Luke 22

Gizebo Ve Ingine Izesu'ni Bili Hililiza Akamu' Vise' Ani' Gamazi

(Mataio' 26:1-5; Maleko' 14:1-2; Zohane' 11:45-53)

Ido' lulu izamine' beleti naa' ani' holise' O'moso'mo Zuda veti avo'ningine ise'ine izingumu' gili minaa' holise' ve lani' nene alitine' ve. Noalitivo eveneto' medeli mini O'moso inite' lehizi-daa' ave nabasi ido' mono' apizi ngimaa' avesi ingine nene Izesu'ni bililisa gilani'za evenelite ningi lovo di soto' ilizahe li golise gili ingine evenelite a'minemu' ningi lamavo zegeni bili hililizani' akamu' vise' igi minani'.

Zuda' Aza Izesu'ni Analo' Dalizani' Aka Do Soto' O-ngedelingumu' Mono' Gizebo Vesi Gamazi Di Hamo' Igi Li Hukani' Gamazi

(Mataio' 26:14-16; Maleko' 14:10-11)

Ne'mine igi nizavo Izesu' izipahala zuho tuvelu engikuti' Kelioto ve ve lave Zuda' ei' lulou' nene Satani ne'mo lemo mino do ote-davo aza nene eveneto' medeli mini O'moso inite' lehizi-daa' ave nabasi ido' mono' numuno nabau' gizebo iga' ani' pilisi veti gizebo vesi nizada vo hetelavo Izesu'ni bililizangumu' Izesu'ni do soto' ogo a'ningu' molaline' akamu' vise' igi engikisi gamazi lo gele ha gele ani'. Ne'mine ogavo nemu' ingine lanite' gili moni ma emelone li li hukani' ve. Ne'mine li li hukikevo aza lamine' ve losa Izesu' aza evene' vaikisi minami eikovo' nolido' ngelebizekuvo dalizave lo amamaka' molo'mo vo minine' ve.

O'moso'mo Ise'ine Izingumu' Gili Mini Naa' Noso' Nite' Nene Izesu' Izipahala Setalitise Di Va'va' Asine' Gamazi

(Mataio' 26:17-25; Maleko' 14:12-21; Zohane' 13:21-30)

Neloti' nene Zuda ve lulu izamine' beleti naa' ani' gamene O'moso'mo avo'ningine ise'ine izingumu' gili sipisipi angale bilaa' ani' gamene nene ogavo nemu' O'moso'mo avotemotine ise'ine izingumu' gelo mino naa' noso' nite' naloningumu' nene lingine vi di va'va' ilizo lo Izesu' aza Petolongi Zohanengi ngimiseline'. nGimiselavo ingine ti' li li-imasine': Gaza nene zaala vo do va'va' olosingumu' nolane. 10 Ne'mine likesivo aza ti' lo lo-ngimine': Olopehe, numuno ebeta nene dizi vi nihetelasivo ve mali'mo misubo somou' noso ohizo geho navo votene' ilisaze. Lingine e'meti vilizo. Ve aza numuno mau' dizo novivo ma a'mingu' e'meti vi 11 numuno ne'mi melehine nene ti' li li-imilizo: Tisate ma'mo ti' lo lo-gedave: Nazasi izipaha'nesi O'moso'mo avotemotine ise'ine izingumu' gelo naa' noune' noso' nite' nalone' numuno lulo nene zau' nalone. 12 Likesivo numuno meleho aza numuno veleto' mino gala'mudo' mino inguti' veleto' nene lulo nabasi miningu' inite' mata' avilise' i nizani' nene lengelebizeleseive. A'mingu' nene noso' nitete di va'va' ilizo. 13 Ti' lo lo-ngemavo ingine a'mida vi heteli ningasine' nene lo-ngimine' ma'mino neivo a'mingu' nene O'moso'mo ise'ine izingumu' gili naa' ani' noso' nite' nene di va'va' asine' ve.

Izesu' Aza Lebeni Inite' Api' Ogo nGimine'

(Mataio' 26:26-30; Maleko' 14:22-26; 1 Kolidi 11:23-25)

14 Mo di va'va' ikesivo noso' nite' nalizani' gamene nene ogavo aposolo've zuhosi mini noso' nite' ni minani'. 15 Ne'mine igi minangu' nene Izesu' ti' lo lo-ngimine': Mulumo alumo nite' gihi-nidilizani' gamene alitelesa olihe alitamivo holise' mino naa' noso' nite' mene lengikisi makato' mino nalone lo mulu'neu' huhu lo mulumo goloso ivosa gele minuvoni' ve. 16 Nene nanitekumu' ve. Naza lo-lengemelove. O'moso'mo ise'ine izine' noso' nite' me'mine nene gohi ma namuvo a'mine noso' nite' avazahalo' minine' inite' gihile nene soto' ogosa O'moso'mi gizebo've soto' ogavo nalosuve. 17 Ne'mine lo noso minine' gomise ma do O'mosola opo'ni lo ti' lo line': Lingine mene di ize' mili nalo. 18 Nemu' naza ti' lo nolo-lingimuve. Naza nene idise mene vaini noso nonunidoti' nene gohi ma namo nouvo O'moso'mo evenelelo' gizebo iline' gamene soto' ilingu' nene gohi nalosuve. 19 Ne'mine lo beleti ma do O'mosola opo'ni lo gito apilo nongemo ti' lo lo-ngimine': Mene neni' me'mele'ne [lengikumu' ve losa nenaze. Nenikumu' gili mini nika' nika' i'mi vi minilo. 20 Noso' nite' nene mo nisa neloti' alinge' nene a'mine'mine ogo vaini noso minine' gomise do ti' lo line': Vaini noso gomiseu' neine' mene neni' vanise'ne lengikumu' hulokuvo O'moso'mo lo huko-lingidine' gamazi gosoho' ma nene do ele'vole' iline' vanise ma nene] neive. 21 Ne'mine o neine'za lingine gililo. Biluvaliti a'ningu' neni' molo-nedelive nene idise tevolilo' mene maka' mino noso' nite' ade hulo do no nosive. 22 Ee, O'mosolati' ve gihile nenikumu' nene O'moso'mo mo ne'mine olosane lo gele minido' do molo mo heleloni' akalo' novuvoni'za biluvalite neni' dalizave lo do soto' o-nedelive nene agae, mo mulumo gono goloso daloseive. 23 Ne'mine lo lavo izipahala zuho ingine neve lelikuti' ne'mine zaho ilivoo lii engi' oko'ningu' nene viseka li minani' ve.

Izesu' Izipahala Zuho Ingine Engikuti' Dizo Minive Nene Zaho Nolive Li Lolize Lovo Ikevo Izesu' Aza Dizi Minaa' Naveti Monovo Lo-ngimine'

24 A'mine izipahala zuho engi' muliseu' nene lovo lolize soto' ine'. Ingine nene engikuti' mali'mo linge ma ngivile' ogo dizo minive ve li gililizado' lisihe' o minive nene zaho nolive li lolize hizi minani'. 25 Ne'mine igi nizavo Izesu' aza ti' lo lo-ngimine': O'moso'mi zuho minamani' heta ato' ve engi' guve'inesi ve'ine naba nete nene amuzo goloso mili di gelekele' ve lili' i-ngidaa' nave. Ido' ne'mine igi mini engito' gizebo i-ngidiliza amuzo di minave ingine nene lelikumu' di lamine' i-lidaa' ave ve li-lidilizado' lisihe' o none laa' nave. 26 Ne'mine igi minaa' nani'za lengita ne'minosa minamiline' o neive. Asi lengikuti' ma dizo minelive nene evene' limi minaa' nave ne'minosa lemo mineleseive. Ido' lengi' gizebo ve nete nene hize ele' iga' ave gelekele' izipe ne'mine lili' igi minilizado' o neive. 27 Nemu' nene lingine ma li'nalo. Ve mali'mo noso' nite' noka' noka' neivo mali'mo gelekele' o-do noso' nite' do emeka' emeka' neivo minilisinguti' guvelesi ve dizo minive nene zaho nolive. Noso' nite' noka' noka' ogo minive nene noloseive. Olo. Ne neiha naza lengiku' nouvoni' nene gelekele' izipe ne'mine lolo' ogo nouve. 28 Ido' naza mulumo gono geho minuvongu' nene olovo' ami nenikisi maka' gihi minaa' ave ma nene nizave. 29 Nemu' nene nenikumu' nene me'neho neni' evene'nelo' gizebo olosane lo do kegese-nedo nele'mize molo neine' ne'mino linginesi nene lengele'mize molokuvo 30 neni' evene'nelo' gizebo o minelongu' lingine holomo'nelo' noso' nite' ni'mi vi mini guve'inesi ve minaa' ani' mo'mosi' tuvelu (12) nene lengemekuvo mini Isilaele' aleveti mulise tuvelu nene gizebo i-ngidi minilisave.

Petolo' Aza Izesu'nimu' Ningamuve Ve Lo Ataize Lo-delingumu' Izesu' Lo-ngimine'

(Mataio' 26:31-35; Maleko' 14:27-31; Zohane' 13:36-38)

31 Ne'mine lo Izesu' ti' lo line': Agae Simonizo, gaza gelezo. Noso' nite' losuvo ili mili ato' iga' nani' ne'mino Satani ne'mo lengi' nene lengemengu' molo do gizeka' o-lengedelesa lavo O'moso aza gele imine'za 32 gei' nenikumu' gele ele'vole' aine' nene mudise hulamiline lo neni' nene geikumu' gelo O'mosola lokuve. Nemu' nene gaza gohi tine' molo ogo nenita gi'mizosa geze zuho nene hize ele' o-ngedezo. 33 Ne'mine lo lo-emavo Petolo' aza ti' lo lo-imine': Guvekasi ve, ne'mino nomive. Gaza nene galapuso numungu' vilibe ido' gibilikevo helaa' akalokisi vilibe ne'mine iline' nene nazasi maka' a'mingu' ha volosusive. 34 Ne'mine lavo Izesu' ti' lo lo-imine': Petoloo, naza ti' lo nolo-gimuze. Gelezo. Idise holuka' nene okoloho nolo olihe molamivo gaza nenikumu' nene ma ningamu ve ve lo ataize nolanivo gamene sitohamo oloseive.

Izesu' Nene Ve Goloso Ve Li Monovo Goloso I-dilizangumu' Izipahala zuho Ingine Nene Angise'ine Oko'nido' Gizebo Ilizave Losa Hungo' Molo Lo-ngimine' Gamazi

35 Ne'mine lo ti' lo lo-ngimine': Gomu' mono' gonou' nolingimiselo moni go'zaa' pausi nehe ido' hanibeki go' nehe ido' gizedido' suu' nehe ne'mine initekisi ma di vami haza vilo lo lingimiselekuvo vani' mau' nene inite' mamu' vise' igi minani' nehe. Ne'mine lavo izipahala zuho ingine ma vise' amune' ve lani'. 36 Ne'mine likevo aza ti' lo lo-ngimine': Gomu' nene evene' zogo nimili-lidavosa ne'mine ani'za idise hize ele' i-lingidami lovo i-lingimilizani' nenako nemu' idise nene moni go'zaa' pausi nehe ido' hanibeki go' nehe ma molo nolive ne'mo nene ha do vilive. Ido' bainati mite' ma molamo nolive nene oko'nolo' izaa' ine' inite' saketi nene salimi ogo moni do bainati mite' nene meni hizelive. 37 Naza ne'mine lo nolo-lingimuvoni' nene mono' godolou' nenikumu' gomu' gizi nizani' gamazi vai' ma nene gihile izelidokovo' neine' nenako a'mingu' nenikumu' ti' li gizi nizani' gamazi nene mo a'nene gihile ize leive losa noluve: Ado' evene' nete ezemu' nene lou' gamazi avuto' igi monovo goloso daa' aveti muliseuti' minive ve li li-dilisave. 38 Ne'mine lavo ingine ti' li lani': Guvekasi ve, gaza ningezo. Bainati mite' sita' mene ma neive. Ne'mine li likevo Izesu' aza moda a'nevo neive line'.

Oliva Golola Gesemani Za Zuhou' Izesu' O'mosola Lo Minine' Gamazi Gizine'

(Mataio' 26:36-46; Maleko' 14:32-42)

39 Ne'mine lo numunguti' heta lemo vo Oliva golola gomu' vaa' ine' ma'mine ogo dizo novivo izipahala zuho nene e'meti vani'. 40 Ne'mine ogo mo a'mine ebeta dizo voo izipahala zuho ti' lo lo-ngimine': Lingine lengemengu' soto' o-lengedelingu' nene limi ingikelizaze. O'mosola li minilo. 41 Ne'mine lo izipahala zuho nene hulo-ngedo ngomo ma vo hoto'ile ogo lemo obuvolo hizo O'mosola ti' lo line': 42 Me'neho make, mulumo alumo ekese' nenita soto' olosa nani' nene gaza gei' lukalo' neivo ma do olovo' o-nedeline losa noluvoni'za gei' lukau' nene ato' neivo ma neni' lu'nelo' do molamo gei' lukalokovo' do molo e'meto iline losa noluve. [ 43 Ne'mine lo nolivo Okulumokuti' angelo' mali'mo lemo soto' o emo hize ele' o-dine'. 44 Ne'mine ogavo mulunou' mulumo naba goloso gelo mino O'mosola nene amuzo gohi ma molo nolivo gohise belavo gohise hiline' nene vanise ne'mine misubouko do'moze' moze' ine' ve.] 45 Ne'mino neivo O'mosola lo minidoti' nene oto izipahala zuho minani' mala vine'. Vo ningine' nene ingine mulu'ningu' mulumo naba gili minadi'mo ngabuso'ine elavo okise ingi nizavo ningine'. 46 Ningo ti' lo lo-ngimine': Lingine nene nanimu' okise ingi nizave. Lingine nene lengemengu' ma soto' iline' nene vi gopo ikelizaze. Oti O'mosola li minilevo.

Izesu'ni Gonito' Ele'mizi Vilisa Analo' Dani' Gamazi

(Mataio' 26:47-56; Maleko' 14:43-50; Zohane' 18:3-11)

47 Ne'mine ogo Izesu' nene gamazi nolivo evene' muki' a'mida ani' nene ve ma Izesu' izipahala zuho tuvelu engikuti' minive Zuda' nene do gomu' molavo a'mida igisa Izesu'ni nene golo elo nalosa Zuda' nene Izesu' neida ani' ve. 48 Ani'za Izesu' aza ti' lo lo-imine': Zudazo, gaza neni' zogone minaine' gelo soza suno do O'mosolati' ve gihile neni' nene go'ne elo nosa lovo veti a'ningu' molo-nedelesa ogane. 49 Ne'mine lo lavo a'mine Izesu' neida maka' minave nete evene' ani' nene mo Izesu'ni dalisa nave li mo ningi gilii ti' li lani': Guvetesi ve, Bainati mitedunu' nene ha ngebelelobe. 50 Ne'mine li nilavo hamoli'mo oteko eveneto' medelo mino O'moso inite' lehize-daa' ive nabali'mi gelekele' izipe ma belo gala zamela hasa' o huline'. 51 Ne'mine ine'za Izesu' aza ti' lo line': Ne'mine monovo nene modaze. Gohi amilo. Ne'mine lo galalo' nene nodo gelo gala nene do lamine' o-dine'. 52 Do lamine' o-do eze analo' dalisa ave eveneto' medeli mini O'moso inite' lehizi-daa' ave nabasi ido' mono' numuno nabau' gizebo iga' ani' pilisi veti gizebo ve nabasi ido' mono' gizebo vesi nene ti' lo lo-ngimine': Gizengize ve dalisa iga' adi'mine igi bainati mite' di gavososi di nahe. 53 Gamene gamene mono' numuno nabau' linginesi maka' minaa' une' ma nene lingine neni' oko'nelo' adine huli ma di gonito' i-nidisa'mani' ma ve. Ne'mine isa'mani' ma neine'za ee, mo ho' dize dize laa' inite' ma nenako idise nene liti'muso'mi meleho Satani ne'mi amuzo soto' o neingu' nene mo lengi' hotine nodizize. Lengitokovo' neive line'.

Petolo' Aza Izesu'ni Nene Ningamu Ve Ve Lo Ataize Lo-dine' Gamazi (Mataio' 26:57-58, 69-75; Maleko' 14:53-54, 66-72; Zohane' 18:12-18, 25-27)

54 Ne'mine lavo neloti' nene Izesu'ni analo' disa eveneto' medelo mino O'moso inite' lehize-daa' ive naba'mi numunguko ele'mizi vani'. Ele'mizi nivavo Petolo' aza e'mete-do hoto'ile ani'. 55 A'mine dizi minani' numuno nene vodo vodo ogo minavo oluso' omo' naba minido' nene evene' ingine igi olo' gizi lahizi nizavo Petolo' azasi nene ogo vovo'ningu' mito' maka' minani'. 56 Aza nene olo' labanato' neivo gelekele' alu mali'mo ningo vonu' nobelo ti' lo line': Ve meesi nene Izesukisi maka' minasive ma ne neive. 57 Ne'mine lavo Petolo' aza ataize ti' lo line': Vene' gaza nene neze ma ningo gelamu vemu' nolane. 58 Ne'mine loosa ngomo ma nominivo ve mali'mo Petolo'ni ningo ti' lo line': Gazasi nene engi' zuho ma nene nane. Ne'mine lo line'za Petolo' ti' lo line': Ve melo, naza nene engi' zuho minamuve. 59 Ne'mine lavo gohi ngomo ma aua hamo' ne'mine nomino ve gohi mali'mo amuzonga goloso lo ti' lo line': Aza nene nGalilaia nolosi ve neiko azasi nene mo makato' Izesukisi minasive ne neive. 60 Ne'mine lo lavo Petolo' ti' lo line': Ve melo, gaza nolaine' gamazi nene ma gelamuvoni' gamazi nolane. Ne'mine lo nolivo a'mido' lite' lo okoloho nolo molani'. 61 Okoloho nolo molavo Guvelesi ve aza mine velepe' izo Petolo'ni vonu' biline'. Vonu' nobilivo Petolo' aza Guvelesi ve'mo gomu' minada idise okoloho olihe nolo molamivo gamene sitohamo nenikumu' nene ningamu ve ve lo ataize lo-nedelesane lo gomu' line' gamazi nene gohi gelo 62 heta lemo vo ive nabalo' goloso ine' ve.

Izesu'ni Golo Izi Goboni Mili-dani' Gamazi Gizine'

(Mataio' 27:67-68; Maleko' 14:65)

63 Ne'mine ogavo neloti' nene Izesu' analo' di minave nete nene golo izi goboni mili-di bili minani'. 64 Ido' velelo' nene lavolavodunu' liki hiti-mikisasi ti' li longo' i-di lani': Nogibilive nene zaho nolihe. Gaza nene polohetelite laa' adi'mine ogo lo soto' ogo lo-lemevo. 65 Ne'mine li-dii divi ledivika li-di gamazi goloso palasa vai' goloso li-di minani' ve.

Izesu'ni Zuda Veti Kanisoleliti Ve'nido' Ele'mizi Di Vi Goni' I-dani' Gamazi Gizine'

(Mataio' 26:59-66; Maleko' 14:55-64; Zohane' 18:19-24)

66 Ne'mine li-di nizavo go' lavo Zuda veti gizebo ve muki' eveneto' medeli mini O'moso inite' lehizi-daa' ave nabasi ido' mono' apizi ngimaa' avesi nene kanisole ma minani' nenako Izesu'ni nene engi' kanisoleliti numu'ningu' ele'mizi di vi mini ti' li longo' i-dani': 67 Gaza nene O'moso'mo do lu' izelive lo imiselelesa live ma nene nabe. Gaza nemu' lo-lemanivo gelelone. Ne'mine li lani'za aza ti' lo lo-ngimine': Naza ma lo-lengemeloni' nene mo lamine' laave li ma gili ele'vole' amilisave. 68 Ido' lengi' longo' ma o-lengedeloni' nesi nene mo ngeli li-nimamilisave. 69 Li-nimamilisani'za alinge' nela O'mosolati' ve gihile neni' nene O'moso amuzo veloti' lemo gizebo ve naba mino ana hulaa' ida minelesuve. 70 Ne'mine lavo ingine mukito' ti' li lani': Gaza nene mo O'moso'mi gipele nouve nolabe. Olo. Likevo aza ti' lo lo-ngimine': Langisetine nene mo nilani' ve. 71 Ne'mine lavo ingine ti' li lani': Izesu' monovo goloso do nolingumu' gili nilizani' aleve gohi ma ato' nene nanimu' asi lo-ngedosa gamazi gohi gelelone. Asi've veleuti' nene mo O'moso avuto' ine' gamazi lavo la'lise mo gelekune.

Copyright information for `ASO