Luke 19

Takisi Moni Daa' Ive Naba Zakaio' Nene Izesuda Vo Gi'mizine' Gamazi

Izesu' aza ebe' mala volosa Zeliko numuno ebeku' dizo novivo a'mida ve ma minine' gulive Zakaio' aza takisi moni daa' ive naba mino mo heneni ve goloso minine'. Ido' Izesu' novivo zaho neve lo eze ningelesa ine'za evene' li'nibe ngomo minine' nenako evene' vailiti mehe'nida mino ngelo ningamiline' ine' ve. Nemu' nene eze ningelongumu' ve lo gomu' molo loti' izo vo gohuno za gele vine' ma Izesu' viline' akala minine' nenako a'mingu' nene vo dize minine' ve. Ne'mino dize neivo Izesu' a'mida vo hetelo a'mine zauko vonu' ogo Zakaio'ni ti' lo lo-imine': Zakaioo, idise nene gei' numungau' mineloni' nenaze. Lite' lo lemezo. Ne'mine lavo lite' lo lemo Izesu'ni nene olize numudo' mino ele'mizo numu'vela vine'. Ido' ne'mine ine' nene evene' muki' ningi aza nene lihimelo' ve'mi numungu' minelesa dizo vaave li Izesu'ni nene emenga lani'. Ne'mine navo Zakaio' aza ote mino Guvelesi ve nene ti' lo lo-imine': Guvekasi ve, gaza gelezo. Inite' mata'ne nene olusoto' molo mino ize' molo lingela nene goho' aleve ngemelesuve. Ido' naza evene' malitidati' inite' ma go'ine izo gumine gidini do noloni' nene naza a'mido' golo hizo inite' hamo hamoto' nene inite' sita've sita've molo ngemeka' ngemeka' olosuve. Ne'mine lavo Izesu' aza ti' lo lo-imine': O'mosolati' ve gihile naza uvoni' nene evene' ma vi tolovo iliza akalo' mini mili minave nene vise' ogo do ngu' izelove losa uvoni' nenako ve mene ve lulo do velepe' izo leli' oga' nounidi'mine ogo O'moso'mi lou' gamazi lido' e'metelesa nolinako ne'mo nene azasi Abalahamu' a'vopilemo' gihile minine' nene mo soto' oganako idise mene numungu' nizani' aleve menesi O'moso'mo mo do lungu' noizive.

Izesu' Aza Ve Mali'mo Gelekele' Izipe've Moni nGimido' Aneza Gamazi Lo Molo Ei' Gonou' Ve O-ngedeline' Monovomu' Line'

(Mataio' 25:14-30)

11 Ne'mino Izesu' gamazi lo-ngimido' nene gapepe' igi gili nizavo aneza gamazi gohi ma imine' molo nemu' line' ve. Aza nene mo Zelusalemi numuno ebeku' vo hetelelesa do alite alite neine' nemukisi ido' maka' minave nete nene O'moso'mo gizebo o-ledeline' gamene nene mo a'ne soto' oke leive li gili minani' nemukisi nene mo ladeni ga'ine gilikeve losa nemu' nene O'moso'mo gizebo o-ledeline' gamene geto soto' amoloseinako lo a'minemu' gizebo igi minilizangu' igi mili ilizani' monovomu' aneza gamazi lo-ngimine' ve. 12 A'mine aneza gamazi nene ti' lo line': Ve naba mali'mo nene misubo hoto' misubola nene vokuvo Guve'nesi ve naba lolo' i-nidikevo tine' molo numu'nela alove lo vine'. 13 Ne'mino volosa gelekele' izipe've teni ne'mine vise lo-ngemo moni nene vanu hadeti kina (K100) ne'mine ngemeka' ngemeka' ine'. Ne'mino nongemo ti' lo lo-ngidine': Lingine nene a'mine monidunu' nene gono gihi'mi vi nizavo tine' molo alove. 14 Ne'mine line'za eze gizebo o-ngede minine' aleve linge ma nete nene gosele' goloso ngebelavo a'mine ve vida nene evene' ma gamazi ti' li lisa ngimiselani': Ve meve nene guvetesi ve minamilive lo nolune. 15 Ne'mine lani'za mo guvelesi ve lili' i-dikevo minidoti' tine' molo ani' nene moni ngimuve nene gono do nanike' imine' mili di soto' ahe ningeloni' nenaze. Nemu' nene nenita alizaze. Vise li-ngidilizave lavo vise li-ngidikevo ika' ika' ani'. 16 Gana' ave ne'mo nene ti' lo line': Guvekasi ve, gaza hadeti kina (K100) nemaine' maloti' nene vanu tauseni kina (K1000) gohi ma do soto' okuve. 17 Ne'mine lavo guvelesi ve'mo ti' lo lo-imine': Gelekele' izipe lamine' goloso nane. Gonolo' gizebo lamine' goloso ogane. Gono ngomolo' gizebo lamine' aine' nemu' nene numuno ebe' teni nelo' nene gizebo ve hulo-gedelesuve. 18 Ne'mine lavo a'midoti' ave ne'mo nene ti' lo line': Guvekasi ve, gaza hadeti kina (K100) nemaine' maloti' nene faef hadeti kina (K500) gohi ma do soto' okuve. 19 Ne'mine lavo guvelesi ve'mo ti' lo lo-dine': Gei' nene numuno ebe' faef ne'mido' nene gizebo ve hulo-gedelesuve. 20 Ne'mine lavo gelekele' izipe gohi mali'mo ogo ti' lo line': Guvekasi ve, gaza hadeti kina (K100) nemaine' ma nene gohi do nogimuve. Gaza nene gasava ve mino evene' malite milikani' inite' nene gei' do ti' oga' nane. Ido' ve malite zuho' ani' inite' nene gei' do ti' o mino dolizo naa' nane. Nemu' nene naza gei' goliseka gelo a'mine moni nemaine' ma nene lavolavou' asabu' izo do haleko molokuvoni' nene do nogimuve. 22 Ne'mine lavo guvelesi ve aza ti' lo lo-imine': Gelekele' izipe goloso gaza mene gei' vekati' laine' gamazika ma'mo goni' o-gedeleseive. Gaza nenikumu' ti' lo labe: Gaza gasava ve mino evene' malite milikani' inite' nene gei' do ti' oga' nane. Ido' ve malite zuho' ani' inite' nene gei' do ti' o mino dolizo naa' nane labe. 23 Naza nene gei' laine' ne'mine oga' uve noloni' nene gaza moni'ne nene do vo beni numungu' molo-nedekelinako nanimu' ne'mine amane. Ne'mine anidiniko naza idise mene uvodo' nene polopetisi duvodine. 24 Ne'mine lo-emo guvelesi ve'mo a'mida minavemu' nene ti' lo lo-ngimine': A'mine hadeti kina (K100) do neine' mene ipe' igi vanu tauseni kina (K1,000) do minive nene imilo. 25 Ne'mine lavo ingine nene ti' li lani': Guvekasi ve, tauseni kina (K1,000) nene mo do neine' nenako emamoloinako gohi emelobe lani'. 26 Ne'mine likevo guvelesi ve aza ti' lo lo-ngimine': Naza ti' lo nolo-lingimuve: Inite' ma di nilizave nene gohi ma ngimi a'mingu' ikevo dalisave. Ne'mine ilisani'za inite' ma dami minilizave engita nene ngomo ma di nilizani' nesi nene engitati' ipe' igi di vikevo haza minilisave. 27 Ido' neni' biluva'ne nenikumu' engi' guve'inesi ve lolo' amiline lave ma nene ngele'mizi di igi ve'nelo' mene ngibili gese' ilo.

Izesu' Aza Zelusalemi Numungu' dizo volosa Novivo Evene' Nete Ganine Hizi nGolize Izi Ele'mizi Vani'

(Mataio' 21:1-11; Maleko' 11:1-11; Zohane' 12:12-19)

28 Izesu' aza ti' lo lo-ngemo Zelusalemi numuno akala nene do gomu' molo dizo vine'. 29 Mo vo numuno ebe' sita' Betehagesi Betanisi Oliva Golo ve lado' minasida nene omo avito' ogo izipahala zuho sita' ma ngimiselo 30 ti' lo line': Lingine a'mine ningi nizasine' numuno ebeku' volene vi dizi ningilisine' nene dongi ize angale naba evenelitesi a'mido' olihe mito' mini monamani' nene ningilisasize. A'mine nene vakesi di mela alizo. 31 Ido' a'mine nene vi nivakesasivo evenelite lingine nanimu' nivakesasive nilavo ma lingine ti' li lilizo: Gono neivosa Guvelesi ve'mo a'mine ize memu' limiselavo usine' ve li lilizo. 32 Ne'mino ngimiselavo ngimiselive ingine vi a'mine dongi ize nene Izesu' line' malo' e'meti ningasine'. 33 Ningi nivakesasivo a'mine dongi ize ne'mi me'ninge nete ti' li li-ngimani': Dongi ize nene nanimu' nivakesasive. 34 Ne'mine likevo ingine ti' li lasine': Guvelesi ve'mo gono neivo a'mine ize mamu' limiselavo nousive. 35 Ne'mine li Izesu' neida di ikesivo saketi'ine nene apasi a'mine dongi ize ne'mi mehenelo' nene Izesu' minelive li hitikevo a'mido' mito' minine'. 36 Mo mito' mino novivo evene' ingine genegana'ine nene apasi kuluhizi akalo' mili-dika' mili-dika' ani'. 37 Ne'mine navo Izesu' aza Zelusalemi numuno ebe' nene mo do avito' noogo Oliva Gololati' lemo omo minine' akalo' nene vo nohetelivo eze e'meti ave muki' goloso ingine nene api' igi ngolize niizi gono lamine' ato ato' amuzo molo davo ningani' nemu' nene O'moso opo'ni nili geke' geke' li 38 ti' li lani':

Guvetesi ve naba O'moso'mi velemu' anive nene no'noho' geita minivoo.
Okulumoku' minive'mo hongu lo minelone' monovo nene do soto' ogavosa
a'mine veleta Okulumoku' minivemu' nene opo'ni nolune.
39 Ido' evene' muliseuti' Halisaio' ve linge malite Izesu'ni ti' li li-imani': Tisazo, izipaha zuho nene ne'mine li geke' geke' lamilo lo o've lo-ngedo ngelemevo. 40 Ne'mine likevo Izesu' ti' lo line': Naza lamineto' nolo-lingimuve. Idise mene geke' geke' li vise naba nilani' nene ma lamadiniko ado' geheni mevotesi nene geke' geke' li ne'mine ladine.

Izesu' Aza Zelusalemi Ebe' Minine' Nene Ningo Muluno Hukavo Vele Novozo Do'mozine' Gamazi

41 Ne'mine ogo Zelusalemi numuno ebeta nene omo avito' noogo a'mine Zelusalemi numuno ebe' nene noningo a'minemu' ive ine'. 42 Ive noogo iveuti' nene ti' lo line' ve: Lingine hongu li minilizani' aka do soto' o-lengedeline' monovo nene alo' gozopotati' gililizanako idisesi nene mo api' igi gililizado' o neiha idisesi nene ha vetido' hite neinako gohi ngeli ma ningamilizani' oganako lengikumu' nene agae lo nogiluve. 43 Ne'mine lo nogiluvoni' nene nanitekumu' ve. O'moso'mo lengi' do lungu' izelesa lengita ani' gamene nene ma ningi gilamani' ne'mo lengita nene gamene ato' ma aloseive. A'mine gameneu' nene biluvalite igi numudine gesi heta nene misubo mili di dizi numuno naba' nabali'mi lavelo' nene di lisihe' igi vilizani' akatine hizi tili-lingidi a'midati' a'midati' biluvalite mo lili gesi ne'mine hize-lingidi galapuso lingimilisave. Ne'mine i-lingidikevo a'mine numuno ebetinesi linginesi nene ingi gese' ilisave. A'mine numudine gizani' geheni nesi nene mo bili tululu li hulikevo a'minguti' geheni sita' nesi nene lobe' igi minamilisasive.

Izesu' Aza Mono' Numuno Nabau' Maketi Milaa' Meni Hizaa' Igi Minave Nene nGimiselo Do Huline'

(Mataio' 21:12-17; Maleko' 11:15-19; Zohane' 2:13-22)

45 Neloti' nene mono' numuno nabau' vo dizo a'mingu' inite' maketi mili minave nene ngeleto do nohulo-ngedo 46 ti' lo lo-ngimine': O'moso'mo line' gamazi mono' godolou' ma ti' lo neine' ma neive:

Neni' numu'ne nene evene' dizi nopo'ni li-nimaa' numuno mineleseive.
Ne'mine li gizi nizani' ma neine'za lingine a'mingu' igi mili minaa' nani' inite' ne'mo nene guminelo' vete igi mili minaa' numuno lolo' ogave line'.

47 Ido' a'mine gameneloti' api' ogo mono' numuno nabau' nene gamene gamene evene' mono' apize ngemo minine'. Ne'mino neivo eveneto' medeli mini O'moso inite' lehizi-daa' ave naba nesi lou' gamazi apizi ngimaa' ave nesi ido' eveneliti gizebo ve'ine nesi ingine a'mine Izesu'ni nene bili hililizani' akamu' vise' ani'za 48 evene' nete ei' gamazi've gililisa amuzo mili minani' nenako ne'mo nene Izesu'ni bililizani' aka nene vise' igi ma ningamani' ve.

Copyright information for `ASO