John 20

Izesu' Galeseuti' Otine' Gamazi

(Mataio' 28:1-8; Maleko' 16:1-8; Luka' 24:1-12)

Holise' gamene osu' lavo Sadeu' nedenga' holuka' olihe go' lalosa neivo Mangadala numudoti' vene' Malia' aza gonoso galesela vo ningine' nene gonoso galese veleloti' geheni nene di hulikeni' neivo ningine' ve. Ne'mine ogo tine' molo loti' izo ogo Simoni Petolo' ve ido' Izesu' izipahala zuhouti' vonolo' ve minive engi' sita' nizasido' ogo ti' lo lo-ngimine': Guvelesi ve nene gonoso galeseuti' di vikeni' neine'za di vi mili-dani' ebekumu' nene ma ningo gelamune. Ne'mine lavo Petolokisi ido' Izesu' izipahala ma nesi gonoso galesela vilisa di aka milasine' ve. Ne'mine igi setato' nene loti' izi vasine'za Izesu' izipahala ma ne'mo nene amuzo molo loti' izo Petolo'ni ivile' ogo gonoso galesela gomu' vo heteline' ve. Gomu' vo hetelo gubi' izo gava hizo gonoso galese lulou' ningine' nene Izesu' oko'nolo' asabu' izani' banisi nene a'mingu' haza neivo ningine'za lulou' nene ma dizamine' ve. Dizamo neivo e'meto ave Simoni Petolo' nesi ogo hetelo ei' neve nene mo gonoso galese lulou' hozi dizo ningine' nene banisi nene a'mingu' haza neivo ningo ido' godololo' asabu' izi-dani' lavolavo nene banisi minida minamo asi lisihe' ogo gangosa abazata minine' ve. Ne'mine o neivo Izesu' izipahala gonoso galesela gomu' ave masi nene a'mingu' dizo ningosa Izesu' mo otave lo gele ele'vole' ine' ve. Ingine gonoso galeseu' dizi ningisa gili ele'vole' asine' nene mono' godolou' O'moso'mo do lu' izelive lo imiselelesa live hilinguti' otelido' o neive li gizikani' gamazi ma nene olihe gili guni amasidi'mo nene ve'inetunu' ningasidoti' gili ele'vole' asine' ve. 10 Ne'mine igisa gohi tine' mili numu'nida vasine' ve.

Izesu' Aza Mangadala Numudoti' Vene' Malia'ni Soto' O Imine' Gamazi

(Mataio' 28:9-10; Maleko' 16:9-11)

11 Numu'nida vikesivo Malia' nene gonoso galese heta nene ha ote mino ive ogo minine' ve. Ive ogo mino gubi' izo gava hizo gonoso galese lulou' ningine' nene 12 angelo' sita' genegana'ine mokono' ngilikasine' nene Izesu' oko'no gomu' minine' malo' mito' minasine' nene ma ne'mo godolo minida minivo ma ne'mo nene gizene minida minivo minasine' nene ningine' ve. 13 Ne'mine ogavo ingine ti' li longo' i-dasine': Alungoo, gaza nene nanitekumu' ive ogo nane. Ne'mine likesivo aza ti' lo lo-ngimine' ve: Guve'nesi ve nene di vikeni' neiha di vi mili-dani' ebekumu' nene ma ningo gelamuve. 14 Ne'mine losa mehenela velepe' izo Izesu' a'mida ote neivo ningine'za Izesu' ve lo ningo gelamine' ve. 15 Ne'mino neivo Izesu' aza ti' lo lo-imine' ve: Alungoo, nanitekumu' ive ogo nane. Gaza zahinemu' vise' nane. Ne'mine lavo Malia' aza ve mene za zuho me'mi gizebo ve'mo nololoseive lo gelo ti' lo lo-imine': Ve meloo, ei' nene gei' do vaine' neivo ma nene gaza molo-de noline' ebekumu' lo-nemanivo naza nene vo do volosuve. 16 Ne'mine lavo Izesu' aza Maliazo lavo velepe' izo vonu' belo Zuda veti gamaziuti' ti' lo lo-imine' ve. Labouni, leli' gamaziuti' nene Tisazo line' ve. 17 Ne'mine lavo Izesu' nene vene' aza oko'nolo' do gelalive lo ti' lo lo-imine': Naza nene me'neho neida olihe dizo vamuze. Oko'nelo' do gelamozo. Asi neze zuho nizada voosa nene ti' lo lo-ngemezo: Neni' ma nene neni' me'nehosi lengi' metibosi minive ido' neni' O'moso'nesi ido' lengi' O'mosotinesi minive neida nene dizo novive lozo. 18 Ne'mine lo-davo Malia' aza Izesu' izipahala zuho nizada vosa Guvelesi ve nene mo ningekuve lo a'mine Izesu' lo-imine' gamazi nene lo-ngimine' ve.

Izesu' Izipahala Zuho Soto' O nGimine' Gamazi

(Mataio' 28:16-20; Maleko' 16:14-18; Luka' 24:36-49)

19 A'mine gamene Sadeu' nivenga' nene izipahala zuho ingine Zuda veti golise gilisa ingine minani' numuno nene akahe muki' gizi gili' lisa minangu' nene Izesu' aza ogo vovo'ningu' ote mino ti' lo lo-ngimine': Lengi' muludingu' nene lamine' hongu lo minivo. 20 Ne'mine lo anau' nili bilani' nesi ido' losonou' hizani' nesi nene ngelebizine' ve. Ne'mine ogavo izipahala zuho ingine a'mine Guvelesi ve ningani' nemu' nene ngolize naba goloso izani' ve. 21 Ne'mine navo gohi ti' lo lo-ngimine': Muludingu' nene lamine' hongu lo minivo. Me'neho neze nimiseline' ne'mino lingine nene naza nolingimiseluve. 22 Ne'mine losa vele mu'nive hubu lo-ngedo ti' lo lo-ngimine' ve: O'moso'mi Sikalahu' mene dalo. 23 Lingine evene' maliti lihime'ine nene ma di huli-ngidilizani' nene mo a'mine lihime'ine nene gohi minamivo minilisave. Ido' evene' maliti lihime'ine nene lingine ma di huli-ngidamilizani' nene a'mine lihime'inesi ha minilisave.

Tomasi' Aza Izesu' Hilinguti' Otingumu' Gele Ele'vole' Amine' Gamazi

24 Ido' Izesu' engita ani' gamenelo' nene izipahala zuho tuvelu engikuti' lobe' izipe ve li-daa' ave Tomasi' nene a'mingu' minamine' ve. 25 Minamine' nenako Izesu' izipahala linge nete Guvelesi ve ma nene mo ningekune li li-imani'za aza ti' lo lo-ngimine' ve: A'mine lani' gamazi nene ma gele ele'vole' amolosuve. Asi ve'nedunu' anau' nili'mo hulo molo-dine' nene ningo a'mingu' nene a'ne do gelo ido' losonouko nesi nene a'ne molo geleloni' nene mo gele ele'vole' olosuve. 26 Ido' gamene eiti (8) ne'mine ogo vavo Izesu' izipahala zuho nene gohi a'mine numungu' nene akahe vai' gizi gili' li minangu' nene Tomasikisi a'mingu' neivo Izesu' nene gohi ogo vovo'ningu' ote mino ti' lo lo-ngimine' ve: Muludingu' nene lamine' hongu lo minivo. 27 Ne'mine loosa Tomasi'ni nene ti' lo lo-imine' ve: Gaza a'ne mene ningezo. Anga do ogo a'neu' hu'ne mene hizo gelo loso'nela hu'neukisi nene anga molo gele' nazo. Gaza gele ele'vole' amaine' nene hulo gele ele'vole' ozo. 28 Ne'mine lavo a'mido' Tomasi' ti' lo Izesu'ni lo-dine' ve: Agae, Guve'nesi ve, O'moso'ne gehepeve ve. 29 Ne'mine lavo Izesu' ti' lo lo-imine' ve: Gaza gele ele'vole' naine' nene oko'nelo' ningosa gele ele'vole' nabe. Evene' ma ingine neze oko'nelo' ningamisa gili ele'vole' i nilizave nene mo O'moso'mo do lamine' o-ngedeli akalo' mini mili minilisave.

Me Buku Nene Nanitekumu' Gizihe Ne'mi Monovomu' Gizine' Gamazi

30 Ido' izipahala zuhoti ve'nido' nene Izesu' aza eze monovo ngelebizo ato ato' suno vai' do soto' ine'za linge muki' nene me bukuu' ma gizamuve. 31 Linge ma gize nouvoni' neve nene Izesu' nene O'moso'mo do lu' izelive lo imiselelesa live O'moso'mi gipele ma nene neive li gili ele'vole' ilizave losa gizuvoni' ve. Ido' lingine a'mido' gili ele'vole' ilizani' nene lingine minevo' minevo' lengemeni dameni nene eitati' dalizave losa gizuvoni' ve.

Copyright information for `ASO