Mark 9

Ne'mine lo imine' molo ti' lo lo-ngimine': Lamine' ma lo-lengemeloze. Melo' nizave lengikuti' linge ma nene hilami ha nizavo O'moso'mo gizebo o-ledaa' monovo nene amuzo'vesi soto' ogavo ningilisave.

Izesu' Oko'nolo Do Atoli'mine Ine' Gamazi

(Mataio' 17:1-13; Luka' 9:28-36)

Ido' gamene sigisi ogo vavo Izesu' aza Petolo'ni ve Zakobo'ni ve Zohane'ni ve nene golo ha'nalo' ngele'mizo dizavo a'mida engikovo' mini ningi nizavo ei' oko'no do atoli'mine ogavo genegana've nene silingenge'ni've hulo mokono' goloso elo minine'. A'mine mokono' iline' ne'mine nene me misubouko evene' hamoli'mosi ngelo ma do soto' amoloseive. Ne'mine neivo Eliaki Moseki soto' igi Izesulesi gamazi li volelo' melo' igi nizavo ningani'. Ne'mine igi nizavo Petolo' aza Izesu'ni ti' lo lo-imine': Tisazo, maka' melo' minune' nene lamine' ogave. Nemu' nene azibe sitohamo ma gizelone. Ma nene gei' ve ido' ma nene Mose'ni ve ido' ma nene Elia'ni ve. Golise naba gili minani' nenako nemu' Petolo' aza nadive lolove lo gamazi gopo line'. Lavo limusoli'mo ogo molo hite-ngedavo limuso lulouti' O'moso'mi nolo ma ti' lo soto' ine': Me ve nene neni' gipe'ne lu'ne eme nouvoni' nenaze. Eze gamazi've gili dalo. Ti' lavo a'mido' lite' li velepe' izi ningani' nene ve masi minamani'za Izesukovo' neivo ningani'.

Ne'mine igi gololoti' limi ada nene Izesu' ti' lo lo huko lo-ngimine': Inite' ningani' nene vetete' igi li-ngimami nizavo O'mosolati' ve gihile naza helo otekuvo ma nene ha li-ngimilizave. 10 Lavo line' gamazi gili di li soto' ami mini hilinguti' oteline' gamazi line' nemu' nene monovo vise' igi li volelo' melo' igi minani'. 11 Ido' ti' li longo' i-dani': Do lu' izelive lo O'moso'mo do kegeso imiselelesa live nene a'mine gozopo' minine' polohete Elia' ne'mo gomu' molo-do tine' molo aloseive li avotemoti mono' gamazi apizi limaa' avete laa' nani' ma nene nanimu' laa' nave. 12 Ne'mine li longo' i-dikevo aza ti' lo lo-ngimine': Inite' muki' do veveselesa Elia' gomu' aloseive lani' nene mo lamineto' lani' ve. Ne'mine ani'za ve gihile neni' nene mulumo nite' nimi goboni mili-nidilisave li polohetelite nenikumu' ma nene nadive li gizi nizani' neve. 13 Ne'mine lo mono' noso holo-ngedaa' ive Zohane' nene Eliado' medelo minine' nemu' gililizave lo gelo ti' lo lo-ngimine': Ido' Eliangumu' lo-lengemeloze. Polohetelite ezemu' luhuvo gizi milani' nene mo gihile izave. Aza mo gomu' molo-nedo ogavo ve lingelite engi' lu'nido' e'meti bilani' ma ve.

Izesu' Aza Sikalahu' Goloso Lulou' Minine' Gipe Ma Do Lamine' O-dine'

(Mataio' 17:14-21; Luka' 9:37-43a)

14 Ne'mine igi izipahala zuho linge nizada vi hetelani' nene evene' mukilite di vodo vodo i-ngidi nizavo avo'ningeliti mono' gamazi apizi ngimaa' ave linge ma nete lolize gani li-ngimi li volelo' melo' igi nizavo ningani'. 15 Niningavo evene' muki' eze ningi upuho' goloso igi geti ezela loti' izi vi geke' voke' li-dani'. 16 Ne'mine ikevo Izesu' ti' lo longo' o-ngedo line': Nanitekumu' lolize gani li volelo' melo' nave. 17 Longo' ogavo evene' mukikuti' ve mali'mo ti' lo lo-imine': Tisazo, gipe'ne'mi lulou' nene sikalahu' golosoli'mo mino gamazi liline' aka hize tile-davo geita ele'mizo nouvoni' ve. 18 Sikalahu' golosoli'mo do ote-dine' gamenelo' gamenelo' nene do hulo misubolo' o-do izo gesebe' ize-davo veleti' gituho' galakala' dizo veleti' kiliko' kiliko' lo mino gizene ana do ngipu ngapa lo minaa' neive. Ne'mine ogo minaa' ingumu' izipaha zuho nete sikalahu' goloso nene imisele hulilizave lo ingine nizada ele'mizo uvoni'za ingine nene ngeli imiseli hulilizado' minamani' ve. 19 Ne'mine lavo Izesu' ti' lo lo-ngimine': Eii, ngeli imiseli hulisa'mani' nehe. Lingine O'mosomu' gili ele'vole' amani' zuho lengikumu' nene gosele' nebele'mo novivo lengi' vovotingu' gamene gohi ma imine' molo mino langamuzo hize'mo vo mineloni' nemu' agae lo noluve. Gipe nene neni' nouvoda ele'mizi alo. 20 Lavo ele'mizi ikevo sikalahu' goloso ne'mo Izesu'ni ningo gipe nene ehuso' ogo hulavo misubola lemo pou' lo ongo velepe' velepe' izo minavo veleti' gituho' galakala' vo minine'. 21 Ne'mino neivo Izesu' aza gipe ne'mi melehine longo' o-do line': Inite' nanihekuti' gize dani' neve. Lavo aza line': Izipe ngomoloti' gize dani' ve. 22 Gamene muki' izipe nene belelesa oloku' nehe nosou' nehe ehuso' ogo hulaa' ine' ve. Nemu' nene do lamine' o-ledelinido' o neivo ma nene muhelete ningo do lamine' o-ledezo. 23 Lavo Izesu' ti' lo lo-imine': Do lamine' o-delinido' o neivo ma ve laine' ma nene naza ma lokuvo gelezo. Gele ele'vole' o minelive ne'mo nene amaa' nitekisi ha oloseive. 24 Lavo izipeli'mi meleho geto geke' naba lo line': Idise geikumu' gele ele'vole' o nouve. A'mine gele ele'vole' o nouvoni' ne'mo vo damida nene hize ele' o-nedezo. 25 Lavo evene' muki' ingine loti' izi igi di gese' navo ningo sikalahu' goloso elemo ti' lo line': Sikalahu' goloso gaza gipe me'mi gala do negi hize-do gamazi laa' aka've hize tile-danive gaza ei' lulouti' lemo vosa tibizo amozo lo nolo huko-giduve. 26 Lavo geke' lo do gabe' kabe' o-dosa lemo vine'. Lemo vavo gipe aza hilave ne'mino ongo miningumu' evene' linge muki' nete nene aza mo helave lani'. 27 Lani'za Izesu' aza analo' dosa do hozi lo-davo otine'.

28 Ne'mine ogavo Izesu' aza numungu' dizavo izipahala zuhosi angisevo' mini ti' li longo' i-dani': Sikalahu' goloso nene laza naniteli'mo imisele hulamolonido' ine' neve. 29 Ne'mine li longo' i-dikevo ti' lo lo-ngimine': Inite' atotunu' nene sikalahu' goloso ne'mine nene ngelo ngimiselamolosune. Asi O'mosola laadunukovo' nene ngimisele hulolosune.

Izesu' Helo Galeseuti' Oteline' Gamazi Nene Gohi Lo Soto' O-ngimine'

(Mataio' 17:22-23; Luka' 9:43b-45)

30 A'mine ebe' huli nGalilaia misubou' vi heteli a'mine misubo nene ivile' iki elese' igi vani'. Ido' elese' igi vani' nene Izesu' aza izipahala zuho gamazi apize ngeme'mo vo minine' nenako nemu' evene' nete aza mela neive li gilikelizave lo lavo elese' igi vani'. Ne'mine igi nivado' nene izipahala zuho ti' lo apize ngeme ngeme' o'mo vine': O'mosolati' ve gihile neni' nene evene' maliti a'ningu' nele'mizi milikevo di vi nibili hililisave. Di vi nibili hilikevo helo mino gamene setohamo vavo otelesuve. 32 Ne'mine lo line'za izipahala zuho ingine a'mine gamazi'mi monovomu' nene gili lamine' amani'. Gili lamine' amani'za eikumu' golise gili nemu' longo' i-damani' ve.

Evene' Naba Lolo' Oga' Monovomu' Izesu' Lo-ngimine'

(Mataio' 18:1-5; Luka' 9:46-48)

33 Ido' Kahanaumi numudo' vi heteli numungu' dizisa Izesu' aza izipahala zuho longo' o-ngedo ti' lo line': Akala ma nene lingine nanitekumu' li volelo' melo' i'mi ave. 34 Longo' o-ngedavo ingine akalo' niigi engi' mukikuti' nene ve zaho ngivile' ogo naba neive li li volelo' melo' ani' nenako nemu' gamazi li-imami minani'. 35 Gamazi li-imamavo aza mito' mino izipahala zuho tuvelu asi lavo ezela ikevo ti' lo lo-ngimine': Ve ma ingine evene' naba minelone li ma evene' muki' nene dizi minikevo engi' nene limi mini evene' mukiliti gelekele' ve minilisave. 36 Ne'mine lo izipe ngomo ma ele'mizo vovo'ningu' do ote-do do mumunouko o-de mino ti' lo lo-ngimine': 37 Ve ma ingine nenikumu' ve li izipe ngomo me'mine ma ngele'mize lamine' ilizani' nene neni' nele'mize lamine' ani' geleleseive. Ido' neni' nele'mize lamine' ilizani' nene nenikovo' nele'mize lamine' ami nimiselive nesi nene ele'mize lamine' ani' geleleseive.

Ve Ma Biluva' I-lidamilizave Nene Lelita Ve Ne Nizave Lo Izesu' Line' Gamazi

(Luka' 9:49-50)

38 Ido' Zohane' aza ti' lo lo-imine': Tisazo, ve mali'mo gei' guliveka lo soto' ogo gei' vekamu' ve lo sikalahu' goloso nongimiselivo laza ningo a'mine ve nene lezesi bizo gei' ge'metesa'mine' nenako nemu' ne'mine amozo lo o've lo-dekune. 39 Lavo Izesu' aza ti' lo line': O've li-damilo. Ve ma ingine neze gulive'ne li soto' igi neze ve'nemu' ve li amuzo nite' di soto' ilizave nete ingine lite' li divi' ledivi' ma i-nidamilisave. 40 Ve ma ingine biluva' i-lidamilizave nene lelita ve nene nizave. 41 Naza lamine' Ma lo-lengemelove. Ve ma aza nene lingine neni' Kilisito' zuho nizangumu' ve lo noso kapuu' ohizo lengemeline' ne'mi meni've nene damilivoba daloseive.

Izesu' Aza Lihime Dalizadi'mo Goloso Ikelizave Lo Hungo' Gamazi Line'

(Mataio' 18:6-9; Luka' 17:1-2)

42 Ido' nenikumu' gili ele'vole' igi minaa' nani' izipaha'ne zuho limi minani' engikuti' hamo' ma evene' mali'mo goloso nite' daline' akau' ele'mize molalosa neivo ma a'mine ve nene O'moso'mo mulumo gono naba' naba emalinako nemu' nene goloso nite' daline' akau' nene olihe ele'mize molamivo gomu' nene luvonou' genivesi geheni naba nene nalava izi-di noso ohuno nabau' ehuso' i hulikevo a'mingu' lemo heleline' nene lamine' oloseive. 43 Ido' anga sita' ha do mino O'moso'mo lihime gemavo lihizami oloku' viline' nene mo edamoloseine' nenako nemu' nene anga mali'mo lihime daa' akalo' gele'mize molalosa neivo ma o've lo a'mine anga nene huko hulaine' gilivosa minezo. Anga hamokovo' minine' gilivo mino minevo' minevo' ebekuko viline' nene ede voloseive. 45 Ido' gizenga sita' ha do minanivo O'moso'mo lihime gemo olo' galeseu' gehuso' o huliline' nene mo edamoloseine' nenako nemu' nene gizenga mali'mo lihime daa' akalo' gele'mize molalosa neivo ma o've lo a'mine gizenga nene huko hulaine' gilivosa minezo. Gizenga hamokovo' minine' gilivo mino minevo' minevo' ebekuko viline' nene ede voloseive. 47 Ido' veka sitakisi ha nanivo O'moso'mo lihime gemo oko'nine naliza ginine osu' lamavo olo' lihizamiline' galeseu' gehuso' o huliline' nene edamoloseine' nenako nemu' nene veka gulo mali'mo lihime daa' akalo' gele'mize molalosa neivo ma gaza o've lo a'mine veka nene kuluhize hulaine' gilivosa minezo. Veka hamokovo' minine' gilivo mino O'moso'mo gizebo o neingu' viline' nene ede voloseive.

49 Noso' niteku' lanite' ilive lo guvo hulaa' none. A'mine'mine ogo evene' mukito' olo' ne'mo guvo ne'mine lolo' oloseive. 50 Guvo nene lamine' neine'za guvo lanite've ma osu' lavo ma gohi nado do lanite' o-delone. Noso' niteku' guvo hulokunivo lanite' oga' neine' ne'mino lingine lutingu' guvo ne'minosa lanite' o minivo mini a'mida a'mida hongu li minilo.

Copyright information for `ASO