James 4

Me Misubou' Minaveti Monovomu' Lumo Helalive Lo Gizine' Gamazi

Ido' gamazi gohi ma lo-lengemeloze: Linginela lingizebolo' molavo lovo hizi minaa' nani' nene naniteli'mo ve. Lingine lanite' gili ahu' lani' inite' nete lutingu' lovo di soto' ikevo ne'mo lovo hizaa' nave. Inite' mamu' lungumo hiline' nene dami evene' ngibililisa gilaa' nave. Ido' a'mine initekumu' mumuzo' igi ngeli ma damilizani' ogavo ma gililinga li lovo hizaa' nave. Inite' ma damani' nene O'mosola voku' lisa'madi'mo nene disa'mave. Ido' inite' mamu' O'mosola voku' lani'za gatine goloso gili langisetine a'mine initeli'mi lanite' gililizangumukovo' voku' likevosa nene O'moso'mo lengemesa'mive. Lingine nene vene' ma va'ningine huli ve gohi malo' vaa' ave ne'mine mini O'mosomu' lungumo hiline' nene huli me misubou' ve O'mosomu' gili hulani' alevemukisi ido' engi' inite'inemukisi lungumo heleline' ne'mo O'moso mehedine imaa' ido' lovo i imaa' o neine' ne gilamahe. Ido' mono' godolou' gamazi ma ne'mino neive:

O'moso'mo leze luteu' molani' sikalahute ne'mo inite' ato' atokumu' umo helavo
a'mine nene dalongisi lo ahu' laa' neive.
A'mine gamazi nene hazamu' neive li gilahe. O'ove. Hazamu' nomive.
Ne neiha lumo helaa' inite' goloso nene gele emamoloningumu' ve lo O'moso'mo vauve elo hize ele' o-ledaa' neive. Nemu' nene mono' godolou' gamazi ma ti' lo neive:

O'moso'mo hokolize' iga' ave lovo o ngemo limi minave hize ele' o-ngedaa' neive.
Nemu' nene O'moso gelekele' i-di Satani nene o've li-di gili huli-dilo. Ne'mine ikevo hulo-lengedo golise vohaha oloseive. Lingine O'mosola vi gi'mizilizani' nene aza linginela a'mine'mine ogo gi'mizeleseive. Lingine goloso inite' daa' nave a'mine inite' alo' hulilo. Ido' O'mosola volohe goloso initeta volohe li ve'nehe' ka'nehe' nilani' nene huli lutine noso izi di lamine' ilo. Lingine monovotida gili evene' goloso none li agae agae li longovozo hili mulumo gili ive ilo. Ee, gize zohi' igi longolize izaa' nani' nene huli mulumo gili muhele' igi ivevo' igi agae agae li minilo. 10 Ne'mine igi Guvelesi ve'mi velelo' langisetine lutine di'mi limilo. Ne'mine ikevo Guvelesi ve aza do'mo dize-lengedeleseive.

Evene' Ge Dovo Ledevo' O-nede Ne Dovo Ledevo' O-gede Lamaakumu' Gizine' Gamazi

11 Neze zuho mate, lengiku' ge dovo ledevo' o-nede ne dovo ledevo' o-gede lamilo. Ve mali'mo gonolohi monovo ize' molo dovo ledevo' ogo lihime molo-deline' nene ezevo' ne'mine o-damoloseive. Lou' gamazi nesi ne'mine o-do dovo ledevo' ogo ivile' ogo ize' molaline' nene lou' gamazi gele daa' anive minamo lou' gamazilo' gizebo ogo ize' molaa' anive lolo' ogane. 12 Ido' O'moso'mo asi've hamo' lou' gamazi do soto' ogo ize' molaa' ive neive. Asi'vevo' do lu' izaakumu' ido' lele'mize tolovo ogakumu' laa' ive neive. Neine' nenako gasika O'moso noosa gonahi monovo ize' molo lihime molo-delibe.

Igi Mili Ilizangumu' Okodine Di Dizamilo Lo Gizine' Gamazi

13 Lingine nene O'moso ivile' igi idise nehe aize' nehe ebe' mala vo kilisimasi hamo' mino bisinisi gono do moni heneni do soto' olone li laa' nani' aleve nene gamazi ma lo-lengemeloze. 14 Aize' inite' ne'minesi ne'minesi ogo molo ogo minelone laa' nani' nene lingine aize' soto' iline' inite' nene gili niisa laa' nahe. Lingine mo gilamave. O'mosovo' gele neive. Lengi' minivi' divi' igi nizani' nene olo' sokile ne'mino neive. Olo' sokile nodizivo nodizivo evene' gamene ngomo ningi nizavo gete geto osu' laa' neive. 15 Nemu' nene ne'mine li lilo: Guvetesi ve'mo gelavo lamine' o neivo ma mine do dizo inite' ne'minesi ne'minesi ogo molo minelone li lilo. 16 Idise lingine monovo goloso di lihime nidave. Hokolize' igi O'moso ivile' igi inite' ne'minesi ne'minesi ogo molo minelone li okodine di dizaa' nave. 17 Ido' inite' veveso lisihe' ogali'mi monovo ningi gili minisasi a'mine monovo lisihe' amilizani' nene lihime dalisave. Nemu' O'moso ivile' ami O'moso'mo gelo gele lemavo ma inite' ne'minesi ne'minesi ogo molo minelone li lilo.

Copyright information for `ASO