Hebrews 7

Melekisedeki' Aza Nene Eveneto' Medelo Mino O'moso Inite' Lehize-daa' Ive Mino Abalahamu'nisi Ido' A'vopilemo' Zuho Nesi nGivile' Ogo Dizo Minine' Nenako Izesu' Aza Nene Eze Monovolo' E'meto Eveneto' Medelo Mino O'moso Inite' Lehize-daa' Ive Mino Abalahamu' Zuhouti' Eveneto' Medeli Mini O'moso Inite' Lehizi-daa' Ave Engi' Nene nGivile' Ogo Dizo Miningumu' Gamazi Lo-ngimine'

A'mine Melekisedeki' nene Salemi ebeku' guvelesi ve mino ido' eveneto' medelo mino veleta O'moso atoli'mine minive nene inite' lehize-daa' ive nesi lolo' ogo minine' ve. Ido' Abalahamu' aza guve'inesi ve ma minani' nene ngebele osu' lo tine' molo navo Melekisedeki' aza vavo akalo' di go'ine hizi Abalahamu'ni nene no'noho' ize-dine' ve. Ne'mino Abalahamu'ni no'noho' ize-davo aza inite' mata've teni teni (10 10) ne'mine mininguti' Melekisedeki'ni hamo hamo' ma imine'. Ido' ei' gulive Melekisedeki' ne'mi monovo nene monovo've lisihekovo' ogo minine' guvelesi ve ve. Ido' ebe've gulive Salemi ne'mi monovo nene hongu monovo ve losa neine' nenako aza nene hongu monovo'vesi minaa' ine' guvelesi ve nene neive. Ido' Aloni' monovo'velo' imine' mili eveneto' medeli mini O'moso inite' lehizi-daa' ave nene lamine' Zakobo' gipele Levi' a'vopilemo' minani' nene ngelebizi avo'ninge ido' ize'ninge me'ningeliti gulive'ine li soto' ikevosavo' nene a'mine gonolo' ngele'mizi milaa' ani'za Melekisedeki' aza nene ne'minosa minamine' ve. Aza nene eveneto' medelo mino O'moso inite' lehize-daa' ive minine'za mono' godolou' nene avolomote ido' izele mele neti gulive'ine nene gizavo ma gelamune. Ido' soto' ogo mine do ogo hiline' ne'mi monovo nesi gizavo gelamune' ne'mo Melekisedeki' nene minevo' minevo' ogovo' minine' gelavo O'moso'mi gipele ei' ne'mine mino eveneto' medelo mino O'moso inite' lehize-daa' ive mine do vovo' vovo' ogo minaa' ive minine' ve.

Ido' Melekisedeki' aza nene evene' naba goloso minani' neine' nemu' mene gili'nalo: Avoteho naba minive Abalahamu' aza nene lovou' ngivile' ine' alevetidati' inite' teni teni (10 10) do anguti' Melekisedeki'ni nene hamo hamo' imine' ve. Isilaele' aleve ma haza alevesi ido' Levi' a'vopilemo' linge ma eveneto' medeli mini O'moso inite' lehizi-daa' ave lili' ave nesi mukito' nene Abalahamu' a'vopilemo' mini hamo' zuho minani'za a'mine eveneto' medeli mini O'moso inite' lehizi-daa' ave ingine O'moso'mo lou' gamazi lido' nene e'meti engi' Isilaele' aleve linge ma inite' teni teni (10 10) di soto' iga' anguti' hamo hamo' nene daa' ani' ve. Ee, inite' ngimaa' ave ido' inite' daa' ave muki' nene mo Abalahamu' a'vopilemokovo' minani'za mo engitatikisi ha daa' ani' ve. Ne neiha Melekisedeki' aza Levi' a'vopilemokuti' soto' amine' minine'za Abalahamu'nidati' inite' nene ha dani' ve. Ido' O'moso'mo salani gamazi lamine' Abalahamu'ni lo huko-daa' idi'mo nene evene' naba minine'za Melekisedeki' ne'mo nene no'noho' ize-dine' ve. Ido' O'moso'mo salani gamazi lamine' nene Abalahamu'ni lo huko-daa' idi'mo nene Abalahamu' aza evene' naba goloso minine' nene gele none. Ne neiha Abalahamu' aza Melekisedeki'ni ivile' ogo naba minidiniko Melekisedeki' aza Abalahamu'ni nene no'noho' ize-delido' o minamidine. No'noho' ize-delido' o minamidine'za aza mo Abalahamu'ni no'noho' ize-dine' nenako Melekisedeki' aza nene Abalahamu'ni ivile' ogo minine' ve. Ee, ve mali'mo ve ma no'noho' ize-deline' nene no'noho' ize-dive nene dizo minavo no'noho' dave nene lemo mineleseive lo gele none' nene lamine' nenako malite soza gamazi ve li mo lamilisave. Nemu' nene Melekisedeki' aza Abalahamu'ni ivile' ogo minive minaani' neive lo gelelesune. Ido' ma nene Levi' a'vopilemo' zuhouti' eveneto' medeli mini O'moso inite' lehizi-daa' ave nete evene'ineti inite' teni teni (10 10) mininguti' hamo hamo' daa' ave engi' nene hili vaa' ani' zuho nizave lo gele minelesune. Ne neiha a'mine'mine ogo evenetati' inite' daa' ive Melekisedeki' ei' nene hiline' ve li mono' godolou' gizamavo ne'mo Melekisedeki' nene helamo velesi hazavo' neine' giline' nemu' nene gelelone. Naza giluvoni' mo ne'mine luvodine: Abalahamu' lovouti' inite' teni teni (10 10) do anguti' hamo hamo' Melekisedeki'ni imine' gameneu' nene Abalahamu' a'vopilemo' inite' teni teni (10 10) evenelite di minanguti' hamo hamo' daa' aveti avo'nibo Levi' nene olihe Abalahamudati' soto' amivo nenako azasi Abalahamukisi maka' mini a'mine inite' nene imasine' gelave. Nemu' nene eveneto' medeli mini O'moso inite' lehizi-daa' ave Levi' a'vopilemo' zuho nene Melekisedeki' eveneto' medelo mino O'moso inite' lehize-daa' gono daa' ine' ne'mo ngivile' ogo minine' ve.

11 Ido' O'moso'mo Mose'ni lou' gamazi've imingu' nene gamazi ma ti' lo lo-imine' ma lingine mo gili nizani' ma neive: Levi' a'vopilemokuti' O'moso neni' nimani' inite' eveneto' medeli mini lehizi-nidilizave lili' igi minilizave ingine nene a'mine lou' gamazilo' nene gizebo igi evene' ngele'mize akalo' ilizave. Ne'mine lo lo-imine' nenako nemu' nene a'mine eveneto' medeli mini O'moso inite' lehizi-daa' ave nete evene' nene mudise ngele'mize akalo' ilizado' lisihe' gehepeve i minadiniko Levi' a'vopilemo' eveneto' medelo mino O'moso inite' lehize-daa' ive aza Aloni' gono daa' ine' ne'mino damo Melekisedeki' eveneto' medelo mino O'moso inite' lehize-daa' gono daa' ine' ne'mino daa' ive atoli'mine ogo minive Izesu'ni nene ma nanimu' do ote-didine. Levi' a'vopilemo' zuho ingine gono nene di pili di osu' ladiniko a'mine inite' lehize-daa' gono dalive gosoho' do ote-dive ne'mi gono've nene ma minamivo ma do ote-damidine. 12 Ido' eveneto' medeli mini O'moso inite' lehizi-daa' gono daa' ave gomu' minado' nene medelo atoli'mine gosoho' soto' ogavo ma nene lou' gamazi nesi gosohokovo' soto' oloseinako nemu' nene gomu' lou' gamazi ne'mi gono've nene mo osu' lani' ve. 13 Ido' eveneto' medelo mino O'moso inite' lehize-daa' ive do ote-dingumu' atoli'mine ve ve luvoni' nene O'moso neni' nimani' inite' nene Melekisedeki' gono daa' ine' monovolo' e'meto lehize-nedaa' anive minevo' minevo' ogo minelesane lo O'moso'mo lo-dive nene Levi' a'vopilemo' zuhouti' soto' amo O'moso'mi holomolo' mili-dani' inite' lehize-daa' gono nene ma damaa' ave ato' zuhouti' soto' ogo minine' nenako nemu' nene luvoni' ve. 14 Ido' ato' zuhouti' soto' ive luvoni' nene Guvetesi ve aza Zuda' a'vopilemo' zuhouti' soto' ine' nene mukito' mo gele osu' lo none' nenako nemu' nene luvoni' ve. Ido' Mose' ne'mo lou' gamazi gizingu' nene Levi' a'vopilemo' zuhoutikovo' nene eveneto' medeli mini O'moso inite' lehizi-daa' ave lili' ilizave lo lo-ngidine'za Zuda' a'vopilemo' zuhoutikisi nene eveneto' medeli mini O'moso inite' lehizi-daa' ave lili' ilizave lo ma lo-ngedamine' ma neive.

15 Ido' eveneto' medelo mino O'moso inite' lehize-daa' ive atoli'mine soto' ine' nene lou' gamazi ma eveneto' medeli mini O'moso inite' lehizi-dilizave nene Levi' a'vopilemo' zuhoutikovo' mini oko'ine laminekisivo' minilizavetevo' nene O'moso inite' lehizi-daa' ave lili' ilizave li lou' milado' nene lisihe' o nouve losa Levi' zuholiti gonolo' medelo soto' ine' nevoba asi minevo' minevo' ogo mino vo osu' lamaa' amuzo ezela miningumu' ve losa eveneto' medelo mino O'moso inite' lehize-daa' ive Melekisedeki' gonolo' medelo soto' ine' nenako gomu' minine' lou' gamazi nene O'moso'mo do ato' ingumu' luvoni' gamazi nene ne'mo soto' ogavo mo lamineto' ningekune. 17 Ido' O'moso aza a'mine vemu' eveneto' medelo mino O'moso inite' lehize-nedaa' anive lolo' ogo minevo' minevo' ogo minelesane lo lo-dine' gamazi ne'mo a'mine luvoni' gamazilo' nene vo daanako mo lamineto' lokuve. 18 Ido' O'moso'mo lou' gamazi gomu' minine' do ato' ine' ne'mi monovo nene ne'mino neive: A'mine lou' gamazi nene evene' hamokisi mudise lele'mize akalo' amivo evene' lisihe' lamine' minesa'mune' ne'mo amuzo've nomine' mino evene' hize ele' o-ledamivo O'moso'mo lavo a'mine lou' gamazi nene gohi minamine'. Ido' ne'mine ogo O'moso'mo a'mine eveneto' medelo mino O'moso inite' lehize-daa' ive atoli'mine nene do soto' o-ledavo aza nene gomu' lou' nesi eveneto' medeli mini O'moso inite' lehizi-daa' ave nesi nene ngivile' ogo lele'mize akalo' ogavo ne'mo lisihe' lamine' ogo O'mososi maka' minelonido' lisihe' ogavo ezela nene lehete ogo minaa' noune.

20 Ido' eveneto' medelo mino O'moso inite' lehize-daa' ive gosoho' atoli'mine nene O'moso'mo ele'mize nomolo a'mine gono do minevo' minevo' ogo minelesane lo ei' gulivelo' lo huko-damo haza do ote-dine' nevoba aza ei' gulive'velo' lo huko-do do ote-dine' ve. Ingine Levi' a'vopilemo' zuhouti' eveneto' medeli mini O'moso inite' lehizi-daa' ave lili' ani' nene O'moso'mo ngele'mize nomolo lingine a'mine gono di minivi' minivi' ilisave lo ei' gulivelo' lo huko-ngedamivo haza di oti-ngidaa' ani'za 21 a'mine ve gosohokumu' nene mono' godolou' ti' lo minine' gamazi nene O'moso ei' gulivelo' lo lo huko-dine' ve:

Gaza nene eveneto' medelo mino O'moso neni' inite' lehize-nedaa' anive lolo' ogo
minevo' minevo' ogo minelesane lo Guvelesi ve O'moso aza ei' gulivelo' lo huko-dine' ne'mo
lulo ngelo do velepe' izo soza lamoloseive.
22 Ido' Izesu' aza minevo' minevo' ogo gono dalive lo O'moso'mo ne'mine ogo ei' gulivelo' lo huko do ote-dine' ne'mo leli' gele dalone' gamazi ve lo O'moso'mo minevo' minevo' gamazi lo huko-lidine' nene gihile izelingumu' hize ele' ilive izeleho nene Izesu' minavo ido' ne'mo nene a'mine idise lo huko-lidine' gamazi ne'mo gomu' aleve lo huko-ngidine' gamazi nene ivile' ogosa gamazi lamine' neive. 23 Ido' gomu' nene eveneto' medeli mini O'moso inite' lehizi-daa' ave minani' nene hilika' hilika' i'mi vaa' ani' ne'mo minivi' minivi' igi gono dalizado' minamavo evene' ato ato' muki' vai' nete nene eveneto' medeli mini O'moso inite' lehizi-daa' ave lili' ika' ika' i'mi vaa' ani' ve. 24 Ne'mine ani'za Izesu' aza helamo minevo' minevo' ogovo' mineline' nenako ezelo' medeli ma minamavo eveneto' medelo mino O'moso inite' lehize-daa' gono nene mo mudise dovo dovo' ogo mineleseive. 25 Nemu' nene Izesu' aza lelikumu' nene isete izelive lo O'mosola lo minevo' minevo' ogo minaa' neine' nenako Izesu'nimu' gele ele'vole' ogo O'mosola vo hulunive leli' nene Izesu' do lu' izo mudise lele'mize lamine' ilido' neive.

26 Ido' aza ne'mine ve'mo eveneto' medelo mino O'moso inite' lehize-daa' ivete naba mino goloso ogo minunidoti' lele'mize lamine' ilido' lisihe' o neine' nenako ha do lu' izo lele'mize lamine' oloseive. A'mine ve nene aza ve lamine' atoli'mine ogo mino lulo do gopo o-deline' inite' hamokisi eita ma nomine' mino lihime daa' nani' aleve ne'mino minamo atoli'mine gehepeve ogo mino okulumo' nesi ivile' ogo osu' lo dizosa neive. 27 Eveneto' medeli mini O'moso inite' lehizi-daa' ave naba ingine gamene gamene eveneliti lihime'ine apase-ngedelive li sipisipi nevo'mine inite' ngibili oloku' gizi O'moso lehizi-dilisa gomu' nene engi' lihime'ine apase-ngedelive li sipisipi ma ngibili O'moso imaa' nave. Izesu' aza dizosa mino engi' ngivile' ogo lihime'vesi nomine' lamine' minaa' neine' nenako ingine iga' adi'mine osa'mine' ve. Ei' nene gele ngemavo evenelite bili hilangu' asi've lulo oko'no've nene O'moso emavo leli' muki' lihimete nene mudise apase-ledelido' lisihe' ogavo ei' oko'no've nene gamene hamokovo' emavo osu' line' ma neive. 28 Ido' lelito' medelo mino O'moso inite' lehize-daa' ivete naba ne'mo gomu' eveneto' medeli mini O'moso inite' lehizi-daa' ave naba minani' nene ngivile' ogo lamine' minive ve luvoni' nene ne'mino neingumu' luvoni' ve: Gomu' minine' lou' gamazilo' e'meti eveneto' medeli mini O'moso inite' lehizi-daa' ave naba minilizave di oti-ngidaa' ani' nene ha evene' muki' amuzote nomivo minaa' noune' ngemeni damenisi minave nene di oti-ngidaa' ani' ve. Ee, ne'mine vevo' di oti-ngidaa' ani'za O'moso'mo gomu' lou' gamazilo' medelo alinge' eveneto' medelo mino O'moso inite' lehize-daa' ive mineline lo ei' gulive'velo' lo huko-dive ei' gipele nene do ote-dine' ve. Ido' a'mine gipele neve gopo haza neivosa do ote-dine' nevoba asi a'mine gono dalido' nene mudise do lisihe' o-davo neivosa nene do ote-dine' ve.

Copyright information for `ASO