James 3

Vete Nahuno Ne'mo Gamazi Goloso Lalize Lo Gizebo Lamine' O-delone Lo Gizine' Gamazi

Neze zuho mate, laza tisa' lolo' ogo nonivete ladanga gamazi lolone' nene O'moso'mo a'minemu' goni' o-ledo haza evene' goni' o-ngedeline' nene ivile' ivosa leli' nene goni' nabalo' o-ledeline' nene gili nizave. Gili nizanako nemu' nene lengikuti' evene' muki' tisa' lili' amilo. Evene' muki' laza ladani vai' oga' noune. Evene' hamo' hamolite gamazi ladanga lamilizani' nene ingine ve lisihe' gehepeve minilisave. Ve'nido' gizebo lamine' igi gopo gamazi lisa'manako oko'nine mukito' ha gizebo lamine' ilizado' i nizave. Hosi ize ingine inite' naba nizani'za oko'ine di zovo' izi vilizangumu' ve li sitia' inite' ainidunu' lili' ani' ngomo lasolo nene ve'ningu' di ingihi-ngidikevo ne'mo gamazi gilaa' nave. A'mine'mine ogo sipi nene inite' naba' naba neivo ido' hepe' naba ne'mo do vaa' neine'za sipilo' daa' ive aza sipi'mi sitia've ngomolo' gelelehe' ogavo inite' nabali'mo a'mido' gele do zovo' izo vaa' neive. A'mine'mine ogo vete nahuno nene inite' ngomo lasolo neine'za a'minetunu' gamazi lokunivo ne'mo inite' naba ma soto' oloseive. Olo' vele ngomo ne'mo gulumo ogo za zuho inite' mata' muki' lovotaa' neive. Ido' vete nahuno nene olo' ne'mino neive. Okodela inite' vaikuti' vete nahuno nene misuboko monovo goloso mukiliti ize'nibo nene neive. Vete nahuno ne'mo okode lute do gopo' napa' oga' neive. Olo' vele nene gulumo ogo za zuho inite' mata' muki' lovotaa' neine' ne'mine ogo misubou' evene' mukiliti vete nahuno nene olo' ebekuti' ve Satani ne'mo do velepe' alepe' ize-ledavo gamazi goloso losa a'midoti' ogo molo oga' noune' inite' nene golosovo' o do vaa' neive. Ize gulo gaha nama, gosihe', nosou' nama gaha ato atoli'mine muki' nene ha di ga'ine lilizado' o neive. Ido' di ga'ine laa' nani'za vete nahuno nene ve mali'mo ngelo do gala lamoloseive. Vete nahuno nene inite' goloso do velepe' alepe' izo mino hazasi minesa'mive. Vete nahuno nene zahemede goloso helaa' inite' ne'mine neive. Vete nahunodunu' Guvetesi ve Metehine opo'ni laa' noune. Ido' O'moso eze gidini do soto' ine' evene' nene a'mine vete nahunodunu' gamazi goloso lo-ngedaa' noune. 10 Vete hamokuti' opo'ni laa' noune. Ido' do velepe' izo gamazi goloso nesi laa' noune. Neze zuhokizo, nene edamine' suno neive. 11 Noso hinipini' hamokuti' lingela nene naa' limivo ido' lingela nene ekese' limivo ilihe. 12 Za ato' za dize nolingu' za mali'mi gihile've ngelo izamoloseive. Vaini nala' malo' gohuno gihile ngelo izelihe. Ido' guvo nosoti' naa' noso ohizelibe. nGelo ma ohizamolosane. Nemu' nene veka hamokuti' gamazi laminekovo' lemelive.

Gele Vevesaa' Nene O'mosolati' Ani' Ve Lo Gizine' Gamazi

13 Lengikuti' ve ma gamazi monovo gelaa' ive mino gala gele veveso oga' ive noline' nene hokolize' amo gele vevesaa' monovo ne'mo do soto' oga' neine' monovo ado' okode do'mo lemo minaa' monovo ogo molo minelidoti' nene a'mine gamazi monovo gelo gele vevesaa' monovo've nene do soto' ilido' o neive. 14 Ne neiha lingine lutingu' lukehe ekese' ngibili mini ge hulo ne hulo li mini okodine di dizi laza gate gele veveso oga' nonive ne none li lilizani' nene mo gamazi lamine' lami sozasi lilisanako nemu' ne'mine lamilo. 15 Ne'mine ilizani' nene O'mosolati' neine' gele vevesali'mi monovo nene dalisave. O'mosomu' gili hulaa' ave me misubou' ve ingine iga' nani' ne'mine Satanilati' neine' monovo nene dalisave. 16 Lu'ningu' lukehe neivo ge hulo ne hulo li minilizada evene' lu'ine bizamivo gopo' napa' mini monovo goloso ato atoli'mine muki' di minilisave. 17 O'mosolati' gele vevesaa' monovo di minave engi' monovo'ine nene ne'mino neive: Inite' naba nene lu'ningu' goloso initekisi nomivo lu'ine laminekovo' minaa' neive. Ido' a'midoti' nene ve hongu vevo' mini gelekele' igi evene' muhele'ine ningi di lamine' tamine' i-ngidi ido' evenekumu' gili mamu' ngumo hilivo mamu' gosele' ngibilivo ami di kegesi-ngidami mini ve'ine avileloti' soza lamilisave. 18 Ido' hongu ve evene' kuku hili-ngidi hongu li minaa' nani' ne'mi gihile nene lisihe' lamine' minaa' nene soto' ogavo dalisave.

Copyright information for `ASO