Luke 1

Luka' Aza Teohilo'ni Luhuvo Nite' Gize Noemo Gana' Gatelive Lo Ne'mi Monovo Lo-emo Gizine' Gamazi

Evene' Naba Teohilo', Gaza Izesu'nimu' li-gimani' gamazi nene mo laminetokovo' li-nimikeve lo geleline lo luhuvo nite' mene nogize-giduze. Ningezo. Ee, leli' vovoteu' soto' ani' inite' nene api' ogo soto' idoti' ningave linge ma nene a'mine soto' ine' mono' gamazi'mi gonolo' ve lili' igi mini lelita li hulikevo evene' muki' nene a'mine li hulani' gamazilo' nene e'meti di lisihe' igi luhuvo gizani' ve. Ido' ne'mine angumukisi ido' a'mine Izesu' gono do ogo molo minine' inite' mata' api' ogo soto' o'mo o'mo vo miningumu' nene naza a'mine'mi monovo danava've ngomo' naba' nene vise' ogo geleka' geleka' ogo gele osu' luvoni' nenako nemukisi nene nazasi a'mine soto' ine' initeli'mi gamazi've nene do lisihe' ogo luhuvo gizeloni' nene lamine' oloseive losa gei' nene nogize-giduve.

Zohane' Soto' Ilingumu' Zakalia'ni Angeloli'mo Lo-imine' Gamazi

Naza ti' lo nolo-gimuve: Helode' aza Zudaia misubou' guvelesi ve naba lolo' ogo minine' gameneu' nene eveneto' medelo mino O'moso inite' lehize-daa' ive ma minine' nene gulive Zakalia' ve. Aza nene eveneto' medeli mini O'moso inite' lehizi-daa' ave Aloni' a'vopilemo' zuhouti' mino ido' O'moso inite' lehizi-daa' gono senisi senisi igi daa' ani' mulise ma Abia' muliseuti' minine' ve. Ido' vene' ma do minine' gulive Elisabete' nesi nene Aloni' a'vopilemo' zuhouti' minine' ve. Ingine sita' nene Guvelesi ve'mo lou' gamazi lo huko line' vaito' nene e'meti mini gamazi'inesi nomine' aleve mini O'moso'mi velelo' nene evene' lisihe' minasine' ve. Evene' lisihe' minasine'za Elisabete' nene gohuno lizo neivo ingine nene izipaha'inesi gidami mini setato' nene ozoho mili minasine' ve.

Ido' Zakalia' zuho muliselite Zelusalemi ebeku' mono' numuno nabau' nene gono dalizado' vavo Zakalia' nene O'moso inite' lehize-daa' gono O'moso'mi velelo' doka' doka' ogo neivo a'mine Zakalia' muliseuti' nene kekeize lo minine' mono' numuno lulou' dizo unuvo lamine' oga' ine' inite' nene oloku' gizo O'moso emelive ma di kegesilisa eveneto' medeli mini O'moso inite' lehizi-daa' aveti monovolo' e'meti evene' mali'mi gulive di soto' iga' zohiku' zohi' ikevo Zakalia' gulive've soto' ogavo di kegesi-dani' ve. 10 Di kegesi-dikevo unuvo lamine' oga' ine' inite' oloku' gizi O'moso imilizani' gamene ogavo evene' muki' nene mono' numuno naba heta nene mulise mili mini O'mosola li nizavo engito' medelo Zakalia' aza mono' numuno kekeize lo miningu' nene dizo a'mine unuvo lamine' oga' ine' inite' nene gizo O'moso noimivo 11 Guvelesi ve'mi angelo' mali'mo soto' o emo unuvo lamine' oga' ine' inite' gizaa' ani' holomo ne'mi zamela ote minine'. 12 Ote neivo Zakalia' ningosa upuho' ogo golise gelo minine' ve. 13 Golise giline'za angelo' ne'mo ti' lo lo-imine': Zakaliazo, gaza golise gelamozo. O'moso'mo ezela loka' loka' naine' initekumu' nene mo gele gemave. Nemu' elengaho Elisabete' nene gipa ma gedeleseize. Gulive nene Zohane' ve lo molalosane. 14 Ido' gaza nene mulungau' lamine' goloso gelo golize izelesane. Ido' evene' linge muki' nesi nene ei' soto' ilingumu' lamine' gililisave. 15 Aza nene Guvelesi ve'mo gilivo eze velelo' nene evene' naba ne'mine mineleseive. Aza nene vaini nososi mo namo sipaki oga' noso ato ato' nesi nene mo namoloseive. Ido' aza nene izelehi mulunou' neivo minilidokisi nene O'moso'mi Sikalahu' ne'mo lulou' minevo dovo' ogo minivo O'moso'mi gono dalive lo ele'mize molaloseive. 16 Ne'mine ogo aza neve Isilaele' aleve linge muki' nene aka golosolo' nivanguti' nene engi' Guve'inesi ve O'mosola do tine' molo-ngedeleseive. 17 Ido' aza nene gomu' polohete Elia' ei' amuzo ido' emeni dameni ne'mine do otuhosa Guvelesi ve nene gomu' molo emo novo me'ninge nete izipaha'ine nene monovo do goloso goloso i-ngidamavo laminivo' minilizave lo do hamo' o-ngedo ido' hokolize' igi bikiheti iga' ave nene evene' lisihe' laminelite gili daa' nani' mono' nene lo-ngemavo gili dalisave. Ne'mine ogo Guvelesi ve alingumu' nene evene' ma ingine eze evenele zuho ma lili' igi e'metilizado' lisihe' gehepeve i minilizave lo do lisihe' o-ngedeleseive. Nemu' a'mine gipa nene soto' ogavo gazasi evene' linge mukikisi longolize izilisave. 18 Angelo' aza ne'mine lavo Zakalia' ti' lo longo' o-dine': Nazasi ele'nahosi nene mo eleni vani molokusine' nenako gipe'ne ma gedelongumu' nolo-nemaine' nene mo lamineto' lo-nemane' neive lo nado gelelove. 19 Ne'mine lavo angelo' aza ti' lo lo-imine': Naza nene O'moso'mi velelo' minaa' nouvoni' angelo' nGabiliele' ma ne nouve. O'moso asi've nene gei' gamazi lo-gemo ido' gamazi lamine' lo-gimuvoni' nemukisi lo-gemelongumu' nene nimiselavo nouve. 20 Nemu' nene gelezo. Gaza neni' gamazi luvoni' gele ele'vole' amane' nemu' nene gamazi lamo tihine hizo nanivo a'mine luvoni' initekumu' nene gamene'velo' lisihe' ogosa ogo gihile izeleseive. Ido' ne'mine ogavo gaza gohi gamazi lolosane.

21 Ido' evene' nete mono' numuno naba'mi heta mini Zakalia' geto nonida lemo alihe li ezemu' gizebo igi minani'za angelo' ne'mo gamazi lo-emo minidi'mo nene gamene ha'na mino lemo heta amivo nemu' nene evene' ingine ga'ine muki' gili minani' ve. 22 Ne'mine igi nizavo Zakalia' aza heta lemo ani'za gamazi ngelo lamiline' ogavo tihine hize mino evene' gamazi lo-ngemelesa nene anadunu' avazahavo' o-ngimine' ve. Ne'mine noo-ngimivo evene' nete aza nene mono' numungu' nene inite' ma velelo' o molo noloseive li gilani'. 23 Ido' Zakalia' nene a'mine gono've nene do do vo neivo gono do do viline' gamene've nene osu' lavo Zelusalemi numuno ebe' nene hulo numu'vela tine' molo vine'. 24 Ido' neloti' alinge' nene elenaho Elisabete' neve izipahala minavo ti' lo line': Idise naza izipaha'ne minine' nene Guvelesi ve'mo neze ninge lamine' do gohuno lizo minuvongumu' eveneliti ve'nido' novozo helo minaa' uvoni' nene gohi nenita novozo minamilive lo gelavo izipaha'ne minine' ve. Ne'mine lo mine haleko neivo ike'ni faef (5) nene ogo vine' ve.

Izesu' Soto' Ilingumu' Malia'ni Angeloli'mo Lo-imine' Gamazi

26 Elisabete' nene izipahala minavo neivo ike'ni sigisi (6) ne'mine ogo vavo O'moso ne'mo angelo' nGabiliele'ni nene imiselavo nGalilaia misubou' numuno ebe' ma gulive Nasaletela lemo ani'. 27 A'mida nene alungo olihe velo' vamine' alu ma gulive Malia' nene Zuda veti guve'inesi ve naba Davidi' a'vopilemo' zuhouti' ve ma gulive Zosehe'ni izeni imikani' alu neida lemo ani'. 28 Angelo' aza ogo a'mine alu Malia'ni nene mese' aseka lo-do ti' lo lo-imine': Guvelesi ve'mo ninge lamine' do hize ele' o-gidivo nane' vene' gaza nabe. Guvelesi ve nene geikisi neive. 29 Ne'mine lo lavo Malia' aza a'mine mese' aseka lo-do line' gamazi nemu' nene monovo nanitekumu' lihe lo gopo gala gelo minine'. 30 Ne'mino neivo angelo' aza ti' lo lo-imine': Maliazo, gaza gehelele izamivoo. O'moso'mo gei' nene ninge lamine' dave. 31 Gaza gelezo. Gaza nene mo izipaha minavo gipe ma gedelesange. Gulive've Izesu' ve lo molalosane. 32 Aza nene evene' naba lolo' ogo mineleseive. Ne'mine ogo neivo eikumu' nene O'moso hozila minive'mi gipele ve lavo mineleseive. Ido' Guvelesi ve O'moso ne'mo avoloho Davidi' guvelesi ve naba lolo' ogo minine' mo'mosi've nene emavo 33 Zakobo' zuho Isilaele' aleveti Guve'inesi ve naba lolo' ogo engito' nene minevo' minevo' ogo gizebo o-ngedo neivo a'mine gizebo ogo mine do viline' nene osu' lamoloseive. 34 Angelo' aza ne'mine lavo Malia' aza ti' lo longo' o-dine': Naza nene olihe vemohokisi bizo ongamusine' nenako gaza laine' gamazi nene nenita nado soto' ilive. 35 Ne'mine line'za angelo' aza ti' lo lo-imine': O'moso'mi Sikalahu' nene geita ogo minavo O'moso hozila dizo minive ne'mi amuzo ne'mo asabu' ize-gedavo ne'mo nene izipaha mineleseive. Nemu' nene a'mine izipahaka gedeline' nene O'moso'mi gipele gehepeve ve lavo mineleseive. 36 Ido' ma nene gelezo. Geze zuhouti' vene' gohaho Elisabete' nene gohuno vene' ve li-daa' ani'za idise nene izipahala minavo gipe gatunosi neivo ike'ni sigisi (6) nene novive. 37 Ido' ne'mine noluvoni' nene O'moso aza ne'mine mana'mine inite' iline' amuzo've nene nomine' nevoba aza olove lo liline' inite' muki' nene ha ogakovo' iline' nenako ha oloseive losa nemu' noluze. Gaza gaka muki' gelamozo. 38 Ne'mine lavo Malia' aza ti' lo line': Naza nene Guvelesi ve'mi gelekele' alu nouvoni' nenako nemu' nene gaza laine' ne'mino soto' o-nidivoo. Ne'mine lavo angelo' aza Malia'ni hulo-do vine'.

Malia' Aza Elisabete' Neida Vo Ninge-dine' Gamazi

39 Ido' angelo' hulo-do vavo neloti' nene Malia' aza mine ha'na amo Zudaia misubou' golo muki' lo minida numuno ebe' ma minida nene geto vo heteline'. 40 A'mida nene Zakalia' numungu' dizo elenaho Elisabete'ni nene mese' aseka lo-dine'. 41 Ne'mino mese' aseka nolo-divo Elisabete' aza nogilivo izipe ne'mo mulunouko gabe kabe' neivo O'moso'mi Sikalahu' ne'mo Elisabeteda mino hize ele' o-divo 42 nolo nabauti' geke' lo ti' lo Malia'ni lo-dine': O'moso'mo gei' nene vene' muki' ngivile' ogo ninge lamine' do no'noho' ize-gedavo nane. Ido' gei' mulungau' neine' izipaha nesi nene no'noho' ize-davo neive. 43 Nemu' nene Guve'nesi ve'mi izeleho gaza nene neni' haza vene' nouvoda alinido' lisihe' amane' nenako mo oganivo lanite' nogiluve. 44 Gelezo. Gaza ogo hetelo mese' aseka nolo-nedanivo nogiluvo gatu'neu' izipe ne'mo olize izo moi' moi' ogavosa nemu' nene noluve. 45 Gaza Guvelesi ve'mo lo-gimine' gamazi nene gihile izeleseive lo gele ele'vole' aine' nenako nemu' Guvelesi ve'mo no'noho' ize-gedavo golize izo mineline' akalo' mine molo nane.

Malia' O'moso Do Naba O-do Line' Nama

46 Elisabete' aza ne'mine lavo Malia' aza nama gosoho' bele molo ti' lo line':

Naza lu'nedunu' nene Guvelesi ve do naba noo-duve.
47 Ido' lu'ne ne'mo nene nu' izaa' ive O'mosomu' nene olize noizive.
48 Naza ne'mine uvoni' nene nanitekumu' ve.
O'moso aza ne'mo naza nene haza gelekele' aluvo lemo minuvoni' nemu' nene ningo gelo do'mo dize-nedo do lamine' o-nedave.
49 Ee, amuzo malehe minive O'moso aza nene inite' lamine' goloso nenita o-nidine' nene
ei' emeni dameni atoli'mine goloso ogo lamine' neivo opo'ni noluve.
50 Ido' ezemu' lehelele izivo mino e'meto nonive leli' nene mulumote ningo hize ele' o-ledo neine' monovo've nene
evene' soto' igi mini di vilizadasi nene ha mine do vo mineleseive.
51 Ido' ve ma ingine amebe ve none li lu'ine ga'ningu' gili gavele ve gehesave nene
aza amuzolo atoli'mine ogo minine' do soto' ogo do gopo o-ngedavo hutile' igi vani' ve.
52 Ido' guve'inesi naba minave nene evene' gizebo i-ngidi minaa' ani' mo'mosi'nidoti' nene ngehuso' ogo do huline' gelavo guve'inesi ve nene gohi minamaa' ani' ve.
Ido' haza ve limi minave nene aza lavo evene' dizi minave ve naba ne'mine lili' iga' ani' ve.
53 Ido' goho' gahali' mini initekumu' ga'na hili minave nene inite' lamine' vai' ngemavo di vai' li minaa' ani'za
heneni ve minave nene inite' ma ngemamo do hulo-ngedavo haza minaa' ani' ve.
54 Aza nene Abalahamukisi ei' a'vopilemo' zuho engi' nesi mulumo'ine ningo hize ele' o-ngede'mo vo mineloni' nene
mo huko vamo ha minevo' minevo' ogovo' mineleseive lo lo huko
avotemotine lo-ngimingumu' nene gala molamivo ha gele mino
eze gelekele' o-daa' unive Isilaele' zuho nene hize ele' o-ledave.
Nemu' nene naza ezemu' nolize noizuve.
56 Malia' aza mo ne'mine lo osu' lo Elisabetekisi maka' mino ike'ni sito hamo do hulosa numu'vela tine' molo vine'.

Mono' Noso Holo-ngedaa' Ive Zohane' Soto' Ingumu' Luhuvo Gizine' Gamazi

57 Ido' Elisabete' aza izipahala gedeline' gamene nene mo alitavo gipele gidine'. 58 Ne'mine ogavo nemu' nene Guvelesi ve'mo Elisabete'ni atoli'mine ogo mulumolo ningo nasahili' o-do hize ele' o-dingumu' nene eze zuho netesi ido' oholomote zuho netesi nene gili ezesi inginesi ngolize makato' izani'. 59 Ne'mine igi nizavo izipe nene soto' idoti' gamene eiti (8) ogo vavo a'mine gameneu' a'mine izipe nene O'moso'mi noso mili-di oko'no lolovo huki-dilisa igi gulive've nene melehido' Zakalia' ve li milalisa ani'za 60 izeleho ne'mo o've lo-ngedo gulive've nene Zohane' ve lo mineleseive line'. 61 Ne'mine lavo ingine ti' li li-imani': E'e, geze zuho mukikuti' nene ne'mine gulive'inesi minave hamokisi ma minamave. 62 Ne'mine li a'inedunu' avazaha igi melehine ti' li longo' i-dani': Gaza gulive nadive lo molo-delesa gele nane. 63 Ne'mine li longo' i-dikevo meleho aza luhuvo gizo lo-ngemelesa luhuvo gizeline' initekumu' anadunu' avazaha ogo longo' o-ngedavo ma di imikevo ti' lo gizine': Gulive've nene Zohane' ve lo mineleseive. Ne'mine lo gizavo evene' ingine vo'ine vavo gopo ga'ine gili minani'. 64 Ne'mine igi nizavo Zakalia' aza gamazi liline' aka've hize tile-davo minine' inite' nene osu' lo-davo gohi tihine hizamo a'mido' lite' lo gamazi api' ogo nolo O'moso opo'ni lo minine'. 65 Ido' inite' ne'mine soto' ingumu' nene a'mine ebeku' mini'mi monave muki' nene gili ngehelele izivo nizavo a'mine soto' ine' inite' ne'mi gamazi've nene Zudaia misubou' golola numuno ebe' mukiku' minave ingine nene li volelo' melo' igi minani'. 66 Ne'mine igi mini a'mine gamazi gilave muki' ingine nene Guvelesi ve'mi amuzo eita soto' ogo minine' nemu' nene gilani' nenako nemu' a'mine gamazi nene di madu'ningu' mili mini ti' li lani': A'mine izipe nene soto' olosa neivosi ido' soto' neivosi vote vine' inite' ne'mine soto' ine' nenako alinge' nani'mine ve lolo' ogo mine' nalivo. Mo evene' naba ne'mine ma lolo' ilido' o noloseive li lani' ve.

Zakalia' Aza Gipele Zohane' Alinge' Ogo Molo Iline' Initekumu' Lo soto' Ogo O'moso Opo'ni Lo Nama Line' Gamazi

67 Ido' Zohane' meleho Zakalia' aza nene O'moso'mi Sikalahuli'mo ogo hize ele' o-divo O'moso'mi veleti' gamazi ti' lo lo soto' ogo nama line':

68 Isilaele' aleveti Guvetesi ve O'moso nene do naba o-do opo'ni lolone.
Aza nene ogo evenele zuho leli' nene mulumote ningo goloso ogo minuninguti' nene kuluhize-ledave.
69 Ee, O'moso'mi veleti' gamazi li soto' iga' ave polohete gozopo' aka'mila minani' nete
O'moso'mo lo huko-lidine' gamazi've gozopo' li soto' ani' nene do gihile izo
gomu' O'moso gelekele' o-do minive guvetesi ve Davidi' a'vopilemo' zuhouti' nene
amuzo malehe ve leli' do lu' izelive nene mo do ote-dave.
71 Ido' do ote-dine' nene evene' ma lelikumu' muso ga'ine dizavo biluva' i-lidaa' aveti a'ningu' minuninguti' nene
kuluhize-ledo do lu' izelive losa do ote-dave.
72 Ee, ne'mine ine' nene gomu' ei' gulive'velo' ele'vole' gamazi leli' avotehine Abalahamu'ni lo huko-dine' mamu' nene
gala gele mino a'mine gamazi leli' Isilaele' aleveti avotemotinemu' nene
lengi' zuho mulumo'ine ningo hize ele' o-ngede'mo vo minelesuve lo lo huko-ngidine' nene
do gihile izelesa ne'mine ine' ve.
Ido' a'mine gamazi lo huko lingu' nene ne'mine olosa line':
74 Aza nene leze biluvateliti a'ninguti' do kuluhize-ledavo
laza nene lehelele izamivo mino mene misubouko eze velelo' vetesi mine do voloningu'
laza nene monovo lisihe' laminekovo' ogo molo mino
ezemu' gele lamine' o mino opo'ni lo mine do vo minelone.
Ido' ne'mine ine' nemu' nene Isilaele' aleveti Guvetesi ve O'moso nene do naba o-do opo'ni lolone.
76 Ne'mine lo Zakalia' aza gipele ngomo Zohane'nimu' nene ti' loo imine' molo line':

Ido' gipe'ne gaza nene Guvelesi ve'mi aka vele-delesa eze evenele ti' lo lo soto' o ngeme'mo gomu' molo-do volosane:
Leli' O'mosote aza nene lelikumu' mulunou' mulumo naba giline' nenako
nemu' aza nene lihimete hulo-ledo do lu' izeline' aka vele-ledelesa neive.
Ee, O'moso aza leli' mulumote ningo Guvelesi ve imiselavo
aza Okulumokuko hozi minidoti' nene lemo
leli' luteu' liti'muso ize minivo mino helo vo tolovo olone' akalo' mine molo minuniveti vovoteu' mino
go' lo labana' elaa' neine' ne'mino luteu' hize labana' ele-ledo
hongu lo minelone' akalo' lele'mize molaloseive.
Ido' gipe'ne gaza evene' ne'mine lo lo-ngeme'mo vo mino Guvelesi ve gomu' molo-do aka've vele-deline' nenako
nemu' nene geikumu' evenelite Okulumoku' atoli'mine ogo dizo minive'mi polohete ve li
li-gidaa' ilisave lo lo-imine'.
80 Ido' neloti' a'mine izipe Zohane' nene naba o'mo vo mino gala gele ngenga lo minine'za eze gono daline' gamene O'moso'mo molo-dine' nene olihe amivo Isilaele' aleveti ve'nido' nene soto' amo ebe' hadive goko' lo minaa' idaavo' nene ongo mono minine' ve.

Copyright information for `ASO