Matthew 10

Izesu' Evene' Tuvelu nGele'mize Molani' Gamazi

(Maleko' 3:13-19; Luka' 6:12-16)

Izesu' aza izipahala zuho tuvelu (12) asi lo-ngemavo ikevo eveneliti lu'ninguti' sikalahu' goloso ngimisele hulaa' ido' ato ato' inite' gizi davesi gilizevosi muki' do lamine' o-ngedaa' amuzo nene ngimine'. A'mine aposolo tuvelu (12) neti gulive'ine nene ne'mino neive: Gana' nene Simoni' gulive gohi ma Petolo' ido' Adelea' nene akunolo minine'. Ido' Zebedaio' gipele Zakobo' ve, akunolo Zohane' ve, Hilipoki Batolomaioki ido' Tomasi' ve, takisi moni daa' ive Mataio' nesi ido' Zakobo' gohi ma minine' nene Alahaio' gipele minine'. Ido' Tadaio' ve, ido' Loma ve ngimisele hulolone li amuzo milaa' aveuti' ve ma Simoni' ve, ido' alinge' Izesu'ni do soto' o-dive ado' Kelioto numudoti' ve Zuda' nesi nene minani'.

A'mine Izesu' Izipahala Zuho Tuvelu (12) Nene Mono' Gonolo' Vani' Gamazi

(Maleko' 6:7-13; Luka' 9:1-6)

Ido' a'mine ve tuvelu (12) nene gonolo' nongimiselo gamazi ti' lo lo-ngidine': Lingine Zuda ve minamani' eveneliti misubou' vami ido' Samalia eveneliti numuno ebe'ningukisi nene vami sipisipi ize vi halekaa' nani' ne'mini Isilaele' aleve vi tolovo igi nizani' engita nene vilo. Vi ma nene O'moso'mi gizebo nene lengita mo ogave li li soto' igi li-ngimilo. Ido' inite' gizi dave nene di lamine' i-ngidilo. Ido' hili nilizanguti' nesi di oti-ngidilo. Ido' ganadise gizi dave nesi di lamine' i-ngidilo. Ido' sikalahu' goloso evene' lu'ninguti' nesi ngimiseli hulilo. Ne'mine mana'mine o-ngedaa' amuzo nene meni hizi ma damaze. Lingine haza ne'mine mana'mine i-ngidilo.

Ido' lingine gotingu' moni ngomosi ma go'ziki vamilo. 10 Ido' aka vilizangumu' ve li go' ne'minesi dami ido' sioti sita' izi vami hamokovo' izi vi suu' nesi izi vami ido' hatuso nesi di vami okodido' neine' nevo' nene minivo vilo. Gono dave nene gono'nido' inite' ma ngimikevo menite ve li haza dalizani' nene lisihe' o neinako linginesi nene a'mine'mine igi lingimikevo haza dalisanaze. Nemu' nene hazavo' vilo. 11 Ido' lingine numuno ebe' nabaupe ngomoupe ma vi heteli ma evene' lamine' ma nolingumu' nene vise' igi ningisa a'mine ve'mi numu'veu' nene dizi limi nizavo numuno ebe' mala viliza gamene nene alitavo ma nene vilo. 12 Lingine numuno mau' dizi ma a'mine numungu' miniliza aleve nene lengita hongu minivo li mese' aseka li-ngidilo. 13 Ido' a'mingu' minave ingine evene' lamine' nilizani' nene lengitati' hongu nene engita mineleseive. Ido' evene' lamine' minami nilizani' nene a'mine hongu nene engita minamo gohi tine' molo lengita aloseive. 14 Ido' evene' malite gamazitine gilami lengele'mize lamine' amavo ma lingine a'mine numungutipe ebekutipe vili ma ingine engi' monovo'ine ningilizangumu' ve li avazaha igi gizedidoti' u'musupo nene okoho' izi di huli vilo. 15 Lamineto' nolo-lingimuve. Gamene nabau' a'mine aleve O'moso'mo lihime'ine ngemeline' nene Sodomu aleve ido' nGomola aleve mulumo inite' naba ngemeline' nesi ivile' ogosa naba goloso ngemeleseive.

Goboni Galete Galete' Soto' Ilingumu' Line' Gamazi

(Maleko' 13:9-13; Luka' 21:12-17)

16 Ido' gilahe. Lingine nene neni' gono'ne vi dalizave lo nolingimiseluve. Lingine nene sipisipi ize ne'minisa minilisave. Sipisipi ize ingine lovo ve'inete ngibililisa ikevo ingine a'mido' alete mili ngibililiza gavoso'ine nomivo minaa' nani' ne'minisa nene minilisave. Ido' lingine vovo'ningu' vi miniliza aleve neve nene sipisipi ize ngibilaa' ani' loposo gulo ne'minisa nene minilisanaze. Lingibilikelizaze. Nemu' lingine nene gosihe' iga' nani' ne'mine igi gatine lamine' gili gizebo ilo. Ido' nama viluso iga' nani' ne'mine igi honguvo' li minilo. 17 Lingine nene evenekumu' ningisa minilo. Ingine nene kanisole'nido' di gonito' mili-lingidi mono' numu'ningu' nalatunu' lili' ani' gavosodunu' lingibililisave. 18 Ido' nenita gi'mizi minangumu' ve li gonito' lengele'mizi mili guve'inesi ve nabaliti ve'nidokisi ngamani nabaliti ve'nidokisi lengele'mize milikevo engikisi ido' Zuda ve minamani' alevesi nene neni' monovo'ne li soto' igi li-ngimilisave. 19 Nemu' nene lengele'mize gonito' nimilavo ma gamazi nado lolove ido' nadive lolove li gopo gatine gilamilo. Gonito' lengele'mizi milikevo gamazi liliza gamene aliteline' nene lilizani' gamazi nene ha omo gatingu' ogavo lilisave. 20 Gamazi lilizani' nene langisetine lamilisave. Metibi Sikalahu' ne'mo nene lengiku' omo holo mino gamazi lilizani' nene ei' loloseive. 21 Ido' evene' nenikumu' gili ele'vole' amani' nete nene nenikumu' gili ele'vole' ave nene ngibili hililizave li gonito' ngele'mizi milalisave. Ee, mo uvo'ninge aku'ninge nilizani' netesi ido' ize'ninge me'ninge izipaha'ine zuho nilizani' netesi nene ha ne'mine ilisave. 22 Neni' gulive'ne di minilizangumu' evene' muki' nete nene lengikumu' goloso gililisave. Ne'mine ilizani'za ve malite nenikumu' gili ele'vole' igi amuzo mili mini di vi nizavo gamene'ine ma osu' lilive nene O'moso'mo do ngu' izeleseive. 23 Ido' numuno ebe' mauti' alevelite ma lengele'mize goloso navo ma golise ebe' malo' malo' vika' vika' igisa nene monilo. Naza lamineto' nolo-lingimuve. Isilaele' aleveti numuno ebe'ningu' nene olihe moni pilamavo O'mosolati' ve gihile naza nene tine' molo alosuve. 24 Tisa' mali'mi izipahala zuho ingine nete nene tisa'ine nene ivile' igi ma minisa'mave. Ido' agove izipe nete ingine gizebo i-ngidave nene ngivile' igi ma minisa'mave. 25 Izipahala zuho ingine tisali'mo gehaa' ine' gono gihi minilizani' nene lamine' oloseive. Ido' agove izipe ingine nene gizebo o-ngedaa' ive'mo gehaa' ine' gono inginesi gihilizani' nene lamine' oloseive. Ve goloso nete metibine nenikumu' sikalahu' golosoliti guve'inesi ve Belezebulo' ve li-nidani' nenako izipaha'ne zuho lengikumu' nene nabisa divi ledivika li-lingidilisave.

O'mosomukovo' Golise Geleloningumu' Izesu' Line' Gamazi

(Luka' 12:2-7)

26 Nemu' nene engikumu' golise gilamilo. Idise mene hito neine' inite' muki' nene alinge' soto' oloseive. Ido' idise mene haleko neine' inite' nene soto' ogavo gililisave. 27 Ido' naza liti'musou' haleko suno' lengikovo' lo-lengemaa' uvo gamazi nene evene' muki' ningi gililizada nene li soto' igi li-ngimilo. Ido' zegeno nununga lo lo-lengemaa' uvoni' gamazi nene numuno heta evene' muki' gililizada nene li hutile' igi li-ngimilo. 28 Evene' ingine okodinevo' nene ha lingibili hililizani'za lutine nene ngeli di gopo amilisave. Engikumu' golise gilamilo. Mudise lutinesi okodinesi oloku' hulo lengebele heleli amuzo'vesi minive O'mosomukovo' nene golise gili minilo. 29 Gilahe. Nama ngomo ngomo oso'moho' ne'mine nama nene haza nite've li gili gulehe' moni hamokovo' nene huli nama sita' meni hizaa' ani' ve. Ido' a'mine ne'mine nama nene haza nite' neiha metibo engito' gizebo lamine' oga' neive. Aza gelamivo engikuti' hamo' ne'minesi nene ma ngelo helo misubou' lemamoloseive. 30 Ido' lingine neve nama ngomo ngomo muki' nene ngivile' igi inite' naba nizanako nemu' nene golise gilamilo. Lengita inite' ngomo lasolo nesi goloso ogalive lo godotine zopovo muki' nene gate osu' lo nelokisi gizebo oga' neive.

Izesu' Gulive Lo Soto' O-ngemeloningumu' Line' Gamazi

(Luka' 12:8-9)

32 Ve mali'mo neze gulive'ne evene' mukiliti ve'nido' lo soto' iline' nene eze gulivesi me'nehi velelo' Okulumoku' lo soto' olosuve. 33 Ido' ve mali'mo nenikumu' evene' mukiliti ve'nido' ningamuve ve lo ataize lo-nedeline' nene ezemukisi ningamuve ve lo me'nehi velelo' Okulumokuko lo-delesuve.

Zou Lo Minaakisi Lovosi Do soto' Olove Lo Lo-limine' Gamazi

(Luka'12:51-53; 14:26-27)

34 Naza lemo uvoni' nemu' nene misubo mukiku' lovo muki' nene osu' lavo evene' muki' nene honguvo' li minilisave li gilamilo. Naza lemo uvoni' ne'mo evene' muki' nene hongu li minami lovo hizi minilisave. 35 Naza lemo uvoni' ne'mo evene' ho' li eza ema minikevo

ve malite engi' me'ninge lovo i ngimi minilisave.
Ido' aluvo'ine malite ize'ningine lovo i ngimi minilisave.
Ido' ngonohulo malite vene' avo'ningine lovo i ngimi minilisave.
36 Ido' engi' zuho gehepeve nete nene engi' zuholiti lovo ve lili' igi minilisave.
37 Ido' lingine izetingine metingine lutine ngimilizani' ivile' igi lutine nimamilizani' nene neze zuho gihile minilizani' votigilelo' minamilisave. Ido' izipahatine lutine ngimilizani' nene ivile' igi lutine nimamilizani' nene neze zuho gihile minamilisave. 38 Ido' ve ma mulumo inite' i-lidi lohoto' zalo' libilikelizave li geli a'manapa igi ne'metamilizani' nene neze zuho gehepeve minilizani' votigilelo' minamilisaave. 39 Ido' ve ma aza helelohe helelohe lo oko'nomu' golise golise gelo minelive nene alinge' helosa minevo' minevo' emeni dameni damoloseive. Ido' ve ma aza neni' ne'meto novilingu' bili hililizani' nene alinge' minevo' minevo' emeni dameni nene mo daloseive.

Menite Daloningumu' Line' Gamazi

(Maleko' 9:41)

40 Ido' evene' ma ingine lengi' gamazitine gili lengele'mize lamine' ilizani' nene neni' gamazi'ne gili nele'mize lamine' ani' geleleseive. Ido' neze ne'mine i-nidilizani' nene nimiselive ei' gamazi've gili ele'mize lamine' ani' geleleseive. 41 Ido' aza O'moso'mi veleti' gamazi lo soto' oga' ive polohete ma ne neive lo ve mali'mo a'mine ve ele'mize lamine' iline' nene O'moso'mi veleti' gamazi lo soto' oga' ive'mo meni daa' ine' votigilelo' meni daloseive. Ido' ve lisihe' ma ne neive lo ve mali'mo a'mine ve lisihe' nene ele'mize lamine' iline' nene a'mine ve lisiheli'mo meni daline' votigilelo' ogo meni daloseive. 42 Ido' ve mali'mo izipaha'ne zuho limi minanguti' nene ma ningo mene ve nene Izesu' izipahala zuhouti' neive lo gelo hepe' noso ngomosi ma ohizo emeline' nene alinge' meni've nene damilivoba daloseive.

Copyright information for `ASO