Mark 16

Izesu' Hilinguti' Otine' Gamazi

(Mataio' 28:1-8; Luka' 24:1-12; Zohane' 20:1-10)

Gohi nivenga' molo sigisi (6) kiloku ogavo holise' nene mo osu' lave li Mangadala numudoti' vene' Maliakisi ei' abalaho Zakobo' izelehosi Salomekisi gonosolo' holalone li unuvo lamine' oga' ine' uveli nene vi meni hizani'. Meni hizi di vi ingi Sadeu' go' lolosa neivo gonoso ebeta vani'. Nivi ti' li li volelo' melo' i'mi vani': Gonoso galese velelo' geheni naba ma nene zaho do velehe' molo hulo-ledelive. Ti' li'mi visa ningi huli gonoso galesela milani' nene a'mine geheni naba goloso ma nene velehe' mili hulikeni' neivo ningani'. Ne'mine igi gonoso mili-dani' geheni muliku' dizi ningani' nene goso've ma saketi mokono' ha'na ha'na izo a'ine hulaa' ada mito' neivo ningi ngehelele izine'. Ne'mine neivo nizavo ti' lo lo-ngimine': Lengehelele izamivo. Nasalete ve Izesu'ni lohoto' zalo' bilave ma nene ningilisa ahe. Aza nene meu' nomive. Mo oto vaze. Mili-dani' ebe' mene ningilo. Nemu' lingine vi izipahala zuhosi ido' Petolo' ei' nesi nene nGalilaia misubouko gomu' molo lengemo volosuve lo lo-lingimine' ma'mine ogo vo neivo a'mida vi ningilisave li li-ngimilo. Ne'mine lo lo-ngemavo luvoluvo izi gopo ga'ine gili mini heto' limi gonoso ebetoti' golise vani'. Ido' ngehelele izine' nemu' nene ve masi vetete' igi li-ngimamani'.

Izesu' Aza Mangadala Numudati' Vene' Malia'ni Nene Soto' Pize Imine' Gamazi

(Mataio' 28:9-10; Zohane' 20:11-18)

Zuda velite gono do do vaa' une' gamene api' neivo Sadeu' nedenga' go' nuvonuvo neivo Izesu' nene hilinguti' otosa sikalahu' goloso seveni lulouti' ngimiselo do huline' vene' Mangadala numudoti' vene' Malia'ni nene gana' soto' pize imine'. 10 Soto' pize emavo aza nene vo Izesulesi monaa' ave nene mulumo alumo gili-di ive nama igi nizavo lo-ngimine'. 11 Hilinguti' oto ha neivo ninguve lo lo-ngemavo ingine line' gamazi nene gili ele'vole' amani' ve.

Izesu' Aza Izipahala Zuhouti' Ve Seta' Ma Soto' Pize nGimine' Gamazi

(Luka' 24:13-35)

12 Ne'mine ogavo alinge' nene engikuti' ve seta' nene numuno ebe' naba nene huli ebe' ngomola nivasivo Izesu' aza ei' emeni do atoli'mine ogosa soto' pize ngimine'. 13 Soto' pize ngemavo ingine tine' mili vi ingi zuho linge nene li-ngimasine'za nesi gili ele'vole' amani' ve.

Izesu' Izipahala Zuho Soto' O-ngemo Gono Dalizangumu' Lo-ngimine' Gamazi

(Mataio' 28:16-20; Luka' 24:36-49; Zohane' 20:19-23; Aposolo 1:6-8)

14 Alinge' nene izipahala zuho leveni (11) di gese' igi noso' nite' ni nizavo engitasi soto' pize ngemo ti' lo ngelemine': Hiluvonguti' nene mo ote nouvo ningave nete a'minemu' li-lingimani'za lingine lutine hize tilavo a'manapa igi engi' gamazi nene gili ele'vole' amave. 15 Ne'mine lo ngelemosa ti' lo lo-ngimine': Lingine numudo' namado' misubou' misubou' vi osu' li evene' zuho ato ato' muki' nizani' nene mono' gamazi lamine' nene li soto' igi li-ngimilo. 16 Li-ngimikevo gili gamazi gihile ve li gili ele'vole' igi mono' noso hilalizave nene O'moso'mo golosouti' do ngu' izeleseiha ve ma gili ele'vole' amilizave nene O'moso'mo goni' o-ngedo lihime ngemeleseive.

17 Ido' ingine nezemu' gili ele'vole' i minilizave nene neze amuzo ne'minisa di soto' ilisave: Ado' sikalahu' goloso neni' ve'nemu' ngimiseli hulilisave. Ido' ato ato' no'ninguti' gamazi lilisave. 18 Ido' gosihe' nene ngibilamavo a'inedunu' nene ha dalisave. Ido' zahemede noso nalizani' nene ma do goloso o-ngedamoloseive. Inite' gizi daveti oko'nido' a'inetunu' hitikevo lamine' ilisave.

O'moso'mo Izesu'ni Okulumokuko Ele'mizo Dizine' Gamazi

(Luka' 24:50-53; Aposolo 1:9-11)

19 Guvetesi ve Izesu' aza ne'mine lo mo lo-ngemavo O'moso'mo Okulumokuko ele'mizo do dizavo O'mosoloti' lemo minidi'mo O'moso'mo ana hulaa' ida mo'mosi'velo' mito' neive. 20 Ne'mino neivo eze izipahala zuho ingine numudo' namado' vi eze gamazi nene li soto' igi nili-ngimavo gamazi laa' ani' nene gihile izave li ningilizave lo Guvelesi ve aza inginesi mino hize ele' o-ngidivo ingine amuzo nite' ato ato' igi mili minani' ve.

Copyright information for `ASO