James 5

Heneni Vemu' Gizine' Gamazi

Heneni nganeni ve lingine gililo. Mulumo nite' naba linginela soto' ilingumu' geke' geke' li ive nama igi minilo. Henenitine di nubo nubo ani' nene mo hulupo elavo geneganatine lamine' nene gi'ningoni nete mo huki nikeve. Ido' monitine nene gaba hitine' ne'mo moni di gili' li minani' monovotine nene do soto' ogavo ne'mo mulumo gono dikevo okodine ololi'mo lovotine' geleleseive. Heneni di nubo nubo igi milani'za misubou' inite' osu' liline' gamene mo alitave. Lengi' midingu' gono dave ingine gohise hili minamuno dolizi-lingidikevo lingine meni'ine lingela di haleki ngimamavo nemu' gono daa' ave ive nama ikevo inite' mukito' gizebo oga' ive amuzo'vesi minive O'moso aza gelave. Lingine me misubou' mini noso' nitetine vai' ivo nivi' nivi' igi mini lanite' ato atoli'mine gili ize ne'mine gehesani'. Ne'mine igi gehesi minikeni'za O'moso'mo lengebeleline' gamene nene mo noalitive. Lingine nete evene' vevesi lisihe' i minani' goni' i-ngidi ngibilani'. Ido' lingine ningibilavo ingine di tibizi lingibilami haza hongu li minaa' nave.

Gosele' Asele' Amo Gamene Nabamu' Gizebo Ogakumu' Gizine' Gamazi

Neze zuho mate, gosele' asele' ami Guvetesi ve alingumu' gizebo igi minilo. Lingine gili nizave. Mine zuho' iga' avete mine zuho' ani' nene gomu' golinesi alinge' golinesi izavo minamuno o molavo mine lamine' nalone li gosele' asele' ami gizebo igi minaa' nave. A'mine'mine igi lingine gosele' asele' ami lutine mili ele'vole' igi minilo. Guvetesi ve aline' gamene nene mo alitelesa neize.

Neze zuho mate, goni' o-ledelive mo avito' ogave. Goni' ikelizaze. Lingine ge nemenga laani ne gemenga loku lami lamini ha minilo. 10 Ido' O'moso'mi velemu' igi eze gamazi li soto' iga' ave polohete ingine evenelite goboni nimili-ngidavo nemu' nene gosele' asele' ami ele'vole' igi minani' nene gili nizave. Ingine mulumo initeku' mini gosele' asele' amo ele'vole' ogo minali'mi monovo nene lelebizikenaze. Ingine adi'mine ilo. 11 Gili nizahe. Ingine mulumo initeku' mini hongu li ele'vole' igi minave engikumu' nene O'moso'mo mulunou' lamine' gelo do lamine' o-ngedaa' neinako nemu' lamineku' minave ve lo laa' noune. Satani'mo goboni molo-davo Hizobe' aza mulumo alumo gilingukisi hongu lo ele'vole' ogo minine' ma gili nizave. Ido' alinge' Guvetesi ve inite' mata' lamine' lehize-dine' nesi mo gili nizave. Nemu' nene Guvetesi ve'mo muhelete ningo muluno hukavo hize ele' o-ledaa' neive lo gelelone.

Lamineto' Nolune Lo Okulumo' Misubou' Lo Molo Lamoloningumu' Gizine' Gamazi

12 Neze zuho mate, amuzo gamazi ma lo-lengemeloze. Gililo. Lingine gamazi ma lilizani' nene lamine' nolune li lilisa Okulumoto' li mili adine dizi li hukamilo. Ido' misubolo' ido' inite' malo' malo' li mili li hukamilo. O'mosola goni' ikelizaze. Lingine inite' mamu' oo. Mo lamineto' nolune lili ma nene laminetokovo' lilo. Ido' o've. Ne'mine amolone lili ma nene laminetokovo' lilo.

O'mosola Laakumu' Gizine' Gamazi

13 Lengikuti' ve ma mulumo geni initeku' mino ma O'mosola lilive. Ido' mali'mo mulunou' lamine' goloso gelo mino ma O'moso opo'ni nolo nama lilive. 14 Ido' lengikuti' ve ma inite' gize do ongo mino ma mono' gizebo ve mamu' elese molavo igi heteli O'mosola li Guvelesi ve'mi velemu' igi uveli noso hili-dilisave. 15 O'mosomu' gili ele'vole' i mini O'mosola lilizani' nene Guvelesi ve'mo do lamine' o-davo inite' gize dave aza lamine' geleleseive. Lamine' gelavo lihime've ma mineline' nene O'moso'mo a'mine lihime've hulo-deleseive. 16 O'moso'mo do lamine' o-lengedelingumu' ve li lihime di mini' mini' ani' nene ingine li soto' avo lingine li soto' avo di bizi O'mosola li ge numuna lo-nede ne numuna lo-gede laa' ilo. Ve lisihe' vevesi minavete O'mosola lilizani' nene amuzo malehe inite' neive. Ne'mo O'moso'mo gelavo inite' gihilevo' soto' oloseive. 17 Elia' nene leli' gidini ve'mo asi've nene goline izamilive lo amuzo molo O'mosola lavo kilisimasi setohamosi ike'ni lumo sigisi vivo misubolo' goline izamine'. 18 Alinge' nene gohi goline izelive lo O'mosola lavo Okulumokuti' goline izavo misubou' inite' mata' muki' nene gala ho'li dizani'.

19 Neze zuho mate, lengikuti' mali'mo mono' gamazi gihile hulo aka zovo' izo gopo novivo ma mali'mo ele'mize tine' molaline' nene 20 aza gamazi ti' lo geleleseive: Ve mali'mo lihime'vesi ve ma aka golosolo' novidoti' do tine' molo-deline' nene a'mine lihime'vesi ve'mo emeni've nene mudise do u' izo lihime've muki' do hulo-dine' geleleseive. Modave.

Copyright information for `ASO