Luke 13

Lu'ine Di Velepe' Izamilizave Muki' Nene Vi Tolovo Ilisave Lo Line' Gamazi

Ido' Izesu' a'mine gamazi lo osu' lo nolo-ngimivo nGalilaia ve malite ize ngibili O'moso lehizi-di nizavo Pilato' lavo a'mine ve nene ngibili hilave li a'mine gamenelo' gehepeve nene evene' ma igi heteli Izesu'ni vetete' igi li-imani'. Ne'mine li li-imikevo ingine lado' ti' lo lo-ngimine': Ido' nemu' lingine gilani' a'mine nGalilaia ve ngebelavo hilave nene nGalilaia ve linge muki' nene ngivile' igi lihime nabalo' daa' ave minadi'mo nene mulumo gili hilani' noloseive lisa nigilahe. O'ove. Mo ne'mino nomive losa ti' lo lamineto' nolo-lingimuve. Lingine lutine ma di velepe' izamilizani' nene linginesi a'mine'mine igi vi tolovo ilisave. Ido' Siloamu numuno ebekuti' numuno ha'na gizi di dizi vani' numunoli'mo ngutoko lemo evene' eitini (18) ngibilive nete Zelusalemi numuno ebeku' minani' aleve nene ngivile' igi monovo goloso naba daa' ani' noloseive li nigilahe. O'ove. Mo ne'mino nomive losa ti' lo lamineto' nolo-lingimuve: Lingine lutine ma di velepe' izamilizani' nene linginesi a'mine'mine igi vi tolovo ilisave.

Lute Do Velepe' Izo Mono' Gihile've Do Soto' Amunivo O'moso'mo Lebelalive Lo Zuda Ve Lu'ine Di Velepe' Izamangumu' Izesu' Aneza Gamazi Line'

Ne'mine lo aneza gamazi ma ti' lo lo-ngimine': Ve mali'mo vaini nala' zuho' oga' ine' mi'veu' gohuno za ma zuho' okingu' nene aza alinge' ogo gihile izihe izamihe lo elelesa vise' ine'za ma izamivo mido' gizebo ve nene ti' lo lo-imine': Ningezo. Gohuno za mene ningeka' ningeka' uvoni' kilisimasi setohamo nene gihile've izine' ma ningamuze. Misubo ngilisi hazamu' no minalize. Bele hulozo lo-dine'. Ne'mine lavo mido' gizebo ve aza ti' lo lo-imine': Ve nabo, idise kilisimasi nene ha minelive. Naza nene a'mine gohuno za ne'mi monovouko nene omo' do guno ogo gono dosa za nene lamine' dizo gihile izelingumu' bulumaka' ise ne'mine molalove. Ne'mine okuvo ma kilisimasiu' nene gihile lamine' izelihe ningelone. Ido' lamine' ogo gihile ma izamiline' nene belo huko do hulolosane lo line'.

Holise' Gameneu' Izesu' Vene' Ma Do Lamine' O-davo A'minemu' Ningi Likevo Izesu' A'minemu' Lo nGolo' Lo Lo-ngemo nGovozo Gani Lo-ngidine'

10 Holise' gameneu' nene Izesu' aza mono' numuno mau' mono' apize ngemo minine'. 11 Lo-ngemo neivo a'mingu' vene' ma minine' nene sikalahu' golosoli'mo kilisimasi eitini (18) ne'mine vene' ne'mi lulou' mino mehene do hilingize-divo mehene hili-ngize vine' mino ote pehe lamiline' o vine' minine'. 12 Neivo Izesu' aza ningo asi lo-do ti' lo lo-imine': Vene' gaza gize do nane' inite' nene mo do mate-gedekuve. 13 Ne'mine nolo vene' ne'mi oko'nolo' ana hitavo a'mido' lite' lo mehene hilingize minine' nene lisihe' ine'. Ne'mine ogavo vene' aza api' ogo O'moso opo'ni lo'mo vo minine'. 14 Ne'mine neivo mono' numudo' gizebo ve naba ne'mo holiseku' vene' do lamine' o-dine' nemu' nene mulunou' goloso gelo evene' ti' lo lo-ngimine': Lingine inite' gizi dani' do lamine' o-lengedelingumu' ve li ma nene holise' gameneu' nene ami asi gono gameneu' gamene sigisi (6) neine' neukovo' nene alizave. 15 Ne'mine lo lavo a'mido' Guvelesi ve'mo ti' lo lo-imine': Lingine evene' lisihe' lamine' gili monii lutingu' monovo goloso di haleki minaa' ave mene lengi' hamo hamo' dongi izetine nehe bulumaka' izetine nehe nene noso nalizangumu' ve li ize numunguti' nene holiseku' vi kuluhizi di vamaa' nani' nehe. Ne'mine iga' nani' nene a'minesi ne gono ve. 16 Nemu' nene vene' Abalahamu' a'vopilemo' mene Satani'mo do goloso o-davo mino kilisimasi eitini (18) ivile' ine' nenako naza holise' gameneu' a'mine gize dani' inite' do lamine' o-deloni' nene edamilihe. 17 Ne'mine lo lavo eze biluva' gidini i-di minave muki' nene ngovozo hilani'. Ne'mine navo evene' muki' ingine nene atoli'mine suno lamine' do soto' ine' vai' nemu' nene ngolize naba goloso izani'.

O'moso'mo Evene'velo' Gizebo Iline' Nene Vo Naba Ilingumu' Izesu' Aza Sakave' Naba'mine Ma Minadi'mi Zuholo' Lo Molo Aneza Gamazi Lo-ngimine' Gamazi

(Mataio' 13:31-32; Maleko' 4:30-32)

18 Ido' neloti' gohi ma ti' lo line': O'moso'mo evene'velo' gizebo iline' aka've nene nadi' ogo neive lolove. Ido' naniteto' lo molo lokuvo vo dalive. 19 A'mine O'moso'mi gizebo nene naba'mine sakave' zuho ne'minosa ne neive. A'mine nene ngomo ha nite' gehepeve neiha ve mali'mo do vo mi'veu' zuho' ogavo dizo za ne'mine lolo' ogavo nama nete a'mine'mi a'navau' nene numuno gizi ingaa' nave.

O'moso'mo Eveneleliti Luteu' Ei' Gizebo Iline' Nene Vo Naba Ilingumu' Izesu' Aza Beleti Do Lulu Izaa' Ine' Inite' Zisitilo' Lo Molo Aneza Gamazi Lo-ngimine' Gamazi

(Mataio' 13:33)

20 Ido' aneza gamazi gohi ma ti' lo line': O'moso'mo ei' gizebo o-ngedeline' alevetingu' gono daa' neine' nene naniteto' lo molo lokuvo vo dalive. 21 Beleti do lulu izaa' neine' inite' zisiti ne'mine nene neive. Vene' mali'mo beleti lolo' olosa palauva' beki ngomo sitohamo nene do nososi do gopo ogo a'mingu' zisiti ngomosi do gopo ogavo ne'mo beleti nene lulu izo naba ine'.

Gateni nGomou' Vo Holaakumu' Gamazi Izesu' Line'

(Mataio' 7:13-14, 22-23)

22 Izesu' aza Zelusalemila volosa aka vida numuno ebe' ngomo nabaku' nene gamazi apize ngeme ngeme' o'mo vine'. 23 Ne'mine o'mo novivo ve mali'mo ti' lo longo' o-do line': Guvekasi ve, O'moso'mo evene' do ngu' izelive nene ngomosi' nizahe. Lavo Izesu' ti' lo lo-ngimine': 24 Lingine gateni ngomou' nene dizili ma dizilisa ele'vole' goloso ilo. Nanitekumu' ve. Naza ti' lo nolo-lingimuve: Evene' muki' nete a'mine gateni ngomou' nene dizelone li dizilisa ilizani'za ngeli ma dizamilisave. 25 Ne'mine igi nizavo numuno meleho naza oto akahe nene gize gili' lokuvo lingine heta oti mini vise li ti' li lilisave: Gaza Guvekasi ve make, akahe si'ze-ledevo. Likevo naza ti' lo lolosuve: Lingine nene zaa' ve nizahe. Ningo gele-lengedamuve. 26 Ne'mine lavo lingine ti' li li-nimilisave: Gezesi maka' mino noso' nite' naa' une' ma ve. Ido' gaza numudela aka vida nene gamazi apize leme' leme' oga' aine' ma ve. 27 Ne'mine li li-nimilizani'za naza ti' lo lo-lengemelesuve: Lingine zaa' ve nizahe ma gelamuve. Lingine goloso initetokovo' monaa' ave lingine nene mo vi haha ilo lolosuve. 28 Ne'mine lo lingine hulo heta o-lengedekuvo mini ningilizani' nene Abalahamu' ve Isaka' ve Zakobo' ve ido' polohete muki' nesi nene O'moso'mi gizebou' vi nizavo ningi nemu' vetine ingihi langolo' igi mini ive nama igi mulumo alumo gili minilisave. 29 Lingine ne'mine navo O'moso'mo gizebo ine' ebeku' nene ato' aleve ho' dizaa' idati' ido' lemaa' idati' ido' eza gahevelati' ido' ema gahevelati' nene igi mo'mosi'ine di ngolize izi noso' nite' ni minilisave. 30 Lingine gililo. Idise mene limi nilizani' aleveuti' linge ma alinge' dizi minilisave. Ido' idise mene dizi nilizani' aleveuti' linge ma nene alinge' limi minilisave.

Izesu' Zelusalemi Alevemu' Muluno Hukavo Ive Ine'

(Mataio' 23:37-39)

31 A'mine gamenelo' nene Halisaio' evene' linge ma igi Izesu'ni ti' li li-imani': Guvelesi ve Helode' aza nene gebele helelesa nolize. Me ebe' nene hulo vozo. 32 Ne'mine likevo aza ti' lo lo-ngimine': Lingine a'mine lovo gulo gele vive nene ti' li li-imilo: Gaza gelezo. Naza nene geikumu' golise gelamo idisesi aizekisi nene sikalahu' goloso ngimiselo mino evene' inite' gizi dani' nene do lamine' o-ngedo mino okozo' nene gono'ne do pelelesuve. 33 Ne'mine o neine'za polohete ngibili hilaa' nani' ebe' nene Zelusalemi ebe' neevo' neine' nenako polohete ma ebe' atota bili hililizani' nene mo edamiline' nenako nemu' nene a'mine Zelusalemi numuda nene idisesi aizekisi ido' okozokisi nene vo'mo vo'mo voloni' o neive. 34 Agae, Zelusalemi alevekizo, lingine polohete ngibili hilii ido' O'moso'mo lengita gono dalizave lo ngeletivesi geheni gavoso ngibili hilaa' ave lengi' nete gamene gamene lengi' nene okoloholi'mo goduvo' do holoke'ne'veko do nubuho o-ngidine' ma'mine ogo lengele'mize lamine' uvoni'za lingine gosele' lengebelave. 35 Lingine gililo. Numuno nabatine minine' ebetingu' nene O'moso aza gohi minamo mo hulo-lengedelesa neive. Naza ti' lo nolo-lingimuve: Idise meloti' nene oko'nelo' ningami mini'mi dizi alingeta gohi soto' nouvo ti' li li-nimilisave: Guvetesi ve O'moso'mi velemu' anive nane' ma nene no'noho' geita minivoo. Ne'mine lii li-nimilizani' gameneu' nene neze ningilisave lo line'.

Copyright information for `ASO