Luke 5

Izesu' Aza Gana' Api' Ogo Izipahala Zuho Do Gi'mizine' Gamazi Gizine'

(Mataio' 4:18-22; Maleko' 1:16-20)

Ido' gamene ma Izesu' aza nGalilaia noso ohuno ne'mi gulive gohi ma nGenesalete ne'mi gahevela ote mino mono' nolo-ngimivo a'mine O'moso'mi gamazi line' nene gililisa evene' vai' nubo nubo igi Izesu'nisi lisikelizani' o vivo aza ningine' nene noso gahevela sipi sita' ma nizasivo ningine'. Ningine' nene alaha' daa' ave nete a'mine sipiuti' nene limisa alaha' daa' ani' golaleze'ine nene noso' izi nizavo a'mine sipi sita' gahevela haza minasine' nene ningine'. A'mine sipi sitakuti' hamo' ma Simoni' sipi miningu' nene dizo Simoni'ni ti' lo lo-imine': Sipi mene ngomo ma ehuso' ogo hulo nosola ozo. Ne'mine lavo Simoni' aza sipi nene ngomo ma ehuso' ogo hulo nosola ogavo Izesu' aza a'mingu' mito' mino evene' muki' nene mono' apize ngemo minine'. Ido' ne'mino gamazi lo-ngemo osu' lo Simoni'ni ti' lo lo-imine': Sipi mene do vo noso ohuno naba moladaa hulozo. Hulanivo lingine alaha' dalizangumu' ve li alaha' daa' ani' golalezetine nene di huli nosou' ilo. Ne'mine lavo Simoni' ti' lo lo-imine': Guvekasi ve, laza idise holuka' nene alaha' daa' une' golaleze' nene huloka' huloka' o'mo monevo' monevo' une'za alaha' hamokisi ma damune' nenako ha gei' laningumu' golaleze' nene gohi hulolosuve. Ne'mine lavo golaleze'ine nene huli nosou' ikevo alaha' nene vai' goloso likevo golaleze'ine nene hukoti' hukoti' ogo minivo evene' masi gelelehe' ilizani' ogavo engikisi maka' gono daa' ave sipi mau' minani' nene igi hize ele' i-lidavo gelelehe' olone li a'ine ngumungumu' izani'. Ne'mine ikevo ingine igi golaleze'ine nene makato' gelelehe' igi alaha' nene sipiu' di tululu likevo sipi sita' nene vai' lo geni goloso ogavo sipi sita' nene nosou' limilisa asine' ve. Ne'mine ogavo Simoni Petolo' aza ningo Izesu' gizenela obuvolo hizo gubi' ize emo ti' lo line': Guvekasi ve, naza lihime daa' uve goloso nouvoni' nenako gaza neni' hulo-nedo vozo. Ido' Simoni Petolo' ne'mine ine' nene ingine alaha' vai' goloso dangumu' nene vono vavo nemu' nene ne'mine ine' ve. Ee, ido' alaha' vai' goloso dangumu' nene Simonikisi minave muki' nene vo'ine vavo 10 ezesi gono maka' daa' asive Zebedaio' gipele Zakoboki Zohaneki nesi nene vo'ine vavo minasine' ve. Ne'mine igi nizavo Izesu' aza Simoni'ni nene ti' lo lo-imine': Gaza gopo gaka gelo golise gelamozo. Idise meloti' nene api' ogo alaha' daa' aine' ne'mino evene' do nenita olosane. 11 Ne'mine lavo ingine sipi di seveto' igisa inite' mata' muki' nene mudise mo hulisa Izesu'ni e'meti vani'.

Ganadise Gize Dave Ma Izesu' Do Guno O-dine' Gamazi Gizine'.

(Mataio' 8:1-4; Maleko' 1:40-45)

12 Ido' Izesu' aza numuno ebe' ma minido' vo neivo a'mida ganadiseli'mo oko'no vovosi nomivo gize dave ma ogo Izesu'ni ningo aza vo gizeneu' lemo golo hizo ongo do lamine' o-delingumu' ti' lo line': Guvekasi ve, gaza do lamine' o-nedeline' amuzokasi naine' nene naza mo gele mino do lamine' o-nedeline lo gele nouve. Gaza do lamine' o-nedelesa gele nabe. 13 Ne'mine lavo Izesu' aza ganadise gizi dave i-ngidisa'mani' inite' o-do ana hulo molo oko'nolo' nohito ti' lo lo-imine': Naza do lamine' o-gedelesa gele nouve. Nemu' gaza lamine' ozo. Ne'mine lavo ganadise ne'mo lite' lo oko'noloti' hulo-do vavo lamine' giline'. 14 Ido' Izesu' do lamine' o-dingumu' evene' hamokisi mo vetete' ogo lo-ngemamilive lo lo huko-do ti' lo lo-imine': Eveneto' medelo mino O'moso inite' lehize-daa' ive ne'mo ganadise okongaloti' hulo-gedo vine' nene ningo lo soto' ogavo gaza lamine' aine' nemu' nene evenelite ningi gililizangumu' ve lo ne'mine ozo: Ganadise gizi dave ingine lamine' igi ma ize inite' ne'mine ne'mine O'moso imilisave lo Mose' lo huko lido' nene e'meto eveneto' medelo mino O'moso inite' lehize-daa' ive nene inite' ma O'moso oloku' gize emelingumu' nene do vo emezo. 15 Ne'mine lo line'za Izesu'nimu' gamazi nene gohi buu naba lo mone osu' lavo evene' vai' nene gili ei' gamazi gelelone li evene' muki' nene inite' gizi di minavesi nene do lamine' o-ledelive li Izesu' neida igi di gese' iga' ani'za 16 aza nene haza ebe' evene' minamada vo O'mosola lolosa vaa' ine' ve.

Izesu' Ve Gebili Ma Do Lamine' O-dine' Gamazi Gizine'

(Mataio' 9:1-8; Maleko' 2:1-12)

17 Ne'mino minaa' ine' gameneu' nene gamene ma Izesu' aza gamazi lo-ngemo neivo Halisaio' mono' gilaa' avesi O'moso'mi lou' gamazi apizi ngimaa' avesi nGalilaia misubou' numuno ebe' ngomo ngomo mine'mo moningutikisi Zelusalemi numuno ebekutikisi Zudaia misubo lingelatikisi ave nene a'mida di nubo igi nizavo Izesu' evene' ma do lamine' o-ngedavo Izesuda nene Guvelesi ve'mi amuzo ne'mo nene evene' do lamine' o-ngedelingumu' amuzo molo minine' nene mo ningani' ve. 18 Ne'mine ogo neivo evene' amuzolo hele vivo gebili ma ngakaku' zalo' mili di igi Izesu' neida di dizi huli-dilisa ani'za 19 evene' nete giki' igi aka hizi tilikevo ingine numuno nubito' di dizi mini nubiku' ngolo' li ngakaku' neivo huli-dikevo eveneliti vovo'ningu' Izesu' velela limine'. 20 Lemavo za gohovo mili di ave ingine gebili ma ha do lamine' o-deleseive li gili ele'vole' ani' nene Izesu' aza mo ningo gelo a'mine amuzolo hele gese' o vive nene ti' lo lo-imine': Ve melo, gaza lihimeka nene mo hulo-gedekuve. 21 Ne'mine lavo Halisaio' mono' gilaa' avesi O'moso'mi lou' apizi ngimaa' avesi ingine a'mine line' gamazimu' lu'ningu' ti' li gilani': Evene' hamolitesi lihimete huli-lidilizado' lisihe' amavo asi O'moso eikovo' nene lihimete hulaa' ive neine' nenako ve meve nene O'moso nevoba gamazi ne'mine lo O'moso ivile' oga' gamazi noline' nene edamive. 22 Ne'mine li lu'ningu' nigilavo Izesu' aza ningo gelo ti' lo lo-ngimine': Lingine lutingu' ne'mine gatine nanimu' nigilave. 23 Lingine nenikumu' nene sozavo' laa' neive li gilaa' nahe. Naza amuzolo hele vive nemu' lihimeka mo hulo-gedekuve luvoni' nene soza lolohe lamine' lolohe ma gilamilisave lo lapa nomivo noluvoni'za sozalo' ve minuvodini amuzolo hele vivemu' mene naza oto vozo nolo-duvo oto vamivo soza luvoni' nene soto' ogavo novozo helalove lo gelo oto vozo lo ma lamuvodine. Olo. 24 Ne neiha O'mosolati' ve gihile naza misubouko lengi' lihimetine apase-lengedaa' amuzo do nouve luvoni' nene soza lamo mo lamineto' noluvoni' nene ningi gililizangumu' naza idise ogo molo oloni' inite' nene ningilo. Ne'mine lo amuzolo helavo minive nemu' ti' lo line': Naza ti' lo nolo-gimuve: Gaza oto ongo minaine' initeka nene do geho numungala vozo. 25 Lavo amuzolo helavo minive aza nene evene' mukiliti ve'nido' nene lite' lo oto ongo minine' inite've nene do geho O'moso do naba o-do opo'ni lo'mo lo'mo numu'vela vine'. 26 Ne'mine neivo evene' ingine ningi upuho' igi vo'ine vavo O'moso opo'ni li di naba i-di ngehelele goloso izavo idise nene atoli'mine inite' goloso ningekune li lani' ve.

Izesu' Levi'ni Do Gi'mizine' Gamazi Gizine'

(Mataio' 9:9-13; Maleko' 2:13-17)

27 Ido' neloti' nene Izesu' aza heta lemo vo takisi moni daa' ive gulive Levi' nene takisi moni daa' ine' opisi'veu' gono do neivo ningo ti' lo lo-imine': Gaza ne'meto ano. 28 Ne'mine lavo aza inite' muki' nene hulo oto e'meto vine'. 29 Maka' Levi' numu'veu' vii Levi' aza Izesu'ni noso' nite' naba gize vata' o-divo evene' muki' takisilo' vesi ido' evene' ato' masi nene maka' mini noso' nite' ni minani'. 30 Ni nizavo Halisaio' mono' gilaa' avesi mono' gamazi apizi ngimaa' avesi ingine Izesu' izipahala zuhomu' nene ngemenga li ti' li lani': Lingine takisi moni daa' ave golososi ido' lihime daa' ave lingesi nene noso' nite' maka' namilizanako nanimu' ninave. 31 Likevo Izesu' aza ti' lo lo-ngimine': Luso ve aza haza lamine' minave do lamine' o-ngedelesa osa'miha inite' gizi davemukovo' nene oga' neive. 32 A'mine'mine ogo naza nene evene' lisihe' i minavemu' amuvoni'za evene' lihime'inesi nizave nene lu'ine di velepe' izilizave lo lo-ngemelesa uvoni' ve.

Evenelite Izesu' Izipahala Zuho Nene Mono' Aka Huli Monokumu' Gili Noso' Nite' Malise Isa'mave Li Langumu' Izesu' Aza Mono' Aka Litehe Nesi Ido' Gosoho' Mono' Aka Nesi Nene nGeli Vi Hamo' Amilisasive Lo Lo-ngimine' Gamazi Gizine'

(Mataio' 9:14-17; Maleko' 2:18-22)

33 Ido' Izesu' ne'mine lo lavo ingine ti' li li-imani': Zohane' izipahala zuho ingine monokumu' ve li noso' nite' malise ika' ika' igi mini O'mosola lika' lika' navo Halisaio' mono' laa' aveti izipaha'ine zuho nesi nene a'mine'mine iga' nani'za gei' izipaha zuho ingine nene a'mine'mine igi noso' nite' malise ilizado' o neine' nenako ne'mine ami noso' nite' gopo naakovo' iga' nako nanimu' nave. 34 Ne'mine likevo Izesu' aza aneza gamazi ma ti' lo lo-ngimine': Ve mali'mo eze vene' huki imiliza gameneu' olize izo eze zuho noso' nite' gize vata' ogo molo-ngedavo aza a'mingu' neivo eze zuhomu' nene lingine noso' nite' malise ilizave lilizado' nene ha gili lingimilizado' o neihe. Ne nomive. A'mine'mine igi neze izipaha'ne zuho nene naza nouvodo' nene noso' nite' malise amilisave. 35 Idise ne'mine amilisani'za ne'mine ilizani' gamene ma aloseive. Engi' vovo'ninguti' biluvalite neze nele'mizi di vilizani' gamene alitavo a'mine gameneu' nene ingine mulumo gili-nidisa noso' nite' malise ilisave.

36 Ne'mine lo lo-ngemo imine' molo aneza gamazi ma ti' lo lo-ngimine': Evene' malite saketi gosohototi' lavolavo ngomo ma huki saketi litehe hukido' nene ma mili ongotisa'mave. Ne'mine igi ma ongotilizani' nene saketi gosoho' nene huki di goloso ilisave. Ido' lavolavo gosoho' saketi litehelo' mineline' nene atokuti' gelo edamoloseive. 37 Ido' a'mine'mine igi lingine vaini noso gosoho' ne'mo meme' ize losuvodunu' lili' ani' gomise nene izo pou' lavo vaini noso lepo vo gomise'vesi nene goloso ogalive li vaini noso gosoho' gituho' galakala' neidi'mo nene lulu izavo gomise liteheli'mo ngipu lo hukiline' o miningu' nene ma ohizi milisa'mave. 38 Vaini noso gosoho' gituho' galakala' neivo nene meme' ize losuvo gosohotunu' lili' ani' gomise gosohoku' nene ohizeso' o neive. 39 Ido' gozopo' vaini nosovo' naa' ave nete gozopo' nite' mene lamine' ve li vaini noso gosoho' ma nalisa gilamilisave. Ne'mine line' nene aza mono' lo-ngemaa' ine' nene gosoho' nenako izipahala zuho igi mili ilizani' monovo ne'mo a'mine Zuda veti monovo litehe malo' vo damivo ingine gozopo' monovo'ine mamu' lanite' gili a'mine monovo gosoho' nene di ti' amilizani' o miningumu' line' ve.

Copyright information for `ASO