Luke 11

O'mosola Laakumu' Izesu' Apize nGimine' Gamazi

(Mataio' 6:9-13; 7:7-11)

Gamene ma Izesu' aza ebe' malo' O'mosola lo minine' nene osu' lavo izipahala zuhouti' mali'mo Izesu'ni ti' lo lo-imine': Gaza nene mono' noso holo-ngedaa' ive Zohane' O'mosola laakumu' izipahala zuho apize ngimine' ma'mino leze apize lemevo. Ne'mine lavo Izesu' aza ti' lo lo-ngimine': O'mosola nili ma ne'minisa lilo:

Meteho ve,
Gei' guliveka nene evene' vai' gelekunivo dizosa miniliho.
Ido' eveneka gizebo o-ledeline' nene lelita mudise soto' iliho.
Ido' nalone' noso' nitete nene gamene gamene lemezo.
Ido' lihime di-lidave mukiliti lihime'ine nene
mo hulo-ngedaa' noune' nenaze.
A'mine'mine ogo leze lihimete nene hulo-ledezo.
Ido' lemengu' molaa' akalo' nene lele'mizo vamozo.
Ne'mine lo lo-ngemo ti' lo lo-ngimine': Lengikuti' ve mali'mo okise ongo velepe' izaa' gamenelo' nene zogo ve'mi numuda vo ti' lo lo-emelihe: Zogone, neni' zogone ma aza aka ha'nati' ogo noheteline'za noso' nite' emeloni' ma nomize. Beleti setohamo ne'mine ma lehize-nedevo. Ne'mine loloseine'za zogo ve ongo mineline' ne'mo nene numuno luloukoti' nene ti' lo ha lilido' o neihe: Idise akahe tile neivo vene' izipaha'ne zuhosi ongo noningu' nene goseleka lo-ledamozo. Naza oto inite' ma ngelo gemamolosuve lilihe. O'ove. Ne'mine lamoloseive. Asi a'mine ongo minive nene zogo ve nolinekisi nene inite' ma emelesa gelamo ongo mineline'za ongalosa nouningu' mene lihiteheka lo minalive lo oto a'mine vise' ine' inite' nene ha do emeleseive.

Ne'mine oloseinako naza ti' lo nolo-lingimuve: Inite' ma dalone li O'mosola lilizave muki' nene inite' ha dalisave. Ido' O'mosolati' nene inite' ma vise' ilizave nene ha ningilisave. Ido' akahelo' okoho' izilizave nene O'moso'mo ha si'ze-ngedeleseive. Nemu' linginesi O'mosola inite' mamu' longo' ilizani' nene ha lengemeleseive. Ido' vise' ilizani' nene O'moso'mo ha lengelebizeleseive. Ido' akahelo' okoho' izilizani' nene O'moso'mo ha si'ze-lengedeleseive. 11 Ido' lengikuti' gipele'mo alahakumu' ma liline' nene meleho zaholike alaha' ma do emamo sata' ma do emeline. 12 Ido' okoloho mulomu' liline' nene gaza ongovuso' beleline' inite' sata' gazehe nevo'mine emelibe. 13 Lingine nevo ha evene' golososi nilizaha izipahatine zuho nene ha gizebo lamine' i-ngidi inite' lamine' nene ha ngimaa' nave. Nemu' nene linginesi lingivile' ogo lamine' minive Okulumoku' metibo ne'mo nene evene' ingine voku' li ezela laa' nave nene Sikalahu've lehize-lengedamilihe. O'ove. Mo atoli'mine ogo lehize-lengedeleseive.

Izesu' Nene Belezebulodati' Amuzo Do Minosa Gono Nodave Langumu' Izesu' Aza Ne'mino Nomive Lo Lo-ngimine' Gamazi

(Mataio' 12:22-30; Maleko' 3:20-27)

14 Sikalahu' golosoli'mo ve mali'mi lulou' mino vele hize langolo' ogavo gamazi lamive'mi lulouti' nene gamene ma Izesu' aza sikalahu' goloso imisele hulavo a'mine ve aza gamazi api' ogo laa' ine'. Ne'mine ogavo evene' nene vo'ine goloso vine'za 15 linge ma nete ti' li lani': Ve mene sikalahu' goloso ngimiselo do nohuline' nene sikalahu' golosoliti guve'inesi ve Belezebulodati' nene amuzo do minosa ne'mine neive li lani'. 16 Ido' linge ma nete emengu' mili ti' li lani': Okulumoku' minive aza geikisi noline' nene amuzo gemavo atoli'mine suno ma do soto' oganivo ningelone li lani'. 17 Ne'mine lani'za Izesu' aza lu'ningu' gamazi gili minani' nene ningo nogelo ti' lo lo-ngimine': Misubo mau' minilizani' aleve ingine nene hizi ho'li mini lovo hizilizani' nene mo evene' sime' nikevo ebe' nene ga'me' pizeleseive. Ido' vani hamoli'mi izipahalalite hizi ho'li mini lovo hizilizani' nene ingine mo hutile' ilisave. 18 Ido' a'mine'mine ogo neze nene Belezebulodati' amuzo do sikalahu' goloso nene ngimiselo do nohulive laa' nani' nene Satani aza eze zuhosi ho'li ato ato' minadiniko a'mine zuho nene ngeli ele'vole' igi minadibe. O'ove. Mo limi ingi vi gopo' napa' adine. 19 Ido' nenikumu' nene Belezebulodati' amuzo dosa sikalahu' goloso nene ngimiselo do nohulive nilahe. Ido' lengi' zuholite sikalahu' goloso ngimiseli hulaa' ani' ma nene amuzo zahidati' disa neve. Lingine engikumu' nene Belezebulodati' amuzo disa sikalahu' goloso nene ngimiseli nihulave li ma li-ngidadiniko lengi' nene mo di gonito' i-lingidadine. O'ove. Ingine Belezebulodati' amuzo damaa' ani' ne'mino nazasi ezelati' damo O'mosolatikovo' amuzo daa' nouve. 20 Ido' sikalahu' goloso ngimisele hulaa' nouvoni' nene O'moso'mi amuzodunu' ne'mine oga' nooloni' nene O'moso'mo evene'velo' gizebo oga' amuzo've nene lengita mo do soto' ogo nolengelebizive.

21 Ido' amuzo malehe ve mali'mo gimise elese ogo mino numu'velo' gizebo ogo mineline' nene inite' mata've muki' nene lamine' ha mineleseive. 22 Ha mineleseine'za eze nene ivile' ogo amuzo ve ma mineline' ne'mo ogo lovo o emo ivile' iline' nene aza gimise elese mene do nouvoni' ne'mo nene nivile' amilisave lo gele ele'vole' ine'za ivile' ogo a'mine gimise elese ipe' ogo do hulo inite've nene ize' molo ngemeleseive. A'mine'mine ogo naza Satani ivile' okuve. 23 Ido' ve ma ingine nenita gi'mizi minamave nene neni' lovo i nimaa' ave nene nizave. Ido' ve ma ingine nenikisi maka' mino evene' do nenita amunive nene evene' ngimiseli di hutile' i huli-ngidaa' nave.

Sikalahu' Goloso Eveneliti Lu'ninguti' Vikevo A'mido' Lite' Li O'moso'mi Sikalahu' Ele'mizi Milamilizani' Nene Mo Ihe' Goloso Gehepeve Ilisave Lo Izesu' Line' Gamazi

(Mataio' 12:43-45)

24 Sikalahu' goloso mali'mo ve mali'mi lulou' mininguti' hulo-do viline' nene mine gelo mineline' ebekumu' nene ebe' gokota viseto' voloseive. Vo vise' iline'za ma ningamiline' nene ti' lo loloseive: Naza gana' hulo uvoni' numu'ne mala tine' molo volove. 25 Ne'mine lo tine' molo ogo ningeline' nene pipia' gisi di lisihe' ikeni' neiha evene' nizamani' neivo ningeleseive. 26 Ningo gohi vo sikalahu' goloso seveni eze ivile' igi goloso naba gehepeve minani' nene ngele'mizo ogavo a'mingu' dizi a'mine ve'mi lulou' nene ingine numu'ine lolo' ogavo minilizani' nene gomu' a'mine ve minaa' ine' nesi ivile' ogosa goloso nabalo' mine molo mineleseive.

27 Ti' lo nolivo evene' di gese' ani' muliseuti' vene' ma minidi'mo vise lo Izesu'ni ti' lo lo-imine' ve: Gei' nene gedosa amine've gimine' vene' nene O'moso'mo no'noho' ize-do do lamine' o-de neine' ma neive. 28 Ne'mine line'za Izesu' ti' lo line': Ne neiha asi O'moso'mi gamazi gili a'mido' e'metaa' nave nene O'moso'mo no'noho' ize-ngedo do lamine' o-ngede neine' ma neive lolone' nene lamine' o neive.

Evene' Golosolite Izesu'ni Ato' Suno Ma Do Soto' Ivo Ningelone Li Laa' Ani' Monovomu' Izesu' Line' Gamazi

(Mataio' 12:38-42)

29 Ne'mine lo-ngemo neivo evene' ika' ika' igi vai' nilavo Izesu' aza api' ogo ti' lo lo-ngeme'mo vine': Mene gamenelo' mine do nouvoda ningi nizave lingine nene evene' golosovo' minii nenikumu' atoli'mine inite' do soto' ogo O'moso'mo amuzo nimine' nene lengelebizelongumu' nilani'za ma lengelebizamuvo O'moso'mo gozopo' eze veleti' gamazi lo soto' oga' ive Zonada ato' suno do soto' ogo amuzo've ngelebizine' ma'minevo' ma nenita soto' ogavo neve ningilisave. 30 A'mine ningilizani' inite' nene Zonada ato' suno soto' ogavo Nineve alevete ningani' ne'mino idise mene nizani' aleve lengitasi nene O'mosolati' ve gihile nenita nene inite' ma soto' ogavo ningilisave. 31 Ido' guvelesi vene' naba aza emala misubo monovo liginela gizebo o minine' misubo Seba nene hulo avotemoti guve'inesi ve naba Solomoni' laa' ine' gamazi lamine' nene gelelesa aka ha'na ha'na goloso ani'za neni' nene Solomoni'ni ivile' ogo mino mela lengi' vovotingu' soto' ogo mino gamazi lamine' noluvoni' nene lingine gilisa'mave. Nemu' nene gamene nabala a'mine guvelesi vene' naba ne'mo nene oto lihimetine lo soto' ogo goni' o-lengedeleseive. 32 Ido' Nineve aleve ingine Zona' mono' gamazi lo-ngimine' nene gilii lu'ine di velepe' izani'za lingine gili'nalo. Naza Zona'ni ivile' ogo minuve mene ogo lengi' vovotingu' mino gamazi lo-lingimuvodo' nene gilii lutine di velepe' izamanako gamene nabala nene Nineve aleve nete oti lengi' lihimetine li soto' i-lingidi gonito' lengele'mizi milalisave.

Luteli'mi Olo' Livi' Nemu' Line' Gamazi

(Mataio' 5:15; 6:22-23)

33 Ve ma lamu vite' igisa galese lulou' nehe ido' somo lulou' nehe nene ma haleki milamilisave. Asi evene' numungu' dizilizave hize labana' ele-ngedelingumu' nene soto' lamu molaa' holomolo' milalisave. 34 Evene' volone' akate nene vete ne'mo olo' livi' ne'mino mino do soto' o-ledaa' neive. Ido' lukali'mi vele lamine' ha mineline' nene O'moso'mo okonga luka muki' nene hize labana' ele-gedeleseive. Ido' lukali'mi vele've goloso o noline' ne'mo nene okonga lukau' liti'musovo' ize vai' lo mineleseive. 35 Ve ma gaza lukau' nene labana' neivo nouhe lo gelo nanivo lukau' liti'muso ize mininekisi minalinge. Ehe' ogo minezo. 36 Ido' gei' okonga lukau' nene liti'muso ngomosi' minamo labanali'mo vai' lo mineline' nene lamu hize labana' goloso ele neine' gelavo luka okonga mukiku' nene labana' goloso elo mineleseive.

Halisaio' Mono' Laa' Avesi Zuda Veti Lou' Apizi nGimaa' Avesi Izesu' nGelemine' Gamazi

(Mataio' 23:1-6; Maleko' 12:38-40)

37 Ido' Izesu' aza gamazi lo-ngemo minine' nene osu' nolivo Halisaio' ve mali'mo noso' nitekumu' elese molo imine'. Ne'mine ogavo Izesu' aza numungu' dizo noso' nite' nalosa noso' nite' naa' holomolo' minine'. 38 Ne'mine ogo noso' nite' no neivo Halisaio' ve aza ningine' nene Izesu' aza Zuda ve engi' monovolo' e'meto ana gomu' noso' ize hulamo noso' nite' nonavo ningo gopo gala giline'. 39 Ne'mine neivo Guvelesi ve'mo ti' lo lo-imine': Gaza gelezo. Halisaio' ve lingine nene kapu ido' lapese naba heta evene' ningilizadavo' noso' izaa' nani' ne'minisa nene nizani'za lutinguko nene gumine daminelo' monovo ido' monovo goloso nene vai' lo neive. 40 Lingine mo negi nizave. O'moso ne'mo inite' oko'no heta lolo' ogosa lulouko nesi nene a'mine'mine ogosa lolo' o neine' nemu' nene gilamahe. 41 Ido' lutinemu' nene lo-lengemelove. Lingine evene' ma ngele'mizi lamine' ilisa inite' ma ngimaa' ilizani' ne'mo lutingu' goloso minine' ma nene do lamine' ogavo lisihe' lamine' minilisave. 42 Ne'mine ilisani'za lingine Halisaio' ve nene ehetine' neve. Lingine Mose' lou' gamazilo' ma gili dii mingu' inite' ngomo ngomo noso' nite' do lanite' oga' ine' inite' nevo'minguti' linge ngomo nene ize' mili O'moso imaa' naha lou' gamazi ma ado' evene' nene monovo lisihekovo' i-ngidilo ido' lutine O'moso imilo lo neine' ma nene gili hulaa' nani' nene Mose' lou' gamazilo' e'meti mingu' inite' ngomo ngomo O'moso imaa' nani' ne'mini ha gili dalizanako gili disa'mave. 43 Ido' Halisaio' ve lingine mono' numungu' numungu' evene' nabalitevo' minaa' ani' holomolokovo' minilisa gilaa' nani' nemukisi ido' maketilo' evene' muliseu' siza li-lidilizave lii gilaa' nani' nemukisi nene ehetine' neve. 44 Lingine gonoso galese soto' igi minami haleki nizavo evene' gopo a'mido' lisi moni goloso iga' nani' ne'mine gonoso galese gili minani' nemu' nene agae, ehetine' neve. 45 Izesu' ne'mine lavo lou' gamazi apize ngemaa' ive mali'mo Izesu'ni ti' lo lo-imine': Tisazo, gaza ne'mine nolaine' nene lelikisi nolelemaine' gelave. 46 Lavo Izesu' ti' lo lo-imine': Lou' gamazilo' sukulu naba li monikeve lingine lou' gamazi ngomo' naba' di nubuho igi evene' gili dalizave li geni'vesi lou' gamazi vai' nene gata'nido' gihi-ngidaa' nave. Gihi-ngidaa' nani'za a'mine geni'vesi lou' gamaziuti' lou' hamo' ma ngomo lasolo ne'minesi langisetine ma gihisa'mani' nenako nemu' nene agae, ehetine' neve. 47 Ido' gozopo' polohete minave nene avotingelite ngibili hilaa' ani' ve. Ne'mine ado' nene lingine imine' mili a'mine poloheteliti gonoso galeselo' nene gono di di lamine' iga' nani' nemu' nene ehetine' neve. 48 Ee, avotingelite polohete ngibilikevo hilaveti gonoso galese'nido' nene lingine gono di di lamine' iga' nani' ne'mo avotingelite igi mili iga' ado' nene hize ele' i-ngidaa' nani' monovo nene di soto' ikeve. 49 Nemu' nene gele vevesaa' ive O'moso ne'mo ti' lo lave: Polohetesi ido' aposolokisi ngimiselekuvo engita vi gono nidavo linge ma nene ngibili hili ido' ma nene goboni mala' mala' i-ngidilisave. 50 Ne'mine ilizani' ne'mi lihime nene gamene gala'muda vomine O'moso'mo misubo do soto' idati' polohete ngibili'mi igi mini idisesi ngibili'mi vi nizani' lihime nene lengi' idise mene gamenelo' nizani' aleve neti okodida dizeleseive. 51 Ee, naza lamineto' nolo-lingimuve. Abeli'ni uvoloho'mo bele hilidoti' nene polohete ne'mine ve muki' ngibili hili'mi dizi Zakalia'ni O'moso lehizi-dani' inite' oloku' gizaa' ani' holomosi ido' mono' numuno naba nesi oluso' neivo bili hilado' ivo ngibili hilani' neti lihime'ine nene idise mene gamenelo' nizani' aleve neti okodida dizeleseive. 52 Ido' lou' gamazilo' sukulu naba li monikeve lingine nene mono' monovo gele ngolo' laa' amuzo nene di minilizanako mo hulikeve. Ee, langisetine nene mono' monovo gili ngolo' lami evene' ma mono' gili ngolo' lilisa ave nene aka'ine hizi tili-ngidaa' nave. 53 Ne'mine loo numunguti' lemo novivo lou' gamazi apizi ngimaa' avesi Halisaio' vesi ingine Izesu' nene gamazi do gopo ogo ma liline' nene analo' do goni' o-delone li amuzo mili golo izi longo' ato ato' vai' goloso i-dani' ve.

Copyright information for `ASO