Luke 15

Sipisipi Ize Vo Halekido' Lo Molo Aneza Gamazi Line'

(Mataio' 18:12-14)

Ido' takisi moni daa' avesi lihime daa' ave linge ma nesi Izesu' mono' gamazi line' gililisa ezela ika' ika' igi minani'. Ne'mine navo Halisaio' vesi ido' lou' gamazi apizi ngimaa' ave ingine ningi goloso gili Izesu'nimu' ti' li lani': Ve mene lihime daa' ave ma nene zogo ngemo engikisi noso' nite' maka' naa' neine' nene edamive. Ne'mine likevo Izesu' aza gelo aneza gamazi ma ti' lo lo-ngimine': Lengitati' ve mali'mi sipisipi ize've vanu hadeti (100) minilizanguti' hamo' ma vo halekeline' nene a'minemu' vise' amilihe. Ne'mino nomive. Sipisipi naedi naeni (99) nene guvisela hulo-ngimiko hamo' vo halekine' nemu' nene vise' ogo do soto' oloseive. Mo vise' ogo do soto' ogo mulunou' lamine' gelo olize ize'mo ize'mo abuti' izo do geho numuda aloseive. Do ogo eze zuho elese molo-ngedo ti' lo lo-ngemeleseive: Naza sipisipi ize'ne vo halekine' ma nene mo ningo do soto' okuze. Maka' lolize izelone loloseive. Nemu' naza ma lo-lengemelove. Okulumoku' nene a'mine'mine ogo evene' lisihe' naedi naeni lu'ine di velepe' izamilizado' i minilizavemu' ngolize izaa' nani' nene ivile' ivosa ve goloso hamo' lulo do velepe' izeline' nemu' nene ngolize naba goloso izilisave.

Moni Vo Halekido' Lo Molo Aneza Gamazi Line'

Ido' ma nene vene' mali'mo moni siluva' teni kina (K10) go'zekelinguti' vanu kina ma vo halekiline' nene aza mo livi' gizo vise' ovo' ovo' ogo ningo do soto' oloseive. Ningo do soto' ogo vene' gonolomotine nene ti' lo lo-ngemeleseive: Naza moni'ne hamo' vo halekine' ma nene mo ningo do soto' okuze. Lolize makato' izelone. 10 Ido' naza ma lo-lengemelove. A'mine'mine igi O'moso'mi angelo' nete lihimelo' ve hamo' ma lulo do velepe' izine' nene ngolize naba goloso izaa' nave.

Gipe Mali'mo Melehine Hulo-do Vido' Lo Molo Aneza Gamazi Line'

11 Ido' Izesu' aza gamazi gohi ma ti' lo lo-ngimine': Ve mali'mi gipele sita' ma minasine'. 12 Minasinguti' alingeni ne'mo melehine nene ti' lo lo-imine': Ahono, gaza moni heneni inite' uvo'nehingisi ize' molo lemelesa molaine' ma nene neze nemelida idise ize' molo nemezo line'. Lavo me'nibo moni heneni inite' muki' nene ize' molo ngimine'. 13 nGemavo alingeni izipe aza inite' ize' molo ngimidoti' nene mine ha'na amo a'mine inite' mata'veloti' nene moni do osu' lo do ebe' hota ma vo minine'. A'mido' nene vo mino moni heneni've nene monovo danava golosolo' nene hulo osu' line'. 14 Ne'mino hulo osu' lavo a'mine minine' misubolo' nene ga'na naba' naba soto' neivo ezela nene inite' hamokisi ma lumo minamivo ga'na'mo helelido' mine molo minine'. 15 Ne'mine ogo a'mine misubou' ve ma minido' vo gonomu' lavo Zuda ve leli' O'moso'mo malise o-lede neine' inite' izelo' nene vo gizebo ilive lo lo-davo agae lo gopo vo gizebo ogo minine'. 16 Ne'mino neivo noso' nitekisi imamavo izeliti noso' nitekuti' nene ha nalove lo giline'za ma imamani'. 17 Ne'mine ikevo aza gala gele veveso ti' lo line': Me'nehi gelekele' izipe muki' nene noso' nite' lamine' muki' ni nilisani'za naza nene mela mino ga'na'mo helelesuve. 18 Nemu' nene naza numu'nela tine' molo vo me'nehine ti' lo lo-emelove: Ahono, naza do goloso ogo lihime O'moso'mi velelokisi gei' vegalokisi dokuvo edamive. 19 Nemu' nene gei' gipa minuvoni' ma nene gohi gei' gipa minelodo' lisihe' amuvonako nemu' nene gelekele' izipaha ne'mine lolo' o-nedanivo minelove lo lo-emelove lo gala gelo 20 oto meleho neida vine'.

Vine'za meleho aza gipele olihe hoto'ile navo ningo muluno gitihine' ogavo aza loti' izo vo abuti' izo golo elo nani'.
21 Ne'mine ogavo gipele aza melehine ti' lo lo-imine': Ahono, naza do goloso ogo lihime O'moso'mi velelokisi gei' vekalokisi dokuvo edamive. Nemu' nene gei' gipa minuvoni' ma nene gohi gei' gipa minelodo' lisihe' amuve. 22 Ne'mine lo line'za meleho aza ei' gelekele' izipe've nene ti' lo lo-ngidine': Lingine lite' li vi oko'nolo' inite' lamine' ma vi di igi ngili-dilo. Ido' analo' nene lini ma di izi-di ido' gizenelo' suu' nesi nene di igi izi-dilo. 23 Ne'mine igi vi bulumaka' angale ado' geheso ma mineline' ma di igi bili gize vata' i-dilo. Laza lolize izo mino no minelone. 24 Gipe'ne mene mo vo haha ogavo hilihe luvonako helanguti' gohi vele gizo ogave lavo nemu' ngolize izi ti' igi minani'.

25 Ne'mine igi nizavo gipele gana've nene mida ha minine'. A'midati' ogo numuno avita ani' nene beni bili huhunale' mili melengeni igi minani' nene giline'. 26 Gelo nanitekumu' ne'mine igi nizahe lo gelekele' izipe ma vise lo-do longo' o-dine'. 27 Longo' o-davo aza ti' lo lo-imine': Gei' nakuna ma nene velesi lamine' ha mino gohi tine' molo numuda mene angumu' nene maho ma bulumaka' angale ado' geheso ma minine' nene ma belavo noso' nite' gizi vata' nave. 28 Ne'mine lo lo-imine'za aza neve izebolo' molavo a'mingu' dizelesa gosele' biline'. Ne'mine ogo numungu' dizamivo me'nibo nene lemo eze mulunou' do zou lo-dine'za 29 melehine ti' lo lo-imine': Gaza gelezo. Kilisimasi vai' goloso mene gei' gonoka do minuvoni' nene haza gelekele' izipe ne'mine lolo' ogo mino gono do minuvoni' ve. Ido' ne'mine mana'mine ozo lo-nidaine' nene ma gele hulosa'muvoni' ve. Ne'mine oga' uvoni'za gaza meme' angale ne'minesi keke' mo ma nemanivo neze zogone zuhosi belo ma gize vata' ogo nosa'mune' ma neive. 30 Ma nemesa'mane'za gipa aza nene initeka muki' do vine' ma nene pasidia' vene' alulo' hulo osu' line' ma neine'za gaza nene bulumaka' ize gehesine' nene bele-dabe. Olo. 31 Ne'mine lavo meleho ti' lo lo-imine': Gipe'ne, gaza nenikisi maka' minaa' nosine' nene inite' muki' nenita neine' nene gei' initeka nene neive. 32 Ido' nakuna nene mo hilihe lunako helanguti' gohi soto' ogave. Nemu' nene muludeu' lamine' gelo lolize noizunivo lamine' neive lo line'.

Copyright information for `ASO