John 19

Ido' neloti' nene Pilato' aza lavo Izesu'ni nene nala' gavosodunu' mehenela soga' saga' izi bilani' ve. Ne'mine igi amilite uhoni nala' nene di gangi guve'inesi ve nabalite gihaa' ani' inite' ne'mine apa nite' igi lili' igi godololo' gihi-di gulehe' lavolavo guve'inesi vete ngilaa' ani' ne'mine nene di ngili-dani' ve. Ne'mine igi mini ezela ika' ika' igi Zuda veti guve'inesi ve naba ma nene gopo'ni nolo-gidune lika' lika' igi a'ine gatapa' gavoso bilika' bilika' igi minani'. Ido' Pilato' nene gohi heta lemo ogo Zuda ve ti' lo lo-ngimine' ve: Ningilo. Naza goni' o-deloni' monovo've nene vise' ogo mo ningamuvongumu' nene ningilizave losa lengi' vetida ele'mizo nolimuve. Ne'mine lavo Izesu' nene uhoni di gangani' nene godololo' geho ido' gulehe' lavolavo nene ngoloko heta lemo ani' ve. Nolimivo Pilato' ti' lo line': A'mine ve ma nene me neize. Ningilo. Ne'mine nolivo eveneto' medeli mini O'moso inite' lehizi-daa' aveti ve naba'ine netesi ido' Zuda veti pilisi ve netesi Izesu'ni niningi geke' li lohoto' zalo' belezo belezo lani' ve. Likevo Pilato' aza a'mido' ti' lo lo-ngimine' ve: Ne'mine lii ma naza neve nene eze goni' o-do lihime emeloni' monovo've nene vise' ogo ma ningamuze. Neni' nene ne'mine amolosuze. Langisetine di vi lohoto' zalo' bililo. Ne'mine lavo Zuda ve nete ti' li li-imani': Lelita lou' gamazi nene mo ma neine' ma neive. Aza nene O'moso'mi gipele nouve lo a'mine lou' gamazi nene avuto' ine' nenako a'mine lou' ne'mo lido' e'meto mo helelido' lisihe' o neive.

O'moso'mi gipele nouve lo Izesu' line' gamazi li soto' ani' nene Pilato' gelo ehelele izine' nene gohi naba goloso ehelele izavo ngamani numunguko nene gohi dizo Izesu'ni ti' lo longo' o-dine' ve: Gaza nene zalati' aine' neve. Ne'mine line'za Izesu' a'mido' gamazi hamokisi ma lo-emamine' ve. 10 Ne'mine ogavo Pilato' nene ti' lo lo-imine' ve: Gaza nene gamazi neni' lo-nemelesa gelamaniko neni' gehepeve nene kuluhize-gedeloni' amuzosi ido' lohoto' zalo' gebeleloni' amuzosi do nouvongumu' nene gelamabe. 11 Ne'mine lavo Izesu' nene a'mido' ti' lo line' ve: A'mine amuzoka nene vozeu' ve'mo ma gemamidiniko gaza nene inite' hamokisi o-nedeline' amuzoka nene mo keke' geita ma minamidine. Ne'mine o neine' nenako gei' angau' molo-nidive neve nene gei' lihime idise nodaine' nene ivile' ivosa lihime naba nodave. 12 Ne'mine lidoti' nene Pilato' aza Izesu'ni kuluhize-delesa aka vise' o'mo vine'za Zuda ve ingine geke' geke' li ti' li li minani' ve: Gaza ve mene ma kuluhize-deline' nene ve ma ingine guve'inesi ve lolo' ilisa ave nene Kaesale' mo'mosi've dalisa biluva' i-daa' nani' nenako gei' nene Kaesale'ni hize ele' i-daa' aveti zuhouti' nomo nolosane.

13 Ne'mine lani' nene gelo nemu' Pilato' aza Izesu'ni ele'mizo heta lemo ogo ebe' ma gulive Geheni Omo' ido' gulive gohi Zuda veti gamaziuti' nene nGabata ve laa' ada zasilite minaa' ani' mo'mosito' nene mito' minine' ve. 14 Ne'mino lemo mito' minine' nene avo'ninge Aigita misubou' minani' gameneu' O'moso'mo ise'ine izingumu' nene Zuda ve nete gili noso' nite' nalizangumu' di va'va' ilizani' gamene holise' beloto' mito' minine' ve. Ne'mino mito' minosa Zuda ve ti' lo lo-ngimine' ve: Ningilo. Guvetinesi ve ma nene me neive. 15 Ne'mine line'za ingine geke' li ti' li lani' ve: Osu' lo-dezo. Lohoto' zalo' belezo. Likevo Pilato' a'mido' ti' lo lo-ngimine' ve: Guvetinesi ve meve nene lohoto' zalo' mo belezo nili-nidahe. Ne'mine lavo eveneto' medeli mini O'moso inite' lehizi-daa' aveliti ve naba'ine nete a'mido' ti' li li-imani' ve: Leli' guvetesi ve nene gohi ma nomine'. Asi Kaesale' ei' hamokovo' nene neive. 16 Ne'mine likevosa Pilato' aza Izesu'ni lohoto' zalo' bililizave lo do ngimine' ve.

Izesu'ni Lohoto' Zalo' Bilani' Gamazi

(Mataio' 27:32-44; Maleko' 15:21-32; Luka' 23:26-43)

Ne'mine ogo do ngemavo di vani' ve.
17 Di vada nene Izesu' asi've ei' lohoto' za've geho numuno ebekuti' leme heta ogo vo ebe' ma gulive Godolo Amuzo Ebe' ado' Zuda veti gamaziuti' nene Goligota ve laa' ado' nene hetelavo 18 a'mida nene lohoto' zalo' bili di otani' ve. Ido' Izesu' oluso' minavo a'mida hela hela nene ve sitakisi lohoto' zalo' ma ngibili di oti-ngidani' ve. 19 Ido' Pilato' ne'mo nene gamazisi ma luhuvo gizavo Izesu' lohoto' za'velo' nene badikani' ve. A'mine luhuvo nene ti' lo minine' ve: Ve meve nene Nasalete ve Izesu' ve. Zuda veti guve'inesi ve. 20 Izesu'ni bilani' ebe' nene numuno ebe' nabali'mi avito' ne'mine minine' nenako Zuda ve muki' a'mine luhuvo nene gatani' ve. A'mine luhuvo nene Zuda veti gamaziutikisi Loma veti gamaziutikisi ido' nGiliki veti gamaziutikisi minine' ve. 21 Ne'mine ogavo ningisa Zuda velo' medeli mini O'moso inite' lehizi-daa' aveliti ve naba'ine nete nene Pilato'ni ti' li li-dani' ve: Meve nene Zuda veti guve'inesi ve naba ve lo gizamo asi meve ne'mo nene Zuda veti guve'inesi ve nouve live lo gizezo. 22 Ne'mine likevo Pilato' aza a'mido' ti' lo line' ve: Naza luhuvo gize nouvoni' nene mo gizosa gize nouve.

23 Ido' Izesu'ni nene mo lohoto' zalo' bili badisa ami nene sita've sita've minani' nenako Izesu' genegana've nene ize' sita've sita've mili ize' hamo hamo dika' dika' ani' ve. Ne'mine ani'za lulou' ngolaa' ine' inite've nene olusoku' no'novo've nomine' mo veletati' gala'muda home limivosa lolo' ani' minine' ve. 24 Ne'mine ikeni' neivo ami nete angise'ine ti' li li volelo' melo' ani' ve: Laza a'mine mene hikelo damolone. Asi a'mine inite' mene zahida minelihe do soto' oloningumu' nene geheni ngomo ngomo hulaa' zohi' ogo livile' ilive nene emelone. Ido' ne'mine ani' nene mono' godolou' ti' li gizi nizani' gamazi ma nene gihile izelive lisa ne'mine ani' ve:

Neni' genegana'ne nene angise'ine ize' mili dave.
Ido' oko'nelo' inite' nene zaho dalihe li geheni zohi' ave.
Ee, ami nene gilamisa ne'mine ani' ve.
25 Ido' Izesu'ni bili badikani' lohoto' za avita nene izelehosi ido' izelehi alunolosi Kelopasi' elenaho Maliakisi ido' Mangadala numudoti' vene' Maliakisi nene oti minani' ve. 26 Nizavo Izesu' aza a'mida nene izelehosi ido' izipahala zuhouti' vonolo' izipesi oti nizasivo ningo izelihinemu' nene ti' lo line': Alungoo, nesee ve nene gei' gipa nene lolo' o neive. 27 Ne'mine lo a'mine izipahala zuhouti' minive mamu' nene ti' lo line': Ningezo. Meve nene gei' izaho lolo' ogave. Ne'mine lo line' gameneloti' nene a'mine Izesu' izipahala zuhouti' minive ne'mo Malia'ni nene ei' numu'veuko do molo gizebo o-dine' ve.

Izesu' Hiline' Gamazi

(Mataio' 27:45-56; Maleko' 15:33-41; Luka' 23:44-49)

28 Neloti' nene Izesu' aza ilido' o minine' inite' muki' nene mo ogo osu' gehepeve lokuve lo gelo mono' godolou' gamazi ma gizikani' ma nene do gihile izelesa nosomu' nonisive line' ve. 29 Ne'mine lavo a'mida gomise ma minine' a'mingu' vaini noso ekese' ine' nene vai' lo neivo nosou' lupizisa lipi naa' ani' inite' ma disa lupizikevo vai' lo neivo hisopu ve laa' ani' gavosolo' hizi di dizi velelo' mili-dani' ve. 30 Mili-dikevo a'mine vaini noso nene noosa Izesu' ti' lo line' ve: Gono'ne nene mo do pelekuve. Ne'mine losa luvono nene vage lavo sikalahu've hulosa hiline' ve.

Izesu'ni Losonou' Hizikevo Vanisesi Nososi Limine' Gamazi

31 A'mine gamenelo' sigisi kilokuloti' holise' minilizangumu' di va'va' iga' ani' gamene neivo ido' a'mine holise' nene holise' naba goloso neine' nenako Zuda ve nete a'mine holiseku' nene a'mine ngibilave lohoto' zalo' ha minikelizave li Pilato' lavo gize'ine amuzo di ledisa lohoto' zaloti' apasi di mili-ngidilizave li ezela lani' ve. 32 Ne'mine likevo Pilato' aza gele ngemo a'mine ami nene lo-ngedavo igi Izesukisi maka' ngibilave ma ma nene gizene amuzo bili ledi ma nesi a'mine'mine i-dani'za 33 Izesudo' igi ningani' nene mo helani' neivo ningi gizene ma izi ledamani' ve. 34 Izi ledamani'za asi ami engikuti' mali'mo nene gohodunu' Izesu' losono gahevela nene hizo ngolosavo a'minguti' nene vanisesi nososi nene lite' losa limine' ve. 35 A'mine inite' soto' neivo ningive ne'mo nene mo mene lo soto' neive. Ne'mine neine' nenako a'mine nene mo lamineto' neive. Ido' a'mine ve ne'mo nene aza lamineto' noline' nene mo gele minosa linginesi a'minemu' gilisa Izesu'nimu' gili ele'vole' ilizave losa nolive. 36 Ido' inite' mene soto' ine' nene mono' godolou' ti' li gizikani' gamazi ma nene gihile izelive losa soto' ine' ve:

Amuzo've hamokisi ma di ledamilisave.
37 Ido' mono' godolou' gamazi gohi ma ti' lo neine' mesi ve:

Oko'nou' hizavelo' nene ve'ine huli ningi minilisave.

Izesu'ni Galese Izi-dani' Gamazi

(Mataio' 27:57-61; Maleko' 15:42-47; Luka' 23:50-56)

38 Ne'mine ogavo neloti' nene Alimataia numudoti' ve Zosehe' nene Izesu'ni e'metaa' ive minine'za Zuda vemu' golise gelo suno' e'metaa' ive ne'mo nene Izesu' oko'no dalove lo Pilato'ni a'minemu' nene longo' o-davo gele emavo ogo a'mine Izesu' oko'no nene do vine' ve. 39 Ido' gomu' Izesu' velesi ha neivo gamene ma holuka' ezela vo hetelive Nikodemo' nene za setalitisi novozo unuvo lamine' oga' ine' do gopo ine' geni've teoti fo (34) kilo (75 pauni) ne'mine nene davo Zosehekisi vasine' ve. 40 Ve sita' ingine vi a'mine unuvo initekisi nene a'mingu' milisa oko'nolo' nene banisi ne'minedunu' nene asabu' izi-dasine' ve. Ne'mine asine' nene Zuda vete iga' ani' monovolo' e'metisa asine' ve. 41 Ido' a'mine Izesu'ni lohoto' zalo' biladaa nene za zuho ma miningu' nene evene' hamokisi ma mili-ngidamani' gonoso galese nene ma minine' ve. 42 Miningu' nene holisekumu' di va'va' iga' ani' gamene nene mo oku' losa holise' minilizani' gamene sigisi kiloku nene olosa mo alite neivo gonoso galese avito' miningumu' Izesu'ni nene a'mingu' mili-dani' ve.

Copyright information for `ASO