Matthew 13

Zuho Nite' Tile' Oga' Ive'mi Aneza Gamazi

(Maleko' 4:1-9; Luka' 8:4-8)

Neloti' a'mine gameneu' nene Izesu' aza numuno nene hulo nGalilaia noso ohuno gahevela nene lemo vo mito' minine'. A'mida nene evene' vai' goloso di nubo adi'mo sipiu' dizo mito' minavo evene' muki' ingine noso gahevela oti minani'. Nizavo Izesu' aza inite' mukikumu' nene aneza gamaziuti' lo-ngemo minine'. Lo-ngemo mino aneza gamazi ma ti' lo line': Lingine gili'nalo. Ve ma zuho inite' tile' oga' iveli'mo zuho inite' tile' olosa vine'. Vo tile' o'mo novivo zuho inite' linge ma nene akalo' di'mozikevo nama nete igi di nani'. Ido' linge ma nene gehedo' misubo naba minamido' di'mozi misubo nene naba nomine' ne'mo zuho inite' nene lite' li gala ho'li dizani'za ho' nene dizo amuzo molo lavo luhive vai' damani' nenako ne'mo gulugulu izani'. Ido' ma nene gasava guvise huki hulikevo luhive ha minido' di'mozi gala ho'li dizani'za gasava guvise ne'mo dizo molo-ngidine'. Ne'mine ani'za linge ma misubo lamineku' di'mozani' nete nene gala ho'li dizi gihile izani' nene hamo hamolite vanu hadeti (100) ido' sigisiti (60) ido' teoti (30) ne'mine izi'mi vani'. Gatine ngolo' live ma nii ma nene gili lamine' ilo.

Izesu' Aneza Gamazi Lo-ngemaa' Neine' Ne'mi Monovo Lo-ngimine' Gamazi

(Maleko' 4:10-12; Luka' 8:9-10)

10 Ne'mine ogavo alinge' izipahala zuho ingine ezela vi ti' li longo' i-dani': Evene' initekumu' lo-ngemelesa aneza gamaziuti' lo-ngemaa' naine' nene nanitekumu' lo-ngemaa' nane. 11 Ne'mine likevo Izesu' ti' lo lo-ngimine': Okulumoku' minive O'moso ne'mo gizebo o-ledelingumu' suno' gamazi nene lengi' ha gililisave lavo lo soto' o-lengemaa' nouvoni'za evene' linge mala nene gililizave lamive. 12 Ido' nanimu' ve. Ve ma ingine mono' ma di nilizani' nene O'moso'mo gohi ma ngemavo di vai' li di minilisave. Ido' mono' ma di minamilizave nene engita mono' ngomo ma noline' nene a'minesi gohi ipe' ogo do voloseive. 13 Nemu' nene ingine ningii ningi guni isa'manako ido' gilii gili guni isa'manako nemu' nene naza aneza gamazivo' nene lo-ngemaa' nouve. 14 Ido' ne'mo nene O'moso'mi veleti' gamazi lo soto' oga' ive polohete Isaia'ni O'moso'mo ti' lo lo-imine' gamazi line' ma nene engito' vo gihile izave:

Gatinedunu' nene ha gililisani'za gili vevesamilizado' o neive.
Ido' vetinedunu' nene ningaa'ni ha ningilisaha
inite' ma ningamilizado' o neive.
15 Ne'mine losa imine' molo Isaia'ni ti' lo lo-imine':

Ido' mene aleve nene
ve'ine liko ga'ine ngi lo lu'ine hize tile vine' nizave.
Ne'mo nene ve'inedunu' inite' ma ningisa'mave.
Ido' ga'inedunu' gamazi ma gilisa'mave.
Ido' lu'inedunu' gamazi gili hehe lisa'mave.
Ingine nene ne'mine amadiniko lu'ine di velepe' izikevo
ha do lamine' o-ngiduvodine.
16 Gomu' polohete muki' minani' netesi ido' mono've lisihe' lamine' muki' netesi ingine neni' ogo molo nouvoni' inite' idise lingine niningani' memu' nene ningelobo li gilani'za ma ningamani' ve. Ido' laa' nouvoni' gamazi idise lingine gatinedunu' nigilani' nene gelelobo li minaa' ani'za gilamani' ve. Nemu' nene a'mine ningi gili nizani' inite' nene O'moso'mo inite' gihile nene lengeme neize. Longolize izi minilo.

Zuho Niteli'mi Aneza Gamazi'mi Monovo Lo-ngimine' Gamazi

Maleko' 4:13-20; Luka' 8:11-15)

18 Nemu' nene aneza gamazi zuho inite' tile' ine' ne'mi monovo ma nene mene gililo. 19 Ve ma zuho inite' tile' ogavo linge ma akalo' di'mozave luvoni' ma'mi monovo nene ne'mino neive: O'moso'mo gizebo o-ledeli gamazi lamine' nene gilii gili lamine' amave engitati' nene goloso meleho aza ogo O'moso'mo evene' lu'ningu' zuho' ine' gamazi nene do vaa' neive. 20 Ido' zuho inite' linge ma gehedo' di'mozave luvoni' ma'mi monovo nene ne'mino neive: Evene' ma ingine O'moso'mo gamazi've tile' ine' nene gilii lite' li gili lanite' igi di go'zaa' naha 21 a'mine gamazi ne'mo lu'ningu' luhise do minelido' mini mili minamavo gamene ha'namu' gili di minisa'mave. Ido' gamene ha'namu' gili di minisa'mani' nene ingine a'mine gamazi nene gili-nidavo ne'mo engita geni soto' o ngemelihe goboni mala' mala' ngemelihe. Ine' nene geti hulaa' nave. 22 Ido' zuho inite' linge ma nene gasava guviseu' di'mozi gala ho'li dizani'za gasava guvise goloso ne'mo molo hite-ngidine' nene evene' ma ingine O'moso'mi gamazi nene mo gili di go'zani'za oko'ine'mi initekumu' ga'ine a'midokovo' gili minaa' ido' monimu' ngumo hilivo minaa' ani' ne'mo dizo O'moso'mi gamazi inginela lemo minine' nene molo hite-davo inginela dizo gihile izamaa' neive. 23 Ido' zuho inite' linge ma misubo lamineku' di'mozave luvoni' ma nene evene' malite O'moso'mo gamazi tile' ine' nene gilii gili vevesi di minave engita nene gihile izaa' neive. Ee, gihile hamototi' gihile vanu hadeti (100) izaa' neine' ne'mino ve malitida nene vauve goloso elosa izaa' neive. Ido' zuho nite' hamototi' gihile sigisiti (60) izaa' neine' ne'mino ve mala nene vai' goloso izaa' neive. Ido' zuho nite' hamototi' gihile teoti (30) izaa' neine' ne'mino ve mala nene muki' izaa' neive.

Lilihemu' Aneza Gamazi Lo-ngimine' Gamazi

24 Ne'mine lo Izesu' aza aneza gamazi gohi ma lo-ngimine' nene ne'mine lo lo-ngimine': Okulumoku' minive'mo eveneto' gizebo oga' ine' ne'mi monovo nene ve mali'mo mi'veu' viti gihile lamine' nene zuho' ogo nelo' gizebo oga' neine' ne'minosa nene neive. 25 Gamene ma holuka' mine melehosi ido' eze zuhosi ingine ingi hilikevo lovo o emaa' iveli'mo ogo viti gele vine' guvise goloso nene viti zuho' ingu' nene tile' o'mo voloseive. 26 Ne'mine ogavosa alinge' viti nene dizo gihile izelesa neivosa viti gele vine' guvise masi nene a'mingu' golo dizo soto' ine'. 27 Ne'mine ogavo agove izipe ingine mine melehine vi ti' li li-imani': Guvekasi ve gaza mingau' nene viti laminekovo' ma zuho' aine' ma nene a'mingu' viti gele vine' guvise goloso masi nene dizako nadosa dizive. 28 Likevo mine meleho ti' lo lo-ngimine': Lovo vete mali'mo nene zuho' o noloseive. Ne'mine lavo agove izipe ingine ti' li li-imani': Nemu' nene gaza a'mine guvise goloso nene leli' kiselilizave losa gele nabe. 29 Ne'mine likevo aza ti' lo lo-ngimine': Lingine viti gele vine' guvise nene nokiselube li vitisi kiselikelizanako nemu' o've noluve. 30 Nemu' nene a'mine guvise goloso nesi maka' dizi nizavo viti hukiliza gamene nene alitelive. Viti hukaa' gamene aliteline' nene viti hukaa' ave ti' lo lo-ngedelesuve: Gomu' nene guvise goloso nene oloku' gizeloningumu' huki di go'no izi ato' di nubo i-ngidi alinge' vitila nene huki di vi neni' mino molo oga' uvoda milalizave lolosuve.

O'moso'mo Evene'velo' Gizebo Iline' Nene Vo Naba Ilingumu' Izesu' Aza Sakave' Naba'mine Ma Minidi'mi Zuholo' Lo Molo Aneza Gamazi Lo-ngimine' Gamazi

(Maleko' 4:30-32; Luka' 13:18-19)

31 Ido' Izesu' aza aneza gamazi gohi ma ti' lo lo-ngimine': Ve mali'mo mi'veu' naba'mine sakave' zuho hamo' ma do zuho' ogavo gala ho'lo dizo naba iline' ne'mino O'moso'mi gizebou' vi hilaliza aleve engi' neti mulise'ine nene vo naba oloseive. 32 A'mine zuho inite' nene ngomo lasolo mino zuho inite' ato ato' muki' nene ngivile' ogo ngomo minine'za zuho' ogavo gala ho'lo dizo mingu' zuho' iga' nani' inite' muki' nene ngivile' ogo inite' naba lolo' ogo za ne'mine mineleseive. Ne'mine ogavo namalite igi a'mine initeli'mi a'navau' nene numuno gizi ingaa' nave. A'mine'mine igi O'moso'mi evenele zuho nene vi naba ilisave.

O'moso'mo Eveneleliti Luteu' Ei' Gizebo Iline' Nene Vo Naba Ilingumu' Izesu' Aza Beleti Do Lulu Izaa' Ine' Inite' Zisitilo' Lo Molo Aneza Gamazi Lo-ngimine' Gamazi

33 Ido' O'moso'mo gizebo o-ngedeli alevetingu' nene mono' vo naba ilingumu' aneza gamazi gohi ma ti' lo lo-ngimine': Gizebo o-ngedeline' alevetingu' Okulumoku' minive O'moso'mo gono daa' neine' nene beleti do lulu izaa' ine' inite' zisiti ne'mine neive. Vene' mali'mo beleti lolo' olosa palauva' beki ngomo sitohamo nene do nososi do gopo ogo a'mingu' zisiti ngomosi do gopo ogavo ne'mo beleti nene lulu izo naba ine'.

Izesu' Aneza Gamazi Ne'mi Monovo Lo-ngimine' Gamazi

(Maleko' 4:33-34)

34 Evene' muki' di gese' ani' gameneu' Izesu' aza inite' muki' lo-ngemelesa ine' nene aneza gamaziutikovo' lo-ngimine'. 35 Ne'mino lo-ngimine' ne'mo nene O'moso'mi veleti' gamazi lo soto' oga' ive mali'mo gamazi ma ti' lo line' ma nene gihile izine':

Ve'neuti' nene aneza gamaziutikovo' nolo-ngemo
gozopo' aka'mila misubo olihe soto' amivo haleko minine' gamazi nene lo soto soto' olosuve.

Lilihemu' Aneza Gamazi Ma'mi Monovo Lo-ngimine' Gamazi

36 Neloti' nene Izesu' aza di gese' ave muki' nene hulo-ngedo numungu' dizo minine'. Neivo izipahala zuho ezela igi viti mingu' guvise goloso dizive lo aneza gamazi laine' ma'mi monovo ma lo ngolo' lo lo-lemanivo gelelone li Izesu'ni li-imani'. 37 Li-imikevo Izesu' ti' lo lo-ngimine': Evene' viti gihile zuho' ive nene O'mosolati' ve gihile naza nene nouve. 38 Ido' mine neve nene misubo mukikumu' nene neive. Ido' viti gihile lamine' neve nene O'moso'mo gizebo ingu' mini mili minani' alevemu' nene neive. Ido' viti gele vine' guvise goloso ve luvoni' nene ve goloso Satanila mini mili minani' aleve nemu' nene neive. 39 Ido' lovo ve guvise goloso zuho' ive nene Satani nemu' luve. Ido' viti hukaa' gamene alitelingu' ve luvoni' nene evene' misubou' mini mili miniliza gamene osu' lavo gamene naba alitelingumu' nene luvoni' ve. Ido' viti hukilizave ve luvoni' nene angelokumu' luvoni've. 40 Ido' guvise goloso nene huki di nubo igi oloku' gizilisave luvodi'mine ogo evene' misubou' mini mili minilizani' gamene nene osu' lavo gamene naba alitelingu' nene ne'mine ilisave. 41 O'mosolati' ve gihile naza angelo'ne zuho nene ngimiselekuvo ingine vi evene' neze gizebolo' mini mili minangu' nene evene' ngele'mize goloso iga' nani' inite' muki' nesi ido' O'moso'mo lo hukine' gamazi gili huli goloso inite' daa' ave muki' nesi nene ngele'mizi vi di nubo i-ngidi 42 olo' nabau' huli-ngidilisave. Huli-ngidikevo a'mingu' nene mini agae agae li ive nama igi mulumo alumo gili ve'ine ingihi langolo' igi minilisave. 43 Ido' evene' lisihe' lamine' ingine nene me'nibo O'moso'mo gizebo o-ngidingu' nene ho' ne'minisa labana' ili minilisave. Nemu' nene evene' ma lingine gili nge li gilaa' ave ma nii ma nene gililo.

Ve Mali'mo Meni've Dizo Minine' Inite' Misubouti' Ningine' Ne'mi Aneza Gamazi

44 O'moso'mi gizebou' minaa' nene lamine' goloso neine' nenako evene' ingine inite' mata'ine a'minemu' huli a'mingu' vi hilalizani' monovo nene ne'mino neive: Ve mali'mo meni've dizo minine' inite' haleko misubo mau' minine' nene ningo do soto' ogo huloko olize ize'mo numu'vela tine' molo vo inite' mata've nene meni do osu' lo gohi tine' molo ogo meni've dizo minine' inite' haleko minine' misubo ma'mi melehine nene meni emo misubo do eita oga' neine' ne'minosa ne neive.

Ve Mali'mo Meni've Dizo Minine' Inite' Ningine' Ne'mi Aneza Gamazi

45 Ido' ma nene Okulumoku' minive'mi gizebou' minaa' nene lamine' goloso neine' nenako inite' mata' muki' nene hulo osu' lo a'mingu' vo holaa' ne'mi monovo nene ne'mino neive: Ve ma situva' molaa' ive mali'mo gonolise inite' laminekumu' vise' o'mo moningu' nene 46 vise' o'mo monine' inite' muki' ngivile' ogo lamine' goloso mino meni've nabalo' goloso minine' ma ningosa tine' molo vo inite' mata've muki' nene meni do osu' lo gohi tine' molo ogo gonolise initeli'mi melehine nene meni emo a'mine inite' do eita ine' ne'minosa ne neive.

Alaha' Daa' Golalezekumu' Aneza Gamazi Izesu' Line'

47 Ido' ma nene Okulumoku' gizebo o minive'mo a'mine gizebo o miningu' vo holaloningumu' evene' ize' molo-ngedeli monovo nene ne'mino neive: Ve ma alaha' daa' ive'mo alaha' daa' golaleze' nene hulo nosou' ogavo ato ato' alaha' nene a'mingu' dizi minaa' nave. 48 Dizi mini vai' likevo alaha' daa' ive ne'mo gelelehe' ogo hulo gahevela ogo mito' mino lamineta nene gizeka' ogo goku' go'zo golosola do hulaa' neine' ne'minosa ne neive. 49 Nemu' nene evene' misubouko mini mili iliza gamene nene osu' lavo gamene nabala soto' iline' inite' nene ne'minosa soto' oloseive: Angelo' ingine igi evene' lisihe' lamineliti vovo'ningu' evene' goloso mini'mi monani' nene ize' mili huli ato' i-ngidi 50 di vi olo' nabau' huli-ngidikevo a'mingu' nene ve'ine ingihi langolo' igi agae agae li ive nama igi minilisave.

Mono' Gosohokisi Litehesi Apize nGemakumu' Lo-ngimine' Gamazi

51 Nemu' nene lingine inite' muki' mene luvoni' nemu' mo gilikehe lo Izesu' lavo izipahala zuho ingine ti' li li-imani': Ee, mo gelekune. 52 Ne'mine likevo aza ti' lo lo-ngimine': Nemu' nene numuno me'ninge ma inite' milikanguti' inite' gosohokisi litehesi di soto' igi engi' numu'ningu' minave ngimaa' nani' ne'minisa linginesi mono' monovo apizi ngimaa' nave muki' nesi Okulumoku' minive'mo eveneto' gizebo o-ngedeli monovomu' gili vevesave muki' nene mono' gosohokisi litehesi di soto' igi evene' apizi ngimilisave.

Nasalete Ebeta Izesu'ni Ningi Hulani' Gamazi

(Maleko' 6:1-6; Luka' 4:16-30)

53 Izesu' aza ne'mino aneza gamazi muki' nene lo-ngemo osu' lo a'mine ebe' nene hulo 54 ei' numuno ebe've gihile Nasaletela vo heteline'. Vo hetelo a'mida vene' vemoho' nene mono' numu'ningu' O'moso'mi gamazi nene lo-ngimine'. Ne'mine ogavo evene' muki' ingine vo'ine goloso vavo ti' li lani': Ne'mine mana'mine suno nesi ido' gamazi nesi zaukoti' do ave. 55 Aza ha kamuda ma'mi gipele neive. Izeleho nene Malia' ve li-daa' nani' vene' ne neive. Olo. Nakunolomote nene Zakobole Zosehele Simonile ido' Zudale nene nizave. 56 Ido' alunolo zuho nesi maka' lelikisi mene none. Aza ha a'ne'mine ve neine' nenako nemu' nene mono' laa' ido' ato' suno do soto' oga' neine' monovo nene zalati' do ave. Do ani' aka nene ma ningamuniko. 57 Ne'mine li Izesu'nimu' nene mulu'ningu' goloso gilani'za aza ti' lo lo-ngimine': O'moso'mi veleti' gamazi li soto' iga' ave polohete engikumu' nene evene' muki' gilavo dizisa minaa' naha engi' zuho gihile lamine' netesi ido' misubo'ningu' aleve netesi nene engikumu' gilavo dizesa'mine' ne'minosa nazasi nouve lo line'. 58 Ido' Izesu' numu've ebe'veloti' aleve ingine ezemu' gili ele'vole' isa'mani' nenako nemu' nene engita O'moso'mi amuzo do soto' ogo ato ato' suno nene muki' do soto' osa'mine'.

Copyright information for `ASO