delido' o neinako a'mine misubou' nene olo' enge vite' oloseinako nemu' nene O'moso'midati' gamazi nene engita lemavo mo gilisa monovo lamine' di soto' ami mudise mehe'ine imilizave nene mo oloku' vilisave.

Ne'mine ve nene oloku' vilisave luvoni'za lu'ne lengeme nouvoni' aleve lingine nene oloku' vaa' akalo' vilizave lo gele minosa noluvoba lengi' do lungu' izine' ne'mi gihile monovo lamine' nene lengita soto' o do vo minelive lo gele minosa nene noluve. 10 Lingine O'mosola lutine mili minadi'mo lingine ei' evenele nasahili' i-ngidaa' nani' monovotine nene lengita neivo ne'mine i di vi minaa' nani' ma neive. Ido' lingine ne'mine igi minaa' nangumu' nene O'moso aza gala molavo lengele'mize lamine' amidiniko eze nene monovo goloso oga' ive ne'mine minidine. Ne'mine idine'za monovo goloso oga' ive minesa'mine' nenako lingine ne'mine igi minaa' nangumu' nene gala molavo lengi' nene lengele'mize lamine' amilivoba ha lengele'mize lamine' oloseive. 11 O'moso'mo gamene nabala inite' lamine' lehize-ledeleseive li a'minemu' gapepe' igi minaa' nani' inite' nene dalizangisi lingine hamo hamo' a'mine igi mili minani' monovotine ne'minevo' nene igi mili mini amuzo mili minilizave lo gelo noluve. 12 Ido' evene' malite gosele' ngebelamivo O'mosomu' gili ele'vole' igi mini igi mili minaa' nani' aleve nene O'moso'mo eze evenele lemelove lo lo huko salani molo-lidine' inite' nene daa' nave. Lingine a'mine'mine igi monokumu' gosele' lengebelaa' ive lili' igi minami a'mine aleveti monovo'nido' nene nge'meti nivi igi mili minilizangumu' ve losa lingine O'moso'mi evenele nasahili' i-ngidi minani' monovotine ne'minevo' nene igi mili mini amuzo mili minilizave lo gelo noluve.

O'moso'mo Lemelove Lo Salani Molo Lo Hukine' Gamazi Nene nGelo Vo Haza Amoloseive Lo Gele Mineloningumu' Lo-ngimine'

13 O'moso'mo salani molo-ngidine' inite' daa' nave luvoni' nene Abalahamu'ni salani gamazi lo molo-dine' nene gihile izingumu' luvoni' ve. Evene' eze O'moso ivile' ogo minive ma neivosa a'mine ve'mi gulivelo' salani gamazi lo huko lilive ma minamivo O'moso ei' gulivelo' salani gamazi ti' lo lo hukine':

14 Neni' nene no'noho' ize-gedekuvo
ga'vopilemo' vai' goloso soto' igi mini di vilisave losa
neni' noluve.
15 Ti' lo lo huko-dine' nenako a'mine nene geto gihile izamingumu' nene gosele' belamivo ha gele ele'vole' ogo gizebo ogo hazavo' neivo a'mine O'moso'mo lo huko-dine' gamazi nene Isaka'ni gedavosa api' ogo gihile izine'. 16 Evene' ingine nene gamazi lamine' nolune li engi' ngivile' ogo minive ei' gulivelo' likevo ne'mo evene' ingine lani' gamazilo' nene ve malitesi e'menga a'manga lisa'mave. Nemu' nene O'moso'mo gamazi lo hukine' nene ei' gulive'velo' lo huko line' ve. 17 Ee, O'moso ei' nene izipahala zuho leli' do lemelove lo lo hukine' initekumu' nene lulo do velepe' izo lemamilihe li gilikelizave losa a'mine line' gamazi nene mo lamine' lave li gililizangumu' nene amuzo molo gele mino ei' gulive'velo' lo huko line' ve. 18 Ido' inite' sita' a'mine gamazi lo huko line' nemukisi ido' a'mine gamazi lo huko lingu' nene ei' gulive'velokisi line' nemukisi nene aza lulo do velepe' izo mo amolosuve lo soza ngelo lamoloseive lo gelelone' ne'mo lute do amuzo goloso molo-ledavo laza alete molo-ledelive lo eze gizebo ingu' vo hulunive laza a'mine lo huko-lidine' inite' nene alinge' mo do soto' o-ledeleseive lo gapepe' ogo gizebo minaa' noune' nene hulamo do gili' lo do minelone losa a'mine gamazi nene ei' gulive'velo' lo huko-lidine' ve. 19 Ido' a'mine initekumu' gapepe' ogo gizebo minaa' noune' ne'mo nene lute do gili' lo-lede mino mo apasamiline' inite' sipi vo mala valive li di gili' li-daa' ani' inite' ne'minosa mo apasamiline' inite' nenako lute nene ngelo vo mala vamoloseive. Ee, mono' numuno nabau' nene O'moso'mi mo'mosi'veuko dizikelizave li evene' aka'ine hizi tili-ngidi lavolavo izi hukikani' nene di veseme' ili eveneto' medeli mini O'moso inite' lehizi-daa' ave naba ingine a'mine O'moso'mi mo'mosi've ve langu' dizaa' nani' ne'mine ogo a'mine O'moso'mo lo huko-lidine' initekumu' gapepe' ogo gizebo minaa' noune' lute gate ne'mo nene vo O'moso'mi mo'mosi've gihile neida nene nalava ize neine' gelavo none. 20 Ido' a'mine O'moso'mi mo'mosi've gihile neida nene Izesu' nesi nene Melekisedeki' gono daa' ine' monovolo' ogo eveneto' medelo mino O'moso inite' lehize-daa' ive naba lolo' ogosa leli' gamazite hize ele' olosa leli' nene gomu' molo lemo vo neive.

Copyright information for `ASO