Mark 12

O'moso'mo Ei' Evenele Zuho Zuda Velo' Gizebo Ve Nete Gelekele' I-damavo Nene Do Hulo-ngedeleseive Lo Vaini Mido' Gizebo Velo' Lo Molo Aneza Gamazi Line'.

(Mataio' 21:33-46; Luka' 20:9-19)

Ido' aneza gamazi ma Izesu' ti' lo lo-ngimine': Ve mali'mo vaini mine zuho' ogo a'mido' gesi hize vodo vodo ogo vaini gihile hite mi' izo lipeline' galese nesi elosa a'mingu' mini mi'velo' gizebo iliza numuno ha'na nesi do dizo gizo evene' ma mine gizebo i-dilizave lo hulo-ngedo misubo mala vo minine'. A'mida neivo vaini nala' gihile elaa' gamene ogavo mine meleho aza a'mine vaini nala' gihile nene ma do-nedo alive lo gelekele' izipe ma mine gizebo vela imiseline'. Imiselavo vo hetelavo mine gizebo ve ingine analo' di gili' liki bili imiseli hulikevo initekisi ma damo haza tine' molo vine' ve. Ne'mine ogavo gelekele' izipe gohi ma engita imiselavo vo hetelavo godolo izi okoti huli di goloso inite' gehepeve i-dani'. Ne'mine i-dikevo gohi ma imiseline' nene bili hilani'. A'mine'mine igi gohi evene' muki' ngimiseline' nene linge ma ngibili di goloso i-ngidi linge ma nene mo ngibili hilani' ve. Ne'mine ikevo imiselelive hamo' ma minine' nene lulo eme neine' gipele minine' nenako alinge' noimiselo ti' lo line': Aza neni' gipe'ne nenako ha ele'mize lamine' ilisave. Ti' lo imiseline'za vo hetelavo mine gizebo ve nete ti' li li volelo' melo' igi ti' li lani': Me ve'mo alinge' melehido' medelo mino mine dalive nenaze. Alo' bele hiluke'zo. Ne'mine okunivo mine mene leli' mide lolo' ilive. Ti' li lite' li analo' diki bili hilisa minguti' gelelehe' igi di vi heta huli-dani' ve.

Ne'mine ani' nenako mine meleho aza nadi' ilive. Aza nene ogo a'mine mido' gizebo ve muki' nene ngebele gese' ogo mi'velo' nene evene' ato' gohi gizebo ve ma hulo-ngedeleseive. 10 Ido' mono' godolou' gamazi ma ti' lo neine' ma nene lingine gati gilisa'mahe:

Numuno gizilizani' geheni mukikuti' geheni ma nene
numuno gizaa' avete ningi goloso o vive lii
di kegesi di hulani' geheni ne'mo nene
geheni muki' ngivile' ogosa numuno do amuzo molo minaa' geheni lolo' ogave.
11 A'mine inite' do soto' ive nene guvelesi ve'mo
do soto' ine' ve.
A'mine inite' nene evenelite ningune'
mo amebe izo do soto' ogani' neive.
12 Ti' lo lo-ngemavo a'mine Zuda veliti mono' ve naba ingine aneza gamazi nene lelikumu' lave li gili galapuso emelone li gilani'za evene' muki' a'mida minavemu' nene golise ngemavo huli-di vani'.

Izesu'ni Ganala Daline' Akalo' Ele'mizi Milalisa Takisi Monimu' Emengu' Mili Longo' I-dani' Nene nGivile' Ine' Gamazi

(Mataio' 22:15-22; Luka' 20:20-26)

13 Ne'mine igi Zuda veti gizebo ve ingine Halisaio' mono' laa' aveutikisi guvelesi ve Helode'ni hize ele' i-daa' aveutikisi linge ma ingine vi Izesu'ni golo izikevo goni' o-delone' gamazi lilihe li ngimiselikevo 14 ezela igi heteli ti' li li-imani': Tisazo, gaza ve lisihe' lamine' naine' nene mo gele none. Gamazi lo-ngemeline' aleve nene nani'mine aleve nilizahe nemu' gaza gaka muki' gelesa'mane. Evene' naba mini gei' liline' gamazimu' mulu'ningu' goloso gili gelemilizadokisi nilizani' nemu' gelamo O'moso'mi aka lelebizo gamazi gihilevo' lo-lemaa' nane. Nemu' nene gaza laanivo gelelone. Loma veti guve'inesi ve naba Kaesale' aza takisi moni huli-nidilizave lo neido' nene e'meto Zuda ve laza ma hulo-deso' nene lisihe' o neihe lou' gamazite avuto' o neive. 15 Gaza gelanivo takisi emelonido' o neihe emamolonido' o neive. Ne'mine lani'za lingine Kaesale'ni takisi imilo liline' nene Zuda ve ngizebolo' molavo ganala dalive. Ido' imamilo liline' nene Loma ve ngizebolo' molavo ganala dalive li gili longo' ani' initeli'mi monovo gililisa lami ha ve'ine avileloti' golo izisa longo' i-dani' nene Izesu' aza mo ningo gelo ti' lo lo-ngimine': Nanimu' nemengu' nimilave. Moni ma di igi nelebizikevo ningelove. 16 Lavo ma imikevo ningo ti' lo longo' o-ngedo line': Me monilo' eveneli'mi golo velesi gulivesi neine' nene zahi golo velesi gulivesi neive. Longo' o-ngedavo ingine Kaesale' ma ve lani'. 17 Likevo Izesu' ti' lo lo-ngimine': Ti' li ma a'mine moni nene ngamani gizebo ve ei' Kaisale' inite've noloseinako a'minemu' nolivo ma nene ha imilo. Ido' a'mine'mine igi O'moso'mo lingimine' initeto' nene ha golo hizi imilo. Ne'mine lavo ingine golize naba li-dani'.

Izesu'ni Di'mi Limi-dilisa Helakuti' Otaa' Monovomu' Longo' I-dani' Nene nGivile' Ine'

(Mataio' 22:23-33; Luka' 20:27-40)

18 Ido' Sadukaio' mono' laa' ave helakuti' otaa' ne nomive laa' ave engikuti' linge ma Izesuda igi longo' i-di ti' li lani': 19 Tisazo, Mose' aza luhuvo gize-lidine' nene ti' lo neive: Uvo'ninge naku'ninge ma minilizanguti' mali'mo vene' do mino izipe gedamo helavo ma engikuti' mali'mo a'mine gevono' vene' nene dosa a'mine hilive nemu' medelo izipe gedo molo-delive. 20 Ne'mino nenako uvo'ninge naku'ninge seveni ma minani'. A'minguti' uvo'nibo gana've ne'mo vene' do mino izipahala soto' amavo hiline'. 21 Helavo akunolo a'midoti' ne'mo a'mine vene' nene do mino izipe soto' amivo hiline'. Ido' helavo akunolo a'midoti' ne'mo a'mine vene' dani'za izipe gedamo hiline'. 22 Ne'mine igi a'mine vene' dika' dika' igi izipe gidami ve seveni ingine mukito' hilika' hilika' igi osu' lani'. Ne'mine ikevo alinge' a'mine venekisi nene hiline'. 23 Ne'mine ogavo a'mine vene' nene a'mine ve seveni muki' nete dani' nenako evene' muki' hilanguti' otiliza gameneu' nene zahi elenaho lolo' ilive. 24 Likevo aza ti' lo lo-ngimine': Lingine gili gopo ani' nene O'moso'mi gamazi mono' godolou' gizi nizani' ma nene gili vevesami O'moso'mi amuzomukisi ma gili lamine' isa'mani' nenako nemu' nene gili gopo ani' ve. Olo. 25 Ne'mine noluvoni' nene nemu' noluve. Helaakuti' otaa' gameneu' nene vene' daa' ido' velo' vaa' monovo nene ma minamoloseive. Asi O'moso'mi angelo've ha minaa' nani' ne'mini evene' inginesi ha minilisave. 26 Ido' lingine helaakuti' otaa' nemu' likeze. A'minemu' ma Lo-lengemelove. Mose' aza zauti' olo' gulumo ogavo ninge neivo O'moso'mo gamazi ti' lo lo-imine' mono' godolou' gize neine' ma nene gati gilahe gilamave: Naza nene Abalahamule Isakale Zakobole engi' O'moso'ine nouve line'. 27 Ido' a'mine ve hili osu' ladiniko engi' O'moso'ine nouve ngelo ma lamidine. Engi' O'moso'ine nouve line' ne'mo mo hili osu' lami ha nizave lo gelelesune. Nemu' nene lingine hilave nene mudise osu' laa' nave laa' nani' nene mo ladanga gehepeve nilave lo lo-ngidine'.

Lou' Gamazi Mukikuti' Nene Nani Gamazi'mo Dizosa Neive Lo Ve Mali'mo Izesu'ni Longo' O-dine' Gamazi

(Mataio' 22:34-40; Luka' 10:25-28)

28 Ne'mine li gamazidunu' ge hulo ne hulo li gamazi gono di nizavo mono' apize ngemaa' ive mali'mo ogo gele minine' nene Izesu'ni longo' i-dikevo a'mido' nene do lamine' ogo do velepe' izo nolo-ngimivo gelo ti' lo longo' o-do line': O'moso'mo lou' gamazi lo huko-lidine' neuti' nene gamazi muki' ngivile' ogo nani gamazi'mo dizosa neive. 29 Lavo Izesu' ti' lo lo-imine': Dizo neine' gamazi nene ne'mine lo neive: Lingine Isilaele' aleve gililo. Guvelesi ve O'mosote neve nene ei' hamo' Guvelesi ve ne neive. 30 Nemu' nene lutine gatine vodinesi amuzotine vai' nesi nene Guvelesi ve O'mosotida nene mili osu' li lutine imivo' minilo. 31 Ido' a'midoti' lemo nene ti' lo neive: Lingine lengi' okodinemu' gilaa' nani' ne'mine igi evene' avita gidini nizavemukisi nene gili lutine ngimilo. A'mine gamazi seta' ngivile' ogo minine' lou' gamazi nene gohi ma nomive. 32 Lavo mono' apize ngemaa' ive aza ti' lo lo-imine': Tisazo, mo lamine' gehepeve lane. O'moso nene hamo' neivo O'moso gohi ma nomive lo laine' nene mo lamine' lane. 33 Ido' lute gatesi amuzote vaikisi nene mudise ezela molo mino lute emo minaa' ido' leli' okodemu' gelaa' noune' ne'minosa evenekumu' gelo lute ngemaa' ne'mo nene inite' oloku' gizo O'moso lehize-daa' ido' ato ato' nite' lehize-daa' monovo nene ivile' goloso ogosa naba neive. Mo lamine' lane. 34 Ne'mine lavo aza gele vevese mino ne'mine line' nene gelo Izesu' aza ti' lo lo-imine': O'moso'mo gizebo o neingu' vo holalinido' avito' ogane. Ne'mine lavo gili ngehelele izavo evene' hamolitesi inite' mamu' gohi longo' i-damani'.

Do Lu' Izelive Lo O'moso'mo Imiselelesa Live Guvelesi Ve Davidi' A'vo Ne'mo Nene Davidi'ni Ivile' O-dosa Neive Lo Izesu' Lo-ngimine' Gamazi

(Mataio' 22:41-46; Luka' 20:41-44)

35 Izesu' aza mono' numuno nabau' mono' noapize ngemo ti' lo longo' o-ngidine': Mono' apizi lingimaa' ave nete O'moso'mo do lu' izelive lo imiselelesa live nene mo ha Davidi' a'vopilemo' neive laa' nani' nene nanimu' laa' nave. 36 O'moso'mi Sikalahuli'mo do ote-davo asi've Davidi' ne'mo nene ti' lo line' ma neive:

Okulumuku' ve aza Guve'nesi vemu' ti' lo lo-imine' ve:
Nezeloti' gei' nene nange. A'ne hulaa' uvoda mene minezo.
Nanivo biluva' i-gidaa' nave nene gizengala do'mo leme-ngedekuvo gelekele' i-gidi minilisave.
37 Ne'mino asi've Davidi' ne'mo nene a'mine do lu' izelive lo O'moso'mo imiselelesa livemu' Guve'nesi ve ve lo line' nenako nemu' nene a'mine ve aza ha Davidi' a'vovo' nene nado minelive. Olo. Ne'mine lo mono' nolivo di gese' ave muki' ingine lanite' gili minisa gapepe' i minani'.

Mono' Apizi nGimaa' Aveliti Monovo Golosomu' Lo Soto' Ine' Gamazi

(Mataio' 23:1-36; Luka' 20:45-47)

38 Izesu' aza mono' noapize ngemo imine' molo ti' lo line': Mono' apizi lingimaa' aveti monovo nene dikelizaze. Ehe' igi minilo. Ingine nene lavolavo ha'na ha'na liki monaakumukovo' ngumo helaa' neivo ido' maketilo' nimonavo evenelite ningi ngopo'ni li-ngidilizangumukovo' ngumo helaa' neivo 39 ido' mono' numungukisi ido' noso' nite' naba nadasi ingine nene ve nabalitevo' minaa' ani' holomolo' minaakumukovo' nene ngumo helaa' neive. 40 Ido' ingine vene' gonoliti inite' mata'ine nene di gopo igi di engita igi ido' apa nite' igi gamazi ha'na ha'na li O'mosola laa' nave. Gamene nabau' a'mine ve nene O'moso'mo lihime naba goloso ngemeleseive.

Vene' Gevono' Mali'mo Ezela Minine' Inite' Muki' Nene O'moso Imine' Gamazi

(Luka' 21:1-4)

41 Izesu' aza mono' numuno nabau' moni milaa' ani' bokisi gahevela mino evene' muki' a'mine bokisiu' moni nihulavo ninge minine'. Moni heneni ve muki' nete nene moni vai' hulika' hulika' navo 42 vene' gevono' goho' minine' ma aza ogo gulehe' moni ngomo seta' huline'. A'mine moni ngomo seta' nene do bizo tili (3) toea oga' neive. 43 Ne'mine ogavo Izesu' izipahala zuho asi lo-ngemavo ezela ikevo ti' lo lo-ngimine': Lamineto' nolo-lingimuve. Vene' gevono' goho' vene' me'mo moni huline' ne'mo nene evene' mukito' moni hulani' nene ngivile' ivosa hulave. 44 Ne'mine ngivile' ogo hulave luvoni' nene evene' muki' ingine moni'ine vai' lo mininguti' hulani'za aza nene noso' nite've do soto' iline' inite' gohi ma minamivo inite' mata' goho' neinguti' nene hulave lo lo-ngimine'.

Copyright information for `ASO