Luke 20

Izesu' Ogo Molo Oga' Ine' Amuzo'vemu' Longo' I-dani'

(Mataio' 21:23-27; Maleko' 11:27-33)

Gamene ma Izesu' aza mono' numuno nabau' nene evene' mono' gamazi apize ngeme ngeme' ogo ei' gamazi've lamine' nene lo-ngemo neivo eveneto' medeli mini O'moso inite' lehizi-daa' ave nabasi mono' gamazi apizi ngimaa' avesi ido' mono' gizebo ve nesi nene Izesu' neida igi ti' li longo' i-dani': Gaza inite' mene mela oga' naine' nene zahi velemu' oga' nane. Ido' zaho lavosa oga' nane. Nemu' lo-lemezo. Likevo aza ti' lo lo-ngimine': Nazasi inite' mamu' longo' o-lengedelesuze. Lingine li-nimilo. Mono' noso holo-ngedelive lo Zohane'ni imiselive ma nene O'moso'mo imiselihe haza misubou' velite imiselave. Ne'mine lavo angise'ine li volelo' melo' igi ti' li lani': Laza O'moso'mo imiselive loso' nene lingine eito' nene nanitekumu' gili ele'vole' amave lo lalive. Ne neiha haza misubou' velite imiselave loso' nene evene' ingine Zohane' nene polohete ve li gili nizani' nenako nemu' ingine geheni libililisave li ngehelele izavo golise gilani'. Ne'mine igi ti' li li-imani': Mono' noso holo-ngedelive lo imiselive nene zaho nolihe ma gelamune lani'. Ne'mine likevo Izesu' aza ti' lo lo-ngimine': Lingine li-nimamani' nemu' nene nazasi ogo molo oga' nouvoni' inite' mene iline lo nimiselivemu' nene ma lo-lengemamolosuve.

O'moso'mo Ei' Evenele Zuho Zuda Velo' Gizebo Ve Nete Gelekele' I-damave Nene Do Hulo-ngedeleseive Lo Vaini Mido' Gizebo Velo' Lo Molo Aneza Gamazi Line'

(Mataio' 21:33-46; Maleko' 12:1-12)

Ido' api' ogo aneza gamaziuti' evene' ti' lo lo-ngimine': Ve mali'mo vaini mine ma zuho' ogo evene' ma mine gizebo i-dilizave lo hulo-ngedo misubo mala vo gamene ha'na minine'.

10 A'mida neivo vaini nala' gihile elaa' gamene ogavo mine meleho aza a'mine vaini nala' gihile nene ma ili nimikevo do-nedo alive lo gelekele' izipe ma imiselavo mine gizebo avela vo heteline'za ingine bili imiseli hulikevo initekisi ma damo haza tine' molo vine' ve. 11 Ne'mine ogavo gohi gelekele' izipe've ma imiselavo vine'za a'minesi bili di goloso inite' gehepeve i-di imiseli hulikevo initekisi ma damo haza tine' molo vine'. 12 Ne'mine ogavo gohi setohamo ivo gelekele' izipe ma nene imiselavo vine'. Vavo a'minesi nene mine gizebo ve ingine bili di goloso igi huli heta i-dani' ve. 13 Ne'mine ikevo mine meleho aza ti' lo line': Naza nene nadi' o' nalove. Naza lu'ne eme nouvoni' gipe'ne mene eze gamazi've gili di ele'mizi lamine' ma ilizahe imiselekuvo vilive. 14 Ne'mine lo gelo imiselavo vo hetelavo mine gizebo ve ingine ningi angise ti' li lani': Me ve'mo melehido' medelo mino mine mene dalive neinako a'mine mine mene leli' mide lolo' ilingisi mo bele helelone. 15 Ne'mine li vaini minguti' nene gelelehe' igi ele'mizi di vi gesi heta bilani' ve. Ne'mine ani' nenako nemu' nene vaini nala' mine ne'mi meleho aza nene nadi' o-ngedelive. 16 Aza ogo hetelo a'mine gizebo ve nene ngebele helo mi'velo' nene evene' gizebo ilizave gohi ma hulo-ngedeleseive. Ne'mine lo Izesu' lavo eze gamazi gili minave ingine gili ti' li lani': E'e. Ne'mino soto' amilihoo. 17 Ne'mine lani'za aza gelo vonu' ngebelo ti' lo line': Ido' lingine ne'mine lii ma mono' godolou' gamazi ma ti' li gizi nizani' ma nene neni' luvodo' nene mo vo damive lisa gili nizahe. O've. Mo vo do neive:

Numuno gizilizani' geheni mukikuti' geheni ma nene numuno gizaa' avete ningi
goloso o vive li di kegesi di hulani' geheni ne'mo nene
geheni muki' ngivile' ogo numuno do amuzo molaa' geheni lolo' ogave.
18 Ve ma ingine a'mine gehedo' velehe' limi ingalizani' nene izi iti hupu' izilisave. Ido' a'mine geheni ne'mo lemo evene' ma ngebeleline' nene izo lanahana o-ngedeleseive. 19 Ne'mine lavo mono' monovo apizi ngimaa' avesi eveneto' medeli mini O'moso inite' lehizi-daa' avesi ingine aneza gamazi line' mene lelikumu' lo molo logave li gili a'mido' nene analo' di bililisa lani'za evenekumu' golise gilani'.

Izesu'ni Ganala Daline' Akalo' Ele'mizi Milalisa Takisi Monimu' Emengu' Mili Longo' I-dani' Nene nGivile' Ine'

(Mataio' 22:15-22; Maleko' 12:13-17)

20 Ne'mine igi mini Izesu'ni nene gamazi lo gopo ilidoti' analo' do do vo guvelesi ve naba ne'mi anau' molalone li lelitati' evene' ma ngimiselekunivo ingine vi Izesu'ni gamazidunu' longo' i-di minavo gamazi gopo lilingumu' ve li evene' ma ngimiselikevo ingine vi evene' lamine' minave gili mini gamazi lo gopo ilingumu' amamaka' mili minani'. 21 Ne'mine igi mini Izesu'ni longo' i-dilisa ti' li li-imani': Tisazo, gei' monovoka gele none. Gaza evene' gamazi apize ngemaa' naine' monovoka nene mo lisihe' laminekovo' o minaa' neive. Gaza gamazi lo-ngemeline' aleve nene nani'mine aleve nilizahe evene' dizi nizani' nilizahe limi minani' nilizahe gasava ve nilizahe hongu ve nilizahe nemu' gaka muki' gelamo O'moso'mi aka lelebizo gamazi gihilevo' lo lemaa' anive nane. 22 Nemu' nene gaza laanivo gelelone. Loma veti guve'inesi ve ngamani naba Kaesale' aza takisi moni huli-nidilizave lo neido' nene e'meto Zuda ve laza ma hulo-deso' nene lisihe' o neihe lou' gamazite avuto' o neive. 23 Ne'mine lani' nene Kaesale'ni takisi moni imilo liline' ne'mo Zuda ve nene ngizebolo' molavo ganala dalive. Ido' imamilo liline' nene Loma ve ngizebolo' molavo nesi ganala dalive li ingine gili mini ei' golo izi lani' nene Izesu' aza mo ningo gelo ti' lo lo-ngimine': 24 Lingine moni ma di igi nelebizilo. Me monilo' eveneli'mi golo velesi gulivesi neine' nene zahi golo velesi gulivesi neive lo lo-ngedavo ingine ti' li lani': Kaesale' ma ve lani'. 25 Ne'mine likevo Izesu' aza ti' lo lo-ngimine': Ti' li ma a'mine moni nene ngamani gizebo ve ei' Kaesale' inite've noloseinako a'minemu' nolivo ma nene ha imilo. Ido' a'mine'mine igi O'moso'mo lingimine' initeto' nene ha golo hizi imilo. 26 Ne'mine lavo ingine evene' mukiliti ve'nido' nene gamazi've lidoti' nene ngeli di goni' i-damilizani' o vivo ingine longo' i-dado' gamazi do ti'no lo-ngimine' gamazi nemu' nene vo'ine vavo gamazi lami minani'.

Izesu'ni Di'mi Limi-dilisa Helaakuti' Otaa' Monovomu' Longo' I-dani' nGivile' Ine'

(Mataio' 22:23-33; Maleko' 12:18-27)

27 Nizavo Sadukaio' mono' laa' ave engikuti' helaakuti' otaa' nene nomive laa' ave linge ma ingine Izesuda igi longo' i-di 28 ti' li lani': Tisazo, Mose' aza luhuvo gize-lidine' nene ti' lo neive: Uvo'ninge naku'ninge ma minilizanguti' mali'mo vene' do mino izipe gedamo helavo ma engikuti' mali'mo a'mine gevono' vene' nene dosa a'mine hilive nemu' medelo izipe gedo molo-delive. 29 Ne'mine ilisanako nemu' nene uvo'ninge naku'ninge seveni ma minani' ve. Gana' ve ne'mo vene' do izipahala ma soto' amavo hiline'. 30 Ido' hilive ne'mi meheneloti' ne'mo dani'za a'mine'mine ogavo 31 ma ne'mo do mino a'mine'mine ogo hiline'. Mo mukito' a'mine'mine ika' ika' igi izipaha'ine ma gidami hili osu' lani' ve. 32 Ne'mine ikevo alinge' nene vene' nesi hiline' ve. 33 Ne'mine ine'za evene' seveni a'mine vene' dani' nenako evene' muki' hilanguti' otiliza gameneu' nene vene' nene zahi elenaho lolo' ogo minelive. 34 Aza a'mido' ngelo do velepe' izo lamivo gize zohi' o-delobe li ne'mine likevo Izesu' ti' lo lo-ngimine': Idise mene none' gamenelo' nizani' aleve lingine nene vene' daa' ido' velo' vaa' iga' nani'za 35 evene' ma alinge' gamene vomila hili nilizanguti' gohi oti minevo' minevo' ngemeni dameni di otuhiliza aleve nene vene' daa' ido' velo' vaa' ami minilisave. 36 A'mine aleve ingine nene angelo' ne'mine minilisanako mo hilamilisave. Ido' hili nilizanguti' otiliza aleve nene O'moso'mo do ote-ngidine' nenako mo ei' izipahala ne'mine lili' igi minilisave. 37 Ido' helaakuti' otaa' nemu' nene Mose' ne'mosi nene do soto' ogo lelebizave. Ado' aza za ngomouti' olo' gulumo ine' gamazi gizida nene O'moso'mo line' gamazi ti' lo gizidoti' nene lelebizine' ma neive: Naza Abalahamule Isakale ido' Zakobole engi' O'moso'ine nouve line'. Ido' a'mine ve hili osu' ladiniko engi' O'moso'ine nouve ngelo ma lamidine. Engi' O'moso'ine nouve line' ne'mo mo hili osu' lami ha nizave lo gelelesune. 38 Ido' nanitekumu' ve. O'moso'mo gelavo evene' muki' nene mo hili osu' lami ha nizani' nenako nemu' ve. 39 Ne'mine lavo evene' mono' apizi ngimaa' ave linge malite Izesu' gamazi'velo' nene ti' li li-imani': Tisazo, gaza mo lamineto' goloso laane lani'. 40 Izesu' ne'mine lo lo-ngimine' nemu' nene ingine longo' gohi i-dilisa vo'ine vavo alamani' ve.

Do Lu' Izelive Lo O'moso'mo Imiselelesa Live Guvelesi Ve Davidi' A'vo Ne'mo Nene Davidi'ni Ivile' O-dosa Neive Lo Izesu' Lo-ngimine'

(Mataio' 22:41-46; Maleko' 12:35-37)

41 Ne'mine igi nizavo Izesu' aza ti' lo longo' o-ngedo lo-ngimine': Do lu' izelive lo O'moso'mo imiselelesa live nene gozopo' guvelesi ve naba Davidi' a'vopilemo' ve laa' nani' nene nanimu' laa' nave. 42 Asi've Davidi' mono' nama lingu' a'mine ve'mi monovo line' nene mono' godolou' ti' lo gize neine' ma neive:

Okulumoku' ve aza Guve'nesi vemu' ti' lo lo-imine':
Nezeloti' gei' nene nange. A'ne hulaa' uvoda minezo.
43 Nanivo biluvaka nene gizengala do'mo leme-ngedekuvo
gizenga lisaa' iline' inite' ne'mine lili' igi
gelekele' i-gidi minilisave.
44 A'mine ve nemu' nene Davidi' aza Guve'nesi ve ve line' nenako nemu' a'mine do lu' izelive lo O'moso'mo imiselelesa live nene Davidi' a'vopilemo' lemo minive minelido' nomive.

Izesu' Aza Halisaio' Veti Monovosi Ido' Mono' Monovo Apizi nGimaa' Aveti Monovosi Lo Soto' Ine'

(Mataio' 23:1-36; Maleko' 12:38-40)

45 Izesu' aza ne'mine lo lo-ngemavo evene' muki' nete nigilavo izipahala zuho ti' lo lo-ngimine': 46 Mono' apizi lingimaa' aveti monovo nene dikelizaze. Ehe' igi golise gili minilo. Ingine nene lavolavo ha'na ha'na liki monaakumukovo' ngumo helaa' neivo ido' maketilo' nimonavo evenelite ningi ngopo'ni li-ngidilizangumukovo' ngumo helaa' neivo ido' mono' numungukisi ido' noso' nite' naba nadaasi ingine nene ve nabalitevo' minaa' ani' holomolo' minaakumukovo' nene ngumo helaa' neive. 47 Ido' vene' gono' neti inite' mata'ine di osu' li-ngidaa' ido' O'mosola opo'ni langu' nene evenelite ma ningilizahe li apa nite' igi gamazi ha'na ha'na laa' nave. Gamene nabau' a'mine ve nene O'moso'mo lihime naba goloso ngemeleseive.

Copyright information for `ASO