Luke 3

Mono' Noso Holo-ngedaa' Ive Zohane' Mono' Gono Dani' Gamazi Gizine'

(Mataio' 3:1-12; Maleko' 1:1-8; Zohane' 1:19-28)

Ido' Tibelio' Kaesale' aza kilisimasi fiftini (15) ne'mine Loma veti guve'inesi ve lolo' ogo neivo Podio' Pilato' nene Zudaia misubou' ngamani naba lolo' o-davo eveneto' gizebo ogo neivo ido' Helode' aza meleho gomu' gizebo ine' misubo linge ma nGalilaia misubou' nene guvelesi ve lolo' ogo neivo ido' akunolo Hilipo' nene misubo linge ma Itulia misuboukisi Talakonito misuboukisi nene guvelesi ve neivo ido' Lisania' nene misubo linge ma Abilene misubou' nene guvelesi ve neivo ido' Anasi' ve Kaiaha' ve ingine nene eveneto' medeli mini O'moso inite' lehizi-daa' asive naba nizasivo ne'mine igi minani' gamenelo' nene Zakalia' gipele Zohane' aza ebe' hadivela miningu' nene O'moso ne'mo eze gamazi've evene' lo-ngeme ngeme' ilive lo a'mine Zohane' veleu' molavo lo-ngeme ngeme' ine'. Ne'mine o'mo novo Zodani noso gahevela misubo muki' mine'mo moningu' nene ti' lo lo-ngeme ngeme' o'mo vine': O'moso'mo lengi' lihimetine nene hulo-lengedelingumu' ve li lingine lutine di velepe' izi mono' noso hilalo. Ne'mino lo-ngeme ngeme' o'mo vo minine' nene mono' godolou' polohete Isaia' ti' lo line' gamazi gizani' minine' malo' nene vo gihile izine' ve:

Ebe' hadivelati' evene' mali'mo asi naba ma ti' lo nolive:
Guvelesi ve alingumu' ve li aka've di va'va' igi lutine di lisihe' i-dilo.
Gi'mize ga'mize nene misubo mili di lisihe' igi
golo ngomo' naba' dizaa' lemaa' o neine' nene bili di'mi limi di lisihe' igi
aka zovo' zava' izo minine' nene di pehe li
ido' aka goloso o noline' nene hasa' igi di lisihe' ilisave.
Ne'mine ikevo evene' muki' ingine
O'moso'mo eze evenele do ngu' izeline' aka nene ningilisave.
Ido' polohete Isaia' nene Zohane' ne'mine gamazi lilingumu' line' nenako nemu' nene evene' vai' goloso ne'minete Zohane' noso holo-ledelive li ei' neida ikevo aza ti' lo lo-ngeme ngeme' ogo minine': Lingine satali'mi izipahala goloso mene O'moso'mo lihime lengemelinguti' ha olovo' ilisave lo ve mali'mo lo-lengemavosa olovo' ilisa nahe. Nemu' nene lingine a'minguti' olovo' olone lii ma lingine lu'ine di velepe' lamine' izaveti monovo nene di mini inite' lamine' gihilevo' nene igi mili minilo. Ido' gililo. Lingine laza Abalahamu' a'vopilemo' O'moso'mo no'noho' ize-ledelesuve live nounako O'moso'mo lihime lemo do goloso o-ledamivo laminekovo' ha minelesune li mo lamilo. Naza ma lo-lengemeloze. Lengi' nene do hulosa O'moso'mo Abalahamu'ni lo huko-dine' gamazi do gihile izelesa Abalahamu' a'vopilemo' gohi ma do soto' o-delove lo gilidiniko geheni nevote Abalahamu' a'vopilemo' lili' adine. Nemu' nene lingine laza Abalahamu' a'vopilemo' nounako lihime lemamoloseive li gilamilo. O'moso'mo idise lihime lemo mo lebelelesa do nene ogo mino evene' za belelesa za monovola luno bai gamuno' oga' neine' ne'mine o neive. Za muki' gihile lamine' izamani' nene mono' gilamani' aleve ne'minosa nenako huko oloku' gizeleseive. 10 Ne'mine lavo evene' nete ti' li longo' i-dani': Ido' gaza ne'mine laine' nemu' nene O'moso'mo ne'mine o-ledamilingumu' nene laza nadi' olone. 11 Ne'mine likevo Zohane' ti' lo lo-ngimine': Lingine nene okodido' izaa' nani' inite' saketitine nene sita' neivo ma nene saketi've ma nomivo nolive nesi nene ize' mili dalisive. Ido' a'mine'mine igi ve ma ingine noso' nite'ine ma neivo minaa' nave nete nene ma nomivo minaa' nave nene ize' mili ngimi ni minilizave. 12 Ido' takisi moni daa' ave nesi nene mono' noso holo-ledelive li Zohane' neida igi ti' li longo' i-dani': Ido' Tisazo, leli' nene nadi' olone' o neive. 13 Ne'mine likevo aza ti' lo lo-ngimine': Lingine nene evene' takisi moni di-ngidilizangu' nene ngamani'mo moni ne'mine makilo' dalizave lo-lengede noline' maki nene ivile' igi di gopo igi vai' damilo. 14 Ne'mine lo-ngedavo ami pilisi ve netesi nene igi ti' li longo' i-dani': Ido' leze nene nadi' olone' o neive. Ne'mine likevo Zohane' aza ti' lo lo-ngimine': Lingine evene' mamu' nene lengebelalone ido' goniku' lengele'mize molalonge moni limilo li soza sakupo gamazi li-ngidi ngehelele izeline' inite' i-ngidi moni gumine damilo. Moni gohi gohi dalisa amuzo milami menitine lingimilizanikovo' lisihe' igi dalo.

15 Ido' Zohane' ne'mine ogo miningumu' gili evene' nete leze do lu' izelive lo O'moso'mo imiselelesa live nene mo soto' olosa neihe li lanite' gilii a'minemu' gizebo igi mini evene' mukilite a'mine ve nene a'mine Zohane' nolihe li lu'ningu' nigilavo 16 Zohane' aza a'mine evene' muki' nene ti' lo lo-ngimine': Naza nene mono' noso holo-lengede'mo vo nouvoni' nene haza nosodunu' holo-lengede'mo vo nouvoni'za evene' ma neni' amuzo nesi ivile' o neine' amuzo'vesi minive nene mo nave. Naza a'ne'mine goboni gono do-do ei' suu'veloti' nala've nesi nene apase hulo-delodo' nene lisihe' amuve. A'mine ve ne'mo noso ne'mine holo-lengedeline' nene O'moso'mi Sikalahukisi olokisi ne neive. 17 Ee, a'mine ve nene evene' laminekisi golososi do gizeka' olosa do nene ogo mino ve ma viti gihilesi losuvosi gopo igi minani' nene do kegeselesa gono daa' inite've do anau' ogo do nene ogo minaa' neine' ne'mine o neive. Aza viti gihile losuvosi minanguti' a'mine vai' nene do lamino ize' moloo naa' inite' nene do nubo ogo numu'veuko molo losuvo nene lovo' lovo' ogo minaa' neine' oloku' nene gizeleseive.

18 Ido' ne'mine gamazi nene ato ato' vai' lo-ngemo lu'ine do ngi lo-ngedo mono' gamazi lamine' nene evene' lo soto' o-ngemo minine' ve. 19 Ne'mine ogo minine'za guvelesi ve Helode' aza akunolo'mi elenahine ipe' ogo dangumukisi ido' goloso nite' vai' dangumukisi Zohane' aza elemavo 20 Helode' aza a'mine goloso nite' vai' dado' nene imine' molo monovo goloso gohi ogo Zohane'ni nene galapuso numungu' hulo-dine' ve.

Izesu' Mono' Noso Holani' Gamazi Gizine'

(Mataio' 3:13-17; Maleko' 1:9-11)

21 Ido' Helode' aza Zohane'ni galapuso numungu' olihe hulo-damivo Zohane' aza evene' muki' nene mono' noso holo-ngedo osu' losa neloti' Izesu'ni nesi nene noso holo-davo O'mosola lo neivo Okulumo' nene ngolo' lavo 22 O'moso'mi Sikalahu' nene nama viluso ne'mine oko'no do otuho Izesuda lemo ani' ve. Lemo navo Okulumokuti' gamazi ma ti' lo limine' ve: Gaza nene vo'nelo' gipe'ne hamo' nene nane. Gezemu' nene mo mulu'neu' lamine' nogiluve.

Luka' Izesu' Avolomoti Gulive'ine Gizine'

(Mataio' 1:1-17)

23 Ne'mine ogo neloti' Izesu' aza gono've gihile nene api' ogo do do vine' nene kilisimasi've teoti (30) ne'mine minosa gono've gihile nene api' ine' ve. Ido' evenelite gilavo Izesu' aza Zosehe' gipele minine' ve.

Ido' a'mine Zosehe' nene Heli' gipele minine' ve.
24 Ido' Heli' nene Matati' gipele minine'.
Ido' Matati' nene Levi' gipele minine'.
Ido' Levi' nene Meleki' gipele minine'.
Ido' Meleki' nene Zanai' gipele minine'.
Ido' Zanai' nene Zosehe' gipele minine'.
25 Ido' Zosehe' nene Matatia' gipele minine'.
Ido' Matatia' nene Amosi' gipele minine'.
Ido' Amosi' nene Nahumi' gipele minine'.
Ido' Nahumi' nene Hesili' gipele minine'.
Ido' Hesili' nene Nagai' gipele minine'.
26 Ido' Nagai' nene Maati' gipele minine'.
Ido' Maati' nene Matatia' gipele minine'.
Ido' Matatia' nene Semeini' gipele minine'.
Ido' Semeini' nene Zoseke' gipele minine'.
Ido' Zoseke' nene Zoda' gipele minine'.
27 Ido' Zoda' nene Zoana' gipele minine'.
Ido' Zoana' nene Lesa' gipele minine'.
Ido' Lesa' nene Zelubabeli' gipele minine'.
Ido' Zelubabeli' nene Sealetieli' gipele minine'.
Ido' Sealetieli' nene Neli' gipele minine'.
28 Ido' Neli' nene Meleki' gipele minine'.
Ido' Meleki' nene Adi' gipele minine'.
Ido' Adi' nene Kosamu' gipele minine'.
Ido' Kosamu' nene Elimadamu' gipele minine'.
Ido' Elimadamu' nene Eli' gipele minine'.
29 Ido' Eli' nene Zosua' gipele minine'.
Ido' Zosua' nene Eliezele' gipele minine'.
Ido' Eliezele' nene Zolimi' gipele minine'.
Ido' Zolimi' nene Matati' gipele minine'.
Ido' Matati' nene Levi' gipele minine'.
30 Ido' Levi' nene Simeoni' gipele minine'.
Ido' Simeoni' nene Zuda' gipele minine'.
Ido' Zuda' nene Zosehe' gipele minine'.
Ido' Zosehe' nene Zonamu' gipele minine'.
Ido' Zonamu' nene Eliakimi' gipele minine'.
31 Ido' Eliakimi' nene Melea' gipele minine'.
Ido' Melea' nene Mena' gipele minine'.
Ido' Mena' nene Matata' gipele minine'.
Ido' Matata' nene Natani' gipele minine'.
Ido' Natani' nene Zuda veti guve'inesi ve naba
Davidi' gipele minine'.
32 Ido' Davidi' nene Zesai' gipele minine'.
Ido' Zesai' nene Obedi' gipele minine'.
Ido' Obedi' nene Boazi' gipele minine'.
Ido' Boazi' nene Sala' gipele minine'.
Ido' Sala' nene Nasoni' gipele minine'.
33 Ido' Nasoni' nene Aminadabu' gipele minine'.
Ido' Aminadabu' nene Adimini' gipele minine'.
Ido' Adimini' nene Alani' gipele minine'.
Ido' Alani' nene Hezeloni' gipele minine'.
Ido' Hezeloni' nene Peleza' gipele minine'.
Ido' Peleza' nene Zuda' gipele minine'.
34 Ido' Zuda' nene Zakobo' gipele minine'.
Ido' Zakobo' nene Isaka' gipele minine'.
Ido' Isaka' nene Abalahamu' gipele minine'.
Ido' Abalahamu' nene Tela' gipele minine'.
Ido' Tela' nene Naholi' gipele minine'.
35 Ido' Naholi' nene Seluga' gipele minine'.
Ido' Seluga' nene Legu' gipele minine'.
Ido' Legu' nene Peleko' gipele minine'.
Ido' Peleko' nene Ebeli' gipele minine'.
Ido' Ebeli' nene Sela' gipele minine'.
36 Ido' Sela' nene Kenani' gipele minine'.
Ido' Kenani' nene Alahasada' gipele minine'.
Ido' Alahasada' nene Semi' gipele minine'.
Ido' Semi' nene Noa' gipele minine'.
Ido' Noa' nene Lameki' gipele minine'.
37 Ido' Lameki' nene Metusela' gipele minine'.
Ido' Metusela' nene Enoku' gipele minine'.
Ido' Enoku' nene Zaledi' gipele minine'.
Ido' Zaledi' nene Mahalaleli' gipele minine'.
Ido' Mahalaleli' nene Kenani' gipele minine'.
38 Ido' Kenani' nene Enosi' gipele minine'.
Ido' Enosi' nene Seti' gipele minine'.
Ido' Seti' nene Adamu' gipele minine'.
Ido' Adamu' nene O'moso'mo lolo' o-davo gipele ne'mine minine' ve.
Copyright information for `ASO