John 1

O'moso'mi Gamazilo' Medelive Minevo' Minevo' Lemeni Dameni'mi Meleho Aza Leli' Okode Ne'mine Do Otuho Evene' Lolo' Ine' Gamazi

O'moso'mo inite' mata' olihe do soto' amine' gamenelo' vomine O'moso'mi gamazilo' medelive nene ha minine' ve. Ido' a'mine ve nene O'mososi maka' mino azasi O'moso minine' ve. Ganakuti' O'moso mine do ada nene azasi maka' minine' ve. Inite' mata' muki' soto' ani' nene a'mine O'moso'mi gamazilo' medelivelatikovo' soto' ani' ve. Eitati' soto' amine' inite' nene hamokisi ma nomive. Aza nene minevo' minevo' lemeni dameni'mi meleho minaavo evene' laza eitati' minevo' minevo' lemeni nene dokunivo ne'mo livi' ne'mino do labana' ele-ledaa' neive. A'mine labana' nene liti'musou' hize labana' elaa' neivo liti'muso ne'mo nene ngelo molo hite-desa'mivo ha labana' ele minaa' neive.

Evene' ma O'moso'mo imiselavo ani' nene gulive Zohane' ve. Aza evene' maliti gamazi li soto' iga' ave ne'mine lolo' ogo ogo heteline' nene a'mine labanali'mi melehi gamazi've lo soto' o ngemavo nemu' evene' muki' nene a'minemu' gili ele'vole' ilizave losa ogo heteline' ve. Ei' neve nene a'mine labanali'mi meleho gehepeve nene minivoba asi a'mine labanali'mi melehinemu' nene lo soto' soto' olosa ani' ve. Labanali'mi meleho gehepeve evene' muki' lute hize labana' ele-ledaa' ive nene mo me misubouko navosa lo soto' ine' ve.

10 A'mine O'moso'mi gamazilo' medelive aza nene me misubou' omo minine'za me misubo nesi nene do soto' ine'za me misubou' aleve nete nene eze ningi ei' monovomu' nesi nene mo ningi gilamani' ve. 11 Ei' misubo'veuko nene ogo heteline'za ei' aleve gehepeve nete nene ma gili imamani' ve. 12 Ido' evene' ma gili imave muki' ado' eikumu' line' gamazi gili ele'vole' igi eito' gili mu'musi' i-dave engi' nene gele ngemavo O'moso'mi izipahala lili' ani'. 13 Ido' O'moso'mi izipahala lili' ani' nene evene' zuho maloti' soto' adoti' nene nomive. Ido' vene' vemoho' oko'ine'mo lanite' gilivo ingasidoti' soto' ani' nene nomive. Ido' ve mali'mi lulolo' soto' ani' nomive. Asi mo O'moso'mo gelavo ei' izipahala gihile lili' ani' ve.

14 Ido' O'moso'mi gamazilo' medelive nene leli' okode ne'mine do otuho evene' lolo' ogosa leli' vovoteu' ogo gamene li'nibemukovo' minevo dovo' ingu' nene nasahili' oga' monovosi ido' O'moso'mi monovo gihile nesi nene ezela vauve elo minivosa amuzo've do soto' ogo minine' nene mo ningune' ve. Asi've ei' meleho O'moso'mi vonolo' gipele hamo' gehepeve minine' nenako ne'mo nene a'mine ningune' amuzo've nene do minine' ve. 15 Eze monovo nene Zohane' aza ti' lo lo soto' ine' ve: Neni' mehe'nela nave nene nenikisi olihe soto' amuvosa gomukuti' ha minive neine' nenako ei' neni' nene nivile' ogo ve naba neive lo gomu' luhe. A'mine luve ma nene me ve nene neive lo nongelebizo line'.

16 Ee, ezela nasahili' oga' monovo vauve elo minine' ve luvoni' nene aza leze muki' nene nasahili' gohi gohi o-lidine' nene a'mine monovo ezela vauve elo minidoti' ne'mine o-lidine' nenako nemu' luve. 17 Ido' me gamazi noluvoni' nene O'moso'mo ei' lou' gamazi've lo-emavo lo-limive Mose' nene lo-limine'za nasahili' monovo nesi ido' O'moso'mi monovo gihile nesi do soto' ive nene Izesu' Kilisito' do soto' ine' nenako nemu' nene noluve. 18 Ido' O'moso nene ve hamolitesi mo keke' ningamune. Ningamune'za O'moso'mi gipele hamo' minive azasi nene O'moso mino melehosi maka' bizi minasive ne'mo O'moso nene do soto' ogo lelebizavo ningo gele none.

Mono' Noso Holo-ngedaa' Ive Zohane' Nene O'moso'mo Do Lu' Izelive Lo Imiselelesa Live Nene Nomuve Lo Ei' Monovo Lo Soto' Ine' Gamazi

(Mataio' 3:1-12; Maleko' 1:1-8; Luka' 3:1-18)

19 Ido' Zuda veti mono' gizebo ve ingine nene eveneto' medeli mini O'moso inite' lehizi-daa' avesi ido' Levi' a'vopilemo' mono' numuno nabau' gonolo' ve nesi nene Zelusalemi numuno ebetati' ngimiselikevo vi Zohane'nimu' nene zaho nane li ei' monovomu' longo' i-dikevo ei' monovo nene ne'mino lo soto' ogo lo-ngimine' ve. 20 Ingine gamazi lado' nene ataize livoba mo lamino lo soto' ogo naza nene O'moso'mo do lu' izelive lo imiselelesa live ma nene nomuve lo lo-ngimine' ve. 21 Ne'mine lo lo-ngemavo ti' li longo' i-dani': Ido' ne'mine lo ma gaza nene zaho nane. Gomu' polohete Elia'ni nene O'moso'mo gohi imiselelesa live ma ne nabe. Likevo aza nene a'mine nomuve line'. Ne'mine lavo ingine ti' li lani': Ido' gaza ne'mine laniko polohete alinge' ma aloseive lo Mose' live ma nene nabe. Ne'mine lani'za o've line'. 22 Ne'mine lavo ingine ti' li gohi longo' i-dani': Laza nene gei' nene zaho nolibe gaza nemu' lo-lemanivo longo' i-gidilisa limiselave nene vo lo-ngemeso' nenaze. Gaza nene mo zaho nouve laa' nane. 23 Ne'mine likevo aza ti' lo lo-ngimine': Polohete Isaia' ti' lo live ma nene nouve.

Ebe' hadivelati' evene' mali'mo asi naba ma ti' lo nolive:
Guvelesi ve alingumu' ve li aka've di lisihe' i-dilo.
24 Ido' ne'mine lavo Halisaio' mono' laa' avete ngimiselikevo ave 25 ingine longo' i-di ti' li lani': Gaza mono' noso evene' noholo-ngedaine' nene gaza O'moso'mo do lu' izelive lo imiselelesa live minamo polohete Eliakisi minamo ido' polohete aloseive lave nesi minamane' nenako nanimu' ne'mine nane. 26 Ne'mine likevo Zohane' aza a'mido' ti' lo lo-ngimine' ve: Neni' nene haza nosodunukovo' holo-ngedaa' nouvoni'za 27 lengi' vovotingu' nene ve ma neive. A'mine ve nene lingine ningamani'za aza nene nenito' medelelesa mehe'nela nave. Naza a'ne'mine goboni gono do do ei' suu'veloti' nala've nesi nene apase hulo-delodo' lisihe' amuve line' ve. 28 Ido' a'mine noluvoni' inite' meve nene Zohane' mono' noso holo-ngedo minaa' idaa ho' dizaa' idaa Zodani noso hela holela Betania numuno ebeta soto' ine' ve.

Eveneliti Lihime Apaselive Li Sipisipi Ize Angale Bilaa' Ado' Medeli Bililizave Lo O'moso'mo Lehize-lidive'mi Gamazi

29 Ongo go' lavo Izesu' nene mono' noso holo-ngedaa' ive Zohane' neida navo ningo ti' lo line' ve: Aizo, ningilo. Lihimetemu' belaa' noune' sipisipi angalelo' medelo O'mosolati' minive me misubou' aleveti lihimete apase-ledaa' ive ma ve. 30 Naza neni' mehe'nela ve ma nani' nene nenikisi olihe soto' amuvosa gomukuti' ha minive neine' nenako ei' ne'mo neni' nene nivile' ogo ve naba neive lo gomu' luvoni' ma nene me vemu' luve. 31 Nazasi nene eze ma ningo gelamo minuvoni'za naza ogo hetelo evene' nosodunu' noso holo-ngede'mo ogo minuvoni' nene Isilaele' aleve ezemu' ningi gililizave losa do soto' o-delesa uvoni' ve line'. 32 Ido' Zohane' ti' lo gamazi ma lo soto' ine' ve: Naza O'moso'mi Sikalahu' nene nama viluso ne'mino Okulumokuti' lemo navo ninguve. A'mine nene lemo ogo a'mine vela minive. 33 Gomu' nene a'mine ve'mi monovo nene ningo gelamuvoni'za evene' nosodunu' noso holo-ngedeline lo nimiselive ne'mo ti' lo lo-nimive: Neni' Sikalahu'neli'mo lemo ogo ezela nominivo ningelinive nene a'mine Sikalahu'ne nedunu' nene noso ne'mino holo-ngedeleseive. 34 Ne'mine lo line' ma nene naza mo ningosa ei' nene mo O'moso'mi gipele ve lo lo soto' oka' oka' nouve line'.

Evene' Api' Igi Izesu' Izipahala Zuho Lili' Ani' Gamazi

35 Ongo go' lavo mino holise' gamene ogavo Zohane' nene izipahala zuho sitakisi imi nizavo 36 Izesu' a'mida ogo novivo Zohane' vonu' bele mino ti' lo line': Ningilo. Lihimetemu' belaa' noune' sipisipi angalelo' medelo O'mosolati' minive ma ve. 37 Ne'mine lavo izipahala zuho sita' nene gili Izesu'ni e'meti vasine'. 38 E'meti nivasivo Izesu' velepe' izo ningine' nene e'meti nasine' neivo ti' lo line': Lingine nanitekumu' nasive. Ne'mine lavo ti' li li-imasine': Labi, gaza nene zala minaa' nane (laza a'mine gamazi labi nene do velepe' izo ti' lo lolosune: Tisazo). 39 Ti' li likesivo aza ti' lo lo-ngimine': Lingine igi ningilizo. Ne'mine lavo nemu' ezesi maka' vi ei' minaa' ine' numuno nene ningi a'mida a'mine gamene nene ezesi maka' minani'. Ido' Izesu' numu'vela vani' nene nivenga' fo kilokulo' nene vani' ve.

40 A'mine Zohane' line' gamazi gili Izesu'ni e'metasive engikuti' ma neve nene Simoni' Petolo' akunolo Adelea' minine' ve. 41 Aza Izesukisi minosa a'midoti' nene geto vo uvolohine Simoni'ni vise' ogo ningo ti' lo lo-imine': Mesia'ni nene mo ningekune (laza a'mine gamazi Mesia' nene do velepe' izo ti' lo lolosune: O'moso'mo do lu' izelive lo imiselelesa live ve). 42 Ne'mine lo lo-emo ele'mizo Izesuda vine'. Ele'mizo vavo Izesu' aza vonu' belo ti' lo line': Gaza nene Zohane' gipele Simoni' ma nene nane. Guliveka Keha' ve lo nomolo-giduve (a'mine gulive Keha' nene do velepe' izo Petolo' ve laa' noune. A'mine Petolo' ne'mi monovo nene geheni gavulo ve).

Hilipoki Natanieleki Izesu' Izipahala Lili' Asine' Gamazi

43 Ingi go' lavo Izesu' nene nGalilaia misubouko volove lo giline'. Ne'mine lo gelosa Hilipo'ni vise' ogo ningosa Izesu' ti' lo lo-imine': Gaza ne'meto ano line'. 44 Ido' a'mine Hilipo' nene Adeleaki Petoloki asine' numuno ebe' Betesaida neloti' ve minine' ve. 45 Ne'meto ano lo-davo Hilipo' aza vo Nataniele'ni ningo ti' lo lo-imine': Laza Mose' lou' gamazi gizingukisi polohetelite gizangukisi ve mamu' li soto' igi monovo've gizikavo minive ma nene mo ningekune. A'mine ve nene Izesu' Zosehe' gipele Nasalete numuno ebetoti' ave ve. 46 Ne'mine lavo Nataniele' aza ti' lo line': Nasalete numudoti' ve ve labe. A'ne'mine ebekuti' nene inite' lamine' ma ngelo soto' ilihe. Ne'mine lavo Hilipo' aza ti' lo lo-imine': Gasika ma ogo ninge' nazo. 47 Ne'mine lo-davo Nataniele' nene ningelesa Izesu' neida vo nohetelivo Izesu' ningo ezemu' ti' lo line': Ningilo. Me ve nene Isilaele' ve gihile evene' go'ine izaa' monovo mo keke' eita nomive ne neive. 48 Ne'mine lo-davo Nataniele' ti' lo Izesu'ni longo' o-dine': Gaza neni' monovo nene nadosa ningo gelane. Ne'mine lavo Izesu' ti' lo lo-imine': Hilipo' nene geikumu' vise' ogo olihe ningamivosa gaza nene gohuno zali'mi monovou' nanivo ma nene ninguve. 49 Ne'mine lavo Nataniele' ti' lo lo-imine': Tisazo, gaza nene mo O'moso'mi gipele nane. Ado' Isilaele' aleve leli' Guvetesi ve naba ma nene nane. 50 Ne'mine lavo Izesu' ti' lo lo-imine': Gaza idise nenikumu' gele ele'vole' aine' nene gaza gohuno zali'mi monovou' nanivo ninguve luvongumu' nene gele ele'vole' abe. Alinge' nene idise gele ele'vole' aine' inite' nesi nene ivile' ivosa inite' naba goloso ningelesane. 51 Ne'mine lo a'mido' gohi imine' molo ti' lo lo-imine': Naza lamineto' gehepeve nolo-lingimuve. Okulumo' huko godavo O'moso'mi angelo've nete nene O'mosolati' ve gihile nenita limaa' dizaa' igi nizavo ningilisave line'.

Copyright information for `ASO