James 2

Evene' Do Kegeso Ninge Lamine' Ogo Ninge Goloso Amaakumu' Gizine' Gamazi

Neze zuho mate, lingine labana'vesi minive Guvetesi ve Izesu' Kilisito'nimu' gili ele'vole' i nizanako evene' di kegesi evene' mamu' siza li-ngidi evene' mamu' ningi hulaa' nani' nene nanitekumu' ve. Lingine mono' gililisa di gese' igi nizavo ve mali'mo inite' lamine' ngolo analo' ngolidunu' lili' ani' lini lamine' izo nodizivo ve goho' gahali' ma genegana've litehevo' izo dizeline' nesi nene lingine inite' lamine' ngolo nodizive ma ne ningi siza li-di gaza holomo lamineta me ogo minezo li-di ve goho' gahali' nene gaza aka' volela vo ote minezo ido' mehe'neko ogo minezo li li-imilizani' nene lingine evene' di kegesi-ngidi gatine goloso gili evene' gizeka' iga' nave.

Neze zuho lu'ne lengeme nouvoni' mate, gililo. Evene' me misubou' minanguti' linge mamu' ve gohi' gahali' nizave li laa' nahe. A'mine ve nene O'moso'mo neze zuho lili' ilisave lo do kegese-ngidine' ma ve. Ee, ezemu' gili ele'vole' ikevo nemu' O'moso'mo gelavo gili ele'vole' ani' ne'mo heneni'ine lolo' ogavo heneni ve gililisave. Ido' lu'ine imilizavemu' O'moso'mo inite' ma ngemelesa salani molo-ngidine' neive. A'mine inite' nene a'mine goho' gahali' engi' ngemelove lo do kegese-ngidine' ma ve. Ido' ngemeline' inite' nene ne'mino neive: Ingine O'moso'mo gizebo o neingu' vi hilalisave. Ne neiha lingine neve ningikevo goho' gahali' nene haza nite' minani' ve. Heneni ve neve ingine goboni mili-lingidi gonito' lengele'mizi di moni' moni' i-lingidaa' nave. Ido' Izesu' gulive lamine' lingine di nizani' nene inginesi di hozi laa' ilizanako a'mine heneni ve nete divi' ledivi' iga' nave.

Mono' godolou' Guvetesi ve naba'mo lo huko line' gamazi ma ne'mino neive:

Geikumu' gelaa' naine' ne'mino gei' nanida nizavemu' gelo luka ngemezo lo lo neive.
Lingine a'mine ele'vole' gamazi gili dalizani' nene inite' gihile dalisani'za
evene' ma siza li-ngidi evene' ma ningi gosele' ilizani' nene lihime dalizani' o neive. Ido' ne'mine ilizani' nene O'moso'mo lo huko line' gamazi avuto' iga' ave minikeve loloseive. 10 Ve mali'mo O'moso'mo lo huko line' gamazi muki' gele do mino hamokovo' ma gele huliline' nene muki' avuto' ine' geleleseive. 11 O'moso'mo vene' longo' amilo ido' evene' ngibili hilamilo nesi line' ma neive. Nemu' nene gaza vene' longo' amaba evene' ma bele heleline' ne'mo mo lou' gamazi avuto' oga' anive lolo' olosane. 12 Ido' O'moso'mo evene' muki' ize' molo-ledelesa nene lihime monovolo' gelekele' ogo minuninguti' apase-ledaa' ine' lou' gamazi've nene gili di minahe gili hulahe lo ize' molo-ledeleseive. Ne'mine ilingumu' nene gilii lingine gamazi lilizadokisi inite' igi mili ilizadokisi gizebo igi minilo. 13 Ido' ve mali'mo evene' ise'ine izesa'mivo ma O'moso'mo goni' o-do eze iseve ize-damoloseive. Ido' evene' ma nete evene' ise'ine izaa' nave nene a'mine'mine ogo O'moso'mo engi' ise'ine ize-ngedeleseive. Ise'ine izaa' ne'mo goni' oga' nene ivile' oloseive.

O'mosola Gele Ele'vole' Oga' Monovomu' Gizine' Gamazi

14 Neze zuho mate, ve mali'mo monovo lamine' ogo molo minamo naza Izesu'nimu' giluvoni' nene gele ele'vole' okuve lo liline' nene haza nite' lolo' oloseive. Ne'mine ogovo' gele ele'vole' o do vilidoti' nene O'moso'mo do u' izamoloseive. 15 Ve ma he vene' ma he oko'nolo' inite' nomivo noso' nitekisi vise' ogo neivo 16 lengikuti' mali'mo a'mine vise' ine' inite' ma emamo geita hongu minivo vozo. Mu'mu lo-gidivo mino no gatunga ogo minezo lo lo-emeline' nene lamine' ilihe. A'mine haza gamazi line' ne'mo evene' ha do lamine' o-delihe. Haza ngelo do lamine' o-damoloseive. 17 Ido' a'mine'mine ogo a'mine gamazi line' nene haza nitekovo' minine' ne'mino monovo lamine' ogo molo minamo haza O'mosomu' gele ele'vole' oga' nesi haza nite' neive. Evene' ma ingine gili ele'vole' igisa monovo lamine' nesi igi mili minamilizani' nene O'mosomu' gili ele'vole' ani' nene hele osu' lo haza nite' lolo' ogave.

18 Ne neiha lengikuti' ve mali'mo ti' lo lilihe lo gele nouve: Evene' malite O'mosomu' gili ele'vole' iga' navo ido' evene' ma nete monovo lamine' igi mili minaa' nave. Ido' ve ma ne'mine lo liline' naza ti' lo lo-emelesuve: Monovo lamine' ogo molo amosa O'mosomu' gele ele'vole' o naine' nene nado do soto' anivo ningelove. Ne neiha naza monovo lamine' ogo molo nouvoni' ne'mo O'mosomu' gele ele'vole' o nouvonikisi nene do soto' ogavo neloti' ha ningelesane lo lo-emelesuve. 19 Lingine O'moso hamokovo' neive li gili ele'vole' iga' nahe. Ne'mini gilaa' nani' nene mo lamine' neiha Satani'mi zuho sikalahu' goloso ingine nesi a'mine'mine igi O'moso neive li gilii gili ele'vole' iga' nave. Ee, ingine gili ele'vole' iga' nanako nemu' nene lihime lemeleseive li golise gilivo' minaa' nave. 20 Monovo lamine' ogo molo minamo O'mosomu' gele ele'volekovo' oga' olone' nene haza nite' neine' nenako gaza gelamabe. Ve negi mene naza gelebizelove. 21 Avoteho Abalahamu' aza gipele Isaka'ni O'moso gize emelesa ogo monovo lamine' ine' nemu' O'moso'mi velelo' ve lisihe' gehepeve lihime'vesi nomine' minine' giline' nene lingine mo gili nizave. Olo. 22 Nemu' nene aza O'mosomu' gele ele'vole' ogo mino monovo lamine' nesi ogo molaa' idoti' nene monovo lamine' oga' monovo've ne'mo O'mosomu' gele ele'vole' oga' monovo've nene hize ele' ogo do gihile izo do soto' ine' nene ningi gilamahe. 23 Ne'mine ogavo mono' godolou' minine' gamazi ma nene gihile izine' ve. A'mine gamazi nene ne'mino neive:

Abalahamu' aza O'mosomu' gele ele'vole' ine' nemu' O'moso'mo gelo
Abalahamu' nene lihime've nomive ve lisihe' ve line'
Ido' evene' ingine ezemu' O'moso'mi zogo ve neive li lani'.
24 Nemu' nene O'moso'mo ningivo lihimete nomivo ve lisihe' minaa' noune' ne'mi monovo mo ningi osu' li nilisave. Ne'mi monovo ne'mino neive: Evene' haza gili ele'vole' iga' nanikovo' nene O'moso'mo ningivo lisihe' osa'mive. Ido' evene' ezemu' gili ele'vole' igi monovo lamine' nesi igi mili iga' nani' nene ningivo evene' lisihe' lihime'ine nomine' minaa' nave. 25 Ido' a'mine'mine ogo pasidia' vene' Lahaba' aza monovo lamine' ogavo O'moso'mo ezemu' gilivo lisihe' ine' ve. Isilaele' aleve Kanaha misubo dizi dalisa nizavo guve'inesi ve Zosuva' aza evene' ma misubo amamaka' mili ningilizave lo ngimiselavo vi a'mine Kanaha vene' Lahaba' neida vikevo aza ngele'mize numu'veu' molo Kanaha evene' nete ningi ngibilikelizave lo aka atota ngimiselavo vani'. 26 Ve ma sikalahu've nomivo oko'no losuvovo' mineline' nene mo hele neive lolosune. A'mine'mine ogo ve ma aza haza gele ele'vole' ogo mineline'za monovo lamine' ogo molo minamivo ma eze gele ele'vole' oga' neine've nene ezela mo helave lo lolosune.

Copyright information for `ASO